454. க⁴டபண்டி³தஜாதகம் (16)

165. உட்டே²ஹி கண்ஹ கிம் ஸேஸி, கோ அத்தோ² ஸுபனேன தே;

யோபி துய்ஹம் [தாயம் (பீ.)] ஸகோ பா⁴தா, ஹத³யம் சக்கு² ச [சக்கு²ம்வ (பீ.)] த³க்கி²ணம்;

தஸ்ஸ வாதா ப³லீயந்தி, க⁴டோ ஜப்பதி [ஸஸம் ஜப்பதி (?)] கேஸவ.

166. தஸ்ஸ தம் வசனம் ஸுத்வா, ரோஹிணேய்யஸ்ஸ கேஸவோ;

தரமானரூபோ வுட்டா²ஸி, பா⁴துஸோகேன அட்டிதோ.

167. கிம் நு உம்மத்தரூபோவ, கேவலம் த்³வாரகம் இமம்;

ஸஸோ ஸஸோதி லபஸி, கோ நு தே ஸஸமாஹரி.

168. ஸோவண்ணமயம் மணீமயம், லோஹமயம் அத² ரூபியாமயம்;

ஸங்க²ஸிலாபவாளமயம், காரயிஸ்ஸாமி தே ஸஸம்.

169. ஸந்தி அஞ்ஞேபி ஸஸகா, அரஞ்ஞே வனகோ³சரா;

தேபி தே ஆனயிஸ்ஸாமி, கீதி³ஸம் ஸஸமிச்ச²ஸி.

170. ந சாஹமேதே [ந சாஹமேதம் (ஸீ.), ந வாஹமேதே (ஸ்யா.), ந வாஹமேதம் (பீ.)] இச்சா²மி, யே ஸஸா பத²விஸ்ஸிதா [பட²விம்ஸிதா (ஸீ. ஸ்யா. பீ.)];

சந்த³தோ ஸஸமிச்சா²மி, தம் மே ஓஹர கேஸவ.

171. ஸோ நூன மது⁴ரம் ஞாதி, ஜீவிதம் விஜஹிஸ்ஸஸி;

அபத்தி²யம் யோ பத்த²யஸி, சந்த³தோ ஸஸமிச்ச²ஸி.

172. ஏவம் சே கண்ஹ ஜானாஸி, யத³ஞ்ஞமனுஸாஸஸி;

கஸ்மா புரே மதம் புத்தம், அஜ்ஜாபி மனுஸோசஸி.

173. யம் ந லப்³பா⁴ மனுஸ்ஸேன, அமனுஸ்ஸேன வா புன [பன (பே. வ. 215)];

ஜாதோ மே மா மரீ புத்தோ, குதோ லப்³பா⁴ அலப்³பி⁴யம்.

174. ந மந்தா மூலபே⁴ஸஜ்ஜா, ஓஸதே⁴ஹி த⁴னேன வா;

ஸக்கா ஆனயிதும் கண்ஹ, யம் பேதமனுஸோசஸி.

175. யஸ்ஸ ஏதாதி³ஸா அஸ்ஸு, அமச்சா புரிஸபண்டி³தா;

யதா² நிஜ்ஜா²பயே அஜ்ஜ, க⁴டோ புரிஸபண்டி³தோ.

176. ஆதி³த்தம் வத மம் ஸந்தம், க⁴தஸித்தம்வ பாவகம்;

வாரினா விய ஓஸிஞ்சம், ஸப்³ப³ம் நிப்³பா³பயே த³ரம்.

177. அப்³ப³ஹீ வத மே ஸல்லம், யமாஸி ஹத³யஸ்ஸிதம்;

யோ மே ஸோகபரேதஸ்ஸ, புத்தஸோகம் அபானுதி³.

178. ஸோஹம் அப்³பூ³ள்ஹஸல்லோஸ்மி, வீதஸோகோ அனாவிலோ;

ந ஸோசாமி ந ரோதா³மி, தவ ஸுத்வான மாணவ [பா⁴திக (பே. வ. 224)].

179. ஏவம் கரோந்தி ஸப்பஞ்ஞா, யே ஹோந்தி அனுகம்பகா;

நிவத்தயந்தி ஸோகம்ஹா, க⁴டோ ஜேட்ட²ம்வ பா⁴தரந்தி.

க⁴டபண்டி³தஜாதகம் ஸோளஸமம்.

த³ஸகனிபாதம் நிட்டி²தம்.