3. து³ட்ட²ட்ட²கஸுத்தனித்³தே³ஸோ

அத² து³ட்ட²ட்ட²கஸுத்தனித்³தே³ஸம் வக்க²தி –

15. வத³ந்தி வே து³ட்ட²மனாபி ஏகே,அதோ²பி [அஞ்ஞேபி தே (ஸீ.), அஞ்ஞேபி (ஸ்யா.)] வே ஸச்சமனா வத³ந்தி;

வாத³ஞ்ச ஜாதம் முனி நோ உபேதி, தஸ்மா முனீ நத்தி² கி²லோ குஹிஞ்சி.

வத³ந்தி வே து³ட்ட²மனாபி ஏகேதி தே தித்தி²யா து³ட்ட²மனா விருத்³த⁴மனா படிவிருத்³த⁴மனா ஆஹதமனா பச்சாஹதமனா ஆகா⁴திதமனா பச்சாகா⁴திதமனா வத³ந்தி உபவத³ந்தி ப⁴க³வந்தஞ்ச பி⁴க்கு²ஸங்க⁴ஞ்ச அபூ⁴தேனாதி – வத³ந்தி வே து³ட்ட²மனாபி ஏகே.

அதோ²பி வே ஸச்சமனா வத³ந்தீதி யே தேஸம் தித்தி²யானம் ஸத்³த³ஹந்தா ஓகப்பேந்தா அதி⁴முச்சந்தா ஸச்சமனா ஸச்சஸஞ்ஞினோ பூ⁴தமனா பூ⁴தஸஞ்ஞினோ தத²மனா தத²ஸஞ்ஞினோ யாதா²வமனா யாதா²வஸஞ்ஞினோ அவிபரீதமனா அவிபரீதஸஞ்ஞினோ வத³ந்தி உபவத³ந்தி ப⁴க³வந்தஞ்ச பி⁴க்கு²ஸங்க⁴ஞ்ச அபூ⁴தேனாதி – அதோ²பி வே ஸச்சமனா வத³ந்தி.

வாத³ஞ்ச ஜாதம் முனி நோ உபேதீதி. ஸோ வாதோ³ ஜாதோ ஹோதி ஸஞ்ஜாதோ நிப்³ப³த்தோ அபி⁴னிப்³ப³த்தோ பாதுபூ⁴தோ பரதோகோ⁴ஸோ அக்கோஸோ உபவாதோ³ ப⁴க³வதோ ச பி⁴க்கு²ஸங்க⁴ஸ்ஸ ச அபூ⁴தேனாதி – வாத³ஞ்ச ஜாதம். முனி நோ உபேதீதி. முனீதி. மோனம் வுச்சதி ஞாணம். யா பஞ்ஞா பஜானனா அமோஹோ த⁴ம்மவிசயோ ஸம்மாதி³ட்டி², தேன ஞாணேன ஸமன்னாக³தோ முனி மோனப்பத்தோ…பே… ஸங்க³ஜாலமதிச்ச ஸோ முனி. யோ வாத³ம் உபேதி ஸோ த்³வீஹி காரணேஹி வாத³ம் உபேதி – காரகோ காரகதாய வாத³ம் உபேதி, அத² வா வுச்சமானோ உபவதி³யமானோ குப்பதி ப்³யாபஜ்ஜதி பதிட்டி²யதி கோபஞ்ச தோ³ஸஞ்ச அப்பச்சயஞ்ச பாதுகரோதி. அகாரகோம்ஹீதி யோ வாத³ம் உபேதி ஸோ இமேஹி த்³வீஹி காரணேஹி வாத³ம் உபேதி. முனி த்³வீஹி காரணேஹி வாத³ம் ந உபேதி – அகாரகோ முனி அகாரகதாய வாத³ம் ந உபேதி, அத² வா வுச்சமானோ உபவதி³யமானோ ந குப்பதி ந ப்³யாபஜ்ஜதி ந பதிட்டி²யதி ந கோபஞ்ச தோ³ஸஞ்ச அப்பச்சயஞ்ச பாதுகரோதி. அகாரகோம்ஹீதி முனி இமேஹி த்³வீஹி காரணேஹி வாத³ம் ந உபேதி ந உபக³ச்ச²தி ந க³ண்ஹாதி ந பராமஸதி ந அபி⁴னிவிஸதீதி – வாத³ஞ்ச ஜாதம் முனி நோ உபேதி.

தஸ்மா முனீ நத்தி² கி²லோ குஹிஞ்சீதி. தஸ்மாதி தஸ்மா தம்காரணா தம்ஹேது தப்பச்சயா தம்னிதா³னம் முனினோ ஆஹதசித்ததா கி²லஜாததாபி நத்தி². பஞ்சபி சேதோகி²லா நத்தி², தயோபி கி²லா நத்தி². ராக³கி²லோ தோ³ஸகி²லோ மோஹகி²லோ நத்தி² ந ஸந்தி ந ஸம்விஜ்ஜதி நுபலப்³ப⁴தி, பஹீனோ ஸமுச்சி²ன்னோ வூபஸந்தோ படிபஸ்ஸத்³தோ⁴ அப⁴ப்³பு³ப்பத்திகோ ஞாணக்³கி³னா த³ட்³டோ⁴. குஹிஞ்சீதி குஹிஞ்சி கிம்ஹிசி கத்த²சி அஜ்ஜ²த்தம் வா ப³ஹித்³தா⁴ வா அஜ்ஜ²த்தப³ஹித்³தா⁴ வாதி – தஸ்மா முனீ நத்தி² கி²லோ குஹிஞ்சீதி.

தேனாஹ ப⁴க³வா –

‘‘வத³ந்தி வே து³ட்ட²மனாபி ஏகே, அதோ²பி வே ஸச்சமனா வத³ந்தி;

வாத³ஞ்ச ஜாதம் முனி நோ உபேதி, தஸ்மா முனீ நத்தி² கி²லோ குஹிஞ்சீ’’தி.

16. ஸகஞ்ஹி தி³ட்டி²ம் கத²மச்சயேய்ய, ச²ந்தா³னுனீதோ ருசியா நிவிட்டோ²;

ஸயம் ஸமத்தானி பகுப்³ப³மானோ, யதா² ஹி ஜானேய்ய ததா² வதே³ய்ய.

ஸகஞ்ஹி தி³ட்டி²ம் கத²மச்சயேய்யாதி. யம் தே தித்தி²யா ஸுந்த³ரிபரிப்³பா³ஜிகம் ஹந்த்வா ஸமணானம் ஸக்யபுத்தியானம் அவண்ணம் பகாஸயித்வா ‘‘ஏவம் ஏதம் லாப⁴ம் யஸஸக்காரம் ஸம்மானம் பச்சாஹரிஸ்ஸாமா’’தி தே ஏவம்தி³ட்டி²கா ஏவம்க²ந்திகா ஏவம்ருசிகா ஏவம்லத்³தி⁴கா ஏவம்அஜ்ஜா²ஸயா ஏவம்அதி⁴ப்பாயா, தே நாஸக்கி²ம்ஸு ஸகம் தி³ட்டி²ம் ஸகம் க²ந்திம் ஸகம் ருசிம் ஸகம் லத்³தி⁴ம் ஸகம் அஜ்ஜா²ஸயம் ஸகம் அதி⁴ப்பாயம் அதிக்கமிதும்; அத² கோ² ஸ்வேவ அயஸோ தே பச்சாக³தோதி, ஏவம்பி – ஸகஞ்ஹி தி³ட்டி²ம் கத²மச்சயேய்ய. அத² வா ‘‘ஸஸ்ஸதோ லோகோ, இத³மேவ ஸச்சம் மோக⁴மஞ்ஞ’’ந்தி யோ ஸோ ஏவம்வாதோ³, ஸோ ஸகம் தி³ட்டி²ம் ஸகம் க²ந்திம் ஸகம் ருசிம் ஸகம் லத்³தி⁴ம் ஸகம் அஜ்ஜா²ஸயம் ஸகம் அதி⁴ப்பாயம் கத²ம் அச்சயேய்ய அதிக்கமேய்ய ஸமதிக்கமேய்ய வீதிவத்தேய்ய? தம் கிஸ்ஸ ஹேது? தஸ்ஸ ஸா தி³ட்டி² ததா² ஸமத்தா ஸமாதி³ன்னா க³ஹிதா பராமட்டா² அபி⁴னிவிட்டா² அஜ்ஜோ²ஸிதா அதி⁴முத்தாதி. ஏவம்பி – ஸகஞ்ஹி தி³ட்டி²ம் கத²மச்சயேய்ய? ‘‘அஸஸ்ஸதோ லோகோ…பே… அந்தவா லோகோ… அனந்தவா லோகோ… தம் ஜீவம் தம் ஸரீரம்… அஞ்ஞம் ஜீவம் அஞ்ஞம் ஸரீரம்… ஹோதி ததா²க³தோ பரம் மரணா… ந ஹோதி ததா²க³தோ பரம் மரணா… ஹோதி ச ந ச ஹோதி ததா²க³தோ பரம் மரணா… நேவ ஹோதி ந ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’’ந்தி யோ ஸோ ஏவம் வாதோ³, ஸோ ஸகம் தி³ட்டி²ம் ஸகம் க²ந்திம் ஸகம் ருசிம் ஸகம் லத்³தி⁴ம் ஸகம் அஜ்ஜா²ஸயம் ஸகம் அதி⁴ப்பாயம் கத²ம் அச்சயேய்ய அதிக்கமேய்ய ஸமதிக்கமேய்ய வீதிவத்தேய்ய? தம் கிஸ்ஸ ஹேது? தஸ்ஸ ஸா தி³ட்டி² ததா² ஸமத்தா ஸமாதி³ன்னா க³ஹிதா பராமட்டா² அபி⁴னிவிட்டா² அஜ்ஜோ²ஸிதா அதி⁴முத்தாதி. ஏவம்பி – ஸகஞ்ஹி தி³ட்டி²ம் கத²மச்சயேய்ய.

ச²ந்தா³னுனீதோ ருசியா நிவிட்டோ²தி. ச²ந்தா³னுனீதோதி ஸகாய தி³ட்டி²யா ஸகாய க²ந்தியா ஸகாய ருசியா ஸகாய லத்³தி⁴யா யாயதி நிய்யதி வுய்ஹதி ஸம்ஹரீயதி. யதா² ஹத்தி²யானேன வா அஸ்ஸயானேன வா ரத²யானேன வா கோ³யானேன வா அஜயானேன வா மேண்ட³யானேன வா ஓட்ட²யானேன வா க²ரயானேன வா யாயதி நிய்யதி வுய்ஹதி ஸம்ஹரீயதி, ஏவமேவ ஸகாய தி³ட்டி²யா ஸகாய க²ந்தியா ஸகாய ருசியா ஸகாய லத்³தி⁴யா யாயதி நிய்யதி வுய்ஹதி ஸம்ஹரீயதீதி – ச²ந்தா³னுனீதோ. ருசியா நிவிட்டோ²தி ஸகாய தி³ட்டி²யா ஸகாய ருசியா ஸகாய லத்³தி⁴யா நிவிட்டோ² பதிட்டி²தோ அல்லீனோ உபக³தோ அஜ்ஜோ²ஸிதோ அதி⁴முத்தோதி – ச²ந்தா³னுனீதோ ருசியா நிவிட்டோ².

ஸயம் ஸமத்தானி பகுப்³ப³மானோதி. ஸயம் ஸமத்தம் கரோதி பரிபுண்ணம் கரோதி அனோமம் கரோதி அக்³க³ம் ஸேட்ட²ம் விஸிட்ட²ம் பாமோக்க²ம் உத்தமம் பவரம் கரோதி. ‘‘அயம் ஸத்தா² ஸப்³ப³ஞ்ஞூ’’தி ஸயம் ஸமத்தம் கரோதி பரிபுண்ணம் கரோதி அனோமம் கரோதி அக்³க³ம் ஸேட்ட²ம் விஸிட்ட²ம் பாமோக்க²ம் உத்தமம் பவரம் கரோதி. ‘‘அயம் த⁴ம்மோ ஸ்வாக்கா²தோ…பே… அயம் க³ணோ ஸுப்படிபன்னோ… அயம் தி³ட்டி² ப⁴த்³தி³கா… அயம் படிபதா³ ஸுபஞ்ஞத்தா… அயம் மக்³கோ³ நிய்யானிகோ’’தி ஸயம் ஸமத்தம் கரோதி பரிபுண்ணம் கரோதி அனோமம் கரோதி அக்³க³ம் ஸேட்ட²ம் விஸிட்ட²ம் பாமோக்க²ம் உத்தமம் பவரம் கரோதி ஜனேதி ஸஞ்ஜனேதி நிப்³ப³த்தேதி அபி⁴னிப்³ப³த்தேதீதி – ஸயம் ஸமத்தானி பகுப்³ப³மானோ.

யதா² ஹி ஜானேய்ய ததா² வதே³ய்யாதி யதா² ஜானேய்ய, ததா² வதே³ய்ய கதே²ய்ய ப⁴ணேய்ய தீ³பயேய்ய வோஹரேய்ய. ‘‘ஸஸ்ஸதோ லோகோ, இத³மேவ ஸச்சம் மோக⁴மஞ்ஞ’’ந்தி யதா² ஜானேய்ய, ததா² வதே³ய்ய கதே²ய்ய ப⁴ணேய்ய தீ³பயேய்ய வோஹரேய்ய. ‘‘அஸஸ்ஸதோ லோகோ…பே… நேவ ஹோதி ந ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’’ந்தி யதா² ஜானேய்ய, ததா² வதே³ய்ய கதே²ய்ய ப⁴ணேய்ய தீ³பயேய்ய வோஹரேய்யாதி – யதா² ஹி ஜானேய்ய ததா² வதே³ய்ய.

தேனாஹ ப⁴க³வா –

‘‘ஸகஞ்ஹி தி³ட்டி²ம் கத²மச்சயேய்ய, ச²ந்தா³னுனீதோ ருசியா நிவிட்டோ²;

ஸயம் ஸமத்தானி பகுப்³ப³மானோ, யதா² ஹி ஜானேய்ய ததா² வதே³ய்யா’’தி.

17. யோ அத்தனோ ஸீலவதானி ஜந்து, அனானுபுட்டோ²வ [அனானுபுட்டோ² ச (ஸ்யா.)] பரேஸ பாவ பாவா (ஸீ. ஸ்யா.) ;

அனரியத⁴ம்மம் குஸலா தமாஹு, யோ ஆதுமானம் ஸயமேவ பாவ [பாவா (ஸீ. ஸ்யா.)] .

யோ அத்தனோ ஸீலவதானி ஜந்தூதி. யோதி யோ யாதி³ஸோ யதா²யுத்தோ யதா²விஹிதோ யதா²பகாரோ யம்டா²னப்பத்தோ யம்த⁴ம்மஸமன்னாக³தோ க²த்தியோ வா ப்³ராஹ்மணோ வா வேஸ்ஸோ வா ஸுத்³தோ³ வா க³ஹட்டோ² வா பப்³ப³ஜிதோ வா தே³வோ வா மனுஸ்ஸோ வா. ஸீலவதானீதி அத்தி² ஸீலஞ்சேவ வதஞ்ச [வத்தஞ்ச (ஸ்யா.), ஏவமுபரிபி], அத்தி² வதம் ந ஸீலம். கதமம் ஸீலஞ்சேவ வதஞ்ச? இத⁴ பி⁴க்கு² ஸீலவா ஹோதி, பாதிமோக்க²ஸம்வரஸம்வுதோ விஹரதி ஆசாரகோ³சரஸம்பன்னோ அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு. யோ தத்த² ஸம்யமோ ஸம்வரோ அவீதிக்கமோ, இத³ம் ஸீலம். யம் ஸமாதா³னம் தம் வதம். ஸம்வரட்டே²ன ஸீலம்; ஸமாதா³னட்டே²ன வதம் – இத³ம் வுச்சதி ஸீலஞ்சேவ வதஞ்ச. கதமம் வதம், ந ஸீலம்? அட்ட² து⁴தங்கா³னி – ஆரஞ்ஞிகங்க³ம், பிண்ட³பாதிகங்க³ம், பம்ஸுகூலிகங்க³ம், தேசீவரிகங்க³ம், ஸபதா³னசாரிகங்க³ம், க²லுபச்சா²ப⁴த்திகங்க³ம், நேஸஜ்ஜிகங்க³ம், யதா²ஸந்த²திகங்க³ம் – இத³ம் வுச்சதி வதம், ந ஸீலம். வீரியஸமாதா³னம்பி வுச்சதி வதம், ந ஸீலம். ‘‘காமம் தசோ ச ந்ஹாரு [நஹாரு (ஸீ. ஸ்யா.)] ச அட்டி² ச அவஸிஸ்ஸது [அவஸுஸ்ஸது (ஸ்யா.)], ஸரீரே உபஸ்ஸுஸ்ஸது மம்ஸலோஹிதம். யம் தம் புரிஸதா²மேன புரிஸப³லேன புரிஸவீரியேன புரிஸபரக்கமேன பத்தப்³ப³ம், ந தம் அபாபுணித்வா வீரியஸ்ஸ ஸண்டா²னம் ப⁴விஸ்ஸதீ’’தி – சித்தம் பக்³க³ண்ஹாதி பத³ஹதி. ஏவரூபம் வீரியஸமாதா³னம் – இத³ம் வுச்சதி வதம், ந ஸீலம்.

‘‘நாஸிஸ்ஸம் ந பிவிஸ்ஸாமி, விஹாரதோ ந நிக்க²மே;

நபி பஸ்ஸம் நிபாதேஸ்ஸம், தண்ஹாஸல்லே அனூஹதே’’தி.

சித்தம் பக்³க³ண்ஹாதி பத³ஹதி. ஏவரூபம்பி வீரியஸமாதா³னம் வுச்சதி வதம், ந ஸீலம். ‘‘ந தாவாஹம் இமம் பல்லங்கம் பி⁴ந்தி³ஸ்ஸாமி யாவ மே ந அனுபாதா³ய ஆஸவேஹி சித்தம் விமுச்சிஸ்ஸதீ’’தி – சித்தம் பக்³க³ண்ஹாதி பத³ஹதி. ஏவரூபம்பி வீரியஸமாதா³னம் வுச்சதி வதம், ந ஸீலம். ‘‘ந தாவாஹம் இமம்ஹா ஆஸனா வுட்ட²ஹிஸ்ஸாமி, சங்கமா ஓரோஹிஸ்ஸாமி, விஹாரா நிக்க²மிஸ்ஸாமி, அட்³ட⁴யோகா³ நிக்க²மிஸ்ஸாமி, பாஸாதா³ நிக்க²மிஸ்ஸாமி, ஹம்மியா நிக்க²மிஸ்ஸாமி, கு³ஹாய நிக்க²மிஸ்ஸாமி, லேணா நிக்க²மிஸ்ஸாமி, குடியா நிக்க²மிஸ்ஸாமி, கூடாகா³ரா நிக்க²மிஸ்ஸாமி, அட்டா நிக்க²மிஸ்ஸாமி, மாளா நிக்க²மிஸ்ஸாமி, உத்³த³ண்டா³ [உட்டண்டா³ (க.)] நிக்க²மிஸ்ஸாமி உபட்டா²னஸாலாய நிக்க²மிஸ்ஸாமி மண்ட³பா நிக்க²மிஸ்ஸாமி, ருக்க²மூலா நிக்க²மிஸ்ஸாமி யாவ மே ந அனுபாதா³ய ஆஸவேஹி சித்தம் விமுச்சிஸ்ஸதீ’’தி – சித்தம் பக்³க³ண்ஹாதி பத³ஹதி. ஏவரூபம்பி வீரியஸமாதா³னம் வுச்சதி வதம், ந ஸீலம். ‘‘இமஸ்மிஞ்ஞேவ புப்³ப³ண்ஹஸமயம் அரியத⁴ம்மம் ஆஹரிஸ்ஸாமி ஸமாஹரிஸ்ஸாமி அதி⁴க³ச்சி²ஸ்ஸாமி ப²ஸ்ஸயிஸ்ஸாமி ஸச்சி²கரிஸ்ஸாமீ’’தி – சித்தம் பக்³க³ண்ஹாதி பத³ஹதி. ஏவரூபம்பி வீரியஸமாதா³னம் வுச்சதி வதம், ந ஸீலம். ‘‘இமஸ்மிஞ்ஞேவ மஜ்ஜ²ன்ஹிகஸமயம், ஸாயன்ஹஸமயம், புரேப⁴த்தம், பச்சா²ப⁴த்தம், புரிமம் யாமம், மஜ்ஜி²மம் யாமம், பச்சி²மம் யாமம், காளே, ஜுண்ஹே, வஸ்ஸே, ஹேமந்தே, கி³ம்ஹே, புரிமே வயோக²ந்தே⁴, மஜ்ஜி²மே வயோக²ந்தே⁴, பச்சி²மே வயோக²ந்தே⁴ அரியத⁴ம்மம் ஆஹரிஸ்ஸாமி ஸமாஹரிஸ்ஸாமி அதி⁴க³ச்சி²ஸ்ஸாமி ப²ஸ்ஸயிஸ்ஸாமி ஸச்சி²கரிஸ்ஸாமீ’’தி – சித்தம் பக்³க³ண்ஹாதி பத³ஹதி. ஏவரூபம்பி வீரியஸமாதா³னம் வுச்சதி வதம், ந ஸீலம். ஜந்தூதி ஸத்தோ நரோ மானவோ [மாணவோ (க.)] போஸோ புக்³க³லோ ஜீவோ ஜாகு³ ஜந்து இந்த³கு³ மனுஜோதி – யோ அத்தனோ ஸீலவதானி ஜந்து.

அனானுபுட்டோ²வ பரேஸ பாவாதி. பரேஸந்தி பரேஸம் க²த்தியானம் ப்³ராஹ்மணானம் வேஸ்ஸானம் ஸுத்³தா³னம் க³ஹட்டா²னம் பப்³ப³ஜிதானம் தே³வானம் மனுஸ்ஸானம். அனானுபுட்டோ²தி அபுட்டோ² அபுச்சி²தோ அயாசிதோ அனஜ்ஜே²ஸிதோ அபஸாதி³தோ. பாவாதி அத்தனோ ஸீலம் வா வதம் வா ஸீலப்³ப³தம் வா பாவத³தி. அஹமஸ்மி ஸீலஸம்பன்னோதி வா, வதஸம்பன்னோதி வா, ஸீலப்³ப³தஸம்பன்னோதி வா ஜாதியா வா கோ³த்தேன வா கோலபுத்தியேன வா வண்ணபோக்க²ரதாய வா த⁴னேன வா அஜ்ஜே²னேன வா கம்மாயதனேன வா ஸிப்பாயதனேன வா விஜ்ஜாட்டா²னேன [விஜ்ஜட்டா²னேன (ஸ்யா.)] வா ஸுதேன வா படிபா⁴னேன [படிபா⁴ணேன (ஸீ. ஸ்யா. க.)] வா அஞ்ஞதரஞ்ஞதரேன வா வத்து²னா, உச்சா குலா பப்³ப³ஜிதோதி வா, மஹாகுலா பப்³ப³ஜிதோதி வா, மஹாபோ⁴க³குலா பப்³ப³ஜிதோதி வா, உளாரபோ⁴க³குலா பப்³ப³ஜிதோதி வா, ஞாதோ யஸஸ்ஸீ ஸக³ஹட்ட²பப்³ப³ஜிதானந்தி வா, லாபி⁴ம்ஹி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரான’’ந்தி வா, ஸுத்தந்திகோதி வா, வினயத⁴ரோதி வா, த⁴ம்மகதி²கோதி வா, ஆரஞ்ஞிகோதி வா, பிண்ட³பாதிகோதி வா, பம்ஸுகூலிகோதி வா, தேசீவரிகோதி வா, ஸபதா³னசாரிகோதி வா, க²லுபச்சா²ப⁴த்திகோதி வா, நேஸஜ்ஜிகோதி வா, யதா²ஸந்த²திகோதி வா, பட²மஸ்ஸ ஜா²னஸ்ஸ லாபீ⁴தி வா, து³தியஸ்ஸ ஜா²னஸ்ஸ லாபீ⁴தி வா, ததியஸ்ஸ ஜா²னஸ்ஸ லாபீ⁴தி வா, சதுத்த²ஸ்ஸ ஜா²னஸ்ஸ லாபீ⁴தி வா, ஆகாஸானஞ்சாயதனஸமாபத்தியா லாபீ⁴தி வா, விஞ்ஞாணஞ்சாயதனஸமாபத்தியா லாபீ⁴தி வா, ஆகிஞ்சஞ்ஞாயதனஸமாபத்தியா லாபீ⁴தி வா, நேவஸஞ்ஞானாஸஞ்ஞாயதனஸமாபத்தியா லாபீ⁴தி வா பாவத³தி கதே²தி ப⁴ணதி தீ³பயதி வோஹரதீதி – அனானுபுட்டோ²வ பரேஸம் பாவ.

அனரியத⁴ம்மம் குஸலா தமாஹூதி. குஸலாதி யே தே க²ந்த⁴குஸலா தா⁴துகுஸலா ஆயதனகுஸலா படிச்சஸமுப்பாத³குஸலா ஸதிபட்டா²னகுஸலா ஸம்மப்பதா⁴னகுஸலா இத்³தி⁴பாத³குஸலா இந்த்³ரியகுஸலா ப³லகுஸலா போ³ஜ்ஜ²ங்க³குஸலா மக்³க³குஸலா ப²லகுஸலா நிப்³பா³னகுஸலா, தே குஸலா ஏவமாஹம்ஸு – ‘‘அனரியானம் ஏஸோ த⁴ம்மோ, நேஸோ த⁴ம்மோ அரியானம்; பா³லானம் ஏஸோ த⁴ம்மோ, நேஸோ த⁴ம்மோ பண்டி³தானம்; அஸப்புரிஸானம் ஏஸோ த⁴ம்மோ, நேஸோ த⁴ம்மோ ஸப்புரிஸான’’ந்தி. ஏவமாஹம்ஸு ஏவம் கதே²ந்தி ஏவம் ப⁴ணந்தி ஏவம் தீ³பயந்தி ஏவம் வோஹரந்தீதி – அனரியத⁴ம்மம் குஸலா தமாஹு.

யோ ஆதுமானம் ஸயமேவ பாவாதி. ஆதுமா வுச்சதி அத்தா. ஸயமேவ பாவாதி ஸயமேவ அத்தானம் பாவத³தி – ‘‘அஹமஸ்மி ஸீலஸம்பன்னோதி வா, வதஸம்பன்னோதி வா, ஸீலப்³ப³தஸம்பன்னோதி வா, ஜாதியா வா கோ³த்தேன வா கோலபுத்தியேன வா வண்ணபோக்க²ரதாய வா த⁴னேன வா அஜ்ஜே²னேன வா கம்மாயதனேன வா ஸிப்பாயதனேன வா விஜ்ஜாட்டா²னேன வா ஸுதேன வா படிபா⁴னேன வா அஞ்ஞதரஞ்ஞதரேன வா வத்து²னா, உச்சா குலா பப்³ப³ஜிதோதி வா, மஹாகுலா பப்³ப³ஜிதோதி வா, மஹாபோ⁴க³குலா பப்³ப³ஜிதோதி வா, உளாரபோ⁴க³குலா பப்³ப³ஜிதோதி வா, ஞாதோ யஸஸ்ஸீ ஸக³ஹட்ட²பப்³ப³ஜிதானந்தி வா, லாபி⁴ம்ஹி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானந்தி வா, ஸுத்தந்திகோதி வா, வினயத⁴ரோதி வா, த⁴ம்மகதி²கோதி வா, ஆரஞ்ஞிகோதி வா, பிண்ட³பாதிகோதி வா, பம்ஸுகூலிகோதி வா, தேசீவரிகோதி வா, ஸபதா³னசாரிகோதி வா, க²லுபச்சா²ப⁴த்திகோதி வா, நேஸஜ்ஜிகோதி வா, யதா²ஸந்த²திகோதி வா, பட²மஸ்ஸ ஜா²னஸ்ஸ லாபீ⁴தி வா, து³தியஸ்ஸ ஜா²னஸ்ஸ லாபீ⁴தி வா, ததியஸ்ஸ ஜா²னஸ்ஸ லாபீ⁴தி வா, சதுத்த²ஸ்ஸ ஜா²னஸ்ஸ லாபீ⁴தி வா, ஆகாஸானஞ்சாயதனஸமாபத்தியா லாபீ⁴தி வா, விஞ்ஞாணஞ்சாயதனஸமாபத்தியா லாபீ⁴தி வா,

விப⁴வஞ்ச ப⁴வஞ்ச விப்பஹாய, வுஸிதவா கீ²ணபுனப்³ப⁴வோ ஸ பி⁴க்கூ²’’தி.

ஆகிஞ்சஞ்ஞாயதனஸமாபத்தியா லாபீ⁴தி வா, நேவஸஞ்ஞானாஸஞ்ஞாயதனஸமாபத்தியா லாபீ⁴தி வா’’ பாவத³தி கதே²தி ப⁴ணதி தீ³பயதி வோஹரதீதி – யோ ஆதுமானம் ஸயமேவ பாவாதி.

தேனாஹ ப⁴க³வா –

‘‘யோ அத்தனோ ஸீலவதானி ஜந்து, அனானுபுட்டோ²வ பரேஸ பாவ;

அனரியத⁴ம்மம் குஸலா தமாஹு, யோ ஆதுமானம் ஸயமேவ பாவா’’தி.

18. ஸந்தோ ச பி⁴க்கு² அபி⁴னிப்³பு³தத்தோ,இதிஹந்தி ஸீலேஸு அகத்த²மானோ;

தமரியத⁴ம்மம் குஸலா வத³ந்தி, யஸ்ஸுஸ்ஸதா³ நத்தி² குஹிஞ்சி லோகே.

ஸந்தோ ச பி⁴க்கு² அபி⁴னிப்³பு³தத்தோதி. ஸந்தோதி ராக³ஸ்ஸ ஸமிதத்தா ஸந்தோ, தோ³ஸஸ்ஸ ஸமிதத்தா ஸந்தோ, மோஹஸ்ஸ ஸமிதத்தா ஸந்தோ, கோத⁴ஸ்ஸ…பே… உபனாஹஸ்ஸ… மக்க²ஸ்ஸ… பளாஸஸ்ஸ [பலாஸஸ்ஸ (ஸீ. க.)] … இஸ்ஸாய… மச்ச²ரியஸ்ஸ… மாயாய… ஸாடே²ய்யஸ்ஸ… த²ம்ப⁴ஸ்ஸ… ஸாரம்ப⁴ஸ்ஸ… மானஸ்ஸ… அதிமானஸ்ஸ… மத³ஸ்ஸ… பமாத³ஸ்ஸ… ஸப்³ப³கிலேஸானம்… ஸப்³ப³து³ச்சரிதானம்… ஸப்³ப³த³ரதா²னம்… ஸப்³ப³பரிளாஹானம்… ஸப்³ப³ஸந்தாபானம்… ஸப்³பா³குஸலாபி⁴ஸங்கா²ரானம் ஸந்தத்தா ஸமிதத்தா வூபஸமிதத்தா விஜ்ஜா²தத்தா நிப்³பு³தத்தா விக³தத்தா படிபஸ்ஸத்³த⁴த்தா ஸந்தோ உபஸந்தோ வூபஸந்தோ நிப்³பு³தோ படிபஸ்ஸத்³தோ⁴தி – ஸந்தோ. பி⁴க்கூ²தி ஸத்தன்னம் த⁴ம்மானம் பி⁴ன்னத்தா பி⁴க்கு² – ஸக்காயதி³ட்டி² பி⁴ன்னா ஹோதி, விசிகிச்சா² பி⁴ன்னா ஹோதி, ஸீலப்³ப³தபராமாஸோ பி⁴ன்னோ ஹோதி, ராகோ³ பி⁴ன்னோ ஹோதி, தோ³ஸோ பி⁴ன்னோ ஹோதி, மோஹோ பி⁴ன்னோ ஹோதி, மானோ பி⁴ன்னோ ஹோதி. பி⁴ன்னாஸ்ஸ ஹோந்தி பாபகா அகுஸலா த⁴ம்மா ஸம்கிலேஸிகா போனோப⁴விகா [போனோப்³ப⁴விகா (ஸ்யா. க.)] ஸத³ரா து³க்க²விபாகா ஆயதிம் ஜாதிஜராமரணியா.

‘‘பஜ்ஜேன கதேன அத்தனா, [ஸபி⁴யாதி ப⁴க³வா]

பரினிப்³பா³னக³தோ விதிண்ணகங்கோ²;

விப⁴வஞ்ச [விப⁴வம் (ஸீ. க.) ஸு. நி. 519] ப⁴வஞ்ச விப்பஹாய,

வுஸிதவா கீ²ணபுனப்³ப⁴வோ ஸ பி⁴க்கூ²’’தி.

ஸந்தோ ச பி⁴க்கு² அபி⁴னிப்³பு³தத்தோதி ராக³ஸ்ஸ நிப்³பா³பிதத்தா அபி⁴னிப்³பு³தத்தோ, தோ³ஸஸ்ஸ நிப்³பா³பிதத்தா அபி⁴னிப்³பு³தத்தோ, மோஹஸ்ஸ நிப்³பா³பிதத்தா அபி⁴னிப்³பு³தத்தோ, கோத⁴ஸ்ஸ…பே… உபனாஹஸ்ஸ… மக்க²ஸ்ஸ… பளாஸஸ்ஸ… இஸ்ஸாய… மச்ச²ரியஸ்ஸ… மாயாய… ஸாடே²ய்யஸ்ஸ… த²ம்ப⁴ஸ்ஸ… ஸாரம்ப⁴ஸ்ஸ… மானஸ்ஸ… அதிமானஸ்ஸ… மத³ஸ்ஸ… பமாத³ஸ்ஸ… ஸப்³ப³கிலேஸானம்… ஸப்³ப³து³ச்சரிதானம்… ஸப்³ப³த³ரதா²னம்… ஸப்³ப³பரிளாஹானம்… ஸப்³ப³ஸந்தாபானம்… ஸப்³பா³குஸலாபி⁴ஸங்கா²ரானம் நிப்³பா³பிதத்தா அபி⁴னிப்³பு³தத்தோதி – ஸந்தோ ச பி⁴க்கு² அபி⁴னிப்³பு³தத்தோ.

இதிஹந்தி ஸீலேஸு அகத்த²மானோதி. இதிஹந்தி பத³ஸந்தி⁴ பத³ஸம்ஸக்³கோ³ பத³பாரிபூரீ அக்க²ரஸமவாயோ ப்³யஞ்ஜனஸிலிட்ட²தா பதா³னுபுப்³ப³தாபேதம் [பதா³னுபுப்³ப³தா மேதம் (ஸ்யா. க.)] – இதிஹந்தி. ஸீலேஸு அகத்த²மானோதி. இதே⁴கச்சோ கத்தீ² ஹோதி விகத்தீ². ஸோ கத்த²தி விகத்த²தி. அஹமஸ்மி ஸீலஸம்பன்னோதி வா, வதஸம்பன்னோதி வா, ஸீலப்³ப³தஸம்பன்னோதி வா, ஜாதியா வா கோ³த்தேன வா கோலபுத்தியேன வா வண்ணபோக்க²ரதாய வா…பே… நேவஸஞ்ஞானாஸஞ்ஞாயதனஸமாபத்தியா லாபீ⁴தி வா கத்த²தி விகத்த²தி. ஏவம் ந கத்த²தி ந விகத்த²தி. கத்த²னா ஆரதோ விரதோ படிவிரதோ நிக்க²ந்தோ நிஸ்ஸடோ விப்பமுத்தோ விஸஞ்ஞுத்தோ விமரியாதி³கதேன சேதஸா விஹரதீதி – இதிஹந்தி ஸீலேஸு அகத்த²மானோ.

தமரியத⁴ம்மம் குஸலா வத³ந்தீதி. குஸலாதி யே தே க²ந்த⁴குஸலா தா⁴துகுஸலா ஆயதனகுஸலா படிச்சஸமுப்பாத³குஸலா ஸதிபட்டா²னகுஸலா ஸம்மப்பதா⁴னகுஸலா இத்³தி⁴பாத³குஸலா இந்த்³ரியகுஸலா ப³லகுஸலா போ³ஜ்ஜ²ங்க³குஸலா மக்³க³குஸலா ப²லகுஸலா நிப்³பா³னகுஸலா, தே குஸலா ஏவம் வத³ந்தி – ‘‘அரியானம் ஏஸோ த⁴ம்மோ, நேஸோ த⁴ம்மோ அனரியானம்; பண்டி³தானம் ஏஸோ த⁴ம்மோ, நேஸோ த⁴ம்மோ பா³லானம்; ஸப்புரிஸானம் ஏஸோ த⁴ம்மோ, நேஸோ த⁴ம்மோ அஸப்புரிஸான’’ந்தி. ஏவம் வத³ந்தி, அரியானம் ஏவம் கதே²ந்தி ஏவம் ப⁴ணந்தி ஏவம் தீ³பயந்தி ஏவம் வோஹரந்தீதி – தமரியத⁴ம்மம் குஸலா வத³ந்தி.

யஸ்ஸுஸ்ஸதா³ நத்தி² குஹிஞ்சி லோகேதி. யஸ்ஸாதி அரஹதோ கீ²ணாஸவஸ்ஸ. உஸ்ஸதா³தி ஸத்துஸ்ஸதா³ – ராகு³ஸ்ஸதோ³, தோ³ஸுஸ்ஸதோ³, மோஹுஸ்ஸதோ³, மானுஸ்ஸதோ³, தி³ட்டு²ஸ்ஸதோ³, கிலேஸுஸ்ஸதோ³, கம்முஸ்ஸதோ³. யஸ்ஸிமே [தஸ்ஸிமே (ஸீ. ஸ்யா.)] உஸ்ஸதா³ நத்தி² ந ஸந்தி ந விஜ்ஜந்தி நுபலப்³ப⁴ந்தி, பஹீனா ஸமுச்சி²ன்னா வூபஸந்தா படிபஸ்ஸத்³தா⁴ அப⁴ப்³பு³ப்பத்திகா ஞாணக்³கி³னா த³ட்³டா⁴. குஹிஞ்சீதி குஹிஞ்சி கிம்ஹிசி கத்த²சி அஜ்ஜ²த்தம் வா ப³ஹித்³தா⁴ வா அஜ்ஜ²த்தப³ஹித்³தா⁴ வா. லோகேதி அபாயலோகே மனுஸ்ஸலோகே தே³வலோகே க²ந்த⁴லோகே தா⁴துலோகே ஆயதனலோகேதி – யஸ்ஸுஸ்ஸதா³ நத்தி² குஹிஞ்சி லோகே.

தேனாஹ ப⁴க³வா –

‘‘ஸந்தோ ச பி⁴க்கு² அபி⁴னிப்³பு³தத்தோ, இதிஹந்தி ஸீலேஸு அகத்த²மானோ;

தமரியத⁴ம்மம் குஸலா வத³ந்தி, யஸ்ஸுஸ்ஸதா³ நத்தி² குஹிஞ்சி லோகே’’தி.

19. பகப்பிதா ஸங்க²தா யஸ்ஸ த⁴ம்மா,புரக்க²தா [புரேக்க²தா (ஸீ. க.)] ஸந்தி அவீவதா³தா;

யத³த்தனி பஸ்ஸதி ஆனிஸம்ஸம், தம் நிஸ்ஸிதோ குப்பபடிச்சஸந்திம்.

பகப்பிதா ஸங்க²தா யஸ்ஸ த⁴ம்மாதி. பகப்பனாதி த்³வே பகப்பனா – தண்ஹாபகப்பனா ச தி³ட்டி²பகப்பனா ச…பே… அயம் தண்ஹாபகப்பனா…பே… அயம் தி³ட்டி²பகப்பனா. ஸங்க²தாதி ஸங்க²தா அபி⁴ஸங்க²தா ஸண்ட²பிதாதிபி – ஸங்க²தா. அத² வா அனிச்சா ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மாதிபி – ஸங்க²தா. யஸ்ஸாதி தி³ட்டி²க³திகஸ்ஸ. த⁴ம்மா வுச்சந்தி த்³வாஸட்டி² தி³ட்டி²க³தானீதி – பகப்பிதா ஸங்க²தா யஸ்ஸ த⁴ம்மா.

புரக்க²தா ஸந்தி அவீவதா³தாதி. புரக்க²தாதி த்³வே புரேக்கா²ரா – தண்ஹாபுரேக்கா²ரோ ச தி³ட்டி²புரேக்கா²ரோ ச…பே… அயம் தண்ஹாபுரேக்கா²ரோ…பே… அயம் தி³ட்டி²புரேக்கா²ரோ. தஸ்ஸ தண்ஹாபுரேக்கா²ரோ அப்பஹீனோ, தி³ட்டி²புரேக்கா²ரோ அப்படினிஸ்ஸட்டோ². தஸ்ஸ தண்ஹாபுரேக்கா²ரஸ்ஸ அப்பஹீனத்தா, தி³ட்டி²புரேக்கா²ரஸ்ஸ அப்படினிஸ்ஸட்ட²த்தா ஸோ தண்ஹம் வா தி³ட்டி²ம் வா புரதோ கத்வா சரதி தண்ஹாத⁴ஜோ தண்ஹாகேது தண்ஹாதி⁴பதேய்யோ, தி³ட்டி²த⁴ஜோ தி³ட்டி²கேது தி³ட்டா²தி⁴பதேய்யோ, தண்ஹாய வா தி³ட்டி²யா வா பரிவாரிதோ சரதீதி – புரக்க²தா. ஸந்தீதி ஸந்தி ஸம்விஜ்ஜந்தி அத்தி² உபலப்³ப⁴ந்தி. அவீவதா³தாதி அவேவதா³தா அவோதா³தா அபரிஸுத்³தா⁴ ஸம்கிலிட்டா² ஸம்கிலேஸிகாதி – புரக்க²தா ஸந்தி அவீவதா³தா.

யத³த்தனி பஸ்ஸதி ஆனிஸம்ஸந்தி. யத³த்தனீதி யம் அத்தனி. அத்தா வுச்சதி தி³ட்டி²க³தம். அத்தனோ தி³ட்டி²யா த்³வே ஆனிஸம்ஸே பஸ்ஸதி – தி³ட்ட²த⁴ம்மிகஞ்ச ஆனிஸம்ஸம், ஸம்பராயிகஞ்ச ஆனிஸம்ஸம். கதமோ தி³ட்டி²யா தி³ட்ட²த⁴ம்மிகோ ஆனிஸம்ஸோ? யம்தி³ட்டி²கோ ஸத்தா² ஹோதி, தம்தி³ட்டி²கா ஸாவகா ஹோந்தி. தம்தி³ட்டி²கம் ஸத்தா²ரம் ஸாவகா ஸக்கரோந்தி க³ரும் கரோந்தி [க³ருகரோந்தி (ஸீ. ஸ்யா.)] மானேந்தி பூஜேந்தி அபசிதிம் கரோந்தி. லப⁴தி ச ததோனிதா³னம் சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் – அயம் தி³ட்டி²யா தி³ட்ட²த⁴ம்மிகோ ஆனிஸம்ஸோ. கதமோ தி³ட்டி²யா ஸம்பராயிகோ ஆனிஸம்ஸோ? அயம் தி³ட்டி² அலம் நாக³த்தாய வா ஸுபண்ணத்தாய வா யக்க²த்தாய வா அஸுரத்தாய வா க³ந்த⁴ப்³ப³த்தாய வா மஹாராஜத்தாய வா இந்த³த்தாய வா ப்³ரஹ்மத்தாய வா தே³வத்தாய வா. அயம் தி³ட்டி² ஸுத்³தி⁴யா விஸுத்³தி⁴யா பரிஸுத்³தி⁴யா, முத்தியா விமுத்தியா பரிமுத்தியா. இமாய தி³ட்டி²யா ஸுஜ்ஜ²ந்தி விஸுஜ்ஜ²ந்தி பரிஸுஜ்ஜ²ந்தி முச்சந்தி விமுச்சந்தி பரிமுச்சந்தி. இமாய தி³ட்டி²யா ஸுஜ்ஜி²ஸ்ஸாமி விஸுஜ்ஜி²ஸ்ஸாமி பரிஸுஜ்ஜி²ஸ்ஸாமி, முச்சிஸ்ஸாமி விமுச்சிஸ்ஸாமி பரிமுச்சிஸ்ஸாமீதி ஆயதிம் ப²லபாடிகங்கீ² ஹோதி – அயம் தி³ட்டி²யா ஸம்பராயிகோ ஆனிஸம்ஸோ. அத்தனோ தி³ட்டி²யா இமே த்³வே ஆனிஸம்ஸே பஸ்ஸதி த³க்க²தி ஓலோகேதி நிஜ்ஜா²யதி உபபரிக்க²தீதி – யத³த்தனி பஸ்ஸதி ஆனிஸம்ஸம்.

தம் நிஸ்ஸிதோ குப்பபடிச்சஸந்திந்தி. திஸ்ஸோ ஸந்தியோ – அச்சந்தஸந்தி, தத³ங்க³ஸந்தி, ஸம்முதிஸந்தி. கதமா அச்சந்தஸந்தி? அச்சந்தஸந்தி வுச்சதி அமதம் நிப்³பா³னம். யோ ஸோ ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹக்க²யோ விராகோ³ நிரோதோ⁴ நிப்³பா³னம். அயம் அச்சந்தஸந்தி. கதமா தத³ங்க³ஸந்தி? பட²மம் ஜா²னம் ஸமாபன்னஸ்ஸ நீவரணா ஸந்தா ஹோந்தி; து³தியம் ஜா²னம் ஸமாபன்னஸ்ஸ விதக்கவிசாரா ஸந்தா ஹோந்தி; ததியம் ஜா²னம் ஸமாபன்னஸ்ஸ பீதி ஸந்தா ஹோதி; சதுத்த²ம் ஜா²னம் ஸமாபன்னஸ்ஸ ஸுக²து³க்கா² ஸந்தா ஹோந்தி; ஆகாஸானஞ்சாயதனம் ஸமாபன்னஸ்ஸ ரூபஸஞ்ஞா படிக⁴ஸஞ்ஞா நானத்தஸஞ்ஞா ஸந்தா ஹோதி; விஞ்ஞாணஞ்சாயதனம் ஸமாபன்னஸ்ஸ ஆகாஸானஞ்சாயதனஸஞ்ஞா ஸந்தா ஹோதி; ஆகிஞ்சஞ்ஞாயதனம் ஸமாபன்னஸ்ஸ விஞ்ஞாணஞ்சாயதனஸஞ்ஞா ஸந்தா ஹோதி; நேவஸஞ்ஞானாஸஞ்ஞாயதனம் ஸமாபன்னஸ்ஸ ஆகிஞ்சஞ்ஞாயதனஸஞ்ஞா ஸந்தா ஹோதி. அயம் தத³ங்க³ஸந்தி. கதமா ஸம்முதிஸந்தி? ஸம்முதிஸந்தியோ வுச்சந்தி த்³வாஸட்டி² தி³ட்டி²க³தானி தி³ட்டி²ஸந்தியோ. அபி ச ஸம்முதிஸந்தி இமஸ்மிம் அத்தே² அதி⁴ப்பேதா ஸந்தீதி. தம் நிஸ்ஸிதோ குப்பபடிச்சஸந்திந்தி. குப்பஸந்திம் பகுப்பஸந்திம் ஏரிதஸந்திம் ஸமேரிதஸந்திம் சலிதஸந்திம் க⁴ட்டிதஸந்திம் கப்பிதஸந்திம் பகப்பிதஸந்திம் அனிச்சம் ஸங்க²தம் படிச்சஸமுப்பன்னம் க²யத⁴ம்மம் வயத⁴ம்மம் விராக³த⁴ம்மம் நிரோத⁴த⁴ம்மம், ஸந்திம் நிஸ்ஸிதோ அஸிதோ அல்லீனோ உபக³தோ அஜ்ஜோ²ஸிதோ அதி⁴முத்தோதி – தம் நிஸ்ஸிதோ குப்பபடிச்சஸந்திம்.

தேனாஹ ப⁴க³வா –

‘‘பகப்பிதா ஸங்க²தா யஸ்ஸ த⁴ம்மா, புரக்க²தா ஸந்தி அவீவதா³தா;

யத³த்தனி பஸ்ஸதி ஆனிஸம்ஸம், தம் நிஸ்ஸிதோ குப்பபடிச்சஸந்தி’’ந்தி.

20. தி³ட்டீ²னிவேஸா ந ஹி ஸ்வாதிவத்தா, த⁴ம்மேஸு நிச்சே²ய்ய ஸமுக்³க³ஹீதம்;

தஸ்மா நரோ தேஸு நிவேஸனேஸு, நிரஸ்ஸதீ ஆதி³யதீ ச த⁴ம்மம்.

தி³ட்டீ²னிவேஸா ந ஹி ஸ்வாதிவத்தாதி. தி³ட்டீ²னிவேஸாதி ‘‘ஸஸ்ஸதோ லோகோ, இத³மேவ ஸச்சம் மோக⁴மஞ்ஞ’’ந்தி அபி⁴னிவேஸபராமாஸோ தி³ட்டி²னிவேஸனம். ‘‘அஸஸ்ஸதோ லோகோ…பே… அந்தவா லோகோ… அனந்தவா லோகோ … தம் ஜீவம் தம் ஸரீரம்… அஞ்ஞம் ஜீவம் அஞ்ஞம் ஸரீரம்… ஹோதி ததா²க³தோ பரம் மரணா… ந ஹோதி ததா²க³தோ பரம் மரணா… ஹோதி ச ந ச ஹோதி ததா²க³தோ பரம் மரணா… நேவ ஹோதி ந ந ஹோதி ததா²க³தோ பரம் மரணா, இத³மேவ ஸச்சம் மோக⁴மஞ்ஞ’’ந்தி அபி⁴னிவேஸபராமாஸோ தி³ட்டி²னிவேஸனந்தி. தி³ட்டீ²னிவேஸா ந ஹி ஸ்வாதிவத்தாதி தி³ட்டி²னிவேஸா ந ஹி ஸ்வாதிவத்தா து³ரதிவத்தா து³த்தரா து³ப்பதரா து³ஸ்ஸமதிக்கமா து³ப்³பி³னிவத்தாதி – [து³ப்³பீ³திவத்தாதி (ஸீ. ஸ்யா. க.)] தி³ட்டீ²னிவேஸா ந ஹி ஸ்வாதிவத்தா.

த⁴ம்மேஸு நிச்சே²ய்ய ஸமுக்³க³ஹீதந்தி. த⁴ம்மேஸூதி த்³வாஸட்டி² தி³ட்டி²க³தேஸு. நிச்சே²ய்யாதி நிச்சி²னித்வா வினிச்சி²னித்வா விசினித்வா பவிசினித்வா துலயித்வா தீரயித்வா விபா⁴வயித்வா விபூ⁴தம் கத்வா. ஸமுக்³க³ஹீதந்தி நிவேஸனேஸு ஓதி⁴க்³கா³ஹோ பி³லக்³கா³ஹோ வரக்³கா³ஹோ கோட்டா²ஸக்³கா³ஹோ உச்சயக்³கா³ஹோ ஸமுச்சயக்³கா³ஹோ. இத³ம் ஸச்சம் தச்ச²ம் தத²ம் பூ⁴தம் யாதா²வம் அவிபரீதம் க³ஹிதம் பராமட்ட²ம் அபி⁴னிவிட்ட²ம் அஜ்ஜோ²ஸிதம் அதி⁴முத்தந்தி – த⁴ம்மேஸு நிச்சே²ய்ய ஸமுக்³க³ஹீதம்.

தஸ்மா நரோ தேஸு நிவேஸனேஸூதி. தஸ்மாதி தஸ்மா தம்காரணா தம்ஹேது தப்பச்சயா தம்னிதா³னம். நரோதி ஸத்தோ நரோ மானவோ போஸோ புக்³க³லோ ஜீவோ ஜாகு³ ஜந்து இந்த³கு³ மனுஜோ. தேஸு நிவேஸனேஸூதி தேஸு தி³ட்டி²னிவேஸனேஸூதி – தஸ்மா நரோ தேஸு நிவேஸனேஸு.

நிரஸ்ஸதீ ஆதி³யதீ ச த⁴ம்மந்தி. நிரஸ்ஸதீதி த்³வீஹி காரணேஹி நிரஸ்ஸதி – பரவிச்சி²ந்த³னாய வா நிரஸ்ஸதி, அனபி⁴ஸம்பு⁴ணந்தோ வா நிரஸ்ஸதி. கத²ம் பரவிச்சி²ந்த³னாய நிரஸ்ஸதி? பரோ விச்சி²ந்தே³தி – ஸோ ஸத்தா² ந ஸப்³ப³ஞ்ஞூ, த⁴ம்மோ ந ஸ்வாக்கா²தோ, க³ணோ ந ஸுப்படிபன்னோ, தி³ட்டி² ந ப⁴த்³தி³கா, படிபதா³ ந ஸுபஞ்ஞத்தா, மக்³கோ³ ந நிய்யானிகோ, நத்தே²த்த² ஸுத்³தி⁴ வா விஸுத்³தி⁴ வா பரிஸுத்³தி⁴ வா முத்தி வா விமுத்தி வா பரிமுத்தி வா, நத்தே²த்த² ஸுஜ்ஜ²ந்தி வா விஸுஜ்ஜ²ந்தி வா பரிஸுஜ்ஜ²ந்தி வா முச்சந்தி வா விமுச்சந்தி வா பரிமுச்சந்தி வா, ஹீனா நிஹீனா ஓமகா லாமகா ச²துக்கா [ஜதுக்கா (ஸீ. ஸ்யா.)] பரித்தாதி – ஏவம் பரோ விச்சி²ந்தே³தி. ஏவம் விச்சி²ந்தி³யமானோ ஸத்தா²ரம் நிரஸ்ஸதி, த⁴ம்மக்கா²னம் நிரஸ்ஸதி, க³ணம் நிரஸ்ஸதி, தி³ட்டி²ம் நிரஸ்ஸதி, படிபத³ம் நிரஸ்ஸதி, மக்³க³ம் நிரஸ்ஸதி. ஏவம் பரவிச்சி²ந்த³னாய நிரஸ்ஸதி. கத²ம் அனபி⁴ஸம்பு⁴ணந்தோ நிரஸ்ஸதி? ஸீலம் அனபி⁴ஸம்பு⁴ணந்தோ ஸீலம் நிரஸ்ஸதி, வதம் அனபி⁴ஸம்பு⁴ணந்தோ வதம் நிரஸ்ஸதி, ஸீலப்³ப³தம் அனபி⁴ஸம்பு⁴ணந்தோ ஸீலப்³ப³தம் நிரஸ்ஸதி. ஏவம் அனபி⁴ஸம்பு⁴ணந்தோ நிரஸ்ஸதி. ஆதி³யதீ ச த⁴ம்மந்தி. ஸத்தா²ரம் க³ண்ஹாதி, த⁴ம்மக்கா²னம் க³ண்ஹாதி, க³ணம் க³ண்ஹாதி, தி³ட்டி²ம் க³ண்ஹாதி, படிபத³ம் க³ண்ஹாதி, மக்³க³ம் க³ண்ஹாதி பராமஸதி அபி⁴னிவிஸதீதி – நிரஸ்ஸதீ ஆதி³யதீ ச த⁴ம்மம்.

தேனாஹ ப⁴க³வா –

‘‘தி³ட்டீ²னிவேஸா ந ஹி ஸ்வாதிவத்தா, த⁴ம்மேஸு நிச்சே²ய்ய ஸமுக்³க³ஹீதம்;

தஸ்மா நரோ தேஸு நிவேஸனேஸு, நிரஸ்ஸதீ ஆதி³யதீ ச த⁴ம்ம’’ந்தி.

21. தோ⁴னஸ்ஸ ஹி நத்தி² குஹிஞ்சி லோகே,பகப்பிதா தி³ட்டி² ப⁴வாப⁴வேஸு;

மாயஞ்ச மானஞ்ச பஹாய தோ⁴னோ, ஸ கேன க³ச்சே²ய்ய அனூபயோ ஸோ.

தோ⁴னஸ்ஸ ஹி நத்தி² குஹிஞ்சி லோகே பகப்பிதா தி³ட்டி² ப⁴வாப⁴வேஸூதி. தோ⁴னோதி. தோ⁴னா வுச்சதி பஞ்ஞா – யா பஞ்ஞா பஜானனா விசயோ பவிசயோ த⁴ம்மவிசயோ ஸல்லக்க²ணா உபலக்க²ணா பச்சுபலக்க²ணா பண்டி³ச்சம் கோஸல்லம் நேபுஞ்ஞம் வேப⁴ப்³யா சிந்தா உபபரிக்கா² பூ⁴ரி மேதா⁴ பரிணாயிகா விபஸ்ஸனா ஸம்பஜஞ்ஞம் பதோதோ³ பஞ்ஞா பஞ்ஞிந்த்³ரியம் பஞ்ஞாப³லம் பஞ்ஞாஸத்த²ம் பஞ்ஞாபாஸாதோ³ பஞ்ஞாஆலோகோ பஞ்ஞாஓபா⁴ஸோ பஞ்ஞாபஜ்ஜோதோ பஞ்ஞாரதனம் அமோஹோ த⁴ம்மவிசயோ ஸம்மாதி³ட்டி². கிம்காரணா தோ⁴னா வுச்சதி பஞ்ஞா? தாய பஞ்ஞாய காயது³ச்சரிதம் து⁴தஞ்ச தோ⁴தஞ்ச ஸந்தோ⁴தஞ்ச நித்³தோ⁴தஞ்ச; வசீது³ச்சரிதம்… மனோது³ச்சரிதம் து⁴தஞ்ச தோ⁴தஞ்ச ஸந்தோ⁴தஞ்ச நித்³தோ⁴தஞ்ச; ராகோ³ து⁴தோ ச தோ⁴தோ ச ஸந்தோ⁴தோ ச நித்³தோ⁴தோ ச; தோ³ஸோ…பே… மோஹோ… கோதோ⁴… உபனாஹோ… மக்கோ²… பளாஸோ து⁴தோ ச தோ⁴தோ ச ஸந்தோ⁴தோ ச நித்³தோ⁴தோ ச; இஸ்ஸா து⁴தா ச தோ⁴தா ச ஸந்தோ⁴தா ச நித்³தோ⁴தா ச; மச்ச²ரியம் து⁴தஞ்ச தோ⁴தஞ்ச ஸந்தோ⁴தஞ்ச நித்³தோ⁴தஞ்ச; மாயா து⁴தா ச தோ⁴தா ச ஸந்தோ⁴தா ச நித்³தோ⁴தா ச; ஸாடே²ய்யம் து⁴தஞ்ச தோ⁴தஞ்ச ஸந்தோ⁴தஞ்ச நித்³தோ⁴தஞ்ச; த²ம்போ⁴ து⁴தோ ச தோ⁴தோ ச ஸந்தோ⁴தோ ச நித்³தோ⁴தோ ச; ஸாரம்போ⁴… மானோ… அதிமானோ… மதோ³… பமாதோ³ து⁴தோ ச தோ⁴தோ ச ஸந்தோ⁴தோ ச நித்³தோ⁴தோ ச; ஸப்³பே³ கிலேஸா, ஸப்³பே³ து³ச்சரிதா, ஸப்³பே³ த³ரதா², ஸப்³பே³ பரிளாஹா, ஸப்³பே³ ஸந்தாபா, ஸப்³பா³குஸலாபி⁴ஸங்கா²ரா து⁴தா ச தோ⁴தா ச ஸந்தோ⁴தா ச நித்³தோ⁴தா ச. தம்காரணா தோ⁴னா வுச்சதி பஞ்ஞா.

அத² வா ஸம்மாதி³ட்டி²யா மிச்சா²தி³ட்டி² து⁴தா ச தோ⁴தா ச ஸந்தோ⁴தா ச நித்³தோ⁴தா ச; ஸம்மாஸங்கப்பேன மிச்சா²ஸங்கப்போ து⁴தோ ச தோ⁴தோ ச ஸந்தோ⁴தோ ச நித்³தோ⁴தோ ச; ஸம்மாவாசாய மிச்சா²வாசா து⁴தா ச தோ⁴தா ச…பே… ஸம்மாகம்மந்தேன மிச்சா²கம்மந்தோ து⁴தோ ச… ஸம்மாஆஜீவேன மிச்சா²ஆஜீவோ து⁴தோ ச… ஸம்மாவாயாமேன மிச்சா²வாயாமோ து⁴தோ ச… ஸம்மாஸதியா மிச்சா²ஸதி து⁴தா ச… ஸம்மாஸமாதி⁴னா மிச்சா²ஸமாதி⁴ து⁴தோ ச தோ⁴தோ ச ஸந்தோ⁴தோ ச நித்³தோ⁴தோ ச; ஸம்மாஞாணேன மிச்சா²ஞாணம் து⁴தம் ச… ஸம்மாவிமுத்தியா மிச்சா²விமுத்தி து⁴தா ச தோ⁴தா ச ஸந்தோ⁴தா ச நித்³தோ⁴தா ச.

அத² வா அரியேன அட்ட²ங்கி³கேன மக்³கே³ன ஸப்³பே³ கிலேஸா, ஸப்³பே³ து³ச்சரிதா, ஸப்³பே³ த³ரதா², ஸப்³பே³ பரிளாஹா, ஸப்³பே³ ஸந்தாபா, ஸப்³பா³குஸலாபி⁴ஸங்கா²ரா து⁴தா ச தோ⁴தா ச ஸந்தோ⁴தா ச நித்³தோ⁴தா ச. அரஹா இமேஹி தோ⁴னேய்யேஹி த⁴ம்மேஹி உபேதோ ஸமுபேதோ உபக³தோ ஸமுபக³தோ உபபன்னோ ஸமுபபன்னோ ஸமன்னாக³தோ; தஸ்மா அரஹா தோ⁴னோ. ஸோ து⁴தராகோ³ து⁴தபாபோ து⁴தகிலேஸோ து⁴தபரிளாஹோதி – தோ⁴னோ. குஹிஞ்சீதி குஹிஞ்சி கிம்ஹிசி கத்த²சி அஜ்ஜ²த்தம் வா ப³ஹித்³தா⁴ வா அஜ்ஜ²த்தப³ஹித்³தா⁴ வா. லோகேதி அபாயலோகே…பே… ஆயதனலோகே.

பகப்பிதாதி த்³வே பகப்பனா – தண்ஹாபகப்பனா ச தி³ட்டி²பகப்பனா ச…பே… அயம் தண்ஹாபகப்பனா…பே… அயம் தி³ட்டி²பகப்பனா. ப⁴வாப⁴வேஸூதி ப⁴வாப⁴வே கம்மப⁴வே புனப்³ப⁴வே காமப⁴வே, கம்மப⁴வே காமப⁴வே புனப்³ப⁴வே ரூபப⁴வே, கம்மப⁴வே ரூபப⁴வே புனப்³ப⁴வே அரூபப⁴வே, கம்மப⁴வே அரூபப⁴வே புனப்³ப⁴வே புனப்புனப⁴வே புனப்புனக³தியா புனப்புனஉபபத்தியா புனப்புனபடிஸந்தி⁴யா புனப்புனஅத்தபா⁴வாபி⁴னிப்³ப³த்தியா. தோ⁴னஸ்ஸ ஹி நத்தி² குஹிஞ்சி லோகே பகப்பிதா தி³ட்டி² ப⁴வாப⁴வேஸூதி தோ⁴னஸ்ஸ குஹிஞ்சி லோகே ப⁴வாப⁴வேஸு ச கப்பிதா பகப்பிதா அபி⁴ஸங்க²தா ஸண்ட²பிதா தி³ட்டி² நத்தி² ந ஸந்தி ந ஸம்விஜ்ஜதி நுபலப்³ப⁴தி, பஹீனா ஸமுச்சி²ன்னா வூபஸந்தா படிபஸ்ஸத்³தா⁴ அப⁴ப்³பு³ப்பத்திகா ஞாணக்³கி³னா த³ட்³டா⁴தி – தோ⁴னஸ்ஸ ஹி நத்தி² குஹிஞ்சி லோகே பகப்பிதா தி³ட்டி² ப⁴வாப⁴வேஸு.

மாயஞ்ச மானஞ்ச பஹாய தோ⁴னோதி. மாயா வுச்சதி வஞ்சனிகா சரியா. இதே⁴கச்சோ காயேன து³ச்சரிதம் சரித்வா, வாசாய து³ச்சரிதம் சரித்வா, மனஸா து³ச்சரிதம் சரித்வா தஸ்ஸ படிச்சா²த³னஹேது பாபிகம் இச்ச²ம் பணித³ஹதி – ‘‘மா மம் ஜஞ்ஞா’’தி இச்ச²தி, ‘‘மா மம் ஜஞ்ஞா’’தி ஸங்கப்பேதி, ‘‘மா மம் ஜஞ்ஞா’’தி வாசம் பா⁴ஸதி, ‘‘மா மம் ஜஞ்ஞா’’தி காயேன பரக்கமதி. யா ஏவரூபா மாயா மாயாவிதா அச்சஸரா வஞ்சனா நிகதி நிகிரணா பரிஹரணா கூ³ஹனா பரிகூ³ஹனா சா²த³னா பரிச்சா²த³னா அனுத்தானிகம்மம் அனாவிகம்மம் வோச்சா²த³னா பாபகிரியா, அயம் வுச்சதி மாயா.

மானோதி ஏகவிதே⁴ன மானோ – யா சித்தஸ்ஸ உன்னதி [உண்ணதி (ஸ்யா. க.)]. து³விதே⁴ன மானோ – அத்துக்கம்ஸனமானோ, பரவம்ப⁴னமானோ. திவிதே⁴ன மானோ – ‘‘ஸேய்யோஹமஸ்மீ’’தி மானோ, ‘‘ஸதி³ஸோஹமஸ்மீ’’தி மானோ, ‘‘ஹீனோஹமஸ்மீ’’தி மானோ. சதுப்³பி³தே⁴ன மானோ – லாபே⁴ன மானம் ஜனேதி, யஸேன மானம் ஜனேதி, பஸம்ஸாய மானம் ஜனேதி, ஸுகே²ன மானம் ஜனேதி. பஞ்சவிதே⁴ன மானோ – ‘‘லாபி⁴ம்ஹி மனாபிகானம் ரூபான’’ந்தி மானம் ஜனேதி, ‘‘லாபி⁴ம்ஹி மனாபிகானம் ஸத்³தா³னம்…பே… க³ந்தா⁴னம்… ரஸானம்… போ²ட்ட²ப்³பா³ன’’ந்தி மானம் ஜனேதி. ச²ப்³பி³தே⁴ன மானோ – சக்கு²ஸம்பதா³ய மானம் ஜனேதி, ஸோதஸம்பதா³ய… கா⁴னஸம்பதா³ய… ஜிவ்ஹாஸம்பதா³ய… காயஸம்பதா³ய… மனோஸம்பதா³ய மானம் ஜனேதி. ஸத்தவிதே⁴ன மானோ – மானோ, அதிமானோ, மானாதிமானோ, ஓமானோ, அதி⁴மானோ, அஸ்மிமானோ, மிச்சா²மானோ. அட்ட²விதே⁴ன மானோ – லாபே⁴ன மானம் ஜனேதி, அலாபே⁴ன ஓமானம் ஜனேதி, யஸேன மானம் ஜனேதி, அயஸேன ஓமானம் ஜனேதி, பஸம்ஸாய மானம் ஜனேதி, நிந்தா³ய ஓமானம் ஜனேதி, ஸுகே²ன மானம் ஜனேதி, து³க்கே²ன ஓமானம் ஜனேதி. நவவிதே⁴ன மானோ – ஸேய்யஸ்ஸ ஸேய்யோஹமஸ்மீதி மானோ, ஸேய்யஸ்ஸ ஸதி³ஸோஹமஸ்மீதி மானோ, ஸேய்யஸ்ஸ ஹீனோஹமஸ்மீதி மானோ, ஸதி³ஸஸ்ஸ ஸேய்யோஹமஸ்மீதி மானோ, ஸதி³ஸஸ்ஸ ஸதி³ஸோஹமஸ்மீதி மானோ, ஸதி³ஸஸ்ஸ ஹீனோஹமஸ்மீதி மானோ, ஹீனஸ்ஸ ஸேய்யோஹமஸ்மீதி மானோ, ஹீனஸ்ஸ ஸதி³ஸோஹமஸ்மீதி மானோ, ஹீனஸ்ஸ ஹீனோஹமஸ்மீதி மானோ. த³ஸவிதே⁴ன மானோ – இதே⁴கச்சோ மானம் ஜனேதி ஜாதியா வா கோ³த்தேன வா கோலபுத்தியேன வா வண்ணபோக்க²ரதாய வா த⁴னேன வா அஜ்ஜே²னேன வா கம்மாயதனேன வா ஸிப்பாயதனேன வா விஜ்ஜாட்டா²னேன வா ஸுதேன வா படிபா⁴னேன வா அஞ்ஞதரஞ்ஞதரேன வா வத்து²னா. யோ ஏவரூபோ மானோ மஞ்ஞனா மஞ்ஞிதத்தம் உன்னதி உன்னாமோ [உண்ணமோ (ஸ்யா. க.)] த⁴ஜோ ஸம்பக்³கா³ஹோ கேதுகம்யதா சித்தஸ்ஸ – அயம் வுச்சதி மானோ. மாயஞ்ச மானஞ்ச பஹாய தோ⁴னோதி. தோ⁴னோ மாயஞ்ச மானஞ்ச பஹாய பஜஹித்வா வினோதே³த்வா ப்³யந்திம் கரித்வா அனபா⁴வம் க³மேத்வாதி – மாயஞ்ச மானஞ்ச பஹாய தோ⁴னோ.

ஸ கேன க³ச்சே²ய்ய அனூபயோ ஸோதி. உபயாதி த்³வே உபயா – தண்ஹூபயோ ச தி³ட்டூ²பயோ ச…பே… அயம் தண்ஹூபயோ…பே… அயம் தி³ட்டூ²பயோ. தஸ்ஸ தண்ஹூபயோ பஹீனோ, தி³ட்டூ²பயோ படினிஸ்ஸட்டோ². தண்ஹூபயஸ்ஸ பஹீனத்தா, தி³ட்டூ²பயஸ்ஸ படினிஸ்ஸட்ட²த்தா அனூபயோ புக்³க³லோ கேன ராகே³ன க³ச்சே²ய்ய, கேன தோ³ஸேன க³ச்சே²ய்ய, கேன மோஹேன க³ச்சே²ய்ய, கேன மானேன க³ச்சே²ய்ய, காய தி³ட்டி²யா க³ச்சே²ய்ய, கேன உத்³த⁴ச்சேன க³ச்சே²ய்ய, காய விசிகிச்சா²ய க³ச்சே²ய்ய, கேஹி அனுஸயேஹி க³ச்சே²ய்ய – ரத்தோதி வா து³ட்டோ²தி வா மூள்ஹோதி வா வினிப³த்³தோ⁴தி வா பராமட்டோ²தி வா விக்கே²பக³தோதி வா அனிட்ட²ங்க³தோதி வா தா²மக³தோதி வா. தே அபி⁴ஸங்கா²ரா பஹீனா. அபி⁴ஸங்கா²ரானம் பஹீனத்தா க³தியோ கேன க³ச்சே²ய்ய – நேரயிகோதி வா திரச்சா²னயோனிகோதி வா பேத்திவிஸயிகோதி வா மனுஸ்ஸோதி வா தே³வோதி வா ரூபீதி வா அரூபீதி வா ஸஞ்ஞீதி வா அஸஞ்ஞீதி வா நேவஸஞ்ஞீனாஸஞ்ஞீதி வா. ஸோ ஹேது நத்தி² பச்சயோ நத்தி² காரணம் நத்தி², யேன க³ச்சே²ய்யாதி – ஸ கேன க³ச்சே²ய்ய அனூபயோ ஸோ.

தேனாஹ ப⁴க³வா –

‘‘தோ⁴னஸ்ஸ ஹி நத்தி² குஹிஞ்சி லோகே, பகப்பிதா தி³ட்டி² ப⁴வாப⁴வேஸு;

மாயஞ்ச மானஞ்ச பஹாய தோ⁴னோ, ஸ கேன க³ச்சே²ய்ய அனூபயோ ஸோ’’தி.

22. உபயோ ஹி த⁴ம்மேஸு உபேதி வாத³ம்,அனூபயம் கேன கத²ம் வதே³ய்ய;

அத்தா நிரத்தா ந ஹி தஸ்ஸ அத்தி², அதோ⁴ஸி ஸோ தி³ட்டி²மிதே⁴வ ஸப்³ப³ம்.

உபயோ ஹி த⁴ம்மேஸு உபேதி வாத³ந்தி. உபயாதி த்³வே உபயா – தண்ஹூபயோ ச தி³ட்டூ²பயோ ச…பே… அயம் தண்ஹூபயோ…பே… அயம் தி³ட்டூ²பயோ. தஸ்ஸ தண்ஹூபயோ அப்பஹீனோ, தி³ட்டூ²பயோ அப்படினிஸ்ஸட்டோ². தண்ஹூபயஸ்ஸ அப்பஹீனத்தா, தி³ட்டூ²பயஸ்ஸ அப்படினிஸ்ஸட்ட²த்தா த⁴ம்மேஸு வாத³ம் உபேதி – ரத்தோதி வா து³ட்டோ²தி வா மூள்ஹோதி வா வினிப³த்³தோ⁴தி வா பராமட்டோ²தி வா விக்கே²பக³தோதி வா அனிட்ட²ங்க³தோதி வா தா²மக³தோதி வா. தே அபி⁴ஸங்கா²ரா அப்பஹீனா. அபி⁴ஸங்கா²ரானம் அப்பஹீனத்தா க³தியா வாத³ம் உபேதி. நேரயிகோதி வா திரச்சா²னயோனிகோதி வா பேத்திவிஸயிகோதி வா மனுஸ்ஸோதி வா தே³வோதி வா ரூபீதி வா அரூபீதி வா ஸஞ்ஞீதி வா அஸஞ்ஞீதி வா நேவஸஞ்ஞீனாஸஞ்ஞீதி வா வாத³ம் உபேதி உபக³ச்ச²தி க³ண்ஹாதி பராமஸதி அபி⁴னிவிஸதீதி – உபயோ ஹி த⁴ம்மேஸு உபேதி வாத³ம்.

அனூபயம் கேன கத²ம் வதே³ய்யாதி. உபயாதி த்³வே உபயா – தண்ஹூபயோ ச தி³ட்டூ²பயோ ச…பே… அயம் தண்ஹூபயோ…பே… அயம் தி³ட்டூ²பயோ. தஸ்ஸ தண்ஹூபயோ பஹீனோ, தி³ட்டூ²பயோ படினிஸ்ஸட்டோ². தண்ஹூபயஸ்ஸ பஹீனத்தா, தி³ட்டூ²பயஸ்ஸ படினிஸ்ஸட்ட²த்தா அனூபயம் புக்³க³லம் கேன ராகே³ன வதே³ய்ய, கேன தோ³ஸேன வதே³ய்ய, கேன மோஹேன வதே³ய்ய, கேன மானேன வதே³ய்ய, காய தி³ட்டி²யா வதே³ய்ய, கேன உத்³த⁴ச்சேன வதே³ய்ய, காய விசிகிச்சா²ய வதே³ய்ய, கேஹி அனுஸயேஹி வதே³ய்ய – ரத்தோதி வா து³ட்டோ²தி வா மூள்ஹோதி வா வினிப³த்³தோ⁴தி வா பராமட்டோ²தி வா விக்கே²பக³தோதி வா அனிட்ட²ங்க³தோதி வா தா²மக³தோதி வா. தே அபி⁴ஸங்கா²ரா பஹீனா. அபி⁴ஸங்கா²ரானம் பஹீனத்தா க³தியோ கேன வதே³ய்ய – நேரயிகோதி வா…பே… நேவஸஞ்ஞீனாஸஞ்ஞீதி வா. ஸோ ஹேது நத்தி², பச்சயோ நத்தி², காரணம் நத்தி², யேன வதே³ய்ய கதே²ய்ய ப⁴ணேய்ய தீ³பயேய்ய வோஹரேய்யாதி – அனூபயம் கேன கத²ம் வதே³ய்ய.

அத்தா நிரத்தா ந ஹி தஸ்ஸ அத்தீ²தி. அத்தாதி அத்தானுதி³ட்டி² நத்தி². நிரத்தாதி உச்சே²த³தி³ட்டி² நத்தி². அத்தாதி க³ஹிதம் நத்தி². நிரத்தாதி முஞ்சிதப்³ப³ம் நத்தி². யஸ்ஸத்தி² க³ஹிதம், தஸ்ஸத்தி² முஞ்சிதப்³ப³ம்; யஸ்ஸத்தி² முஞ்சிதப்³ப³ம், தஸ்ஸத்தி² க³ஹிதம். க³ஹணம் முஞ்சனா ஸமதிக்கந்தோ அரஹா பு³த்³தி⁴பரிஹானிவீதிவத்தோ. ஸோ வுட்ட²வாஸோ சிண்ணசரணோ க³தத்³தோ⁴ க³ததி³ஸோ ஜாதிமரணஸம்ஸாரோ, நத்தி² தஸ்ஸ புனப்³ப⁴வோதி – அத்தா நிரத்தா ந ஹி தஸ்ஸ அத்தி².

அதோ⁴ஸி ஸோ தி³ட்டி²மிதே⁴வ ஸப்³ப³ந்தி தஸ்ஸ த்³வாஸட்டி² தி³ட்டி²க³தானி பஹீனானி ஸமுச்சி²ன்னானி வூபஸந்தானி படிபஸ்ஸத்³தா⁴னி அப⁴ப்³பு³ப்பத்திகானி ஞாணக்³கி³னா த³ட்³டா⁴னி. ஸோ ஸப்³ப³தி³ட்டி²க³தம் இதே⁴வ அதோ⁴ஸி து⁴னி ஸந்து⁴னி நித்³து⁴னி பஜஹி வினோதே³ஸி ப்³யந்திம் அகாஸி அனபா⁴வம் க³மேஸீதி – அதோ⁴ஸி ஸோ தி³ட்டி²மிதே⁴வ ஸப்³ப³ம்.

தேனாஹ ப⁴க³வா –

‘‘உபயோ ஹி த⁴ம்மேஸு உபேதி வாத³ம், அனூபயம் கேன கத²ம் வதே³ய்ய;

அத்தா நிரத்தா ந ஹி தஸ்ஸ அத்தி², அதோ⁴ஸி ஸோ தி³ட்டி²மிதே⁴வ ஸப்³ப³’’ந்தி.

து³ட்ட²ட்ட²கஸுத்தனித்³தே³ஸோ ததியோ.