5. உக்கோடனஸுத்தவண்ணனா

1165. உக்கோடனாதீ³ஸு உக்கோடனந்தி ஸாமிகே அஸ்ஸாமிகே காதும் லஞ்ஜக்³க³ஹணம். வஞ்சனந்தி தேஹி தேஹி உபாயேஹி பரேஸம் வஞ்சனம். தத்ரித³மேகம்வத்து² – ஏகோ கிர லுத்³த³கோ மிக³ஞ்ச மிக³போதகஞ்ச க³ஹேத்வா ஆக³ச்ச²தி. தமேகோ து⁴த்தோ ‘‘கிம், போ⁴, மிகோ³ அக்³க⁴தி, கிம் மிக³போதகோ’’தி?, ஆஹ. ‘‘மிகோ³ த்³வே கஹாபணே, மிக³போதகோ ஏக’’ந்தி ச வுத்தே கஹாபணம் த³த்வா, மிக³போதகம் க³ஹேத்வா தோ²கம் க³ந்த்வா நிவத்தோ ‘‘ந மே, போ⁴, மிக³போதகேன அத்தோ², மிக³ம் மே தே³ஹீ’’தி ஆஹ. தேன ஹி த்³வே கஹாபணே தே³ஹீதி. நனு, போ⁴, மயா பட²மம் ஏகோ கஹாபணோ தி³ன்னோதி. ஆம தி³ன்னோதி. இமம்பி மிக³போதகம் க³ண்ஹ, ஏவம் ஸோ ச கஹாபணோ, அயஞ்ச கஹாபணக்³க⁴னகோ மிக³போதகோதி த்³வே கஹாபணா ப⁴விஸ்ஸந்தீதி. ஸோ ‘‘காரணம் வத³தீ’’தி ஸல்லக்கே²த்வா மிக³போதகம் க³ஹேத்வா மிக³ம் அதா³ஸீதி.

நிகதீதி யோக³வஸேன வா மாயாவஸேன வா அபாமங்க³ம் பாமங்க³ந்தி அமணிம் மணிந்தி, அஸுவண்ணம் ஸுவண்ணந்தி கத்வா பதிரூபகேன வஞ்சனம். ஸாசியோகோ³தி குடிலயோகோ³. ஏதேஸம்யேவ உக்கோடனாதீ³னமேதம் நாமம். தஸ்மா உக்கோடனஸாசியோகா³ வஞ்சனஸாசியோகா³ நிகதிஸாசியோகா³தி ஏவமேத்த² அத்தோ² த³ட்ட²ப்³போ³. கேசி அஞ்ஞம் த³ஸ்ஸேத்வா அஞ்ஞஸ்ஸ பரிவத்தனம் ஸாசியோகோ³தி வத³ந்தி. தம் பன வஞ்சனேனேவ ஸங்க³ஹிதம்.