4. அனமதக்³க³ஸம்யுத்தம்

1. பட²மவக்³கோ³

1. திணகட்ட²ஸுத்தவண்ணனா

124. அனமதக்³க³ஸம்யுத்தஸ்ஸ பட²மே அனமதக்³கோ³தி அனு அமதக்³கோ³, வஸ்ஸஸதம் வஸ்ஸஸஹஸ்ஸம் ஞாணேன அனுக³ந்த்வாபி அமதக்³கோ³ அவிதி³தக்³கோ³, நாஸ்ஸ ஸக்கா இதோ வா ஏத்தோ வா அக்³க³ம் ஜானிதும், அபரிச்சி²ன்னபுப்³பா³பரகோடிகோதி அத்தோ². ஸம்ஸாரோதி க²ந்தா⁴தீ³னம் அவிச்சி²ன்னப்பவத்தா படிபாடி. புப்³பா³ கோடி ந பஞ்ஞாயதீதி புரிமமரியாதா³ ந தி³ஸ்ஸதி. யத³க்³கே³ன சஸ்ஸ புரிமா கோடி ந பஞ்ஞாயதி, பச்சி²மாபி தத³க்³கே³னேவ ந பஞ்ஞாயதி, வேமஜ்ஜே²யேவ பன ஸத்தா ஸம்ஸரந்தி. பரியாதா³னம் க³ச்சே²ய்யாதி இத³ம் உபமாய கு²த்³த³கத்தா வுத்தம். பா³ஹிரஸமயஸ்மிஞ்ஹி அத்தோ² பரித்தோ ஹோதி, உபமா மஹதீ. ‘‘ஹத்தீ² விய அயம் கோ³ணோ, கோ³ணோ விய ஸூகரோ, ஸமுத்³தோ³ விய தளாக’’ந்தி ஹி வுத்தே ந தேஸம் தாதி³ஸம் பமாணம் ஹோதி. பு³த்³த⁴ஸமயே பன உபமா பரித்தா, அத்தோ² மஹா. பாளியஞ்ஹி ஏகோ ஜம்பு³தீ³போ க³ஹிதோ, ஏவரூபானம் பன ஜம்பு³தீ³பானம் ஸதேபி ஸஹஸ்ஸேபி ஸதஸஹஸ்ஸேபி திணாதீ³னி தேன உபக்கமேன பரியாதா³னம் க³ச்சே²ய்யும், ந த்வேவ புரிஸஸ்ஸ மாது மாதரோதி. து³க்க²ம் பச்சனுபூ⁴தந்தி தும்ஹேஹி து³க்க²ம் அனுபூ⁴தம். திப்³ப³ந்தி தஸ்ஸேவ வேவசனம். ப்³யஸனந்தி ஞாதிப்³யஸனாதி³அனேகவித⁴ம். கடஸீதி ஸுஸானம், பத²வீயேவ வா. ஸா ஹி புனப்புனம் மரந்தேஹி ஸரீரனிக்கே²பேன வட்³டி⁴தா. அலமேவாதி யுத்தமேவ. பட²மம்.

2. பத²வீஸுத்தவண்ணனா

125. து³தியே மஹாபத²விந்தி சக்கவாளபரியந்தம் மஹாபத²விம். நிக்கி²பேய்யாதி தம் பத²விம் பி⁴ந்தி³த்வா வுத்தப்பமாணம் கு³ளிகம் கரித்வா ஏகமந்தம் ட²பேய்ய. து³தியம்.

3. அஸ்ஸுஸுத்தவண்ணனா

126. ததியே கந்த³ந்தானந்தி ஸஸத்³த³ம் ருத³மானானம். பஸ்ஸன்னந்தி ஸந்தி³தம் பவத்தம். சதூஸு மஹாஸமுத்³தே³ஸூதி ஸினேருரஸ்மீஹி பரிச்சி²ன்னேஸு சதூஸு மஹாஸமுத்³தே³ஸு. ஸினேருஸ்ஸ ஹி பாசீனபஸ்ஸம் ரஜதமயம், த³க்கி²ணபஸ்ஸம் மணிமயம், பச்சி²மபஸ்ஸம் ப²லிகமயம், உத்தரபஸ்ஸம் ஸுவண்ணமயம். புப்³ப³த³க்கி²ணபஸ்ஸேஹி நிக்க²ந்தா ரஜதமணிரஸ்மியோ ஏகதோ ஹுத்வா மஹாஸமுத்³த³பிட்டே²ன க³ந்த்வா சக்கவாளபப்³ப³தம் ஆஹச்ச திட்ட²ந்தி, த³க்கி²ணபச்சி²மபஸ்ஸேஹி நிக்க²ந்தா மணிப²லிகரஸ்மியோ, பச்சி²முத்தரபஸ்ஸேஹி நிக்க²ந்தா ப²லிகஸுவண்ணரஸ்மியோ, உத்தரபாசீனபஸ்ஸேஹி நிக்க²ந்தா ஸுவண்ணரஜதரஸ்மியோ ஏகதோ ஹுத்வா மஹாஸமுத்³த³பிட்டே²ன க³ந்த்வா சக்கவாளபப்³ப³தம் ஆஹச்ச திட்ட²ந்தி. தாஸம் ரஸ்மீனம் அந்தரேஸு சத்தாரோ மஹாஸமுத்³தா³ ஹோந்தி. தே ஸந்தா⁴ய வுத்தம் ‘‘சதூஸு மஹாஸமுத்³தே³ஸூ’’தி. ஞாதிப்³யஸனந்திஆதீ³ஸு ப்³யஸனந்தி விஅஸனம், வினாஸோதி அத்தோ². ஞாதீனம் ப்³யஸனம் ஞாதிப்³யஸனம், போ⁴கா³னம் ப்³யஸனம் போ⁴க³ப்³யஸனம். ரோகோ³ பன ஸயமேவ ஆரோக்³யம் வியஸதி வினாஸேதீதி ப்³யஸனம், ரோகோ³வ ப்³யஸனம் ரோக³ப்³யஸனம். ததியம்.

4. கீ²ரஸுத்தவண்ணனா

127. சதுத்தே² மாதுத²ஞ்ஞந்தி ஏகனாமிகாய மனுஸ்ஸமாது கீ²ரம். இமேஸஞ்ஹி ஸத்தானம் க³ண்டு³ப்பாத³கிபில்லிகாதீ³ஸு வா மச்ச²கச்ச²பாதீ³ஸு வா பக்கி²ஜாதேஸு வா நிப்³ப³த்தகாலே மாதுகீ²ரமேவ நத்தி², அஜபஸுமஹிம்ஸாதீ³ஸு நிப்³ப³த்தகாலே கீ²ரம் அத்தி², ததா² மனுஸ்ஸேஸு. தத்த² அஜாதி³காலே ச மனுஸ்ஸேஸு சாபி ‘‘தே³வீ ஸுமனா திஸ்ஸா’’தி ஏவம் நானானாமிகானம் குச்சி²யம் நிப்³ப³த்தகாலே அக்³க³ஹேத்வா திஸ்ஸாதி ஏகனாமிகாய ஏவ மாது குச்சி²யம் நிப்³ப³த்தகாலே பீதம் த²ஞ்ஞம் சதூஸு மஹாஸமுத்³தே³ஸு உத³கதோ ப³ஹுதரந்தி வேதி³தப்³ப³ம். சதுத்த²ம்.

5. பப்³ப³தஸுத்தவண்ணனா

128. பஞ்சமே ஸக்கா பன, ப⁴ந்தேதி ஸோ கிர பி⁴க்கு² சிந்தேஸி – ‘‘ஸத்தா² அனமதக்³க³ஸ்ஸ ஸம்ஸாரஸ்ஸ தீ³க⁴தமத்தா ‘ந ஸுகரம் ந ஸுகர’ந்தி கதே²தியேவ, கத²ம் நச்சி²ந்த³தி, ஸக்கா நு கோ² உபமம் காராபேது’’ந்தி. தஸ்மா ஏவமாஹ. காஸிகேனாதி தயோ கப்பாஸம்ஸூ ஏகதோ க³ஹேத்வா கந்திதஸுத்தமயேன அதிஸுகு²மவத்தே²ன. தேன பன பரிமட்டே² கித்தகம் கீ²யேய்யாதி. ஸாஸபமத்தம். பஞ்சமம்.

6. ஸாஸபஸுத்தவண்ணனா

129. ச²ட்டே² ஆயஸம் நக³ரந்தி ஆயஸேன பாகாரேன பரிக்கி²த்தம் நக³ரம், ந பன அந்தோ ஆயஸேஹி ஏகபூ⁴மிகாதி³பாஸாதே³ஹி ஆகிண்ணந்தி த³ட்ட²ப்³ப³ம். ச²ட்ட²ம்.

7. ஸாவகஸுத்தவண்ணனா

130. ஸத்தமே அனுஸ்ஸரேய்யுந்தி ஏகேன கப்பஸதஸஹஸ்ஸே அனுஸ்ஸரிதே அபரோ தஸ்ஸ டி²தட்டா²னதோ அஞ்ஞம் ஸதஸஹஸ்ஸம், அஞ்ஞோபி அஞ்ஞந்தி ஏவம் சத்தாரோபி சத்தாரிஸதஸஹஸ்ஸானி அனுஸ்ஸரேய்யும். ஸத்தமம்.

8-9. க³ங்கா³ஸுத்தாதி³வண்ணனா

131-132. அட்ட²மே யா ஏதஸ்மிம் அந்தரே வாலிகாதி யா ஏதஸ்மிம் ஆயாமதோ பஞ்சயோஜனஸதிகே அந்தரே வாலிகா. நவமே வத்தப்³ப³ம் நத்தி². அட்ட²மனவமானி.

10. புக்³க³லஸுத்தவண்ணனா

133. த³ஸமே அட்டி²கங்கலோதிஆதீ³னி தீணிபி ராஸிவேவசனானேவ. இமேஸம் பன ஸத்தானம் ஸஅட்டி²காலதோ அனட்டி²காலோவ ப³ஹுதரோ. க³ண்டு³ப்பாத³காதி³பாணபூ⁴தானஞ்ஹி ஏதேஸம் அட்டி²மேவ நத்தி², மச்ச²கச்ச²பாதி³பூ⁴தானம் பன அட்டி²மேவ ப³ஹுதரம், தஸ்மா அனட்டி²காலஞ்ச ப³ஹுஅட்டி²காலஞ்ச அக்³க³ஹேத்வா ஸமட்டி²காலோவ க³ஹேதப்³போ³. உத்தரோ கி³ஜ்ஜ²கூடஸ்ஸாதி கி³ஜ்ஜ²கூடஸ்ஸ உத்தரபஸ்ஸே டி²தோ. மக³தா⁴னம் கி³ரிப்³ப³ஜேதி மக³த⁴ரட்ட²ஸ்ஸ கி³ரிப்³ப³ஜே, கி³ரிபரிக்கே²பே டி²தோதி அத்தோ². ஸேஸம் ஸப்³ப³த்த² உத்தானமேவாதி. த³ஸமம்.

பட²மோ வக்³கோ³.

2. து³தியவக்³கோ³

1. து³க்³க³தஸுத்தவண்ணனா

134. து³தியவக்³க³ஸ்ஸ பட²மே து³க்³க³தந்தி த³லித்³த³ம் கபணம். து³ரூபேதந்தி து³ஸ்ஸண்டா²னேஹி ஹத்த²பாதே³ஹி உபேதம். பட²மம்.

2. ஸுகி²தஸுத்தவண்ணனா

135. து³தியே ஸுகி²தந்தி ஸுக²ஸமப்பிதம் மஹத்³த⁴னம் மஹாபோ⁴க³ம். ஸுஸஜ்ஜிதந்தி அலங்கதபடியத்தம் ஹத்தி²க்க²ந்த⁴க³தம் மஹாபரிவாரம். து³தியம்.

3. திம்ஸமத்தஸுத்தவண்ணனா

136. ததியே பாவேய்யகாதி பாவேய்யதே³ஸவாஸினோ. ஸப்³பே³ ஆரஞ்ஞிகாதிஆதீ³ஸு து⁴தங்க³ஸமாதா³னவஸேன தேஸம் ஆரஞ்ஞிகாதி³பா⁴வோ வேதி³தப்³போ³. ஸப்³பே³ ஸஸம்யோஜனாதி ஸப்³பே³ ஸப³ந்த⁴னா, கேசி ஸோதாபன்னா, கேசி ஸகதா³கா³மினோ, கேசி அனாகா³மினோ. தேஸு ஹி புது²ஜ்ஜனோ வா கீ²ணாஸவோ வா நத்தி². கு³ன்னந்திஆதீ³ஸு ஸேதகாளாதி³வண்ணேஸு ஏகேகவண்ணகாலோவ க³ஹேதப்³போ³. பாரிபந்த²காதி பரிபந்தே² திட்ட²னகா பந்த²கா⁴தசோரா. பாரதா³ரிகாதி பரதா³ரசாரித்தம் ஆபஜ்ஜனகா. ததியம்.

4-9. மாதுஸுத்தாதி³வண்ணனா

137-142. சதுத்தா²தீ³ஸு லிங்க³னியமேன சேவ சக்கவாளனியமேன ச அத்தோ² வேதி³தப்³போ³. புரிஸானஞ்ஹி மாதுகா³மகாலோ, மாதுகா³மானஞ்ச புரிஸகாலோதி ஏவமேத்த² லிங்க³னியமோ. இமம்ஹா சக்கவாளா ஸத்தா பரசக்கவாளம், பரசக்கவாளா ச இமம் சக்கவாளம் ஸம்ஸரந்தி. தேஸு இமஸ்மிம் சக்கவாளே மாதுகா³மகாலே மாதுபூ⁴தஞ்ஞேவ த³ஸ்ஸேந்தோ யோ நமாதாபூ⁴தபுப்³போ³தி ஆஹ. யோ நபிதாபூ⁴தபுப்³போ³திஆதீ³ஸுபி ஏஸேவ நயோ. சதுத்தா²தீ³னி.

10. வேபுல்லபப்³ப³தஸுத்தவண்ணனா

143. த³ஸமே பூ⁴தபுப்³ப³ந்தி அதீதகாலே ஏகம் அபதா³னம் ஆஹரித்வா த³ஸ்ஸேதி. ஸமஞ்ஞா உத³பாதீ³தி பஞ்ஞத்தி அஹோஸி. சதூஹேன ஆரோஹந்தீதி இத³ம் தா²மமஜ்ஜி²மே ஸந்தா⁴ய வுத்தம். அக்³க³ந்தி உத்தமம். ப⁴த்³த³யுக³ந்தி ஸுந்த³ரயுக³லம். தீஹேன ஆரோஹந்தீதி ஏத்தாவதா கிர த்³வின்னம் பு³த்³தா⁴னம் அந்தரே யோஜனம் பத²வீ உஸ்ஸன்னா, ஸோ பப்³ப³தோ தியோஜனுப்³பே³தோ⁴ ஜாதோ.

அப்பம் வா பி⁴ய்யோதி வஸ்ஸஸததோ உத்தரிம் அப்பம் த³ஸ வா வீஸம் வா வஸ்ஸானி. புன வஸ்ஸஸதமேவ ஜீவனகோ நாம நத்தி², உத்தமகோடியா பன ஸட்டி² வா அஸீதி வா வஸ்ஸானி ஜீவந்தி. வஸ்ஸஸதம் பன அப்பத்வா பஞ்சவஸ்ஸத³ஸவஸ்ஸாதி³காலே மீயமானாவ ப³ஹுகா. ஏத்த² ச ககுஸந்தோ⁴ ப⁴க³வா சத்தாலீஸவஸ்ஸஸஹஸ்ஸாயுககாலே, கோணாக³மனோ திம்ஸவஸ்ஸஸஹஸ்ஸாயுககாலே நிப்³ப³த்தோதி இத³ம் அனுபுப்³பே³ன பரிஹீனஸதி³ஸம் கதம், ந பன ஏவம் பரிஹீனம், வட்³டி⁴த்வா வட்³டி⁴த்வா பரிஹீனந்தி வேதி³தப்³ப³ம். கத²ம்? ககுஸந்தோ⁴ தாவ ப⁴க³வா இமஸ்மிம்யேவ கப்பே சத்தாலீஸவஸ்ஸஸஹஸ்ஸாயுககாலே நிப்³ப³த்தோ ஆயுப்பமாணம் பஞ்ச கோட்டா²ஸே கத்வா சத்தாரோ ட²த்வா பஞ்சமே விஜ்ஜமானேயேவ பரினிப்³பு³தோ. தம் ஆயு பரிஹாயமானம் த³ஸவஸ்ஸகாலம் பத்வா புன வட்³ட⁴மானம் அஸங்கே²ய்யம் ஹுத்வா ததோ பரிஹாயமானம் திம்ஸவஸ்ஸஸஹஸ்ஸாயுககாலே டி²தம், ததா³ கோணாக³மனோ நிப்³ப³த்தோ. தஸ்மிம்பி ததே²வ பரினிப்³பு³தே தம் ஆயு த³ஸவஸ்ஸகாலம் பத்வா புன வட்³ட⁴மானம் அஸங்கே²ய்யம் ஹுத்வா பரிஹாயித்வா வீஸவஸ்ஸஸஹஸ்ஸகாலே டி²தம், ததா³ கஸ்ஸபோ ப⁴க³வா நிப்³ப³த்தோ. தஸ்மிம்பி ததே²வ பரினிப்³பு³தே தம் ஆயு த³ஸவஸ்ஸகாலம் பத்வா புன வட்³ட⁴மானம் அஸங்கே²ய்யம் ஹுத்வா பரிஹாயித்வா வஸ்ஸஸதகாலம் பத்தம், அத² அம்ஹாகம் ஸம்மாஸம்பு³த்³தோ⁴ நிப்³ப³த்தோ. ஏவம் அனுபுப்³பே³ன பரிஹாயித்வா வட்³டி⁴த்வா வட்³டி⁴த்வா பரிஹீனந்தி வேதி³தப்³ப³ம். தத்த² ச யம் ஆயுபரிமாணேஸு மந்தே³ஸு பு³த்³தா⁴ நிப்³ப³த்தந்தி, தேஸம்பி ததே³வ ஆயுபரிமாணம் ஹோதீதி. த³ஸமம்.

து³தியோ வக்³கோ³.

அனமதக்³க³ஸம்யுத்தவண்ணனா நிட்டி²தா.