1. யமகவக்³கோ³

1. மனோபுப்³ப³ங்க³மா த⁴ம்மா, மனோஸேட்டா² மனோமயா;

மனஸா சே பது³ட்டே²ன, பா⁴ஸதி வா கரோதி வா;

ததோ நம் து³க்க²மன்வேதி, சக்கம்வ வஹதோ பத³ம்.

2. மனோபுப்³ப³ங்க³மா த⁴ம்மா, மனோஸேட்டா² மனோமயா;

மனஸா சே பஸன்னேன, பா⁴ஸதி வா கரோதி வா;

ததோ நம் ஸுக²மன்வேதி, சா²யாவ அனபாயினீ [அனுபாயினீ (க.)].

3. அக்கோச்சி² மம் அவதி⁴ மம், அஜினி [அஜினீ (?)] மம் அஹாஸி மே;

யே ச தம் உபனய்ஹந்தி, வேரம் தேஸம் ந ஸம்மதி.

4. அக்கோச்சி² மம் அவதி⁴ மம், அஜினி மம் அஹாஸி மே;

யே ச தம் நுபனய்ஹந்தி, வேரம் தேஸூபஸம்மதி.

5. ந ஹி வேரேன வேரானி, ஸம்மந்தீத⁴ குதா³சனம்;

அவேரேன ச ஸம்மந்தி, ஏஸ த⁴ம்மோ ஸனந்தனோ.

6. பரே ச ந விஜானந்தி, மயமேத்த² யமாமஸே;

யே ச தத்த² விஜானந்தி, ததோ ஸம்மந்தி மேத⁴கா³.

7. ஸுபா⁴னுபஸ்ஸிம் விஹரந்தம், இந்த்³ரியேஸு அஸம்வுதம்;

போ⁴ஜனம்ஹி சாமத்தஞ்ஞும், குஸீதம் ஹீனவீரியம்;

தம் வே பஸஹதி மாரோ, வாதோ ருக்க²ம்வ து³ப்³ப³லம்.

8. அஸுபா⁴னுபஸ்ஸிம் விஹரந்தம், இந்த்³ரியேஸு ஸுஸம்வுதம்;

போ⁴ஜனம்ஹி ச மத்தஞ்ஞும், ஸத்³த⁴ம் ஆரத்³த⁴வீரியம்;

தம் வே நப்பஸஹதி மாரோ, வாதோ ஸேலம்வ பப்³ப³தம்.

9. அனிக்கஸாவோ காஸாவம், யோ வத்த²ம் பரித³ஹிஸ்ஸதி;

அபேதோ த³மஸச்சேன, ந ஸோ காஸாவமரஹதி.

10. யோ ச வந்தகஸாவஸ்ஸ, ஸீலேஸு ஸுஸமாஹிதோ;

உபேதோ த³மஸச்சேன, ஸ வே காஸாவமரஹதி.

11. அஸாரே ஸாரமதினோ, ஸாரே சாஸாரத³ஸ்ஸினோ;

தே ஸாரம் நாதி⁴க³ச்ச²ந்தி, மிச்சா²ஸங்கப்பகோ³சரா.

12. ஸாரஞ்ச ஸாரதோ ஞத்வா, அஸாரஞ்ச அஸாரதோ;

தே ஸாரம் அதி⁴க³ச்ச²ந்தி, ஸம்மாஸங்கப்பகோ³சரா.

13. யதா² அகா³ரம் து³ச்ச²ன்னம், வுட்டீ² ஸமதிவிஜ்ஜ²தி;

ஏவம் அபா⁴விதம் சித்தம், ராகோ³ ஸமதிவிஜ்ஜ²தி.

14. யதா² அகா³ரம் ஸுச²ன்னம், வுட்டீ² ந ஸமதிவிஜ்ஜ²தி;

ஏவம் ஸுபா⁴விதம் சித்தம், ராகோ³ ந ஸமதிவிஜ்ஜ²தி.

15. இத⁴ ஸோசதி பேச்ச ஸோசதி, பாபகாரீ உப⁴யத்த² ஸோசதி;

ஸோ ஸோசதி ஸோ விஹஞ்ஞதி, தி³ஸ்வா கம்மகிலிட்ட²மத்தனோ.

16. இத⁴ மோத³தி பேச்ச மோத³தி, கதபுஞ்ஞோ உப⁴யத்த² மோத³தி;

ஸோ மோத³தி ஸோ பமோத³தி, தி³ஸ்வா கம்மவிஸுத்³தி⁴மத்தனோ.

17. இத⁴ தப்பதி பேச்ச தப்பதி, பாபகாரீ [பாபகாரி (?)] உப⁴யத்த² தப்பதி;

‘‘பாபம் மே கத’’ந்தி தப்பதி, பி⁴ய்யோ [பீ⁴யோ (ஸீ.)] தப்பதி து³க்³க³திம் க³தோ.

18. இத⁴ நந்த³தி பேச்ச நந்த³தி, கதபுஞ்ஞோ உப⁴யத்த² நந்த³தி;

‘‘புஞ்ஞம் மே கத’’ந்தி நந்த³தி, பி⁴ய்யோ நந்த³தி ஸுக்³க³திம் க³தோ.

19. ப³ஹும்பி சே ஸம்ஹித [ஸஹிதம் (ஸீ. ஸ்யா. கம். பீ.)] பா⁴ஸமானோ, ந தக்கரோ ஹோதி நரோ பமத்தோ;

கோ³போவ கா³வோ க³ணயம் பரேஸம், ந பா⁴க³வா ஸாமஞ்ஞஸ்ஸ ஹோதி.

20. அப்பம்பி சே ஸம்ஹித பா⁴ஸமானோ, த⁴ம்மஸ்ஸ ஹோதி [ஹோதீ (ஸீ. பீ.)] அனுத⁴ம்மசாரீ;

ராக³ஞ்ச தோ³ஸஞ்ச பஹாய மோஹம், ஸம்மப்பஜானோ ஸுவிமுத்தசித்தோ;

அனுபாதி³யானோ இத⁴ வா ஹுரம் வா, ஸ பா⁴க³வா ஸாமஞ்ஞஸ்ஸ ஹோதி.

யமகவக்³கோ³ பட²மோ நிட்டி²தோ.