7. பஞ்சதீ³பகத்தே²ரஅபதா³னம்

50. ‘‘பது³முத்தரபு³த்³த⁴ஸ்ஸ, ஸப்³ப³பூ⁴தானுகம்பினோ;

ஸத்³த³ஹித்வான [ஸுஸண்ட²ஹித்வா (ஸீ.)] ஸத்³த⁴ம்மே, உஜுதி³ட்டி² அஹோஸஹம்.

51. ‘‘பதீ³பதா³னம் பாதா³ஸிம், பரிவாரேத்வான போ³தி⁴யம்;

ஸத்³த³ஹந்தோ பதீ³பானி, அகரிம் தாவதே³ அஹம்.

52. ‘‘யம் யம் யோனுபபஜ்ஜாமி, தே³வத்தம் அத² மானுஸம்;

ஆகாஸே உக்கம் தா⁴ரேந்தி, தீ³பதா³னஸ்ஸித³ம் ப²லம்.

53. ‘‘திரோகுட்டம் திரோஸேலம், ஸமதிக்³க³ய்ஹ பப்³ப³தம்;

ஸமந்தா யோஜனஸதம், த³ஸ்ஸனம் அனுபோ⁴மஹம்.

54. ‘‘தேன கம்மாவஸேஸேன, பத்தோம்ஹி ஆஸவக்க²யம்;

தா⁴ரேமி அந்திமம் தே³ஹம், த்³விபதி³ந்த³ஸ்ஸ ஸாஸனே.

55. ‘‘சதுத்திம்ஸே கப்பஸதே, ஸதசக்கு²ஸனாமகா;

ராஜாஹேஸும் மஹாதேஜா, சக்கவத்தீ மஹப்³ப³லா.

56. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா பஞ்சதீ³பகோ தே²ரோ இமா கா³தா²யோ அபா⁴ஸித்தா²தி.

பஞ்சதீ³பகத்தே²ரஸ்ஸாபதா³னம் ஸத்தமம்.