375. கபோதஜாதகம் (5-3-5)

135. இதா³னி கோ²ம்ஹி ஸுகி²தோ அரோகோ³, நிக்கண்டகோ நிப்பதிதோ கபோதோ;

காஹாமி தா³னீ ஹத³யஸ்ஸ துட்டி²ம், ததா²ஹிமம் மம்ஸஸாகம் ப³லேதி.

136. காயம் ப³லாகா ஸிகி²னோ, சோரீ லங்கி⁴பிதாமஹா;

ஓரம் ப³லாகே ஆக³ச்ச², சண்டோ³ மே வாயஸோ ஸகா².

137. அலஞ்ஹி தே ஜக்³கி⁴தாயே, மமம் தி³ஸ்வான ஏதி³ஸம்;

விலூனம் ஸூத³புத்தேன, பிட்ட²மண்டே³ன [பிட்ட²மத்³தே³ன (ஸீ. ஸ்யா. பீ.)] மக்கி²தம்.

138. ஸுன்ஹாதோ ஸுவிலித்தோஸி, அன்னபானேன தப்பிதோ;

கண்டே² ச தே வேளுரியோ, அக³மா நு கஜங்க³லம்.

139. மா தே மித்தோ அமித்தோ வா, அக³மாஸி கஜங்க³லம்;

பிஞ்சா²னி தத்த² லாயித்வா, கண்டே² ப³ந்த⁴ந்தி வட்டனம்.

140. புனபாபஜ்ஜஸீ ஸம்ம, ஸீலஞ்ஹி தவ தாதி³ஸம்;

ந ஹி மானுஸகா போ⁴கா³, ஸுபு⁴ஞ்ஜா ஹோந்தி பக்கி²னாதி.

கபோதஜாதகம் பஞ்சமம்.

அட்³ட⁴வக்³கோ³ ததியோ.

தஸ்ஸுத்³தா³னம் –

அத² வண்ண ஸஸீல ஹிரி லப⁴தே, ஸுமுகா² விஸ ஸாளியமித்தவரோ;

அத² சக்க பலாஸ ஸராஜ ஸதோ, யவ பா³ல கபோதக பன்னரஸாதி.

அத² வக்³கு³த்³தா³னம் –

ஜீனஞ்ச வண்ணம் அஸமம்வகு³ப்பரி, ஸுதே³ஸிதா ஜாதகந்தி ஸந்தி வீஸதி [ஜாதக பஞ்சவீஸதி (?)];

மஹேஸினோ ப்³ரஹ்மசரித்தமுத்த-மவோச கா³தா² அத்த²வதீ ஸுப்³யஞ்ஜனாதி.

பஞ்சகனிபாதம் நிட்டி²தம்.