444. கண்ஹதீ³பாயனஜாதகம் (6)

62. ஸத்தாஹமேவாஹம் பஸன்னசித்தோ, புஞ்ஞத்தி²கோ ஆசரிம் [அசரிம் (ஸீ. ஸ்யா. பீ.)] ப்³ரஹ்மசரியம்;

அதா²பரம் யம் சரிதம் மமேத³ம் [மம யித³ம் (ஸ்யா.), மமாயித³ம் (பீ.)], வஸ்ஸானி பஞ்ஞாஸ ஸமாதி⁴கானி;

அகாமகோ வாபி [வாஹி (பீ. க.)] அஹம் சராமி, ஏதேன ஸச்சேன ஸுவத்தி² ஹோது;

ஹதம் விஸம் ஜீவது யஞ்ஞத³த்தோ.

63. யஸ்மா தா³னம் நாபி⁴னந்தி³ம் கதா³சி, தி³ஸ்வானஹம் அதிதி²ம் வாஸகாலே;

ந சாபி மே அப்பியதம் அவேது³ம், ப³ஹுஸ்ஸுதா ஸமணப்³ராஹ்மணா ச.

அகாமகோ வாபி அஹம் த³தா³மி, ஏதேன ஸச்சேன ஸுவத்தி² ஹோது;

ஹதம் விஸம் ஜீவது யஞ்ஞத³த்தோ.

64. ஆஸீவிஸோ தாத பஹூததேஜோ, யோ தம் அத³ம்ஸீ [அட³ம்ஸீ (ஸ்யா.)] ஸசரா [பி³லரா (ஸீ.), பிளாரா (ஸ்யா.), பதரா (பீ.)] உதி³ச்ச;

தஸ்மிஞ்ச மே அப்பியதாய அஜ்ஜ, பிதரி ச தே நத்தி² கோசி விஸேஸோ;

ஏதேன ஸச்சேன ஸுவத்தி² ஹோது, ஹதம் விஸம் ஜீவது யஞ்ஞத³த்தோ.

65. ஸந்தா த³ந்தாயேவ [த³ந்தா ஸந்தா யே ச (ஸ்யா. க.)] பரிப்³ப³ஜந்தி, அஞ்ஞத்ர கண்ஹா நத்தா²காமரூபா [அனகாமரூபா (ஸீ. ஸ்யா. பீ.)];

தீ³பாயன கிஸ்ஸ ஜிகு³ச்ச²மானோ, அகாமகோ சரஸி ப்³ரஹ்மசரியம்.

66. ஸத்³தா⁴ய நிக்க²ம்ம புனம் நிவத்தோ, ஸோ ஏளமூகோ³வ பா³லோ [ஏளமூகோ³ சபலோ (ஸ்யா. க.)] வதாயம்;

ஏதஸ்ஸ வாத³ஸ்ஸ ஜிகு³ச்ச²மானோ, அகாமகோ சராமி ப்³ரஹ்மசரியம்;

விஞ்ஞுப்பஸத்த²ஞ்ச ஸதஞ்ச டா²னம் [விஞ்ஞூபஸத்த²ம் வஸிதம் ச டா²னம் (க.)], ஏவம்பஹம் புஞ்ஞகரோ ப⁴வாமி.

67. ஸமணே துவம் ப்³ராஹ்மணே அத்³தி⁴கே ச, ஸந்தப்பயாஸி அன்னபானேன பி⁴க்க²ம்;

ஓபானபூ⁴தம்வ க⁴ரம் தவ யித³ம், அன்னேன பானேன உபேதரூபம்;

அத² கிஸ்ஸ வாத³ஸ்ஸ ஜிகு³ச்ச²மானோ, அகாமகோ தா³னமிமம் த³தா³ஸி.

68. பிதரோ ச மே ஆஸும் பிதாமஹா ச, ஸத்³தா⁴ அஹும் தா³னபதீ வத³ஞ்ஞூ;

தம் குல்லவத்தம் அனுவத்தமானோ, மாஹம் குலே அந்திமக³ந்த⁴னோ [க³ந்தி⁴னோ (ஸ்யா. பீ. க.), க³ந்தி⁴னீ (ஸீ.)] அஹும்;

ஏதஸ்ஸ வாத³ஸ்ஸ ஜிகு³ச்ச²மானோ, அகாமகோ தா³னமிமம் த³தா³மி.

69. த³ஹரிம் குமாரிம் அஸமத்த²பஞ்ஞம், யம் தானயிம் ஞாதிகுலா ஸுக³த்தே;

ந சாபி மே அப்பியதம் அவேதி³, அஞ்ஞத்ர காமா பரிசாரயந்தா [பரிசாரயந்தீ (ஸீ. பீ.)];

அத² கேன வண்ணேன மயா தே போ⁴தி, ஸம்வாஸத⁴ம்மோ அஹு ஏவரூபோ.

70. ஆரா தூ³ரே நயித⁴ கதா³சி அத்தி², பரம்பரா நாம குலே இமஸ்மிம்;

தம் குல்லவத்தம் அனுவத்தமானா, மாஹம் குலே அந்திமக³ந்தி⁴னீ அஹும்;

ஏதஸ்ஸ வாத³ஸ்ஸ ஜிகு³ச்ச²மானா, அகாமிகா பத்³த⁴சராம்ஹி [பட்ட²சராம்ஹி (ஸ்யா. க.)] துய்ஹம்.

71. மண்ட³ப்³ய பா⁴ஸிம் யமபா⁴ஸனேய்யம் [பா⁴ஸிஸ்ஸம் அபா⁴ஸனேய்யம் (ஸீ. ஸ்யா. பீ.), பா⁴ஸிஸ்ஸ’மபா⁴ஸனேய்யம் (?)], தம் க²ம்யதம் புத்தகஹேது மஜ்ஜ;

புத்தபேமா ந இத⁴ பரத்தி² கிஞ்சி, ஸோ நோ அயம் ஜீவதி யஞ்ஞத³த்தோதி.

கண்ஹதீ³பாயனஜாதகம் [மண்ட³ப்³யஜாதகம் (ஸ்யா. க.)] ச²ட்ட²ம்.