10. தேவிஜ்ஜஸுத்தம்

99. வுத்தஞ்ஹேதம் ப⁴க³வதா, வுத்தமரஹதாதி மே ஸுதம் –

‘‘த⁴ம்மேனாஹம், பி⁴க்க²வே, தேவிஜ்ஜம் ப்³ராஹ்மணம் பஞ்ஞாபேமி, நாஞ்ஞம் லபிதலாபனமத்தேன.

‘‘கத²ஞ்சாஹம், பி⁴க்க²வே, த⁴ம்மேன தேவிஜ்ஜம் ப்³ராஹ்மணம் பஞ்ஞாபேமி, நாஞ்ஞம் லபிதலாபனமத்தேன? இத⁴, பி⁴க்க²வே, பி⁴க்கு² அனேகவிஹிதம் புப்³பே³னிவாஸம் அனுஸ்ஸரதி, ஸேய்யதி²த³ம் – ஏகம்பி ஜாதிம் த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி ஜாதியோ வீஸம்பி ஜாதியோ திம்ஸம்பி ஜாதியோ சத்தாலீஸம்பி ஜாதியோ பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி அனேகேபி ஸம்வட்டகப்பே அனேகேபி விவட்டகப்பே அனேகேபி ஸம்வட்டவிவட்டகப்பே – ‘அமுத்ராஸிம் ஏவம்னாமோ ஏவம்கோ³த்தோ ஏவம்வண்ணோ ஏவமாஹாரோ ஏவம்ஸுக²து³க்க²ப்படிஸம்வேதீ³ ஏவமாயுபரியந்தோ. ஸோ ததோ சுதோ அமுத்ர உத³பாதி³ம். தத்ராபாஸிம் ஏவம்னாமோ ஏவம்கோ³த்தோ ஏவம்வண்ணோ ஏவமாஹாரோ ஏவம்ஸுக²து³க்க²ப்படிஸம்வேதீ³ ஏவமாயுபரியந்தோ. ஸோ ததோ சுதோ இதூ⁴பபன்னோ’தி. இதி ஸாகாரம் ஸஉத்³தே³ஸம் அனேகவிஹிதம் புப்³பே³னிவாஸம் அனுஸ்ஸரதி. அயமஸ்ஸ பட²மா விஜ்ஜா அதி⁴க³தா ஹோதி, அவிஜ்ஜா விஹதா, விஜ்ஜா உப்பன்னா, தமோ விஹதோ, ஆலோகோ உப்பன்னோ, யதா² தம் அப்பமத்தஸ்ஸ ஆதாபினோ பஹிதத்தஸ்ஸ விஹரதோ.

‘‘புன சபரம், பி⁴க்க²வே, பி⁴க்கு² தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே, ஸுக³தே து³க்³க³தே யதா²கம்மூபகே³ ஸத்தே பஜானாதி – ‘இமே வத போ⁴ந்தோ ஸத்தா காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா மனோது³ச்சரிதேன ஸமன்னாக³தா அரியானம் உபவாத³கா மிச்சா²தி³ட்டி²கா மிச்சா²தி³ட்டி²கம்மஸமாதா³னா. தே காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபன்னா. இமே வா பன போ⁴ந்தோ ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன ஸமன்னாக³தா அரியானம் அனுபவாத³கா ஸம்மாதி³ட்டி²கா ஸம்மாதி³ட்டி²கம்மஸமாதா³னா. தே காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபன்னா’தி. இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே, ஸுக³தே து³க்³க³தே யதா²கம்மூபகே³ ஸத்தே பஜானாதி. அயமஸ்ஸ து³தியா விஜ்ஜா அதி⁴க³தா ஹோதி, அவிஜ்ஜா விஹதா, விஜ்ஜா உப்பன்னா, தமோ விஹதோ, ஆலோகோ உப்பன்னோ, யதா² தம் அப்பமத்தஸ்ஸ ஆதாபினோ பஹிதத்தஸ்ஸ விஹரதோ.

‘‘புன சபரம், பி⁴க்க²வே, பி⁴க்கு² ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. அயமஸ்ஸ ததியா விஜ்ஜா அதி⁴க³தா ஹோதி, அவிஜ்ஜா விஹதா, விஜ்ஜா உப்பன்னா, தமோ விஹதோ, ஆலோகோ உப்பன்னோ, யதா² தம் அப்பமத்தஸ்ஸ ஆதாபினோ பஹிதத்தஸ்ஸ விஹரதோ. ஏவம் கோ² அஹம், பி⁴க்க²வே, த⁴ம்மேன தேவிஜ்ஜம் ப்³ராஹ்மணம் பஞ்ஞாபேமி, நாஞ்ஞம் லபிதலாபனமத்தேனா’’தி. ஏதமத்த²ம் ப⁴க³வா அவோச. தத்தே²தம் இதி வுச்சதி –

‘‘புப்³பே³னிவாஸம் யோவேதி³ [யோவேதி³ (ஸப்³ப³த்த²)], ஸக்³கா³பாயஞ்ச பஸ்ஸதி;

அதோ² [அத² (ஸ்யா. க.)] ஜாதிக்க²யம் பத்தோ, அபி⁴ஞ்ஞாவோஸிதோ முனி.

‘‘ஏதாஹி தீஹி விஜ்ஜாஹி, தேவிஜ்ஜோ ஹோதி ப்³ராஹ்மணோ;

தமஹம் வதா³மி தேவிஜ்ஜம், நாஞ்ஞம் லபிதலாபன’’ந்தி.

அயம்பி அத்தோ² வுத்தோ ப⁴க³வதா, இதி மே ஸுதந்தி. த³ஸமம்.

பஞ்சமோ வக்³கோ³ நிட்டி²தோ.

தஸ்ஸுத்³தா³னம் –

பஸாத³ ஜீவித ஸங்கா⁴டி, அக்³கி³ உபபரிக்க²யா;

உபபத்தி [உப்பத்தி (ஸீ.)] காம கல்யாணம், தா³னம் த⁴ம்மேன தே த³ஸாதி.

திகனிபாதோ நிட்டி²தோ.