1. யுத⁴ஞ்ஜயசரியா

1. ‘‘யதா³ஹம் அமிதயஸோ, ராஜபுத்தோ யுத⁴ஞ்ஜயோ;

உஸ்ஸாவபி³ந்து³ம் ஸூரியாதபே, பதிதம் தி³ஸ்வான ஸம்விஜிம்.

2. ‘‘தஞ்ஞேவாதி⁴பதிம் கத்வா, ஸம்வேக³மனுப்³ரூஹயிம்;

மாதாபிதூ ச வந்தி³த்வா, பப்³ப³ஜ்ஜமனுயாசஹம்.

3. ‘‘யாசந்தி மம் பஞ்ஜலிகா, ஸனேக³மா ஸரட்ட²கா;

‘அஜ்ஜேவ புத்த படிபஜ்ஜ, இத்³த⁴ம் பீ²தம் மஹாமஹிம்’.

4. ‘‘ஸராஜகே ஸஹோரோதே⁴, ஸனேக³மே ஸரட்ட²கே;

கருணம் பரிதே³வந்தே, அனபேக்கோ²வ பரிச்சஜிம்.

5. ‘‘கேவலம் பத²விம் ரஜ்ஜம், ஞாதிபரிஜனம் யஸம்;

சஜமானோ ந சிந்தேஸிம், போ³தி⁴யாயேவ காரணா.

6. ‘‘மாதாபிதா ந மே தே³ஸ்ஸா, நபி மே தே³ஸ்ஸம் மஹாயஸம்;

ஸப்³ப³ஞ்ஞுதம் பியம் மய்ஹம், தஸ்மா ரஜ்ஜம் பரிச்சஜி’’ந்தி.

யுத⁴ஞ்ஜயசரியம் பட²மம்.