456. ஜுண்ஹஜாதகம் (2)

13. ஸுணோஹி மய்ஹம் வசனம் ஜனிந்த³, அத்தே²ன ஜுண்ஹம்ஹி இதா⁴னுபத்தோ;

ந ப்³ராஹ்மணே அத்³தி⁴கே திட்ட²மானே, க³ந்தப்³ப³ [க³ந்தப்³ய (க.)] மாஹு த்³விபதி³ந்த³ [தி³பதா³ன (ஸீ. பீ.), த்³விபதா³ன (ஸ்யா.)] ஸேட்ட².

14. ஸுணோமி திட்டா²மி வதே³ஹி ப்³ரஹ்மே, யேனாஸி [யேனாபி (ஸ்யா. க.)] அத்தே²ன இதா⁴னுபத்தோ;

கம் வா த்வமத்த²ம் மயி பத்த²யானோ, இதா⁴க³மா ப்³ரஹ்மே ததி³ங்க⁴ ப்³ரூஹி.

15. த³தா³ஹி மே கா³மவரானி பஞ்ச, தா³ஸீஸதம் ஸத்த க³வம்ஸதானி;

பரோஸஹஸ்ஸஞ்ச ஸுவண்ணனிக்கே², ப⁴ரியா ச மே ஸாதி³ஸீ த்³வே த³தா³ஹி.

16. தபோ நு தே ப்³ராஹ்மண பி⁴ம்ஸரூபோ, மந்தா நு தே ப்³ராஹ்மண சித்தரூபா;

யக்கா² நு [யக்கா² வ (ஸீ. பீ.)] தே அஸ்ஸவா ஸந்தி கேசி, அத்த²ம் வா மே அபி⁴ஜானாஸி கத்தம்.

17. ந மே தபோ அத்தி² ந சாபி மந்தா, யக்கா²பி மே அஸ்ஸவா நத்தி² கேசி;

அத்த²ம்பி தே நாபி⁴ஜானாமி கத்தம், புப்³பே³ ச கோ² [புப்³பே³வ கோ² (ஸ்யா. க.)] ஸங்க³திமத்தமாஸி.

18. பட²மம் இத³ம் த³ஸ்ஸனம் ஜானதோ மே, ந தாபி⁴ஜானாமி இதோ புரத்தா²;

அக்கா²ஹி மே புச்சி²தோ ஏதமத்த²ம், கதா³ குஹிம் வா அஹு ஸங்க³மோ நோ.

19. க³ந்தா⁴ரராஜஸ்ஸ புரம்ஹி ரம்மே, அவஸிம்ஹஸே தக்கஸீலாயம் தே³வ;

தத்த²ந்த⁴காரம்ஹி திமீஸிகாயம் [திமிஸ்ஸிகாயம் (ஸீ. அட்ட².), திமிஸ்ஸகாயம் (ஸ்யா.)], அம்ஸேன அம்ஸம் ஸமக⁴ட்டயிம்ஹ.

20. தே தத்த² ட²த்வான உபோ⁴ ஜனிந்த³, ஸாராணியம் [ஸாரணீயம் (க.)] வீதிஸாரயிம்ஹ [வீதிஸாரிம்ஹ (ஸீ. ஸ்யா. பீ.)] தத்த²;

ஸாயேவ நோ ஸங்க³திமத்தமாஸி, ததோ ந பச்சா² ந புரே அஹோஸி.

21. யதா³ கதா³சி மனுஜேஸு ப்³ரஹ்மே, ஸமாக³மோ ஸப்புரிஸேன ஹோதி;

ந பண்டி³தா ஸங்க³திஸந்த²வானி, புப்³பே³ கதம் வாபி வினாஸயந்தி.

22. பா³லாவ [பா³லா ச (ஸீ. ஸ்யா. பீ.)] கோ² ஸங்க³திஸந்த²வானி, புப்³பே³ கதம் வாபி வினாஸயந்தி;

ப³ஹும்பி பா³லேஸு கதம் வினஸ்ஸதி, ததா² ஹி பா³லா அகதஞ்ஞுரூபா.

23. தீ⁴ரா ச கோ² ஸங்க³திஸந்த²வானி, புப்³பே³ கதம் வாபி ந நாஸயந்தி;

அப்பம்பி தீ⁴ரேஸு கதம் ந நஸ்ஸதி, ததா² ஹி தீ⁴ரா ஸுகதஞ்ஞுரூபா.

24. த³தா³மி தே கா³மவரானி பஞ்ச, தா³ஸீஸதம் ஸத்த க³வம்ஸதானி;

பரோஸஹஸ்ஸஞ்ச ஸுவண்ணனிக்கே², ப⁴ரியா ச தே ஸாதி³ஸீ த்³வே த³தா³மி.

25. ஏவம் ஸதம் ஹோதி ஸமேச்ச ராஜ, நக்க²த்தராஜாரிவ தாரகானம்;

ஆபூரதீ காஸிபதீ ததா²ஹம், தயாபி மே ஸங்க³மோ அஜ்ஜ லத்³தோ⁴தி.

ஜுண்ஹஜாதகம் து³தியம்.