7. காமயோக³ஸுத்தம்

96. வுத்தஞ்ஹேதம் ப⁴க³வதா, வுத்தமரஹதாதி மே ஸுதம் –

‘‘காமயோக³யுத்தோ, பி⁴க்க²வே, ப⁴வயோக³யுத்தோ ஆகா³மீ ஹோதி ஆக³ந்தா [ஆக³ந்த்வா (ஸ்யா. க.)] இத்த²த்தம். காமயோக³விஸம்யுத்தோ, பி⁴க்க²வே, ப⁴வயோக³யுத்தோ அனாகா³மீ ஹோதி அனாக³ந்தா இத்த²த்தம். காமயோக³விஸம்யுத்தோ, பி⁴க்க²வே, ப⁴வயோக³விஸம்யுத்தோ அரஹா ஹோதி, கீ²ணாஸவோ’’தி. ஏதமத்த²ம் ப⁴க³வா அவோச. தத்தே²தம் இதி வுச்சதி –

‘‘காமயோகே³ன ஸம்யுத்தா, ப⁴வயோகே³ன சூப⁴யம்;

ஸத்தா க³ச்ச²ந்தி ஸம்ஸாரம், ஜாதிமரணகா³மினோ.

‘‘யே ச காமே பஹந்த்வான, அப்பத்தா ஆஸவக்க²யம்;

ப⁴வயோகே³ன ஸம்யுத்தா, அனாகா³மீதி வுச்சரே.

‘‘யே ச கோ² சி²ன்னஸம்ஸயா, கீ²ணமானபுனப்³ப⁴வா;

தே வே பாரங்க³தா லோகே, யே பத்தா ஆஸவக்க²ய’’ந்தி.

அயம்பி அத்தோ² வுத்தோ ப⁴க³வதா, இதி மே ஸுதந்தி. ஸத்தமம்.

கல்யாணஸீலஸுத்தம்

97. வுத்தஞ்ஹேதம் ப⁴க³வதா, வுத்தமரஹதாதி மே ஸுதம் –

‘‘கல்யாணஸீலோ, பி⁴க்க²வே, பி⁴க்கு² கல்யாணத⁴ம்மோ கல்யாணபஞ்ஞோ இமஸ்மிம் த⁴ம்மவினயே ‘கேவலீ வுஸிதவா உத்தமபுரிஸோ’தி வுச்சதி –

‘‘கத²ஞ்ச, பி⁴க்க²வே, பி⁴க்கு² கல்யாணஸீலோ ஹோதி? இத⁴, பி⁴க்க²வே, பி⁴க்கு² ஸீலவா ஹோதி, பாதிமோக்க²ஸம்வரஸம்வுதோ விஹரதி, ஆசாரகோ³சரஸம்பன்னோ அணுமத்தேஸு வஜ்ஜேஸு ப⁴யத³ஸ்ஸாவீ, ஸமாதா³ய ஸிக்க²தி ஸிக்கா²பதே³ஸு. ஏவம் கோ², பி⁴க்க²வே, பி⁴க்கு² கல்யாணஸீலோ ஹோதி. இதி கல்யாணஸீலோ.

‘‘கல்யாணத⁴ம்மோ ச கத²ம் ஹோதி? இத⁴, பி⁴க்க²வே, பி⁴க்கு² ஸத்தன்னம் போ³தி⁴பக்கி²யானம் த⁴ம்மானம் பா⁴வனானுயோக³மனுயுத்தோ விஹரதி. ஏவம் கோ², பி⁴க்க²வே, பி⁴க்கு² கல்யாணத⁴ம்மோ ஹோதி. இதி கல்யாணஸீலோ, கல்யாணத⁴ம்மோ.

‘‘கல்யாணபஞ்ஞோ ச கத²ம் ஹோதி? இத⁴, பி⁴க்க²வே, பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. ஏவம் கோ², பி⁴க்க²வே, பி⁴க்கு² கல்யாணபஞ்ஞோ ஹோதி.

‘‘இதி கல்யாணஸீலோ கல்யாணத⁴ம்மோ கல்யாணபஞ்ஞோ இமஸ்மிம் த⁴ம்மவினயே ‘கேவலீ வுஸிதவா உத்தமபுரிஸோ’தி வுச்சதீ’’தி. ஏதமத்த²ம் ப⁴க³வா அவோச. தத்தே²தம் இதி வுச்சதி –

‘‘யஸ்ஸ காயேன வாசாய, மனஸா நத்தி² து³க்கடம்;

தம் வே கல்யாணஸீலோதி, ஆஹு பி⁴க்கு²ம் ஹிரீமனம் [ஹிரீமதம் (ஸ்யா. க.)].

‘‘யஸ்ஸ த⁴ம்மா ஸுபா⁴விதா, ஸத்த [பத்த (ஸப்³ப³த்த²)] ஸம்போ³தி⁴கா³மினோ;

தம் வே கல்யாணத⁴ம்மோதி, ஆஹு பி⁴க்கு²ம் அனுஸ்ஸத³ம்.

‘‘யோ து³க்க²ஸ்ஸ பஜானாதி, இதே⁴வ க²யமத்தனோ;

தம் வே கல்யாணபஞ்ஞோதி, ஆஹு பி⁴க்கு²ம் அனாஸவம்.

‘‘தேஹி த⁴ம்மேஹி ஸம்பன்னம், அனீக⁴ம் சி²ன்னஸம்ஸயம்;

அஸிதம் ஸப்³ப³லோகஸ்ஸ, ஆஹு ஸப்³ப³பஹாயின’’ந்தி.

அயம்பி அத்தோ² வுத்தோ ப⁴க³வதா, இதி மே ஸுதந்தி. அட்ட²மம்.