2. ஜீவிகஸுத்தம்

91. வுத்தஞ்ஹேதம் ப⁴க³வதா, வுத்தமரஹதாதி மே ஸுதம் –

‘‘அந்தமித³ம், பி⁴க்க²வே, ஜீவிகானம் யதி³த³ம் பிண்டோ³ல்யம். அபி⁴ஸாபோயம் [அபி⁴ஸாபாயம் (ஸீ.), அபி⁴லாபாயம் (ஸ்யா. பீ.), அபி⁴ஸபாயம் (க.)], பி⁴க்க²வே, லோகஸ்மிம் – ‘பிண்டோ³லோ விசரஸி பத்தபாணீ’தி. தஞ்ச கோ² ஏதம், பி⁴க்க²வே, குலபுத்தா உபேந்தி அத்த²வஸிகா, அத்த²வஸம் படிச்ச; நேவ ராஜாபி⁴னீதா, ந சோராபி⁴னீதா, ந இணட்டா, ந ப⁴யட்டா, ந ஆஜீவிகாபகதா. அபி ச கோ² ‘ஓதிண்ணம்ஹா ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி து³க்கோ²திண்ணா து³க்க²பரேதா, அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா பஞ்ஞாயேதா²’தி. ஏவம் பப்³ப³ஜிதோ சாயம், பி⁴க்க²வே, குலபுத்தோ ஸோ ச ஹோதி அபி⁴ஜ்ஜா²லு காமேஸு திப்³ப³ஸாராகோ³, ப்³யாபன்னசித்தோ பது³ட்ட²மனஸங்கப்போ, முட்ட²ஸ்ஸதி அஸம்பஜானோ அஸமாஹிதோ விப்³ப⁴ந்தசித்தோ பாகதிந்த்³ரியோ. ஸேய்யதா²பி, பி⁴க்க²வே, ச²வாலாதம் உப⁴தோபதி³த்தம் மஜ்ஜே² கூ³த²க³தம் நேவ கா³மே கட்ட²த்த²ம் ப²ரதி ந அரஞ்ஞேः ததூ²பமாஹம், பி⁴க்க²வே, இமம் புக்³க³லம் வதா³மி கி³ஹிபோ⁴கா³ பரிஹீனோ ஸாமஞ்ஞத்த²ஞ்ச ந பரிபூரேதீ’’தி. ஏதமத்த²ம் ப⁴க³வா அவோச. தத்தே²தம் இதி வுச்சதி –

‘‘கி³ஹிபோ⁴கா³ பரிஹீனோ, ஸாமஞ்ஞத்த²ஞ்ச து³ப்³ப⁴கோ³;

பரித⁴ம்ஸமானோ பகிரேதி, ச²வாலாதம்வ நஸ்ஸதி.

‘‘காஸாவகண்டா² ப³ஹவோ, பாபத⁴ம்மா அஸஞ்ஞதா;

பாபா பாபேஹி கம்மேஹி, நிரயம் தே உபபஜ்ஜரே.

‘‘ஸேய்யோ அயோகு³ளோ பு⁴த்தோ, தத்தோ அக்³கி³ஸிகூ²பமோ;

யஞ்சே பு⁴ஞ்ஜேய்ய து³ஸ்ஸீலோ, ரட்ட²பிண்ட³மஸஞ்ஞதோ’’தி.

அயம்பி அத்தோ² வுத்தோ ப⁴க³வதா, இதி மே ஸுதந்தி. து³தியம்.