10. மோக⁴ராஜத்தே²ரஅபதா³னம்

327. ‘‘பது³முத்தரோ நாம ஜினோ, ஸப்³ப³லோகவிதூ³ முனி;

இதோ ஸதஸஹஸ்ஸம்ஹி, கப்பே உப்பஜ்ஜி சக்கு²மா.

328. ‘‘ஓவாத³கோ விஞ்ஞாபகோ, தாரகோ ஸப்³ப³பாணினம்;

தே³ஸனாகுஸலோ பு³த்³தோ⁴, தாரேஸி ஜனதம் ப³ஹும்.

329. ‘‘அனுகம்பகோ காருணிகோ, ஹிதேஸீ ஸப்³ப³பாணினம்;

ஸம்பத்தே தித்தி²யே ஸப்³பே³, பஞ்சஸீலே பதிட்ட²பி.

330. ‘‘ஏவம் நிராகுலம் ஆஸி, ஸுஞ்ஞதம் தித்தி²யேஹி ச;

விசித்தம் அரஹந்தேஹி, வஸீபூ⁴தேஹி தாதி³பி⁴.

331. ‘‘ரதனானட்ட²பஞ்ஞாஸம், உக்³க³தோ ஸோ மஹாமுனி;

கஞ்சனக்³கி⁴யஸங்காஸோ, பா³த்திம்ஸவரலக்க²ணோ.

332. ‘‘வஸ்ஸஸதஸஹஸ்ஸானி, ஆயு விஜ்ஜதி தாவதே³;

தாவதா திட்ட²மானோ ஸோ, தாரேஸி ஜனதம் ப³ஹும்.

333. ‘‘ததா³ஹம் ஹம்ஸவதியம், குலே அஞ்ஞதரே அஹும்;

பரகம்மாயனே யுத்தோ, நத்தி² மே கிஞ்சி ஸம்த⁴னம்.

334. ‘‘படிக்கமனஸாலாயம், வஸந்தோ கதபூ⁴மியம்;

அக்³கி³ம் உஜ்ஜாலயிம் தத்த², த³ள்ஹம் கண்ஹாஸி ஸா [கண்ஹா ஸியா (ஸீ. பீ.), ட³ய்ஹகண்ஹா ஸிலா (ஸ்யா.)] ஹீ.

335. ‘‘ததா³ பரிஸதிம் நாதோ², சதுஸச்சபகாஸகோ;

ஸாவகம் ஸம்பகித்தேஸி, லூக²சீவரதா⁴ரகம்.

336. ‘‘தஸ்ஸ தம்ஹி கு³ணே துட்டோ², பணிபச்ச [பதிபஜ்ஜ (ஸ்யா.)] ததா²க³தம்;

லூக²சீவரதா⁴ரக்³க³ம், பத்த²யிம் டா²னமுத்தமம்.

337. ‘‘ததா³ அவோச ப⁴க³வா, ஸாவகே பது³முத்தரோ;

‘பஸ்ஸதே²தம் புரிஸகம், குசேலம் தனுதே³ஹகம்.

338. ‘‘‘பீதிப்பஸன்னவத³னம், ஸத்³தா⁴த⁴னஸமன்விதம் [ஸத்³தா⁴ஸ்னேஹஸமன்வதம் (க.)];

உத³க்³க³தனுஜம் ஹட்ட²ம், அசலம் ஸாலபிண்டி³தம்.

339. ‘‘‘ஏஸோ பத்தே²தி தம் டா²னம், ஸச்சஸேனஸ்ஸ பி⁴க்கு²னோ;

லூக²சீவரதா⁴ரிஸ்ஸ, தஸ்ஸ வண்ணஸிதாஸயோ [வண்ணக³தாஸயோ (ஸீ. ஸ்யா. பீ.)].

340. ‘‘தம் ஸுத்வா முதி³தோ ஹுத்வா, நிபச்ச ஸிரஸா ஜினம்;

யாவஜீவம் ஸுப⁴ம் கம்மம், கரித்வா ஜினஸாஸனே.

341. ‘‘தேன கம்மேன ஸுகதேன, சேதனாபணிதீ⁴ஹி ச;

ஜஹித்வா மானுஸம் தே³ஹம், தாவதிம்ஸூபகோ³ அஹம்.

342. ‘‘படிக்கமனஸாலாயம், பூ⁴மிதா³ஹககம்முனா;

ஸமஸஹஸ்ஸம் நிரயே, அத³ய்ஹிம் வேத³னாட்டிதோ.

343. ‘‘தேன கம்மாவஸேஸேன, பஞ்ச ஜாதிஸதானிஹம்;

மனுஸ்ஸோ குலஜோ ஹுத்வா, ஜாதியா லக்க²ணங்கிதோ.

344. ‘‘பஞ்ச ஜாதிஸதானேவ, குட்ட²ரோக³ஸமப்பிதோ;

மஹாது³க்க²ம் அனுப⁴விம், தஸ்ஸ கம்மஸ்ஸ வாஹஸா.

345. ‘‘இமஸ்மிம் ப⁴த்³த³கே கப்பே, உபரிட்ட²ம் யஸஸ்ஸினம்;

பிண்ட³பாதேன தப்பேஸிம், பஸன்னமானஸோ அஹம்.

346. ‘‘தேன கம்மவிஸேஸேன, சேதனாபணிதீ⁴ஹி ச;

ஜஹித்வா மானுஸம் தே³ஹம், தாவதிம்ஸமக³ச்ச²ஹம்.

347. ‘‘பச்சி²மே ப⁴வே ஸம்பத்தே, அஜாயிம் க²த்தியே குலே;

பிதுனோ அச்சயேனாஹம், மஹாரஜ்ஜஸமப்பிதோ.

348. ‘‘குட்ட²ரோகா³தி⁴பூ⁴தோஹம், ந ரதிம் ந ஸுக²ம் லபே⁴;

மோக⁴ம் ரஜ்ஜம் ஸுக²ம் யஸ்மா, மோக⁴ராஜா ததோ அஹம்.

349. ‘‘காயஸ்ஸ தோ³ஸம் தி³ஸ்வான, பப்³ப³ஜிம் அனகா³ரியம்;

பா³வரிஸ்ஸ தி³ஜக்³க³ஸ்ஸ, ஸிஸ்ஸத்தம் அஜ்ஜு²பாக³மிம்.

350. ‘‘மஹதா பரிவாரேன, உபேச்ச நரனாயகம்;

அபுச்சி²ம் நிபுணம் பஞ்ஹம், தம் வீரம் வாதி³ஸூத³னம்.

351. ‘‘‘அயம் லோகோ பரோ லோகோ, ப்³ரஹ்மலோகோ ஸதே³வகோ;

தி³ட்டி²ம் நோ [தி³ட்டா² நோ (ஸீ.), தி³ட்ட²ம் நோ (பீ.), தி³ட்டி²ம் தே (ஸ்யா.)] நாபி⁴ஜானாமி, கோ³தமஸ்ஸ யஸஸ்ஸினோ.

352. ‘‘‘ஏவாபி⁴க்கந்தத³ஸ்ஸாவிம், அத்தி² பஞ்ஹேன ஆக³மம்;

கத²ம் லோகம் அவேக்க²ந்தம், மச்சுராஜா ந பஸ்ஸதி’.

353. ‘‘‘ஸுஞ்ஞதோ லோகம் அவேக்க²ஸ்ஸு, மோக⁴ராஜ ஸதா³ ஸதோ;

அத்தானுதி³ட்டி²ம் உஹச்ச, ஏவம் மச்சுதரோ ஸியா.

354. ‘‘‘ஏவம் லோகம் அவேக்க²ந்தம், மச்சுராஜா ந பஸ்ஸதி’;

இதி மம் அப⁴ணி பு³த்³தோ⁴, ஸப்³ப³ரோக³திகிச்ச²கோ.

355. ‘‘ஸஹ கா³தா²வஸானேன, கேஸமஸ்ஸுவிவஜ்ஜிதோ;

காஸாவவத்த²வஸனோ, ஆஸிம் பி⁴க்கு² ததா²ரஹா.

356. ‘‘ஸங்கி⁴கேஸு விஹாரேஸு, ந வஸிம் ரோக³பீளிதோ;

மா விஹாரோ பது³ஸ்ஸீதி, வாதரோகே³ஹி பீளிதோ [வாசாயாபி⁴ஸுபீளிதோ (ஸ்யா. பீ.), வாதரோகீ³ ஸுபீளிதோ (க.)].

357. ‘‘ஸங்காரகூடா ஆஹித்வா, ஸுஸானா ரதி²காஹி ச;

ததோ ஸங்கா⁴டிம் கரித்வா, தா⁴ரயிம் லூக²சீவரம்.

358. ‘‘மஹாபி⁴ஸக்கோ தஸ்மிம் மே, கு³ணே துட்டோ² வினாயகோ;

லூக²சீவரதா⁴ரீனம், ஏதத³க்³கே³ ட²பேஸி மம்.

359. ‘‘புஞ்ஞபாபபரிக்கீ²ணோ, ஸப்³ப³ரோக³விவஜ்ஜிதோ;

ஸிகீ²வ அனுபாதா³னோ, நிப்³பா³யிஸ்ஸமனாஸவோ.

360. ‘‘கிலேஸா ஜா²பிதா மய்ஹம்…பே… விஹராமி அனாஸவோ.

361. ‘‘ஸ்வாக³தம் வத மே ஆஸி…பே… கதம் பு³த்³த⁴ஸ்ஸ ஸாஸனம்.

362. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா மோக⁴ராஜா தே²ரோ இமா கா³தா²யோ

அபா⁴ஸித்தா²தி.

மோக⁴ராஜத்தே²ரஸ்ஸாபதா³னம் த³ஸமம்.

கச்சாயனவக்³கோ³ சதுபஞ்ஞாஸமோ.