29. தா⁴துபா⁴ஜனீயகதா²

1. மஹாகோ³தமோ ஜினவரோ, குஸினாரம்ஹி நிப்³பு³தோ;

தா⁴துவித்தா²ரிகம் ஆஸி, தேஸு தேஸு பதே³ஸதோ.

2. ஏகோ அஜாதஸத்துஸ்ஸ, ஏகோ வேஸாலியா புரே;

ஏகோ கபிலவத்து²ஸ்மிம், ஏகோ ச அல்லகப்பகே.

3. ஏகோ ச ராமகா³மம்ஹி, ஏகோ ச வேட²தீ³பகே;

ஏகோ பாவேய்யகே மல்லே, ஏகோ ச கோஸினாரகே.

4. கும்ப⁴ஸ்ஸ தூ²பம் காரேஸி, ப்³ராஹ்மணோ தோ³ணஸவ்ஹயோ;

அங்கா³ரதூ²பம் காரேஸும், மோரியா துட்ட²மானஸா.

5. அட்ட² ஸாரீரிகா தூ²பா, நவமோ கும்ப⁴சேதியோ;

அங்கா³ரதூ²போ த³ஸமோ, ததா³யேவ பதிட்டி²தோ.

6. உண்ஹீஸம் சதஸ்ஸோ தா³டா², அக்க²கா த்³வே ச தா⁴துயோ;

அஸம்பி⁴ன்னா இமா ஸத்த, ஸேஸா பி⁴ன்னாவ தா⁴துயோ.

7. மஹந்தா முக்³க³மத்தா ச [முக்³க³மாஸாவ (க.)], மஜ்ஜி²மா பி⁴ன்னதண்டு³லா;

கு²த்³த³கா ஸாஸபமத்தா ச, நானாவண்ணா ச தா⁴துயோ.

8. மஹந்தா ஸுவண்ணவண்ணா ச, முத்தவண்ணா ச மஜ்ஜி²மா;

கு²த்³த³கா மகுலவண்ணா ச, ஸோளஸதோ³ணமத்திகா.

9. மஹந்தா பஞ்ச நாளியோ, நாளியோ பஞ்ச மஜ்ஜி²மா;

கு²த்³த³கா ச² நாளீ சேவ, ஏதா ஸப்³பா³பி தா⁴துயோ.

10. உண்ஹீஸம் ஸீஹளே தீ³பே, ப்³ரஹ்மலோகே ச வாமகம்;

ஸீஹளே த³க்கி²ணக்க²ஞ்ச, ஸப்³பா³பேதா பதிட்டி²தா.

11. ஏகா தா³டா² தித³ஸபுரே, ஏகா நாக³புரே அஹு;

ஏகா க³ந்தா⁴ரவிஸயே, ஏகா கலிங்க³ராஜினோ.

12. சத்தாலீஸஸமா த³ந்தா, கேஸா லோமா ச ஸப்³ப³ஸோ;

தே³வா ஹரிம்ஸு ஏகேகம், சக்கவாளபரம்பரா.

13. வஜிராயம் ப⁴க³வதோ, பத்தோ த³ண்ட³ஞ்ச சீவரம்;

நிவாஸனம் குலக⁴ரே, பச்சத்த²ரணம் கபிலவ்ஹயே [ஸிலவ்ஹயே (ஸ்யா.)].

14. பாடலிபுத்தபுரம்ஹி, கரணம் காயப³ந்த⁴னம்;

சம்பாயுத³கஸாடியம், உண்ணலோமஞ்ச கோஸலே.

15. காஸாவம் ப்³ரஹ்மலோகே ச, வேட²னம் தித³ஸே புரே;

நிஸீத³னம் அவந்தீஸு, ரட்டே² [தே³வரட்டே² (ஸ்யா.)] அத்த²ரணம் ததா³.

16. அரணீ ச மிதி²லாயம், விதே³ஹே பரிஸாவனம்;

வாஸி ஸூசிக⁴ரஞ்சாபி, இந்த³பத்த²புரே ததா³.

17. பரிக்கா²ரா அவஸேஸா, ஜனபதே³ அபரந்தகே;

பரிபு⁴த்தானி முனினா, அகம்ஸு மனுஜா ததா³.

18. தா⁴துவித்தா²ரிகம் ஆஸி, கோ³தமஸ்ஸ மஹேஸினோ;

பாணீனம் அனுகம்பாய, அஹு போராணிகம் ததா³தி.

தா⁴துபா⁴ஜனீயகதா² நிட்டி²தா.