8. கலிங்க³ரஸுத்தவண்ணனா

230. அட்ட²மே கலிங்க³ரூபதா⁴னாதி கலிங்க³ரக⁴டிகம் ஸீஸூபதா⁴னஞ்சேவ பாதூ³பதா⁴னஞ்ச கத்வா. அப்பமத்தாதி ஸிப்புக்³க³ஹணே அப்பமத்தா. ஆதாபினோதி உட்டா²னவீரியாதாபேன யுத்தா. உபாஸனஸ்மிந்தி ஸிப்பானம் அபி⁴யோகே³ ஆசரியானஞ்ச பயிருபாஸனே. தே கிர ததா³ பாதோவ உட்டா²ய ஸிப்பஸாலம் க³ச்ச²ந்தி, தத்த² ஸிப்பம் உக்³க³ஹேத்வா ஸஜ்ஜா²யாதீ³ஹி அபி⁴யோக³ம் கத்வா முக²ம் தோ⁴வித்வா யாகு³பானாய க³ச்ச²ந்தி. யாகு³ம் பிவித்வா புன ஸிப்பஸாலம் க³ந்த்வா ஸிப்பம் க³ண்ஹித்வா ஸஜ்ஜா²யம் கரோந்தா பாதராஸாய க³ச்ச²ந்தி. கதபாதராஸா ஸமானா ‘‘மா பமாதே³ன சிரம் நித்³தோ³க்கமனம் அஹோஸீ’’தி க²தி³ரக⁴டிகாஸு ஸீஸே ச பாதே³ ச உபத³ஹித்வா தோ²கம் நிபஜ்ஜித்வா புன ஸிப்பஸாலம் க³ந்த்வா ஸிப்பம் க³ஹேத்வா ஸஜ்ஜா²யந்தி. ஸாயம் ஸஜ்ஜா²யம் கரோந்தா ச கே³ஹம் க³ந்த்வா பு⁴த்தஸாயமாஸா பட²மயாமம் ஸஜ்ஜா²யம் கத்வா ஸயனகாலே ததே²வ கலிங்க³ரம் உபதா⁴னம் கத்வா ஸயந்தி. ஏவம் தே அக்க²ணவேதி⁴னோ வாலவேதி⁴னோ ச அஹேஸும். இத³ம் ஸந்தா⁴யேதம் வுத்தம்.

ஓதாரந்தி விவரம். ஆரம்மணந்தி பச்சயம். பதா⁴னஸ்மிந்தி பதா⁴னபூ⁴மியம் வீரியம் குருமானா. பட²மபோ³தி⁴யம் கிர பி⁴க்கூ² ப⁴த்தகிச்சம் கத்வாவ கம்மட்டா²னம் மனஸி கரோந்தி. தேஸம் மனஸிகரோந்தானம்யேவ ஸூரியோ அத்த²ம் க³ச்ச²தி. தே ந்ஹாயித்வா புன சங்கமம் ஓதரித்வா பட²மயாமம் சங்கமந்தி. ததோ ‘‘மா சிரம் நித்³தா³யிம்ஹா’’தி ஸரீரத³ரத²வினோத³னத்த²ம் நிபஜ்ஜந்தா கட்ட²க²ண்ட³ம் உபத³ஹித்வா நிபஜ்ஜந்தி, தே புன பச்சி²மயாமே வுட்டா²ய சங்கமம் ஓதரந்தி. தே ஸந்தா⁴ய இத³ம் வுத்தம். அயம்பி தீ³போ திண்ணம் ராஜூனம் காலே ஏகக⁴ண்டி³னிக்³கோ⁴ஸோ ஏகபதா⁴னபூ⁴மி அஹோஸி. நானாமுகே² பஹடக⁴ண்டி³ பிலிச்சி²கோளியம் ஓஸரதி, கல்யாணியம் பஹடக⁴ண்டி³ நாக³தீ³பே ஓஸரதி. ‘‘அயம் பி⁴க்கு² புது²ஜ்ஜனோ, அயம் புது²ஜ்ஜனோ’’தி அங்கு³லிம் பஸாரேத்வா த³ஸ்ஸேதப்³போ³ அஹோஸி. ஏகதி³வஸம் ஸப்³பே³ அரஹந்தோவ அஹேஸும். தஸ்மாதி யஸ்மா கலிங்க³ரூபதா⁴னானம் மாரோ ஆரம்மணம் ந லப⁴தி, தஸ்மா. அட்ட²மம்.