6. பா³ஹியத்தே²ரஅபதா³னம்

178. ‘‘இதோ ஸதஸஹஸ்ஸம்ஹி, கப்பே உப்பஜ்ஜி நாயகோ;

மஹப்பபோ⁴ திலோகக்³கோ³, நாமேன பது³முத்தரோ.

179. ‘‘கி²ப்பாபி⁴ஞ்ஞஸ்ஸ பி⁴க்கு²ஸ்ஸ, கு³ணம் கித்தயதோ முனே;

ஸுத்வா உத³க்³க³சித்தோஹம், காரம் கத்வா மஹேஸினோ.

180. ‘‘த³த்வா ஸத்தாஹிகம் தா³னம், ஸஸிஸ்ஸஸ்ஸ முனே அஹம்;

அபி⁴வாதி³ய ஸம்பு³த்³த⁴ம், தம் டா²னம் பத்த²யிம் ததா³.

181. ‘‘ததோ மம் ப்³யாகரி பு³த்³தோ⁴, ‘ஏதம் பஸ்ஸத² ப்³ராஹ்மணம்;

பதிதம் பாத³மூலே மே, சரியம் பச்சவேக்க²ணம் [பஸன்னனயனானனம் (ஸீ.), பீனஸம்பன்னவேக்க²ணம் (ஸ்யா.), பீணம்ஸம் பச்சவேக்க²ணம் (பீ.)].

182. ‘‘‘ஹேமயஞ்ஞோபசிதங்க³ம், அவதா³ததனுத்தசம்;

பலம்ப³பி³ம்ப³தம்போ³ட்ட²ம், ஸேததிண்ஹஸமம் தி³ஜம்.

183. ‘‘‘கு³ணதா²மப³ஹுதரம், ஸமுக்³க³ததனூருஹம்;

கு³ணோகா⁴யதனீபூ⁴தம், பீதிஸம்பு²ல்லிதானனம்.

184. ‘‘‘ஏஸோ பத்த²யதே டா²னம், கி²ப்பாபி⁴ஞ்ஞஸ்ஸ பி⁴க்கு²னோ;

அனாக³தே மஹாவீரோ, கோ³தமோ நாம ஹேஸ்ஸதி.

185. ‘‘‘தஸ்ஸ த⁴ம்மேஸு தா³யாதோ³, ஓரஸோ த⁴ம்மனிம்மிதோ;

பா³ஹியோ நாம நாமேன, ஹேஸ்ஸதி ஸத்து² ஸாவகோ’.

186. ‘‘ததா³ ஹி துட்டோ² வுட்டா²ய, யாவஜீவம் மஹாமுனே;

காரம் கத்வா சுதோ ஸக்³க³ம், அக³ம் ஸப⁴வனம் யதா².

187. ‘‘தே³வபூ⁴தோ மனுஸ்ஸோ வா, ஸுகி²தோ தஸ்ஸ கம்முனோ;

வாஹஸா ஸம்ஸரித்வான, ஸம்பத்திமனுபோ⁴மஹம்.

188. ‘‘புன கஸ்ஸபவீரஸ்ஸ, அத்த²மேந்தம்ஹி [அத்த²ங்க³தம்ஹி (ஸ்யா.)] ஸாஸனே;

ஆருய்ஹ ஸேலஸிக²ரம், யுஞ்ஜித்வா ஜினஸாஸனம்.

189. ‘‘விஸுத்³த⁴ஸீலோ ஸப்பஞ்ஞோ, ஜினஸாஸனகாரகோ;

ததோ சுதா பஞ்ச ஜனா, தே³வலோகம் அக³ம்ஹஸே.

190. ‘‘ததோஹம் பா³ஹியோ ஜாதோ, பா⁴ருகச்சே² புருத்தமே;

ததோ நாவாய பக்க²ந்தோ³ [பக்க²ந்தோ (ஸீ.), பக்கந்தோ (பீ.)], ஸாக³ரம் அப்பஸித்³தி⁴யம் [அத்த²ஸித்³தி⁴யம் (க.)].

191. ‘‘ததோ நாவா அபி⁴ஜ்ஜித்த², க³ந்த்வான கதிபாஹகம்;

ததா³ பீ⁴ஸனகே கோ⁴ரே, பதிதோ மகராகரே.

192. ‘‘ததா³ஹம் வாயமித்வான, ஸந்தரித்வா மஹோத³தி⁴ம்;

ஸுப்பாத³பட்டனவரம் [ஸுப்பாரபட்டனவரம் (ஸீ. பீ.)], ஸம்பத்தோ மந்த³வேதி⁴தோ [மந்த³மேதி⁴கோ (ஸீ.), மந்த³வேதி³தோ (ஸ்யா.), மத்³த³வேரதம் (க.)].

193. ‘‘தா³ருசீரம் நிவாஸேத்வா, கா³மம் பிண்டா³ய பாவிஸிம்;

ததா³ஹ ஸோ ஜனோ துட்டோ², அரஹாயமிதா⁴க³தோ.

194. ‘‘இமம் அன்னேன பானேன, வத்தே²ன ஸயனேன ச;

பே⁴ஸஜ்ஜேன ச ஸக்கத்வா, ஹேஸ்ஸாம ஸுகி²தா மயம்.

195. ‘‘பச்சயானம் ததா³ லாபீ⁴, தேஹி ஸக்கதபூஜிதோ;

அரஹாஹந்தி ஸங்கப்பம், உப்பாதே³ஸிம் அயோனிஸோ.

196. ‘‘ததோ மே சித்தமஞ்ஞாய, சோத³யீ புப்³ப³தே³வதா;

‘ந த்வம் உபாயமக்³க³ஞ்ஞூ, குதோ த்வம் அரஹா ப⁴வே’.

197. ‘‘சோதி³தோ தாய ஸம்விக்³கோ³, ததா³ஹம் பரிபுச்சி² தம்;

‘கே வா ஏதே குஹிம் லோகே, அரஹந்தோ நருத்தமா.

198. ‘‘‘ஸாவத்தி²யம் கோஸலமந்தி³ரே ஜினோ, பஹூதபஞ்ஞோ வரபூ⁴ரிமேத⁴ஸோ;

ஸோ ஸக்யபுத்தோ அரஹா அனாஸவோ, தே³ஸேதி த⁴ம்மம் அரஹத்தபத்தியா.

199. ‘‘‘தத³ஸ்ஸ ஸுத்வா வசனம் ஸுபீணிதோ [பீணித்வா (க.)], நிதி⁴ம்வ லத்³தா⁴ கபணோதி விம்ஹிதோ;

உத³க்³க³சித்தோ அரஹத்தமுத்தமம், ஸுத³ஸ்ஸனம் த³ட்டு²மனந்தகோ³சரம்.

200. ‘‘‘ததா³ ததோ நிக்க²மித்வான ஸத்து²னோ [நிக்க²மிதுன ஸத்து²வரம் (ஸீ.)], ஸதா³ ஜினம் பஸ்ஸாமி விமலானனம் [பராஜினம் பஸ்ஸாமி கமலானனம் (க.)];

உபேச்ச ரம்மம் விஜிதவ்ஹயம் வனம், தி³ஜே அபுச்சி²ம் குஹிம் லோகனந்த³னோ.

201. ‘‘‘ததோ அவோசும் நரதே³வவந்தி³தோ, புரம் பவிட்டோ² அஸனேஸனாய ஸோ;

ஸஸோவ [பச்சேஹி (ஸீ. ஸ்யா.)] கி²ப்பம் முனித³ஸ்ஸனுஸ்ஸுகோ, உபேச்ச வந்தா³ஹி தமக்³க³புக்³க³லம்’.

202. ‘‘ததோஹம் துவடம் க³ந்த்வா, ஸாவத்தி²ம் புரமுத்தமம்;

விசரந்தம் தமத்³த³க்கி²ம், பிண்ட³த்த²ம் அபிஹாகி³த⁴ம்.

203. ‘‘பத்தபாணிம் அலோலக்க²ம், பாசயந்தம் பீதாகரம் [பா⁴ஜயந்தம் வியாமதம் (ஸீ.), ஜோதயந்தம் இதா⁴மதம் (ஸ்யா.), பா⁴ஜயந்தம் இத³ம்மதம் (பீ.)];

ஸிரீனிலயஸங்காஸம், ரவிதி³த்திஹரானனம்.

204. ‘‘தம் ஸமேச்ச நிபச்சாஹம், இத³ம் வசனமப்³ரவிம்;

‘குபதே² விப்பனட்ட²ஸ்ஸ, ஸரணம் ஹோஹி கோ³தம.

205. ‘‘‘பாணஸந்தாரணத்தா²ய, பிண்டா³ய விசராமஹம்;

ந தே த⁴ம்மகதா²காலோ, இச்சாஹ முனிஸத்தமோ’.

206. ‘‘ததா³ புனப்புனம் பு³த்³த⁴ம், ஆயாசிம் த⁴ம்மலாலஸோ;

யோ மே த⁴ம்மமதே³ஸேஸி, க³ம்பீ⁴ரம் ஸுஞ்ஞதம் பத³ம்.

207. ‘‘தஸ்ஸ த⁴ம்மம் ஸுணித்வான, பாபுணிம் ஆஸவக்க²யம்;

பரிக்கீ²ணாயுகோ ஸந்தோ, அஹோ ஸத்தா²னுகம்பகோ.

208. ‘‘கிலேஸா ஜா²பிதா மய்ஹம்…பே… விஹராமி அனாஸவோ.

209. ‘‘ஸ்வாக³தம் வத மே ஆஸி…பே… கதம் பு³த்³த⁴ஸ்ஸ ஸாஸனம்.

210. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்.

211. ‘‘ஏவம் தே²ரோ வியாகாஸி, பா³ஹியோ தா³ருசீரியோ;

ஸங்காரகூடே பதிதோ, பூ⁴தாவிட்டா²ய கா³வியா.

212. ‘‘அத்தனோ புப்³ப³சரியம், கித்தயித்வா மஹாமதி;

பரினிப்³பா³யி ஸோ தே²ரோ [வீரோ (ஸீ.), தீ⁴ரோ (ஸ்யா.)], ஸாவத்தி²யம் புருத்தமே.

213. ‘‘நக³ரா நிக்க²மந்தோ தம், தி³ஸ்வான இஸிஸத்தமோ;

தா³ருசீரத⁴ரம் தீ⁴ரம், பா³ஹியம் பா³ஹிதாக³மம்.

214. ‘‘பூ⁴மியம் பதிதம் த³ந்தம், இந்த³கேதூவ பாதிதம்;

க³தாயும் ஸுக்க²கிலேஸம் [க³தாயு ஸம்க³தக்லேஸம் (ஸீ. பீ.), ததா³யு ஸங்கதாலேஸம் (க.)], ஜினஸாஸனகாரகம்.

215. ‘‘ததோ ஆமந்தயீ ஸத்தா², ஸாவகே ஸாஸனே ரதே;

‘க³ண்ஹத² நேத்வா [ஹுத்வா (ஸ்யா. பீ. க.)] ஜா²பேத², தனும் ஸப்³ரஹ்மசாரினோ.

216. ‘‘‘தூ²பம் கரோத² பூஜேத², நிப்³பு³தோ ஸோ மஹாமதி;

கி²ப்பாபி⁴ஞ்ஞானமேஸக்³கோ³, ஸாவகோ மே வசோகரோ.

217. ‘‘‘ஸஹஸ்ஸமபி சே கா³தா², அனத்த²பத³ஸஞ்ஹிதா;

ஏகம் கா³தா²பத³ம் ஸேய்யோ, யம் ஸுத்வா உபஸம்மதி.

218. ‘‘‘யத்த² ஆபோ ச பத²வீ, தேஜோ வாயோ ந கா³த⁴தி;

ந தத்த² ஸுக்கா ஜோதந்தி, ஆதி³ச்சோ ந பகாஸதி.

219. ‘‘‘ந தத்த² சந்தி³மா பா⁴தி, தமோ தத்த² ந விஜ்ஜதி;

யதா³ ச அத்தனா வேதி³, முனிமோனேன ப்³ராஹ்மணோ.

220. ‘‘‘அத² ரூபா அரூபா ச, ஸுக²து³க்கா² விமுச்சதி’;

இச்சேவம் அப⁴ணீ நாதோ², திலோகஸரணோ முனி’’.

இத்த²ம் ஸுத³ம் ஆயஸ்மா பா³ஹியோ தே²ரோ இமா கா³தா²யோ

அபா⁴ஸித்தா²தி.

பா³ஹியத்தே²ரஸ்ஸாபதா³னம் ச²ட்ட²ம்.