5. பா³லவக்³கோ³

60. தீ³கா⁴ ஜாக³ரதோ ரத்தி, தீ³க⁴ம் ஸந்தஸ்ஸ யோஜனம்;

தீ³கோ⁴ பா³லானம் ஸம்ஸாரோ, ஸத்³த⁴ம்மம் அவிஜானதம்.

61. சரஞ்சே நாதி⁴க³ச்சே²ய்ய, ஸேய்யம் ஸதி³ஸமத்தனோ;

ஏகசரியம் [ஏகசரியம் (க.)] த³ள்ஹம் கயிரா, நத்தி² பா³லே ஸஹாயதா.

62. புத்தா மத்தி² த⁴னம்மத்தி² [புத்தமத்தி² த⁴னமத்தி² (க.)], இதி பா³லோ விஹஞ்ஞதி;

அத்தா ஹி [அத்தாபி (?)] அத்தனோ நத்தி², குதோ புத்தா குதோ த⁴னம்.

63. யோ பா³லோ மஞ்ஞதி பா³ல்யம், பண்டி³தோ வாபி தேன ஸோ;

பா³லோ ச பண்டி³தமானீ, ஸ வே ‘‘பா³லோ’’தி வுச்சதி.

64. யாவஜீவம்பி சே பா³லோ, பண்டி³தம் பயிருபாஸதி;

ந ஸோ த⁴ம்மம் விஜானாதி, த³ப்³பீ³ ஸூபரஸம் யதா².

65. முஹுத்தமபி சே விஞ்ஞூ, பண்டி³தம் பயிருபாஸதி;

கி²ப்பம் த⁴ம்மம் விஜானாதி, ஜிவ்ஹா ஸூபரஸம் யதா².

66. சரந்தி பா³லா து³ம்மேதா⁴, அமித்தேனேவ அத்தனா;

கரோந்தா பாபகம் கம்மம், யம் ஹோதி கடுகப்ப²லம்.

67. ந தம் கம்மம் கதம் ஸாது⁴, யம் கத்வா அனுதப்பதி;

யஸ்ஸ அஸ்ஸுமுகோ² ரோத³ம், விபாகம் படிஸேவதி.

68. தஞ்ச கம்மம் கதம் ஸாது⁴, யம் கத்வா நானுதப்பதி;

யஸ்ஸ பதீதோ ஸுமனோ, விபாகம் படிஸேவதி.

69. மது⁴வா [மது⁴ம் வா (தீ³. நி. டீகா 1)] மஞ்ஞதி பா³லோ, யாவ பாபம் ந பச்சதி;

யதா³ ச பச்சதி பாபம், பா³லோ [அத² பா³லோ (ஸீ. ஸ்யா.) அத² (?)] து³க்க²ம் நிக³ச்ச²தி.

70. மாஸே மாஸே குஸக்³கே³ன, பா³லோ பு⁴ஞ்ஜேய்ய போ⁴ஜனம்;

ந ஸோ ஸங்கா²தத⁴ம்மானம் [ஸங்க²தத⁴ம்மானம் (ஸீ. பீ. க.)], கலம் அக்³க⁴தி ஸோளஸிம்.

71. ந ஹி பாபம் கதம் கம்மம், ஸஜ்ஜு கீ²ரம்வ முச்சதி;

ட³ஹந்தம் பா³லமன்வேதி, ப⁴ஸ்மச்ச²ன்னோவ [ப⁴ஸ்மாச²ன்னோவ (ஸீ. பீ. க.)] பாவகோ.

72. யாவதே³வ அனத்தா²ய, ஞத்தம் [ஞாதம் (?)] பா³லஸ்ஸ ஜாயதி;

ஹந்தி பா³லஸ்ஸ ஸுக்கம்ஸம், முத்³த⁴மஸ்ஸ விபாதயம்.

73. அஸந்தம் பா⁴வனமிச்சே²ய்ய [அஸந்தம் பா⁴வமிச்சே²ய்ய (ஸ்யா.), அஸந்தபா⁴வனமிச்சே²ய்ய (க.)], புரேக்கா²ரஞ்ச பி⁴க்கு²ஸு;

ஆவாஸேஸு ச இஸ்ஸரியம், பூஜா பரகுலேஸு ச.

74. மமேவ கத மஞ்ஞந்து, கி³ஹீபப்³ப³ஜிதா உபோ⁴;

மமேவாதிவஸா அஸ்ஸு, கிச்சாகிச்சேஸு கிஸ்மிசி;

இதி பா³லஸ்ஸ ஸங்கப்போ, இச்சா² மானோ ச வட்³ட⁴தி.

75. அஞ்ஞா ஹி லாபூ⁴பனிஸா, அஞ்ஞா நிப்³பா³னகா³மினீ;

ஏவமேதம் அபி⁴ஞ்ஞாய, பி⁴க்கு² பு³த்³த⁴ஸ்ஸ ஸாவகோ;

ஸக்காரம் நாபி⁴னந்தே³ய்ய, விவேகமனுப்³ரூஹயே.

பா³லவக்³கோ³ பஞ்சமோ நிட்டி²தோ.