8. து³தியசி²க்³க³ளயுக³ஸுத்தவண்ணனா

1118. அட்ட²மே மஹாபத²வீதி சக்கவாளக³ப்³ப⁴ந்தரா மஹாபத²வீ. அதி⁴ச்சமித³ம், ப⁴ந்தேதி இத³ம் அதி⁴ச்சுப்பத்திகம் ஸசே தம் யுக³ம் ந பூதி ப⁴வேய்ய, ஸமுத்³தே³ உத³கம் ந ஸுஸ்ஸேய்ய, ஸோ ச கச்ச²போ ந மரேய்ய, அபி நாம யதி³ச்சா²வஸேன ஸியாதி அத்தோ².

ஏவம் அதி⁴ச்சமித³ம், பி⁴க்க²வேதி ஏத்த² மஹாஸீவத்தே²ரோ சத்தாரி யுகா³னி த³ஸ்ஸேதி – புரத்தி²மசக்கவாளமுக²வட்டியம் டி²தேன புரிஸேன பக்கி²த்தயுக³ஸ்ஸ ஹி சி²க்³க³ளேன தஸ்ஸ அந்த⁴கச்ச²பஸ்ஸ கீ³வாய பவேஸனம் விய மனுஸ்ஸபடிலாபோ⁴ அதி⁴ச்சபடிலாபீ⁴. த³க்கி²ணசக்கவாளமுக²வட்டியம் டி²தேன பக்கி²த்தஸ்ஸ பன பரிப்³ப⁴மந்தஸ்ஸ புரிமயுக³ம் பத்வா சி²க்³க³ளேன சி²க்³க³ளுபரி ஆருள்ஹஸ்ஸ சி²க்³க³ளேன கீ³வப்பவேஸனம் விய ததா²க³துப்பாதோ³ அதி⁴ச்சதரஸம்ப⁴வோ. பச்சி²மசக்கவாளமுக²வட்டியம் டி²தேன பக்கி²த்தஸ்ஸ பன பரிப்³ப⁴மந்தஸ்ஸ புரிமயுக³த்³வயம் பத்வா சி²க்³க³ளேன சி²க்³க³ளுபரி ஆருள்ஹஸ்ஸ சி²க்³க³ளேன கீ³வப்பவேஸனம் விய ததா²க³தப்பவேதி³தஸ்ஸ த⁴ம்மவினயஸ்ஸ தீ³பனம் அதி⁴ச்சதரஸம்ப⁴வம். உத்தரசக்கவாளமுக²வட்டியம் டி²தேன பக்கி²த்தஸ்ஸ பன பரிப்³ப⁴மந்தஸ்ஸ புரிமயுக³த்தயம் பத்வா சி²க்³க³ளேன சி²க்³க³ளுபரி ஆருள்ஹஸ்ஸ சி²க்³க³ளேன கீ³வப்பவேஸனம் விய சதுஸச்சபடிவேதோ⁴ அதிவிய அதி⁴ச்சதரஸம்ப⁴வோ வேதி³தப்³போ³. நவமாதீ³னி அபி⁴ஸமயஸம்யுத்தே வுத்தனயானேவாதி.

பபாதவக்³கோ³ பஞ்சமோ.