7. ஏகச²த்தியத்தே²ரஅபதா³னம்

37. ‘‘அங்கா³ரஜாதா பத²வீ, குக்குளானுக³தா மஹீ;

பது³முத்தரோ ப⁴க³வா, அப்³போ⁴காஸம்ஹி சங்கமி.

38. ‘‘பண்ட³ரம் ச²த்தமாதா³ய, அத்³தா⁴னம் படிபஜ்ஜஹம்;

தத்த² தி³ஸ்வான ஸம்பு³த்³த⁴ம், வித்தி மே உபபஜ்ஜத².

39. ‘‘மரீசியோத்த²டா [மரிசிமோபு²னா (ஸ்யா.), மரீசிவோபு²டா (பீ.)] பூ⁴மி, அங்கா³ராவ மஹீ அயம்;

உபஹந்தி [உபவாயந்தி (ஸீ. பீ.)] மஹாவாதா, ஸரீரஸ்ஸாஸுகே²பனா [ஸரீரகாயுகே²பனா (ஸ்யா.)].

40. ‘‘ஸீதம் உண்ஹம் விஹனந்தம் [விஹனதி (ஸ்யா. க.)], வாதாதபனிவாரணம்;

படிக்³க³ண்ஹ இமம் ச²த்தம், ப²ஸ்ஸயிஸ்ஸாமி [பஸ்ஸயிஸ்ஸாமி (க.)] நிப்³பு³திம்.

41. ‘‘அனுகம்பகோ காருணிகோ, பது³முத்தரோ மஹாயஸோ;

மம ஸங்கப்பமஞ்ஞாய, படிக்³க³ண்ஹி ததா³ ஜினோ.

42. ‘‘திம்ஸகப்பானி தே³விந்தோ³, தே³வரஜ்ஜமகாரயிம்;

ஸதானம் பஞ்சக்க²த்துஞ்ச, சக்கவத்தீ அஹோஸஹம்.

43. ‘‘பதே³ஸரஜ்ஜம் விபுலம், க³ணனாதோ அஸங்கி²யம்;

அனுபோ⁴மி ஸகம் கம்மம், புப்³பே³ ஸுகதமத்தனோ.

44. ‘‘அயம் மே பச்சி²மா ஜாதி, சரிமோ வத்ததே ப⁴வோ;

அஜ்ஜாபி ஸேதச்ச²த்தம் மே, ஸப்³ப³காலம் த⁴ரீயதி.

45. ‘‘ஸதஸஹஸ்ஸிதோ கப்பே, யம் ச²த்தமத³தி³ம் ததா³;

து³க்³க³திம் நாபி⁴ஜானாமி, ச²த்ததா³னஸ்ஸித³ம் ப²லம்.

46. ‘‘கிலேஸா ஜா²பிதா மய்ஹம்…பே… விஹராமி அனாஸவோ.

47. ‘‘ஸ்வாக³தம் வத மே ஆஸி…பே… கதம் பு³த்³த⁴ஸ்ஸ ஸாஸனம்.

48. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா ஏகச²த்தியோ தே²ரோ இமா கா³தா²யோ

அபா⁴ஸித்தா²தி.

ஏகச²த்தியத்தே²ரஸ்ஸாபதா³னம் ஸத்தமம்.