338. து²ஸஜாதகம் (4-4-8)

149. விதி³தம் து²ஸம் உந்து³ரானம் [உந்தூ³ரானம் (க.)], விதி³தம் பன தண்டு³லம்;

து²ஸம் து²ஸம் [து²ஸம் தூ²லம் (ஸீ.)] விவஜ்ஜேத்வா, தண்டு³லம் பன கா²த³ரே.

150. யா மந்தனா அரஞ்ஞஸ்மிம், யா ச கா³மே நிகண்ணிகா;

யஞ்சேதம் இதி சீதி ச, ஏதம்பி விதி³தம் மயா.

151. த⁴ம்மேன கிர ஜாதஸ்ஸ, பிதா புத்தஸ்ஸ மக்கடோ;

த³ஹரஸ்ஸேவ ஸந்தஸ்ஸ, த³ந்தேஹி ப²லமச்சி²தா³.

152. யமேதம் பரிஸப்பஸி [பரிஸப்³பே³ஸி (க.)], அஜகாணோவ ஸாஸபே;

யோபாயம் ஹேட்ட²தோ ஸேதி [ஸேஸி (ஸீ.)], ஏதம்பி விதி³தம் மயாதி.

து²ஸஜாதகம் அட்ட²மம்.