11. சரஸுத்தம்

110. வுத்தஞ்ஹேதம் ப⁴க³வதா, வுத்தமரஹதாதி மே ஸுதம் –

‘‘சரதோ சேபி, பி⁴க்க²வே, பி⁴க்கு²னோ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தஞ்சே, பி⁴க்க²வே, பி⁴க்கு² அதி⁴வாஸேதி நப்பஜஹதி ந வினோதே³தி ந ப்³யந்தீகரோதி [ப்³யந்திகரோதி (ஸீ. பீ.), ப்³யந்தம் கரோதி (க.)] அனபா⁴வம் க³மேதி. சரம்பி, பி⁴க்க²வே, பி⁴க்கு² ஏவம்பூ⁴தோ அனாதாபீ அனோத்தாபீ [அனோத்தப்பீ (ஸப்³ப³த்த²) து³கனிபாதே, அங்கு³த்தரே 1.4.11 பஸ்ஸிதப்³ப³ம்] ஸததம் ஸமிதம் குஸீதோ ஹீனவீரியோதி வுச்சதி.

‘‘டி²தஸ்ஸ சேபி, பி⁴க்க²வே, பி⁴க்கு²னோ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தஞ்சே, பி⁴க்க²வே, பி⁴க்கு² அதி⁴வாஸேதி நப்பஜஹதி ந வினோதே³தி ந ப்³யந்தீகரோதி ந அனபா⁴வம் க³மேதி. டி²தோபி, பி⁴க்க²வே, பி⁴க்கு² ஏவம்பூ⁴தோ அனாதாபீ அனோத்தாபீ ஸததம் ஸமிதம் குஸீதோ ஹீனவீரியோதி வுச்சதி.

‘‘நிஸின்னஸ்ஸ சேபி, பி⁴க்க²வே, பி⁴க்கு²னோ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தஞ்சே, பி⁴க்க²வே, பி⁴க்கு² அதி⁴வாஸேதி நப்பஜஹதி ந வினோதே³தி ந ப்³யந்தீகரோதி ந அனபா⁴வம் க³மேதி. நிஸின்னோபி, பி⁴க்க²வே, பி⁴க்கு² ஏவம்பூ⁴தோ அனாதாபீ அனோத்தாபீ ஸததம் ஸமிதம் குஸீதோ ஹீனவீரியோதி வுச்சதி.

‘‘ஸயானஸ்ஸ சேபி, பி⁴க்க²வே, பி⁴க்கு²னோ ஜாக³ரஸ்ஸ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தஞ்சே, பி⁴க்க²வே, பி⁴க்கு² அதி⁴வாஸேதி நப்பஜஹதி ந வினோதே³தி ந ப்³யந்தீகரோதி ந அனபா⁴வம் க³மேதி. ஸயானோபி, பி⁴க்க²வே, பி⁴க்கு² ஜாக³ரோ ஏவம்பூ⁴தோ அனாதாபீ அனோத்தாபீ ஸததம் ஸமிதம் குஸீதோ ஹீனவீரியோதி வுச்சதி.

‘‘சரதோ சேபி, பி⁴க்க²வே, பி⁴க்கு²னோ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தஞ்சே, பி⁴க்க²வே, பி⁴க்கு² நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வம் க³மேதி. சரம்பி, பி⁴க்க²வே, பி⁴க்கு² ஏவம்பூ⁴தோ ஆதாபீ ஓத்தாபீ [ஓத்தப்பீ (ஸப்³ப³த்த²)] ஸததம் ஸமிதம் ஆரத்³த⁴வீரியோ பஹிதத்தோதி வுச்சதி.

‘‘டி²தஸ்ஸ சேபி, பி⁴க்க²வே, பி⁴க்கு²னோ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தஞ்சே, பி⁴க்க²வே, பி⁴க்கு² நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வம் க³மேதி. டி²தோபி, பி⁴க்க²வே, பி⁴க்கு² ஏவம்பூ⁴தோ ஆதாபீ ஓத்தாபீ ஸததம் ஸமிதம் ஆரத்³த⁴வீரியோ பஹிதத்தோதி வுச்சதி.

‘‘நிஸின்னஸ்ஸ சேபி, பி⁴க்க²வே, பி⁴க்கு²னோ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தஞ்சே, பி⁴க்க²வே, பி⁴க்கு² நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வம் க³மேதி. நிஸின்னோபி, பி⁴க்க²வே, பி⁴க்கு² ஏவம்பூ⁴தோ ஆதாபீ ஓத்தாபீ ஸததம் ஸமிதம் ஆரத்³த⁴வீரியோ பஹிதத்தோதி வுச்சதி.

‘‘ஸயானஸ்ஸ சேபி, பி⁴க்க²வே, பி⁴க்கு²னோ ஜாக³ரஸ்ஸ உப்பஜ்ஜதி காமவிதக்கோ வா ப்³யாபாத³விதக்கோ வா விஹிம்ஸாவிதக்கோ வா. தஞ்சே, பி⁴க்க²வே, பி⁴க்கு² நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வம் க³மேதி. ஸயானோபி, பி⁴க்க²வே, பி⁴க்கு² ஜாக³ரோ ஏவம்பூ⁴தோ ஆதாபீ ஓத்தாபீ ஸததம் ஸமிதம் ஆரத்³த⁴வீரியோ பஹிதத்தோதி வுச்சதீ’’தி. ஏதமத்த²ம் ப⁴க³வா அவோச. தத்தே²தம் இதி வுச்சதி –

‘‘சரம் வா யதி³ வா திட்ட²ம், நிஸின்னோ உத³ வா ஸயம்;

யோ விதக்கம் விதக்கேதி, பாபகம் கே³ஹனிஸ்ஸிதம்.

‘‘கும்மக்³க³ம் படிபன்னோ [கும்மக்³க³ப்படிபன்னோ (அ. நி. 4.11)] ஸோ, மோஹனேய்யேஸு முச்சி²தோ;

அப⁴ப்³போ³ தாதி³ஸோ பி⁴க்கு², பு²ட்டு²ம் ஸம்போ³தி⁴முத்தமம்.

‘‘யோ ச சரம் வா திட்ட²ம் வா [யோ சரம் வா யதி³ வா திட்ட²ம் (ஸ்யா.), யோ சரம் வாத² திட்ட²ம் வா (ஸீ. க.)], நிஸின்னோ உத³ வா ஸயம்;

விதக்கம் ஸமயித்வான, விதக்கூபஸமே ரதோ;

ப⁴ப்³போ³ ஸோ தாதி³ஸோ பி⁴க்கு², பு²ட்டு²ம் ஸம்போ³தி⁴முத்தம’’ந்தி.

அயம்பி அத்தோ² வுத்தோ ப⁴க³வதா, இதி மே ஸுதந்தி. ஏகாத³ஸமம்.