7. உபஸேனவங்க³ந்தபுத்தத்தே²ரஅபதா³னம்

86. ‘‘பது³முத்தரம் ப⁴க³வந்தம், லோகஜேட்ட²ம் நராஸப⁴ம்;

பப்³பா⁴ரம்ஹி நிஸீத³ந்தம், உபக³ச்சி²ம் நருத்தமம்.

87. ‘‘கணிகாரபுப்ப²ம் [கணிகாரம் புப்பி²தம் (ஸீ. ஸ்யா.)] தி³ஸ்வா, வண்டே சே²த்வானஹம் ததா³;

அலங்கரித்வா ச²த்தம்ஹி, பு³த்³த⁴ஸ்ஸ அபி⁴ரோபயிம்.

88. ‘‘பிண்ட³பாதஞ்ச பாதா³ஸிம், பரமன்னம் ஸுபோ⁴ஜனம்;

பு³த்³தே⁴ன நவமே தத்த², ஸமணே அட்ட² போ⁴ஜயிம்.

89. ‘‘அனுமோதி³ மஹாவீரோ, ஸயம்பூ⁴ அக்³க³புக்³க³லோ;

இமினா ச²த்ததா³னேன, பரமன்னபவேச்ச²னா.

90. ‘‘தேன சித்தப்பஸாதே³ன, ஸம்பத்திமனுபோ⁴ஸ்ஸஸி;

ச²த்திம்ஸக்க²த்தும் தே³விந்தோ³, தே³வரஜ்ஜம் கரிஸ்ஸதி.

91. ‘‘ஏகவீஸதிக்க²த்துஞ்ச, சக்கவத்தீ ப⁴விஸ்ஸதி;

பதே³ஸரஜ்ஜம் விபுலம், க³ணனாதோ அஸங்கி²யம்.

92. ‘‘ஸதஸஹஸ்ஸிதோ கப்பே, ஓக்காககுலஸம்ப⁴வோ;

கோ³தமோ நாம கோ³த்தேன, ஸத்தா² லோகே ப⁴விஸ்ஸதி [யம் வத³ந்தி ஸுமேதோ⁴தி, பூ⁴ரிபஞ்ஞம் ஸுமேத⁴ஸம்; கப்பேதோ ஸதஸஹஸ்ஸே, ஏஸ பு³த்³தோ⁴ ப⁴விஸ்ஸதி; (க.)].

93. ‘‘ஸாஸனே தி³ப்³ப³மானம்ஹி, மனுஸ்ஸத்தம் க³மிஸ்ஸதி;

தஸ்ஸ த⁴ம்மேஸு தா³யாதோ³, ஓரஸோ த⁴ம்மனிம்மிதோ.

94. ‘‘உபஸேனோதி நாமேன, ஹேஸ்ஸதி ஸத்து² ஸாவகோ;

[இத³ம் பாத³த்³வயம் தே²ரகா³தா²அட்ட²கதா²யமேவ தி³ஸ்ஸதி] ஸமந்தபாஸாதி³கத்தா, அக்³க³ட்டா²னே ட²பேஸ்ஸதி

[இத³ம் பாத³த்³வயம் தே²ரகா³தா²அட்ட²கதா²யமேவ தி³ஸ்ஸதி].

95. ‘‘சரிமம் வத்ததே மய்ஹம், ப⁴வா ஸப்³பே³ ஸமூஹதா;

தா⁴ரேமி அந்திமம் தே³ஹம், ஜேத்வா மாரம் ஸவாஹனம் [ஸவாஹினிம் (?)].

96. ‘‘படிஸம்பி⁴தா³ சதஸ்ஸோ, விமோக்கா²பி ச அட்டி²மே;

ச²ளபி⁴ஞ்ஞா ஸச்சி²கதா, கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா உபஸேனோ வங்க³ந்தபுத்தோ தே²ரோ இமா கா³தா²யோ அபா⁴ஸித்தா²தி.

உபஸேனவங்க³ந்தபுத்தத்தே²ரஸ்ஸாபதா³னம் ஸத்தமம்.

ததியபா⁴ணவாரம்.