2. அனோத்தப்பீஸுத்தவண்ணனா

145. து³தியே அனாதாபீதி யம் வீரியம் கிலேஸே ஆதபதி, தேன ரஹிதோ. அனோத்தப்பீதி நிப்³ப⁴யோ கிலேஸுப்பத்திதோ குஸலானுப்பத்திதோ ச ப⁴யரஹிதோ. ஸம்போ³தா⁴யாதி ஸம்பு³ஜ்ஜ²னத்தா²ய. நிப்³பா³னாயாதி நிப்³பா³னஸச்சி²கிரியாய. அனுத்தரஸ்ஸ யோக³க்கே²மஸ்ஸாதி அரஹத்தஸ்ஸ தஞ்ஹி அனுத்தரஞ்சேவ சதூஹி ச யோகே³ஹி கே²மம்.

அனுப்பன்னாதிஆதீ³ஸு யே புப்³பே³ அப்படிலத்³த⁴புப்³ப³ம் சீவராதி³ம் வா பச்சயம் உபட்டா²கஸத்³தி⁴விஹாரிக-அந்தேவாஸீனம் வா அஞ்ஞதரதோ மனுஞ்ஞவத்து²ம் படிலபி⁴த்வா தம் ஸுப⁴ம் ஸுக²ந்தி அயோனிஸோ க³ண்ஹந்தஸ்ஸ அஞ்ஞதரம் வா பன அனனுபூ⁴தபுப்³ப³ம் ஆரம்மணம் யதா² ததா² வா அயோனிஸோ ஆவஜ்ஜேந்தஸ்ஸ லோபா⁴த³யோ பாபகா அகுஸலா த⁴ம்மா உப்பஜ்ஜந்தி, தே அனுப்பன்னாதி வேதி³தப்³பா³. அஞ்ஞதா² ஹி அனமதக்³கே³ ஸம்ஸாரே அனுப்பன்னா நாம பாபகா த⁴ம்மா நத்தி². அனுபூ⁴தபுப்³பே³பி ச வத்து²ம்ஹி ஆரம்மணே வா யஸ்ஸ பகதிபு³த்³தி⁴யா வா உத்³தே³ஸபரிபுச்சா²ய வா பரியத்தினவகம்மயோனிஸோமனஸிகாரானம் வா அஞ்ஞதரவஸேன புப்³பே³ அனுப்பஜ்ஜித்வா பச்சா² தாதி³ஸேன பச்சயேன ஸஹஸா உப்பஜ்ஜந்தி, இமேபி ‘‘அனுப்பன்னா உப்பஜ்ஜமானா அனத்தா²ய ஸம்வத்தேய்யு’’ந்தி வேதி³தப்³பா³. தேஸுயேவ பன வத்தா²ரம்மணேஸு புனப்புனம் உப்பஜ்ஜமானா நப்பஹீயந்தி நாம, தே ‘‘உப்பன்னா அப்பஹீயமானா அனத்தா²ய ஸம்வத்தேய்யு’’ந்தி வேதி³தப்³பா³. அயமேத்த² ஸங்கே²போ, வித்தா²ரதோ பன உப்பன்னானுப்பன்னபே⁴தோ³ ச பஹானப்பஹானவிதா⁴னஞ்ச ஸப்³ப³ம் விஸுத்³தி⁴மக்³கே³ ஞாணத³ஸ்ஸனவிஸுத்³தி⁴னித்³தே³ஸே கதி²தம்.

அனுப்பன்னா மே குஸலா த⁴ம்மாதி அப்படிலத்³தா⁴பி ஸீலஸமாதி⁴மக்³க³ப²லஸங்கா²தா அனவஜ்ஜத⁴ம்மா. உப்பன்னாதி தேயேவ படிலத்³தா⁴. நிருஜ்ஜ²மானா அனத்தா²ய ஸம்வத்தேய்யுந்தி தே ஸீலாதி³த⁴ம்மா பரிஹானிவஸேன புன அனுப்பத்தியா நிருஜ்ஜ²மானா அனத்தா²ய ஸம்வத்தேய்யுந்தி வேதி³தப்³பா³. ஏத்த² ச லோகியா பரிஹாயந்தி, லோகுத்தரானம் பரிஹானி நத்தீ²தி. ‘‘உப்பன்னானம் குஸலானம் த⁴ம்மானம் டி²தியா’’தி இமஸ்ஸ பன ஸம்மப்பதா⁴னஸ்ஸ வஸேனாயம் தே³ஸனா கதா. து³தியமக்³கோ³ வா ஸீக⁴ம் அனுப்பஜ்ஜமானோ, பட²மமக்³கோ³ நிருஜ்ஜ²மானோ அனத்தா²ய ஸம்வத்தேய்யாதி ஏவம்பேத்த² அத்தோ² த³ட்ட²ப்³போ³. இதி இமஸ்மிம் ஸுத்தே இமே சத்தாரோ ஸம்மப்பதா⁴னா புப்³ப³பா⁴க³விபஸ்ஸனாவஸேன கதி²தாதி. து³தியம்.