6. அங்கோலபுப்பி²யத்தே²ரஅபதா³னம்

29. ‘‘நாரதோ³ [வரதோ³ (க.)] இதி மே நாமம், கஸ்ஸபோ இதி மம் விதூ³;

அத்³த³ஸம் ஸமணானக்³க³ம், விபஸ்ஸிம் தே³வஸக்கதம்.

30. ‘‘அனுப்³யஞ்ஜனத⁴ரம் பு³த்³த⁴ம், ஆஹுதீனம் படிக்³க³ஹம்;

அங்கோலபுப்ப²ம் [வகுலபுப்ப²ம் (ஸ்யா.), ப³கோலபுப்ப²ம் (க.)] பக்³க³ய்ஹ, பு³த்³த⁴ஸ்ஸ அபி⁴ரோபயிம்.

31. ‘‘ஏகனவுதிதோ கப்பே, யம் புப்ப²மபி⁴பூஜயிம்;

து³க்³க³திம் நாபி⁴ஜானாமி, பு³த்³த⁴பூஜாயித³ம் ப²லம்.

32. ‘‘சதுஸத்ததிதோ கப்பே, ரோமஸோ நாம க²த்தியோ;

ஆமுக்கமாலாப⁴ரணோ, ஸயோக்³க³ப³லவாஹனோ.

33. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா அங்கோலபுப்பி²யோ [வகுலபுப்பி²யோ (ஸ்யா.), ப³கோலபுப்பி²யோ (க.)] தே²ரோ இமா கா³தா²யோ அபா⁴ஸித்தா²தி.

அங்கோலபுப்பி²யத்தே²ரஸ்ஸாபதா³னம் ச²ட்ட²ம்.