1. ஸேரேய்யகத்தே²ரஅபதா³னம்

1. ‘‘அஜ்ஜா²யகோ மந்தத⁴ரோ, திண்ணம் வேதா³ன பாரகூ³;

அப்³போ⁴காஸே டி²தோ ஸந்தோ, அத்³த³ஸம் லோகனாயகம்.

2. ‘‘ஸீஹம் யதா² வனசரம், ப்³யக்³க⁴ராஜம்வ நித்தஸம்;

திதா⁴பபி⁴ன்னமாதங்க³ம், குஞ்ஜரம்வ மஹேஸினம்.

3. ‘‘ஸேரேய்யகம் க³ஹேத்வான, ஆகாஸே உக்கி²பிம் [நிக்கி²பிம் (க.)] அஹம்;

பு³த்³த⁴ஸ்ஸ ஆனுபா⁴வேன, பரிவாரேந்தி ஸப்³ப³ஸோ [ஸப்³ப³தோ (ஸீ.)].

4. ‘‘அதி⁴ட்ட²ஹி மஹாவீரோ, ஸப்³ப³ஞ்ஞூ லோகனாயகோ;

ஸமந்தா புப்ப²ச்ச²த³னா, ஓகிரிம்ஸு நராஸப⁴ம்.

5. ‘‘ததோ ஸா புப்ப²கஞ்சுகா, அந்தோவண்டா ப³ஹிமுகா²;

ஸத்தாஹம் ச²த³னம் கத்வா, ததோ அந்தரதா⁴யத².

6. ‘‘தஞ்ச அச்ச²ரியம் தி³ஸ்வா, அப்³பு⁴தம் லோமஹம்ஸனம்;

பு³த்³தே⁴ சித்தம் பஸாதே³ஸிம், ஸுக³தே லோகனாயகே.

7. ‘‘தேன சித்தப்பஸாதே³ன, ஸுக்கமூலேன சோதி³தோ;

கப்பானம் ஸதஸஹஸ்ஸம், து³க்³க³திம் நுபபஜ்ஜஹம்.

8. ‘‘பன்னரஸஸஹஸ்ஸம்ஹி, கப்பானம் பஞ்சவீஸதி;

வீதமலா [சித்தமாலா (ஸீ.), விலாமாலா (ஸ்யா.)] ஸமானா ச, சக்கவத்தீ மஹப்³ப³லா.

9. ‘‘படிஸம்பி⁴தா³ சதஸ்ஸோ, விமோக்கா²பி ச அட்டி²மே;

ச²ளபி⁴ஞ்ஞா ஸச்சி²கதா, கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஆயஸ்மா ஸேரேய்யகோ தே²ரோ இமா கா³தா²யோ அபா⁴ஸித்தா²தி.

ஸேரேய்யகத்தே²ரஸ்ஸாபதா³னம் பட²மம்.