40. பிலிந்த³வச்ச²வக்³கோ³

1. பிலிந்த³வச்ச²த்தே²ரஅபதா³னம்

1. ‘‘நக³ரே ஹம்ஸவதியா, ஆஸிம் தோ³வாரிகோ அஹம்;

அக்கோ²ப⁴ம் அமிதம் போ⁴க³ம், க⁴ரே ஸன்னிசிதம் மம.

2. ‘‘ரஹோக³தோ நிஸீதி³த்வா, பஹம்ஸித்வான மானஸம் [ஸம்பஹம்ஸித்வ மானஸம் (ஸீ.)];

நிஸஜ்ஜ பாஸாத³வரே, ஏவம் சிந்தேஸஹம் ததா³.

(சிந்தனாகாரோ)

3. ‘‘‘ப³ஹூ மேதி⁴க³தா போ⁴கா³, பீ²தம் அந்தேபுரம் மம;

ராஜாபி [ராஜிஸி (க.)] ஸன்னிமந்தேஸி, ஆனந்தோ³ பத²விஸ்ஸரோ.

4. ‘‘‘அயஞ்ச பு³த்³தோ⁴ உப்பன்னோ, அதி⁴ச்சுப்பத்திகோ முனி;

ஸம்விஜ்ஜந்தி ச மே போ⁴கா³, தா³னம் த³ஸ்ஸாமி ஸத்து²னோ.

5. ‘‘‘பது³மேன ராஜபுத்தேன, தி³ன்னம் தா³னவரம் ஜினே;

ஹத்தி²னாகே³ ச பல்லங்கே, அபஸ்ஸேனஞ்சனப்பகம்.

6. ‘‘‘அஹம்பி தா³னம் த³ஸ்ஸாமி, ஸங்கே⁴ க³ணவருத்தமே;

அதி³ன்னபுப்³ப³மஞ்ஞேஸம், ப⁴விஸ்ஸம் ஆதி³கம்மிகோ.

7. ‘‘‘சிந்தேத்வாஹம் ப³ஹுவித⁴ம், யாகே³ யஸ்ஸ ஸுக²ம்ப²லம்;

பரிக்கா²ரதா³னமத்³த³க்கி²ம், மம ஸங்கப்பபூரணம்.

8. ‘‘‘பரிக்கா²ரானி த³ஸ்ஸாமி, ஸங்கே⁴ க³ணவருத்தமே;

அதி³ன்னபுப்³ப³மஞ்ஞேஸம், ப⁴விஸ்ஸம் ஆதி³கம்மிகோ’.

(தா³னவத்து²ஸம்பாத³னம்)

9. ‘‘நளகாரே உபாக³ம்ம, ச²த்தம் காரேஸி தாவதே³;

ச²த்தஸதஸஹஸ்ஸானி, ஏகதோ ஸன்னிபாதயிம்.

10. ‘‘து³ஸ்ஸஸதஸஹஸ்ஸானி, ஏகதோ ஸன்னிபாதயிம்;

பத்தஸதஸஹஸ்ஸானி, ஏகதோ ஸன்னிபாதயிம்.

11. ‘‘வாஸியோ ஸத்த²கே சாபி, ஸூசியோ நக²சே²த³னே;

ஹேட்டா²ச²த்தே ட²பாபேஸிம், காரேத்வா தத³னுச்ச²வே.

12. ‘‘விதூ⁴பனே தாலவண்டே, மோரஹத்தே² ச சாமரே;

பரிஸ்ஸாவனே தேலதா⁴ரே [தேலத⁴ரே (ஸீ.)], காரயிம் தத³னுச்ச²வே.

13. ‘‘ஸூசிக⁴ரே அம்ஸப³த்³தே⁴, அதோ²பி காயப³ந்த⁴னே;

ஆதா⁴ரகே ச ஸுகதே, காரயிம் தத³னுச்ச²வே.

14. ‘‘பரிபோ⁴க³பா⁴ஜனே ச, அதோ²பி லோஹதா²லகே;

பே⁴ஸஜ்ஜே பூரயித்வான, ஹேட்டா²ச²த்தே ட²பேஸஹம்.

15. ‘‘வசம் உஸீரம் லட்டி²மது⁴ம், பிப்ப²லீ மரிசானி ச;

ஹரீதகிம் ஸிங்கீ³வேரம், ஸப்³ப³ம் பூரேஸி பா⁴ஜனே.

16. ‘‘உபாஹனா பாது³காயோ, அதோ² உத³கபுஞ்ச²னே;

கத்தரத³ண்டே³ ஸுகதே, காரயிம் தத³னுச்ச²வே.

17. ‘‘ஓஸத⁴ஞ்ஜனனாளீ ச [ஓஸத⁴ம் அஞ்ஜனாபிச (ஸ்யா.)], ஸலாகா த⁴ம்மகுத்தரா;

குஞ்சிகா பஞ்சவண்ணேஹி, ஸிப்³பி³தே குஞ்சிகாக⁴ரே.

18. ‘‘ஆயோகே³ தூ⁴மனேத்தே ச, அதோ²பி தீ³பதா⁴ரகே;

தும்ப³கே ச கரண்டே³ ச, காரயிம் தத³னுச்ச²வே.

19. ‘‘ஸண்டா³ஸே பிப்ப²லே சேவ, அதோ²பி மலஹாரகே;

பே⁴ஸஜ்ஜத²விகே சேவ, காரயிம் தத³னுச்ச²வே.

20. ‘‘ஆஸந்தி³யோ பீட²கே ச, பல்லங்கே சதுரோமயே;

தத³னுச்ச²வே காரயித்வா, ஹேட்டா²ச²த்தே ட²பேஸஹம்.

21. ‘‘உண்ணாபி⁴ஸீ தூலபி⁴ஸீ, அதோ²பி பீடி²காபி⁴ஸீ [பீட²காபி⁴ஸீ (ஸ்யா. க.)];

பி³ம்போ³ஹனே [பி³ப்³போ³ஹனே (ஸ்யா. க.)] ச ஸுகதே, காரயிம் தத³னுச்ச²வே.

22. ‘‘குருவிந்தே³ மது⁴ஸித்தே², தேலம் ஹத்த²ப்பதாபகம்;

ஸிபாடிப²லகே ஸுசீ, மஞ்சம் அத்த²ரணேன ச.

23. ‘‘ஸேனாஸனே பாத³புஞ்சே², ஸயனாஸனத³ண்ட³கே;

த³ந்தபோணே ச ஆடலீ [கத²லிம் (ஸ்யா.)], ஸீஸாலேபனக³ந்த⁴கே.

24. ‘‘அரணீ ப²லபீடே² [பலாலபீடே² (ஸீ.)] ச, பத்தபிதா⁴னதா²லகே;

உத³கஸ்ஸ கடச்சூ² ச, சுண்ணகம் ரஜனம்ப³ணம் [ரஜனம்மணம் (ஸீ.)].

25. ‘‘ஸம்மஜ்ஜனம் [ஸம்முஞ்ஜனம் (ஸ்யா.), ஸம்மஜ்ஜனிம், ஸம்முஞ்ஜனிம் (?)] உத³பத்தம், ததா² வஸ்ஸிகஸாடிகம்;

நிஸீத³னம் கண்டு³ச்சா²தி³, அத² அந்தரவாஸகம்.

26. ‘‘உத்தராஸங்க³ஸங்கா⁴டீ, நத்து²கம் முக²ஸோத⁴னம்;

பி³ளங்க³லோணம் பஹூதஞ்ச [லோணபூ⁴தஞ்ச (க.)], மது⁴ஞ்ச த³தி⁴பானகம்.

27. ‘‘தூ⁴பம் [தூ⁴மம் (க.)] ஸித்த²ம் பிலோதிஞ்ச, முக²புஞ்ச²னஸுத்தகம்;

தா³தப்³ப³ம் நாம யம் அத்தி², யஞ்ச கப்பதி ஸத்து²னோ.

28. ‘‘ஸப்³ப³மேதம் ஸமானேத்வா, ஆனந்த³ம் உபஸங்கமிம்;

உபஸங்கம்ம ராஜானம், ஜனேதாரம் மஹேஸினோ [மஹேஸினம் (ஸீ.), மஹாயஸம் (ஸ்யா.), மஹிஸ்ஸரம் (க.)];

ஸிரஸா அபி⁴வாதே³த்வா, இத³ம் வசனமப்³ரவிம்.

(தா³னோகாஸயாசனா)

29. ‘‘‘ஏகதோ ஜாதஸம்வத்³தா⁴, உபி⁴ன்னம் ஏகதோ மனம் [யஸோ (ஸ்யா.), மனோ (?)];

ஸாதா⁴ரணா ஸுக²து³க்கே², உபோ⁴ ச அனுவத்தகா.

30. ‘‘‘அத்தி² சேதஸிகம் து³க்க²ம், தவாதே⁴ய்யம் அரிந்த³ம;

யதி³ ஸக்கோஸி தம் து³க்க²ம், வினோதே³ய்யாஸி க²த்திய.

31. ‘‘‘தவ து³க்க²ம் மம து³க்க²ம், உபி⁴ன்னம் ஏகதோ மனோ [மனம் (ஸீ. ஸ்யா.)];

நிட்டி²தந்தி விஜானாஹி, மமாதே⁴ய்யம் ஸசே துவம்.

32. ‘‘‘ஜானாஹி கோ² மஹாராஜ, து³க்க²ம் மே து³ப்³பி³னோத³யம்;

பஹு ஸமானோ க³ஜ்ஜஸு, ஏகம் தே து³ச்சஜம் வரம்.

33. ‘‘‘யாவதா விஜிதே அத்தி², யாவதா மம ஜீவிதம்;

ஏதேஹி யதி³ தே அத்தோ², த³ஸ்ஸாமி அவிகம்பிதோ.

34. ‘‘‘க³ஜ்ஜிதம் கோ² தயா தே³வ, மிச்சா² தம் ப³ஹு க³ஜ்ஜிதம்;

ஜானிஸ்ஸாமி துவம் அஜ்ஜ, ஸப்³ப³த⁴ம்மே [ஸச்சத⁴ம்மே (?)] பதிட்டி²தம்.

35. ‘‘‘அதிபா³ள்ஹம் நிபீளேஸி, த³த³மானஸ்ஸ மே ஸதோ;

கிம் தே மே பீளிதேனத்தோ², பத்தி²தம் தே கதே²ஹி மே.

36. ‘‘‘இச்சா²மஹம் மஹாராஜ, பு³த்³த⁴ஸேட்ட²ம் அனுத்தரம்;

போ⁴ஜயிஸ்ஸாமி ஸம்பு³த்³த⁴ம், வஜ்ஜம் [வஞ்சும் (?)] மே மாஹு ஜீவிதம்.

37. ‘‘‘அஞ்ஞம் தேஹம் வரம் த³ம்மி, மா யாசித்தோ² ததா²க³தம் [அயாசிதோ ததா²க³தோ (ஸ்யா. க.)];

அதே³ய்யோ கஸ்ஸசி பு³த்³தோ⁴, மணி ஜோதிரஸோ யதா².

38. ‘‘‘நனு தே க³ஜ்ஜிதம் தே³வ, யாவ ஜீவிதமத்தனோ [விஜிதமத்தி²தம் (க.), ஜீவிதமத்தி²கம் (ஸ்யா.)];

ஜீவிதம் [விஜிதம் (க.)] த³த³மானேன, யுத்தம் தா³தும் ததா²க³தம்.

39. ‘‘‘ட²பனீயோ மஹாவீரோ, அதே³ய்யோ கஸ்ஸசி ஜினோ;

ந மே படிஸ்ஸுதோ பு³த்³தோ⁴, வரஸ்ஸு அமிதம் த⁴னம்.

40. ‘‘‘வினிச்ச²யம் பாபுணாம, புச்சி²ஸ்ஸாம வினிச்ச²யே;

யதா²ஸண்ட²ம் [யதா²ஸந்தம் (ஸீ.)] கதே²ஸ்ஸந்தி, படிபுச்சா²ம தம் ததா².

41. ‘‘‘ரஞ்ஞோ ஹத்தே² க³ஹேத்வான, அக³மாஸிம் வினிச்ச²யம்;

புரதோ அக்க²த³ஸ்ஸானம், இத³ம் வசனமப்³ரவிம்.

42. ‘‘‘ஸுணந்து மே அக்க²த³ஸ்ஸா, ராஜா வரமதா³ஸி மே;

ந கிஞ்சி ட²பயித்வான, ஜீவிதம்பி [விஜிதம்பி (க.)] பவாரயி.

43. ‘‘‘தஸ்ஸ மே வரதி³ன்னஸ்ஸ, பு³த்³த⁴ஸேட்ட²ம் வரிம் அஹம்;

ஸுதி³ன்னோ ஹோதி மே பு³த்³தோ⁴, சி²ந்த³த² ஸம்ஸயம் மம.

44. ‘‘‘ஸோஸ்ஸாம தவ வசனம், பூ⁴மிபாலஸ்ஸ ராஜினோ;

உபி⁴ன்னம் வசனம் ஸுத்வா, சி²ந்தி³ஸ்ஸாமேத்த² ஸம்ஸயம்.

45. ‘‘‘ஸப்³ப³ம் தே³வ தயா தி³ன்னம், இமஸ்ஸ ஸப்³ப³கா³ஹிகம் [ஸப்³ப³கா³ஹிதம் (ஸ்யா. க.)];

ந கிஞ்சி ட²பயித்வான, ஜீவிதம்பி பவாரயி.

46. ‘‘‘கிச்ச²ப்பத்தோவ ஹுத்வான, யாசீ வரமனுத்தரம் [யாவஜீவமனுத்தரம் (ஸ்யா. க.)];

இமம் ஸுது³க்கி²தம் ஞத்வா, அதா³ஸிம் ஸப்³ப³கா³ஹிகம்.

47. ‘‘‘பராஜயோ துவம் [தவம் (ஸீ.)] தே³வ, அஸ்ஸ தே³ய்யோ ததா²க³தோ;

உபி⁴ன்னம் ஸம்ஸயோ சி²ன்னோ, யதா²ஸண்ட²ம்ஹி [யதா²ஸந்தம்ஹி (ஸீ.)] திட்ட²த².

48. ‘‘‘ராஜா தத்தே²வ ட²த்வான, அக்க²த³ஸ்ஸேதத³ப்³ரவி;

ஸம்மா மய்ஹம்பி தே³ய்யாத², புன பு³த்³த⁴ம் லபா⁴மஹம்.

49. ‘‘‘பூரேத்வா தவ ஸங்கப்பம், போ⁴ஜயித்வா ததா²க³தம்;

புன தே³ய்யாஸி [தே³ய்யாத² (க.)] ஸம்பு³த்³த⁴ம், ஆனந்த³ஸ்ஸ யஸஸ்ஸினோ’.

(நிமந்தனகதா²)

50. ‘‘அக்க²த³ஸ்ஸேபி⁴வாதே³த்வா, ஆனந்த³ஞ்சாபி க²த்தியம்;

துட்டோ² பமுதி³தோ ஹுத்வா, ஸம்பு³த்³த⁴முபஸங்கமிம்.

51. ‘‘உபஸங்கம்ம ஸம்பு³த்³த⁴ம், ஓக⁴திண்ணமனாஸவம்;

ஸிரஸா அபி⁴வாதே³த்வா, இத³ம் வசனமப்³ரவிம்.

52. ‘வஸீஸதஸஹஸ்ஸேஹி, அதி⁴வாஸேஹி சக்கு²ம;

ஹாஸயந்தோ மம சித்தம், நிவேஸனமுபேஹி மே’.

53. ‘‘பது³முத்தரோ லோகவிதூ³, ஆஹுதீனம் படிக்³க³ஹோ;

மம ஸங்கப்பமஞ்ஞாய, அதி⁴வாஸேஸி சக்கு²மா.

54. ‘‘அதி⁴வாஸனமஞ்ஞாய, அபி⁴வாதி³ய ஸத்து²னோ;

ஹட்டோ² உத³க்³க³சித்தோஹம், நிவேஸனமுபாக³மிம்.

(தா³னபடியாத³னம்)

55. ‘‘மித்தாமச்சே ஸமானேத்வா, இத³ம் வசனமப்³ரவிம்;

‘ஸுது³ல்லபோ⁴ மயா லத்³தோ⁴, மணி ஜோதிரஸோ யதா².

56. ‘‘‘கேன தம் பூஜயிஸ்ஸாம, அப்பமேய்யோ அனூபமோ;

அதுலோ அஸமோ தீ⁴ரோ, ஜினோ அப்படிபுக்³க³லோ.

57. ‘‘‘ததா²ஸமஸமோ சேவ, அது³தியோ நராஸபோ⁴;

து³க்கரம் அதி⁴காரஞ்ஹி, பு³த்³தா⁴னுச்ச²விகம் மயா.

58. ‘‘‘நானாபுப்பே² ஸமானேத்வா, கரோம புப்ப²மண்ட³பம்;

பு³த்³தா⁴னுச்ச²விகம் ஏதம், ஸப்³ப³பூஜா ப⁴விஸ்ஸதி’.

59. ‘‘உப்பலம் பது³மம் வாபி, வஸ்ஸிகம் அதி⁴முத்தகம் [அதிமுத்தகம் (?)];

சம்பகம் [சந்த³னம் (க.)] நாக³புப்ப²ஞ்ச, மண்ட³பம் காரயிம் அஹம்.

60. ‘‘ஸதாஸனஸஹஸ்ஸானி, ச²த்தச்சா²யாய பஞ்ஞபிம்;

பச்சி²மம் ஆஸனம் மய்ஹம், அதி⁴கம் ஸதமக்³க⁴தி.

61. ‘‘ஸதாஸனஸஹஸ்ஸானி, ச²த்தச்சா²யாய பஞ்ஞபிம்;

படியாதே³த்வா அன்னபானம், காலம் ஆரோசயிம் அஹம்.

62. ‘‘ஆரோசிதம்ஹி காலம்ஹி, பது³முத்தரோ மஹாமுனி;

வஸீஸதஸஹஸ்ஸேஹி, நிவேஸனமுபேஸி மே.

63. ‘‘தா⁴ரேந்தம் உபரிச்ச²த்தம் [தா⁴ரேந்தமுபரிச்ச²த்தே (ஸீ.)], ஸுபு²ல்லபுப்ப²மண்ட³பே;

வஸீஸதஸஹஸ்ஸேஹி, நிஸீதி³ புரிஸுத்தமோ.

64. ‘‘‘ச²த்தஸதஸஹஸ்ஸானி, ஸதஸஹஸ்ஸமாஸனம்;

கப்பியம் அனவஜ்ஜஞ்ச, படிக³ண்ஹாஹி சக்கு²ம’.

65. ‘‘பது³முத்தரோ லோகவிதூ³, ஆஹுதீனம் படிக்³க³ஹோ;

மமம் தாரேதுகாமோ ஸோ, ஸம்படிச்சி² மஹாமுனி.

(தா³னகதா²)

66. ‘‘பி⁴க்கு²னோ ஏகமேகஸ்ஸ, பச்சேகம் பத்தமதா³ஸஹம்;

ஜஹிம்ஸு ஸும்ப⁴கம் [புப்³ப³கம் (ஸீ.), ஸம்ப⁴தம் (ஸ்யா.), மத்திகம் (?)] பத்தம், லோஹபத்தம் அதா⁴ரயும்.

67. ‘‘ஸத்தரத்திந்தி³வம் பு³த்³தோ⁴, நிஸீதி³ புப்ப²மண்ட³பே;

போ³த⁴யந்தோ ப³ஹூ ஸத்தே, த⁴ம்மசக்கம் பவத்தயி.

68. ‘‘த⁴ம்மசக்கம் பவத்தேந்தோ, ஹேட்ட²தோ புப்ப²மண்ட³பே;

சுல்லாஸீதிஸஹஸ்ஸானம், த⁴ம்மாபி⁴ஸமயோ அஹு.

69. ‘‘ஸத்தமே தி³வஸே பத்தே, பது³முத்தரோ மஹாமுனி;

ச²த்தச்சா²யாயமாஸீனோ, இமா கா³தா² அபா⁴ஸத².

(ப்³யாகரணம்)

70. ‘‘‘அனூனகம் தா³னவரம், யோ மே பாதா³ஸி மாணவோ;

தமஹம் கித்தயிஸ்ஸாமி, ஸுணாத² மம பா⁴ஸதோ.