509. ஹத்தி²பாலஜாதகம் (13)

337. சிரஸ்ஸம் வத பஸ்ஸாம, ப்³ராஹ்மணம் தே³வவண்ணினம்;

மஹாஜடம் கா²ரித⁴ரம் [பா⁴ரத⁴ரம் (பீ.)], பங்கத³ந்தம் ரஜஸ்ஸிரம்.

338. சிரஸ்ஸம் வத பஸ்ஸாம, இஸிம் த⁴ம்மகு³ணே ரதம்;

காஸாயவத்த²வஸனம், வாகசீரம் படிச்ச²த³ம்.

339. ஆஸனம் உத³கம் பஜ்ஜம், படிக³ண்ஹாது நோ ப⁴வம்;

அக்³கே⁴ ப⁴வந்தம் புச்சா²ம, அக்³க⁴ம் குருது நோ ப⁴வம்.

340. அதி⁴ச்ச வேதே³ பரியேஸ வித்தம், புத்தே க³ஹே [கே³ஹே (ஸீ. ஸ்யா. பீ.)] தாத பதிட்ட²பேத்வா;

க³ந்தே⁴ ரஸே பச்சனுபு⁴ய்ய [பச்சனுபோ⁴த்வ (ஸ்யா.), பச்சனுபு⁴த்வ (பீ.)] ஸப்³ப³ம், அரஞ்ஞம் ஸாது⁴ முனி ஸோ பஸத்தோ².

341. வேதா³ ந ஸச்சா ந ச வித்தலாபோ⁴, ந புத்தலாபே⁴ன ஜரம் விஹந்தி;

க³ந்தே⁴ ரஸே முச்சன [முஞ்சன (ஸீ. க.)] மாஹு ஸந்தோ, ஸகம்முனா [ஸகம்மனா (ஸீ. பீ.)] ஹோதி ப²லூபபத்தி.

342. அத்³தா⁴ ஹி ஸச்சம் வசனம் தவேதம், ஸகம்முனா ஹோதி ப²லூபபத்தி;

ஜிண்ணா ச மாதாபிதரோ தவீமே [தவேமே (ஸீ.), தவ யிமே (ஸ்யா. பீ.)], பஸ்ஸேய்யும் தம் வஸ்ஸஸதம் அரோக³ம் [அரோக்³யம் (ஸ்யா. க.)].

343. யஸ்ஸஸ்ஸ ஸக்கீ² மரணேன ராஜ, ஜராய மேத்தீ நரவீரஸேட்ட²;

யோ சாபி ஜஞ்ஞா ந மரிஸ்ஸம் கதா³சி, பஸ்ஸேய்யும் தம் வஸ்ஸஸதம் அரோக³ம்.

344. யதா²பி நாவம் புரிஸோ த³கம்ஹி, ஏரேதி சே நம் உபனேதி தீரம்;

ஏவம்பி ப்³யாதீ⁴ ஸததம் ஜரா ச, உபனேதி மச்சம் [மச்சு (ஸ்யா. பீ.)] வஸமந்தகஸ்ஸ.

345. பங்கோ ச காமா பலிபோ ச காமா, மனோஹரா து³த்தரா மச்சுதே⁴ய்யா;

ஏதஸ்மிம் பங்கே பலிபே ப்³யஸன்னா [விஸன்னா (ஸ்யா. க.)], ஹீனத்தரூபா ந தரந்தி பாரம்.

346. அயம் புரே லுத்³த³மகாஸி கம்மம், ஸ்வாயம் க³ஹீதோ ந ஹி மோக்கி²தோ மே;

ஓருந்தி⁴யா நம் பரிரக்கி²ஸ்ஸாமி, மாயம் புன லுத்³த³மகாஸி கம்மம்.

347. க³வம்வ [கா³வம்வ (ஸீ.)] நட்ட²ம் புரிஸோ யதா² வனே, அன்வேஸதீ [பரியேஸதீ (ஸீ. பீ.)] ராஜ அபஸ்ஸமானோ;

ஏவம் நட்டோ² ஏஸுகாரீ மமத்தோ², ஸோஹம் கத²ம் ந க³வேஸேய்யம் ராஜ.

348. ஹிய்யோதி ஹிய்யதி [ஹீயோதி ஹீயதி (ஸீ.)] போஸோ, பரேதி பரிஹாயதி;

அனாக³தம் நேதமத்தீ²தி ஞத்வா, உப்பன்னச²ந்த³ம் கோ பனுதே³ய்ய தீ⁴ரோ.

349. பஸ்ஸாமி வோஹம் த³ஹரம் [த³ஹரீ (ஸ்யா. பீ. க.)] குமாரிம், மத்தூபமம் கேதகபுப்ப²னேத்தம்;

அபு⁴த்தபோ⁴கே³ [அபு⁴த்வ போ⁴கே³ (ஸ்யா. க. அட்ட².), அபு⁴த்வ போ⁴கே³ (பீ.), போ⁴கே³ அதுத்வா (க.)] பட²மே வயஸ்மிம், ஆதா³ய மச்சு வஜதே குமாரிம்.

350. யுவா ஸுஜாதோ ஸுமுகோ² ஸுத³ஸ்ஸனோ, ஸாமோ குஸும்ப⁴பரிகிண்ணமஸ்ஸு;

ஹித்வான காமே படிகச்ச [படிக³ச்ச (ஸீ.), படிக³ச்ச² (ஸ்யா. பீ.)] கே³ஹம், அனுஜான மம் பப்³ப³ஜிஸ்ஸாமி தே³வ.

351. ஸாகா²ஹி ருக்கோ² லப⁴தே ஸமஞ்ஞம், பஹீனஸாக²ம் பன கா²ணுமாஹு;

பஹீனபுத்தஸ்ஸ மமஜ்ஜ போ⁴தி, வாஸேட்டி² பி⁴க்கா²சரியாய காலோ.

352. அக⁴ஸ்மி கோஞ்சாவ யதா² ஹிமச்சயே, கதானி [தந்தானி (ஸீ. பீ.)] ஜாலானி பதா³லிய [பதா³லேய்ய (ஸீ.)] ஹம்ஸா;

க³ச்ச²ந்தி புத்தா ச பதீ ச மய்ஹம், ஸாஹம் கத²ம் நானுவஜே பஜானம்.

353. ஏதே பு⁴த்வா வமித்வா ச, பக்கமந்தி விஹங்க³மா;

யே ச பு⁴த்வான வமிம்ஸு, தே மே ஹத்த²த்த [ஹத்த²த்த² (ஸீ. ஸ்யா. பீ.)] மாக³தா.

354. அவமீ ப்³ராஹ்மணோ காமே, ஸோ [தே (ஸீ. பீ.)] த்வம் பச்சாவமிஸ்ஸஸி;

வந்தாதோ³ புரிஸோ ராஜ, ந ஸோ ஹோதி பஸம்ஸியோ.

355. பங்கே ச [பங்கேவ (ஸீ. பீ.)] போஸம் பலிபே ப்³யஸன்னம், ப³லீ யதா² து³ப்³ப³லமுத்³த⁴ரேய்ய;

ஏவம்பி மம் த்வம் உத³தாரி போ⁴தி, பஞ்சாலி கா³தா²ஹி ஸுபா⁴ஸிதாஹி.

356. இத³ம் வத்வா மஹாராஜா, ஏஸுகாரீ தி³ஸம்பதி;

ரட்ட²ம் ஹித்வான பப்³ப³ஜி, நாகோ³ சே²த்வாவ ப³ந்த⁴னம்.

357. ராஜா ச பப்³ப³ஜ்ஜமரோசயித்த², ரட்ட²ம் பஹாய நரவீரஸேட்டோ²;

துவம்பி நோ ஹோதி யதே²வ ராஜா, அம்ஹேஹி கு³த்தா அனுஸாஸ ரஜ்ஜம்.

358. ராஜா ச பப்³ப³ஜ்ஜமரோசயித்த², ரட்ட²ம் பஹாய நரவீரஸேட்டோ²;

அஹம்பி ஏகா [ஏகாவ (ஸீ.)] சரிஸ்ஸாமி லோகே, ஹித்வான காமானி மனோரமானி.

359. ராஜா ச பப்³ப³ஜ்ஜமரோசயித்த², ரட்ட²ம் பஹாய நரவீரஸேட்டோ²;

அஹம்பி ஏகா சரிஸ்ஸாமி லோகே, ஹித்வான காமானி யதோ²தி⁴கானி.

360. அச்சேந்தி காலா தரயந்தி ரத்தியோ, வயோகு³ணா அனுபுப்³ப³ம் ஜஹந்தி;

அஹம்பி ஏகா சரிஸ்ஸாமி லோகே, ஹித்வான காமானி மனோரமானி.

361. அச்சேந்தி காலா தரயந்தி ரத்தியோ, வயோகு³ணா அனுபுப்³ப³ம் ஜஹந்தி;

அஹம்பி ஏகா சரிஸ்ஸாமி லோகே, ஹித்வான காமானி யதோ²தி⁴கானி.

362. அச்சேந்தி காலா தரயந்தி ரத்தியோ, வயோகு³ணா அனுபுப்³ப³ம் ஜஹந்தி;

அஹம்பி ஏகா சரிஸ்ஸாமி லோகே, ஸீதிபூ⁴தா [ஸீதீபூ⁴தா (ஸீ.)] ஸப்³ப³மதிச்ச ஸங்க³ந்தி.

ஹத்தி²பாலஜாதகம் தேரஸமம்.