406. க³ந்தா⁴ரஜாதகம் (7-2-1)

76. ஹித்வா கா³மஸஹஸ்ஸானி, பரிபுண்ணானி ஸோளஸ;

கோட்டா²கா³ரானி பீ²தானி, ஸன்னிதி⁴ம் தா³னி குப்³ப³ஸி.

77. ஹித்வா க³ந்தா⁴ரவிஸயம், பஹூதத⁴னதா⁴ரியம் [தா⁴னியம் (ஸீ. பீ.), த⁴ஞ்ஞந்தி அத்தோ²];

பஸாஸனதோ [பஸாஸனிதோ (ஸீ. ஸ்யா.), பஸாஸனாதோ (பீ.)] நிக்க²ந்தோ, இத⁴ தா³னி பஸாஸஸி.

78. த⁴ம்மம் ப⁴ணாமி வேதே³ஹ, அத⁴ம்மோ மே ந ருச்சதி;

த⁴ம்மம் மே ப⁴ணமானஸ்ஸ, ந பாபமுபலிம்பதி.

79. யேன கேனசி வண்ணேன, பரோ லப⁴தி ருப்பனம்;

மஹத்தி²யம்பி சே வாசம், ந தம் பா⁴ஸேய்ய பண்டி³தோ.

80. காமம் ருப்பது வா மா வா, பு⁴ஸம்வ விகிரீயது;

த⁴ம்மம் மே ப⁴ணமானஸ்ஸ, ந பாபமுபலிம்பதி.

81. நோ சே அஸ்ஸ ஸகா பு³த்³தி⁴, வினயோ வா ஸுஸிக்கி²தோ;

வனே அந்த⁴மஹிம்ஸோவ [அந்த⁴மஹிஸோவ (ஸீ. பீ.)] சரேய்ய ப³ஹுகோ ஜனோ.

82. யஸ்மா ச பனிதே⁴கச்சே, ஆசேரம்ஹி [ஆசாரம்ஹி (ஸீ. பீ.)] ஸுஸிக்கி²தா;

தஸ்மா வினீதவினயா, சரந்தி ஸுஸமாஹிதாதி.

க³ந்தா⁴ரஜாதகம் பட²மம்.