1. ஏகபது³மியத்தே²ரஅபதா³னம்

1. ‘‘பது³முத்தரோ நாம ஜினோ, ஸப்³ப³த⁴ம்மான பாரகூ³;

ப⁴வாப⁴வே விபா⁴வேந்தோ, தாரேஸி ஜனதம் ப³ஹும்.

2. ‘‘ஹம்ஸராஜா ததா³ ஹோமி, தி³ஜானம் பவரோ அஹம்;

ஜாதஸ்ஸரம் ஸமோக³ய்ஹ, கீளாமி ஹம்ஸகீளிதம்.

3. ‘‘பது³முத்தரோ லோகவிதூ³, ஆஹுதீனம் படிக்³க³ஹோ;

ஜாதஸ்ஸரஸ்ஸ உபரி, ஆக³ச்சி² தாவதே³ ஜினோ.

4. ‘‘தி³ஸ்வானஹம் தே³வதே³வம், ஸயம்பு⁴ம் லோகனாயகம்;

வண்டே சே²த்வான பது³மம், ஸதபத்தம் மனோரமம்.

5. ‘‘முக²துண்டே³ன பக்³க³ய்ஹ, பஸன்னோ லோகனாயகே [விப்பஸன்னேன சேதஸா (ஸ்யா.)];

உக்கி²பித்வான க³க³ணே [உக்கி²பித்வா நலாடேன (க.)], பு³த்³த⁴ஸேட்ட²ம் அபூஜயிம்.

6. ‘‘பது³முத்தரோ லோகவிதூ³, ஆஹுதீனம் படிக்³க³ஹோ;

அந்தலிக்கே² டி²தோ ஸத்தா², அகா மே அனுமோத³னம்.

7. ‘‘‘இமினா ஏகபது³மேன, சேதனாபணிதீ⁴ஹி ச;

கப்பானம் ஸதஸஹஸ்ஸம், வினிபாதம் ந க³ச்ச²ஸி’.

8. ‘‘இத³ம் வத்வான ஸம்பு³த்³தோ⁴, ஜலஜுத்தமனாமகோ;

மம கம்மம் பகித்தேத்வா, அக³மா யேன பத்தி²தம்.

9. ‘‘ஸதஸஹஸ்ஸிதோ கப்பே, யம் கம்மமகரிம் ததா³;

து³க்³க³திம் நாபி⁴ஜானாமி, பு³த்³த⁴பூஜாயித³ம் ப²லம்.

10. ‘‘படிஸம்பி⁴தா³ சதஸ்ஸோ, விமோக்கா²பி ச அட்டி²மே;

ச²ளபி⁴ஞ்ஞா ஸச்சி²கதா, கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா ஏகபது³மியோ தே²ரோ இமா கா³தா²யோ அபா⁴ஸித்தா²தி.

ஏகபது³மியத்தே²ரஸ்ஸாபதா³னம் பட²மம்.