7. கதி²னக்க²ந்த⁴கம்

கதி²னானுஜானனகதா²

306. கதி²னக்க²ந்த⁴கே – பாவேய்யகாதி பாவேய்யரட்ட²வாஸினோ. பாவேய்யம் நாம கோஸலேஸு பச்சி²மதி³ஸாபா⁴கே³ ரட்ட²ம்; தத்த² வாஸினோதி வுத்தம் ஹோதி. கோஸலரஞ்ஞோ ஏகபிதுகபா⁴தூனம் ப⁴த்³த³வக்³கி³யத்தே²ரானம் ஏதம் அதி⁴வசனம். தேஸு ஸப்³ப³ஜேட்ட²கோ அனாகா³மீ, ஸப்³ப³பச்சி²மகோ ஸோதாபன்னோ, ஏகோபி அரஹா வா புது²ஜ்ஜனோ வா நத்தி². ஆரஞ்ஞிகாதி து⁴தங்க³ஸமாதா³னவஸேன ஆரஞ்ஞிகா; ந அரஞ்ஞவாஸமத்தேன. பிண்ட³பாதிகாதி³பா⁴வேபி தேஸம் ஏஸேவ நயோ. ஸீஸவஸேன சேதம் வுத்தம். இமே பன தேரஸாபி து⁴தங்கா³னி ஸமாதா³யேவ வத்தந்தி. உத³கஸங்க³ஹேதி உத³கேன ஸங்க³ஹிதே க⁴டிதே ஸம்ஸட்டே²; த²லே ச நின்னே ச ஏகோத³கீபூ⁴தேதி அத்தோ².

உத³கசிக்க²ல்லேதி அக்கந்தஅக்கந்தட்டா²னே உத³கசிக்க²ல்லோ உட்ட²ஹித்வா யாவ ஆனிஸதா³ பஹரதி, ஈதி³ஸே சிக்க²ல்லேதி அத்தோ². ஓகபுண்ணேஹீதி உத³கபுண்ணேஹி. தேஸம் கிர சீவரானி க⁴னானி, தேஸு பதிதம் உத³கம் ந பக்³க⁴ரதி க⁴னத்தா புடப³த்³த⁴ம் விய திட்ட²தி. தேன வுத்தம் – ‘‘ஓகபுண்ணேஹி சீவரேஹீ’’தி. ‘‘ஓக⁴புண்ணேஹீ’’திபி பாடோ².

அவிவத³மானா வஸ்ஸம் வஸிம்ஹாதி ஏத்த² ஆக³ந்துகட்டா²னே ஸேனாஸனபா²ஸுதாய அபா⁴வேன ச ப⁴க³வதோ த³ஸ்ஸனாலாபே⁴ன உக்கண்டி²ததாய ச தே பி⁴க்கூ² பா²ஸும் ந வஸிம்ஸு, தஸ்மா ‘‘அவிவத³மானா பா²ஸுகம் வஸ்ஸம் வஸிம்ஹா’’தி நாவோசும். த⁴ம்மிம் கத²ம் கத்வாதி ப⁴க³வா தேஸம் பி⁴க்கூ²னம் அனமதக்³கி³யகத²ம் கதே²ஸி. தே ஸப்³பே³பி கதா²பரியோஸானே அரஹத்தம் பாபுணித்வா நிஸின்னட்டா²னதோயேவ ஆகாஸே உப்பதித்வா அக³மம்ஸு, தம் ஸந்தா⁴ய வுத்தம் – ‘‘த⁴ம்மிம் கத²ம் கத்வா’’தி. ததோ ப⁴க³வா ‘‘ஸசே கதி²னத்தா²ரோ பஞ்ஞத்தோ அப⁴விஸ்ஸ, ஏதே பி⁴க்கூ² ஏகம் சீவரம் ட²பேத்வா ஸந்தருத்தரேன ஆக³ச்ச²ந்தா ந ஏவம் கிலந்தா அஸ்ஸு, கதி²னத்தா²ரோ ச நாமேஸ ஸப்³ப³பு³த்³தே⁴ஹி அனுஞ்ஞாதோ’’தி சிந்தேத்வா கதி²னத்தா²ரம் அனுஜானிதுகாமோ பி⁴க்கூ² ஆமந்தேஸி, ஆமந்தேத்வா ச பன ‘‘அனுஜானாமி பி⁴க்க²வே’’திஆதி³மாஹ.

தத்த² அத்த²தகதி²னானம் வோதி நிபாதமத்தம் வோகாரோ; அத்த²தகதி²னானந்தி அத்தோ². ஏவஞ்ஹி ஸதி பரதோ ‘‘ஸோ நேஸம் ப⁴விஸ்ஸதீ’’தி யுஜ்ஜதி. அத² வா வோதி ஸாமிவசனமேவேதம். ஸோ நேஸந்தி ஏத்த² பன ஸோ சீவருப்பாதோ³ யே அத்த²தகதி²னா, தேஸம் ப⁴விஸ்ஸதீதி அத்தோ².

தத்த² அனாமந்தசாரோதி யாவ கதி²னம் ந உத்³த⁴ரியதி, தாவ அனாமந்தேத்வா சரணம் கப்பிஸ்ஸதி, சாரித்தஸிக்கா²பதே³ன அனாபத்தி ப⁴விஸ்ஸதீதி அத்தோ². அஸமாதா³னசாரோதி திசீவரம் அஸமாதா³ய சரணம்; சீவரவிப்பவாஸோ கப்பிஸ்ஸதீதி அத்தோ². க³ணபோ⁴ஜனந்தி க³ணபோ⁴ஜனம்பி கப்பிஸ்ஸதி. யாவத³த்த²சீவரந்தி யாவத்தகேன சீவரேன அத்தோ², தாவத்தகம் அனதி⁴ட்டி²தம் அவிகப்பிதம் கப்பிஸ்ஸதீதி அத்தோ². யோ ச தத்த² சீவருப்பாதோ³தி தத்த² கதி²னத்த²தஸீமாயம் மதகசீவரம் வா ஹோது ஸங்க⁴ம் உத்³தி³ஸ்ஸ தி³ன்னம் வா ஸங்கி⁴கேன தத்ருப்பாதே³ன ஆப⁴தம் வா, யேன கேனசி ஆகாரேன யம் ஸங்கி⁴கசீவரம் உப்பஜ்ஜதி, தம் தேஸம் ப⁴விஸ்ஸதீதி அத்தோ².

ஏவஞ்ச பன பி⁴க்க²வே கதி²னம் அத்த²ரிதப்³ப³ந்தி ஏத்த² கதி²னத்தா²ரம் கே லப⁴ந்தி, கே ந லப⁴ந்தீதி? க³ணனவஸேன தாவ பச்சி²மகோடியா பஞ்ச ஜனா லப⁴ந்தி, உத்³த⁴ம் ஸதஸஹஸ்ஸம்பி, பஞ்சன்னம் ஹேட்டா² ந லப⁴ந்தி. வுத்த²வஸ்ஸவஸேன புரிமிகாய வஸ்ஸம் உபக³ந்த்வா பட²மபவாரணாய பவாரிதா லப⁴ந்தி, சி²ன்னவஸ்ஸா வா பச்சி²மிகாய உபக³தா வா ந லப⁴ந்தி, அஞ்ஞஸ்மிம் விஹாரே வுத்த²வஸ்ஸாபி ந லப⁴ந்தீதி மஹாபச்சரியம் வுத்தம். புரிமிகாய உபக³தானம் பன ஸப்³பே³ க³ணபூரகா ஹோந்தி, ஆனிஸம்ஸம் ந லப⁴ந்தி, ஆனிஸம்ஸோ இதரேஸம்யேவ ஹோதி. ஸசே புரிமிகாய உபக³தா சத்தாரோ வா ஹோந்தி தயோ வா த்³வே வா ஏகோ வா, இதரே க³ணபூரகே கத்வா கதி²னம் அத்த²ரிதப்³ப³ம். அத² சத்தாரோ பி⁴க்கூ² உபக³தா, ஏகோ பரிபுண்ணவஸ்ஸோ ஸாமணேரோ, ஸோ சே பச்சி²மிகாய உபஸம்பஜ்ஜதி, க³ணபூரகோ சேவ ஹோதி, ஆனிஸம்ஸஞ்ச லப⁴தி. தயோ பி⁴க்கூ² த்³வே ஸாமணேரா, த்³வே பி⁴க்கூ² தயோ ஸாமணேரா, ஏகோ பி⁴க்கு² சத்தாரோ ஸாமணேராதி ஏத்தா²பி ஏஸேவ நயோ. ஸசே புரிமிகாய உபக³தா கதி²னத்தா²ரகுஸலா ந ஹோந்தி, அத்தா²ரகுஸலா க²ந்த⁴கபா⁴ணகதே²ரா பரியேஸித்வா ஆனேதப்³பா³. கம்மவாசம் ஸாவேத்வா கதி²னம் அத்த²ராபேத்வா தா³னஞ்ச பு⁴ஞ்ஜித்வா க³மிஸ்ஸந்தி. ஆனிஸம்ஸோ பன இதரேஸம்யேவ ஹோதி.

கதி²னம் கேன தி³ன்னம் வட்டதி? யேன கேனசி தே³வேன வா மனுஸ்ஸேன வா பஞ்சன்னம் வா ஸஹத⁴ம்மிகானம் அஞ்ஞதரேன தி³ன்னம் வட்டதி. கதி²னதா³யகஸ்ஸ வத்தம் அத்தி², ஸசே ஸோ தம் அஜானந்தோ புச்ச²தி – ‘‘ப⁴ந்தே கத²ம் கதி²னம் தா³தப்³ப³’’ந்தி தஸ்ஸ ஏவம் ஆசிக்கி²தப்³ப³ம் – ‘‘திண்ணம் சீவரானம் அஞ்ஞதரப்பஹோனகம் ஸூரியுக்³க³மனஸமயே வத்த²ம் ‘கதி²னசீவரம் தே³மா’தி தா³தும் வட்டதி, தஸ்ஸ பரிகம்மத்த²ம் ஏத்தகா நாம ஸூசியோ, ஏத்தகம் ஸுத்தம், ஏத்தகம் ரஜனம், பரிகம்மம் கரோந்தானம் ஏத்தகானம் பி⁴க்கூ²னம் யாகு³ப⁴த்தஞ்ச தா³தும் வட்டதீ’’தி.

கதி²னத்தா²ரகேனாபி த⁴ம்மேன ஸமேன உப்பன்னம் கதி²னம் அத்த²ரந்தேன வத்தம் ஜானிதப்³ப³ம். தந்தவாயகே³ஹதோ ஹி ஆப⁴தஸந்தானேனேவ க²லிமக்கி²தஸாடகோ ந வட்டதி, மலீனஸாடகோபி ந வட்டதி, தஸ்மா கதி²னத்தா²ரஸாடகம் லபி⁴த்வா ஸுட்டு² தோ⁴வித்வா ஸூசிஆதீ³னி சீவரகம்மூபகரணானி ஸஜ்ஜேத்வா ப³ஹூஹி பி⁴க்கூ²ஹி ஸத்³தி⁴ம் தத³ஹேவ ஸிப்³பி³த்வா நிட்டி²தஸூசிகம்மம் ரஜித்வா கப்பபி³ந்து³ம் த³த்வா கதி²னம் அத்த²ரிதப்³ப³ம். ஸசே தஸ்மிம் அனத்த²தேயேவ அஞ்ஞம் கதி²னஸாடகம் ஆஹரதி, அஞ்ஞானி ச ப³ஹூனி கதி²னானிஸம்ஸவத்தா²னி தே³தி, யோ ஆனிஸம்ஸம் ப³ஹும் தே³தி, தஸ்ஸ ஸந்தகேனேவ அத்த²ரிதப்³ப³ம். இதரோ யதா² ததா² ஓவதி³த்வா ஸஞ்ஞாபேதப்³போ³.

கதி²னம் பன கேன அத்த²ரிதப்³ப³ம்? யஸ்ஸ ஸங்கோ⁴ கதி²னசீவரம் தே³தி. ஸங்கே⁴ன பன கஸ்ஸ தா³தப்³ப³ம்? யோ ஜிண்ணசீவரோ ஹோதி. ஸசே ப³ஹூ ஜிண்ணசீவரா ஹோந்தி, வுட்³ட⁴ஸ்ஸ தா³தப்³ப³ம். வுட்³டே⁴ஸுபி யோ மஹாபரிஸோ தத³ஹேவ சீவரம் கத்வா அத்த²ரிதும் ஸக்கோதி, தஸ்ஸ தா³தப்³ப³ம். ஸசே வுட்³டோ⁴ ந ஸக்கோதி நவகதரோ ஸக்கோதி, தஸ்ஸ தா³தப்³ப³ம். அபிச ஸங்கே⁴ன மஹாதே²ரஸ்ஸ ஸங்க³ஹம் காதும் வட்டதி, தஸ்மா ‘‘தும்ஹே ப⁴ந்தே க³ண்ஹத², மயம் கத்வா த³ஸ்ஸாமா’’தி வத்தப்³ப³ம். தீஸு சீவரேஸு யம் ஜிண்ணம் ஹோதி, தத³த்தா²ய தா³தப்³ப³ம். பகதியா து³பட்டசீவரஸ்ஸ து³பட்டத்தா²யேவ தா³தப்³ப³ம். ஸசேபிஸ்ஸ ஏகபட்டசீவரம் க⁴னம் ஹோதி, கதி²னஸாடகோ ச பேலவோ, ஸாருப்பத்தா²ய து³பட்டப்பஹோனகமேவ தா³தப்³ப³ம், ‘‘அஹம் அலப⁴ந்தோ ஏகபட்டம் பாருபாமீ’’தி வத³ந்தஸ்ஸாபி து³பட்டம் தா³தும் வட்டதி. யோ பன லோப⁴பகதிகோ ஹோதி, தஸ்ஸ ந தா³தப்³ப³ம். தேனாபி ‘‘கதி²னம் அத்த²ரித்வா பச்சா² ஸிப்³பி³த்வா த்³வே சீவரானி கரிஸ்ஸாமீ’’தி ந க³ஹேதப்³ப³ம். யஸ்ஸ பன தீ³யதி, தஸ்ஸ யேன விதி⁴னா தா³தப்³ப³ம், தம் த³ஸ்ஸேதும் ‘‘ஏவஞ்ச பன பி⁴க்க²வே கதி²னம் அத்த²ரிதப்³ப³’’ந்தி ஆரபி⁴த்வா ஸுணாது மே ப⁴ந்தேதிஆதி³கா தா³னகம்மவாசா தாவ வுத்தா.

ஏவம் தி³ன்னே பன கதி²னே ஸசே தம் கதி²னது³ஸ்ஸம் நிட்டி²தபரிகம்மமேவ ஹோதி, இச்சேதம் குஸலம். நோ சே நிட்டி²தபரிகம்மம் ஹோதி, ‘‘அஹம் தே²ரோ’’தி வா ‘‘ப³ஹுஸ்ஸுதோ’’தி வா ஏகேனாபி அகாதும் ந லப்³ப⁴தி, ஸப்³பே³ஹேவ ஸன்னிபதித்வா தோ⁴வனஸிப்³ப³னரஜனானி நிட்டா²பேதப்³பா³னி. இத³ஞ்ஹி கதி²னவத்தம் நாம பு³த்³த⁴ப்பஸத்த²ம். அதீதே பது³முத்தரோபி ப⁴க³வா கதி²னவத்தம் அகாஸி. தஸ்ஸ கிர அக்³க³ஸாவகோ ஸுஜாதத்தே²ரோ நாம கதி²னம் க³ண்ஹி, தம் ஸத்தா² அட்ட²ஸட்டி²யா பி⁴க்கு²ஸதஸஹஸ்ஸேஹி ஸத்³தி⁴ம் நிஸீதி³த்வா அகாஸி.

கதபரியோஸிதம் பன கதி²னம் க³ஹேத்வா அத்தா²ரகேன பி⁴க்கு²னா ‘‘ஸசே ஸங்கா⁴டியா கதி²னம் அத்த²ரிதுகாமோ ஹோதி, போராணிகா ஸங்கா⁴டி பச்சுத்³த⁴ரிதப்³பா³, நவா ஸங்கா⁴டி அதி⁴ட்டா²தப்³பா³. ‘இமாய ஸங்கா⁴டியா கதி²னம் அத்த²ராமீ’தி வாசா பி⁴ந்தி³தப்³பா³’’திஆதி³னா பரிவாரே வுத்தவிதா⁴னேன கதி²னம் அத்த²ரிதப்³ப³ம். அத்த²ரித்வா ச பன ‘‘தேன கதி²னத்தா²ரகேன பி⁴க்கு²னா ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘அத்த²தம் ப⁴ந்தே ஸங்க⁴ஸ்ஸ கதி²னம், த⁴ம்மிகோ கதி²னத்தா²ரோ, அனுமோத³தா²’தி தேஹி அனுமோத³கேஹி பி⁴க்கூ²ஹி ஏகம்ஸம் உத்தராஸங்க³ம் கரித்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘அத்த²தம் ஆவுஸோ ஸங்க⁴ஸ்ஸ கதி²னம், த⁴ம்மிகோ கதி²னத்தா²ரோ, அனுமோதா³மா’’தி ஏவமாதி³னா பரிவாரே வுத்தவிதா⁴னேனேவ அனுமோதா³பேதப்³ப³ம், இதரேஹி ச அனுமோதி³தப்³ப³ம். ஏவம் ஸப்³பே³ஸம் அத்த²தம் ஹோதி கதி²னம். வுத்தஞ்ஹேதம் பரிவாரே ‘‘த்³வின்னம் புக்³க³லானம் அத்த²தம் ஹோதி கதி²னம் – அத்தா²ரகஸ்ஸ ச அனுமோத³கஸ்ஸ சா’’தி (பரி. 403). புனபி வுத்தம் – ‘‘ந ஸங்கோ⁴ கதி²னம் அத்த²ரதி, ந க³ணோ கதி²னம் அத்த²ரதி, புக்³க³லோ கதி²னம் அத்த²ரதி, ஸங்க⁴ஸ்ஸ அனுமோத³னா க³ணஸ்ஸ அனுமோத³னா புக்³க³லஸ்ஸ அத்தா²ரா ஸங்க⁴ஸ்ஸ அத்த²தம் ஹோதி கதி²னம், க³ணஸ்ஸ அத்த²தம் ஹோதி கதி²னம், புக்³க³லஸ்ஸ அத்த²தம் ஹோதி கதி²னம்’’தி (பரி. 414).

ஏவம் அத்த²தே பன கதி²னே ஸசே கதி²னசீவரேன ஸத்³தி⁴ம் ஆப⁴தம் ஆனிஸம்ஸம் தா³யகா ‘‘யேன அம்ஹாகம் கதி²னம் க³ஹிதம், தஸ்ஸேவ தே³மா’’தி தே³ந்தி, பி⁴க்கு²ஸங்கோ⁴ அனிஸ்ஸரோ. அத² அவிசாரேத்வாவ த³த்வா க³ச்ச²ந்தி, பி⁴க்கு²ஸங்கோ⁴ இஸ்ஸரோ. தஸ்மா ஸசே கதி²னத்தா²ரகஸ்ஸ ஸேஸசீவரானிபி து³ப்³ப³லானி ஹோந்தி, ஸங்கே⁴ன அபலோகேத்வா தேஸம்பி அத்தா²ய வத்தா²னி தா³தப்³பா³னி. கம்மவாசா பன ஏகாயேவ வட்டதி. அவஸேஸே கதி²னானிஸம்ஸே ப³லவவத்தா²னி வஸ்ஸாவாஸிகட்டி²திகாய தா³தப்³பா³னி, டி²திகாய அபா⁴வே தே²ராஸனதோ பட்டா²ய தா³தப்³பா³னி, க³ருப⁴ண்ட³ம் ந பா⁴ஜேதப்³ப³ம். ஸசே பன ஏகஸீமாய ப³ஹூ விஹாரா ஹோந்தி, ஸப்³பே³ பி⁴க்கூ² ஸன்னிபாதேத்வா ஏகத்த² கதி²னம் அத்த²ரிதப்³ப³ம், விஸும் விஸும் அத்த²ரிதும் ந வட்டதி.

308. இதா³னி யதா² ச கதி²னம் அத்த²தம் ஹோதி, யதா² ச அனத்த²தம், தம் விதி⁴ம் வித்தா²ரதோ த³ஸ்ஸேதும் ஏவஞ்ச பன பி⁴க்க²வே அத்த²தம் ஹோதி கதி²னம் ஏவம் அனத்த²தந்தி வத்வா அகரணீயஞ்சேவ மஹாபூ⁴மிகஞ்ச அனத்த²தலக்க²ணம் தாவ த³ஸ்ஸேந்தோ ந உல்லிகி²தமத்தேனாதிஆதி³கே சதுவீஸதி ஆகாரே த³ஸ்ஸேஸி. ததோ பரம் அத்த²தலக்க²ணம் த³ஸ்ஸேந்தோ அஹதேன அத்த²தந்திஆதி³கே ஸத்தரஸ ஆகாரே த³ஸ்ஸேஸி. பரிவாரேபி ஹி ‘‘சதுவீஸதியா ஆகாரேஹி அனத்த²தம் ஹோதி கதி²னம், ஸத்தரஸஹி ஆகாரேஹி அத்த²தம் ஹோதி கதி²ன’’ந்தி இத³மேவ லக்க²ணம் வுத்தம்.

தத்த² உல்லிகி²தமத்தேனாதி தீ³க⁴தோ ச புது²லதோ ச பமாணக்³க³ஹணமத்தேன. பமாணஞ்ஹி க³ண்ஹந்தோ தஸ்ஸ தஸ்ஸ பதே³ஸஸ்ஸ ஸஞ்ஜானனத்த²ம் நகா²தீ³ஹி வா பரிச்சே²த³ம் த³ஸ்ஸேந்தோ உல்லிக²தி, நலாடாதீ³ஸு வா க⁴ம்ஸதி, தஸ்மா தம் பமாணக்³க³ஹணம் ‘‘உல்லிகி²தமத்த’’ந்தி வுச்சதி. தோ⁴வனமத்தேனாதி கதி²னது³ஸ்ஸதோ⁴வனமத்தேன. சீவரவிசாரணமத்தேனாதி ‘‘பஞ்சகம் வா ஸத்தகம் வா நவகம் வா ஏகாத³ஸகம் வா ஹோதூ’’தி ஏவம் விசாரிதமத்தேன. சே²த³னமத்தேனாதி யதா²விசாரிதஸ்ஸ வத்த²ஸ்ஸ சே²த³னமத்தேன. ப³ந்த⁴னமத்தேனாதி மோக⁴ஸுத்தகாரோபனமத்தேன. ஓவட்டியகரணமத்தேனாதி மோக⁴ஸுத்தகானுஸாரேன தீ³க⁴ஸிப்³பி³தமத்தேன. கண்டு³ஸகரணமத்தேனாதி முத்³தி⁴யபத்தப³ந்த⁴னமத்தேன. த³ள்ஹீகம்மகரணமத்தேனாதி த்³வே சிமிலிகாயோ ஏகதோ கத்வா ஸிப்³பி³தமத்தேன. அத² வா பட²மசிமிலிகா க⁴டேத்வா ட²பிதா ஹோதி, கதி²னஸாடகம் தஸ்ஸா குச்சி²சிமிலிகம் கத்வா ஸிப்³பி³தமத்தேனாதிபி அத்தோ². மஹாபச்சரியம் ‘‘பகதிசீவரஸ்ஸ உபஸ்ஸயதா³னேனா’’தி வுத்தம். குருந்தி³யம் பன ‘‘பகதிபத்தப³த்³த⁴சீவரம் து³பட்டம் காதும் குச்சி²சிமிலிகம் அல்லியாபனமத்தேனா’’தி வுத்தம். அனுவாதகரணமத்தேனாதி பிட்டி²அனுவாதாரோபனமத்தேன. பரிப⁴ண்ட³கரணமத்தேனாதி குச்சி²அனஉவாதாரோபனமத்தேன. ஓவத்³தே⁴ய்யகரணமத்தேனாதி ஆக³ந்துகபத்தாரோபனமத்தேன. கதி²னசீவரதோ வா பத்தம் க³ஹேத்வா அஞ்ஞஸ்மிம் அகதி²னசீவரே பத்தாரோபனமத்தேன.

கம்ப³லமத்³த³னமத்தேனாதி ஏகவாரம்யேவ ரஜனே பக்கி²த்தேன த³ந்தவண்ணேன பண்டு³பலாஸவண்ணேன வா. ஸசே பன ஸகிம் வா த்³விக்க²த்தும் வா ரத்தம்பி ஸாருப்பம் ஹோதி, வட்டதி. நிமித்தகதேனாதி ‘‘இமினா து³ஸ்ஸேன கதி²னம் அத்த²ரிஸ்ஸாமீ’’தி ஏவம் நிமித்தகதேன. ஏத்தகமேவ ஹி பரிவாரே வுத்தம். அட்ட²கதா²ஸு பன ‘‘அயம் ஸாடகோ ஸுந்த³ரோ, ஸக்கா இமினா கதி²னம் அத்த²ரிது’ந்தி ஏவம் நிமித்தகம்மம் கத்வா லத்³தே⁴னா’’தி வுத்தம். பரிகதா²கதேனாதி ‘‘கதி²னம் நாம தா³தும் வட்டதி, கதி²னதா³யகோ ப³ஹும் புஞ்ஞம் பஸவதீ’’தி ஏவம் பரிகதா²ய உப்பாதி³தேன. கதி²னம் நாம அதிஉக்கட்ட²ம் வட்டதி, மாதரம்பி விஞ்ஞாபேதும் ந வட்டதி, ஆகாஸதோ ஓதிண்ணஸதி³ஸமேவ வட்டதீதி. குக்குகதேனாதி தாவகாலிகேன. ஸன்னிதி⁴கதேனாதி ஏத்த² து³விதோ⁴ ஸன்னிதி⁴ கரணஸன்னிதி⁴ ச நிசயஸன்னிதி⁴ ச. தத்த² தத³ஹேவ அகத்வா ட²பேத்வா கரணம் கரணஸன்னிதி⁴. ஸங்கோ⁴ அஜ்ஜ கதி²னது³ஸ்ஸம் லபி⁴த்வா புனதி³வஸே தே³தி, அயம் நிசயஸன்னிதி⁴.

நிஸ்ஸக்³கி³யேனாதி ரத்தினிஸ்ஸக்³கி³யேன. பரிவாரேபி வுத்தம் – ‘‘நிஸ்ஸக்³கி³யம் நாம கரியமானே அருணம் உட்ட²ஹதீ’’தி. அகப்பகதேனாதி அனாதி³ன்னகப்பபி³ந்து³னா. அஞ்ஞத்ர ஸங்கா⁴டியாதிஆதீ³ஸு ட²பேத்வா ஸங்கா⁴டிஉத்தராஸங்க³அந்தரவாஸகே அஞ்ஞேன பச்சத்த²ரணாதி³னா அத்த²தம் அனத்த²தம் ஹோதீதி. அஞ்ஞத்ர பஞ்சகேன வா அதிரேகபஞ்சகேன வாதி பஞ்ச வா அதிரேகானி வா க²ண்டா³னி கத்வா மஹாமண்ட³லஅட்³ட⁴மண்ட³லானி த³ஸ்ஸேத்வா கதேனேவ வட்டதி. ஏவஞ்ஹி ஸமண்ட³லிகதம் ஹோதி, தம் ட²பேத்வா அஞ்ஞேன அச்சி²ன்னகேன வா த்³வத்திசதுக²ண்டே³ன வா ந வட்டதி. அஞ்ஞத்ர புக்³க³லஸ்ஸ அத்தா²ராதி புக்³க³லஸ்ஸ அத்தா²ரம் ட²பேத்வா ந அஞ்ஞேன ஸங்க⁴ஸ்ஸ வா க³ணஸ்ஸ வா அத்தா²ரேன அத்த²தம் ஹோதி. நிஸ்ஸீமட்டோ² அனுமோத³தீதி ப³ஹிஉபசாரஸீமாய டி²தோ அனுமோத³தி.

309. அஹதேனாதி அபரிபு⁴த்தேன. அஹதகப்பேனாதி அஹதஸதி³ஸேன ஏகவாரம் வா த்³விக்க²த்தும் வா தோ⁴தேன. பிலோதிகாயாதி ஹதவத்த²கஸாடகேன. பம்ஸுகூலேனாதி தேவீஸதியா கே²த்தேஸு உப்பன்னபம்ஸுகூலேன. பம்ஸுகூலிகபி⁴க்கு²னா சோளகபி⁴க்க²ம் ஆஹிண்டி³த்வா லத்³த⁴சோளகேஹி கதசீவரேனாதிபி குருந்தி³மஹாபச்சரீஸு வுத்தம். பாபணிகேனாதி ஆபணத்³வாரே பதிதபிலோதிகம் க³ஹேத்வா கதி²னத்தா²ய தே³தி, தேனாபி வட்டதீதி அத்தோ². ஸேஸம் வுத்தவிபல்லாஸேனேவ வேதி³தப்³ப³ம். இமஸ்மிம் பன டா²னே ‘‘ஸஹ கதி²னஸ்ஸ அத்தா²ரா கதி த⁴ம்மா ஜாயந்தீ’’திஆதி³ ப³ஹுஅட்ட²கதா²ஸு வுத்தம், தம் ஸப்³ப³ம் பரிவாரே பாளிஆரூள்ஹமேவ, தஸ்மா தத்த² ஆக³தனயேனேவ வேதி³தப்³ப³ம். ந ஹி தேன இத⁴ அவுச்சமானேன கதி²னத்தா²ரகஸ்ஸ கிஞ்சி பரிஹாயதி.

310. ஏவம் கதி²னத்தா²ரம் த³ஸ்ஸேத்வா இதா³னி உப்³பா⁴ரம் த³ஸ்ஸேதும் கத²ஞ்ச பி⁴க்க²வே உப்³ப⁴தம் ஹோதி கதி²னந்திஆதி³மாஹ. தத்த² மாதிகாதி மாதரோ; ஜனேத்தியோதி அத்தோ². கதி²னுப்³பா⁴ரஞ்ஹி ஏதா அட்ட² ஜனேத்தியோ. தாஸு பக்கமனம் அந்தோ அஸ்ஸாதி பக்கமனந்திகா. ஏவம் ஸேஸாபி வேதி³தப்³பா³.

ஆதா³யஸத்தககதா²

311. ந பச்சேஸ்ஸந்தி ந புன ஆக³மிஸ்ஸம். ஏதஸ்மிம் பன பக்கமனந்திகே கதி²னுத்³தா⁴ரே பட²மம் சீவரபலிபோ³தோ⁴ சி²ஜ்ஜதி, பச்சா² ஆவாஸபலிபோ³தோ⁴. ஏவம் பக்கமதோ ஹி சீவரபலிபோ³தோ⁴ அந்தோஸீமாயமேவ சி²ஜ்ஜதி, ஆவாஸபலிபோ³தோ⁴ ஸீமாதிக்கமே. வுத்தம்பி சேதம் பரிவாரே –

‘‘பக்கமனந்திகோ கதி²னுத்³தா⁴ரோ, வுத்தோ ஆதி³ச்சப³ந்து⁴னா;

ஏதஞ்ச தாஹம் விஸ்ஸஜ்ஜிஸ்ஸம், சீவரபலிபோ³தோ⁴ பட²மம் சி²ஜ்ஜதி;

பச்சா² ஆவாஸபலிபோ³தோ⁴ சி²ஜ்ஜதீ’’தி. (பரி. 415);

சீவரம் ஆதா³யாதி அகதசீவரம் ஆதா³ய. ப³ஹிஸீமக³தஸ்ஸாதி அஞ்ஞம் ஸாமந்தவிஹாரம் க³தஸ்ஸ. ஏவம் ஹோதீதி தஸ்மிம் விஹாரே ஸேனாஸனபா²ஸுகம் வா ஸஹாயஸம்பத்திம் வா தி³ஸ்வா ஏவம் ஹோதி. ஏதஸ்மிம் பன நிட்டா²னந்திகே கதி²னுத்³தா⁴ரே ஆவாஸபலிபோ³தோ⁴ பட²மம் சி²ஜ்ஜதி, ஸோ ஹி ‘‘ந பச்சேஸ்ஸ’’ந்தி சித்தே உப்பன்னமத்தேயேவ சி²ஜ்ஜதி. வுத்தம்பி சேதம் –

‘‘நிட்டா²னந்திகோ கதி²னுத்³தா⁴ரோ, வுத்தோ ஆதி³ச்சப³ந்து⁴னா;

ஏதஞ்ச தாஹம் விஸ்ஸஜ்ஜிஸ்ஸம், ஆவாஸபலிபோ³தோ⁴ பட²மம் சி²ஜ்ஜதி;

சீவரே நிட்டி²தே சீவரபலிபோ³தோ⁴ சி²ஜ்ஜதீ’’தி.

ஏதேன நயேன ஸேஸமாதிகாவிப⁴ஜனேபி அத்தோ² வேதி³தப்³போ³. அயம் பன விஸேஸோ – ‘‘ஸன்னிட்டா²னந்திகே த்³வேபி பலிபோ³தா⁴ நேவிமம் சீவரம் காரேஸ்ஸம், ந பச்சேஸ்ஸந்தி சித்தே உப்பன்னமத்தேயேவ ஏகதோ சி²ஜ்ஜந்தீதி. வுத்தஞ்ஹேதம் –

‘‘ஸன்னிட்டா²னந்திகோ கதி²னுத்³தா⁴ரோ, வுத்தோ ஆதி³ச்சப³ந்து⁴னா;

ஏதஞ்ச தாஹம் விஸ்ஸஜ்ஜிஸ்ஸம், த்³வே பலிபோ³தா⁴ அபுப்³ப³ம் அசரிமம் சி²ஜ்ஜந்தீ’’தி.

ஏவம் ஸப்³ப³கதி²னுத்³தா⁴ரேஸு பலிபோ³து⁴பச்சே²தோ³ வேதி³தப்³போ³. ஸோ பன யஸ்மா இமினா ச வுத்தனயேன பரிவாரே ச ஆக³தபா⁴வேன ஸக்கா ஜானிதும், தஸ்மா வித்தா²ரதோ ந வுத்தோ. அயம் பனேத்த² ஸங்கே²போ – நாஸனந்திகே ஆவாஸபலிபோ³தோ⁴ பட²மம் சி²ஜ்ஜதி, சீவரே நட்டே² சீவரபலிபோ³தோ⁴ சி²ஜ்ஜதி. யஸ்மா சீவரே நட்டே² சீவரபலிபோ³தோ⁴ சி²ஜ்ஜதி, தஸ்மா ‘‘நாஸனந்திகோ’’தி வுத்தம்.

ஸவனந்திகே சீவரபலிபோ³தோ⁴ பட²மம் சி²ஜ்ஜதி, தஸ்மா தஸ்ஸ ஸஹ ஸவனேன ஆவாஸபலிபோ³தோ⁴ சி²ஜ்ஜதி.

ஆஸாவச்சே²தி³கே ஆவாஸபலிபோ³தோ⁴ பட²மம் சி²ஜ்ஜதி. சீவராஸாய உபச்சி²ன்னாய சீவரபலிபோ³தோ⁴ சி²ஜ்ஜதி. அயம் பன யஸ்மா ‘‘அனாஸாய லப⁴தி; ஆஸாய ந லப⁴தி; தஸ்ஸ ஏவம் ஹோதி ‘இதே⁴விமம் சீவரம் காரேஸ்ஸம், ந பச்சேஸ்ஸ’’’ந்திஆதி³னா நயேன இதரேஹி உத்³தா⁴ரேஹி ஸத்³தி⁴ம் வோமிஸ்ஸகதே³ஸனோ அனேகப்பபே⁴தோ³ ஹோதி, தஸ்மா பரதோ விஸும் வித்தா²ரேத்வா வுத்தோ, இத⁴ ந வுத்தோ. இத⁴ பன ஸவனந்திகஸ்ஸ அனந்தரம் ஸீமாதிக்கந்திகோ வுத்தோ. தத்த² சீவரபலிபோ³தோ⁴ பட²மம் சி²ஜ்ஜதி, தஸ்ஸ ப³ஹிஸீமே ஆவாஸபலிபோ³தோ⁴ சி²ஜ்ஜதி. ஸஹுப்³பா⁴ரே த்³வே பலிபோ³தா⁴ அபுப்³ப³ம் அசரிமம் சி²ஜ்ஜந்தீதி.

316-325. ஏவம் ஆதா³யவாரே ஸத்தகதி²னுத்³தா⁴ரே த³ஸ்ஸேத்வா புன ஸமாதா³யவாரேபி விப்பகதசீவரஸ்ஸ ஆதா³யஸமாதா³யவாரேஸுபி யதா²ஸம்ப⁴வம் தேயேவ த³ஸ்ஸிதா. ததோ பரம் அந்தோஸீமாயம் ‘‘பச்சேஸ்ஸம் ந பச்சேஸ்ஸ’’ந்தி இமம் விதி⁴ம் அனாமஸித்வாவ ‘‘ந பச்சேஸ்ஸ’’ந்தி இமமேவ ஆமஸித்வா அனதி⁴ட்டி²தேனா’’திஆதி³னா நயேன ச யே யே யுஜ்ஜந்தி, தே தே த³ஸ்ஸிதா. ததோ பரம் ‘‘சீவராஸாய பக்கமதீ’’திஆதி³னா நயேன இதரேஹி ஸத்³தி⁴ம் வோமிஸ்ஸகனயேன அனேகக்க²த்தும் ஆஸாவச்சே²தி³கம் த³ஸ்ஸேத்வா புன தி³ஸம்க³மியவஸேன ச பா²ஸுவிஹாரிகவஸேன ச நிட்டா²னந்திகேஸு யுஜ்ஜமானா கதி²னுத்³தா⁴ரா த³ஸ்ஸிதா. ஏவம் பபே⁴த³தோ கதி²னுத்³தா⁴ரம் த³ஸ்ஸேத்வா இதா³னி யே தேன தேன கதி²னுத்³தா⁴ரேன பலிபோ³தா⁴ சி²ஜ்ஜந்தீதி வுத்தா, தேஸம் படிபக்கே² த³ஸ்ஸேந்தோ த்³வேமே பி⁴க்க²வே கதி²னஸ்ஸ பலிபோ³தா⁴திஆதி³மாஹ. தத்த² சத்தேனாதி யேன சித்தேன ஸோ ஆவாஸோ சத்தோ ஹோதி, தம் சத்தம் நாம, தேன சத்தேன. வந்தமுத்தேஸுபி ஏஸேவ நயோ. ஸேஸம் ஸப்³ப³த்த² உத்தானமேவாதி.

கதி²னக்க²ந்த⁴கவண்ணனா நிட்டி²தா.