10. பச்சயஸுத்தவண்ணனா

20. த³ஸமே படிச்சஸமுப்பாத³ஞ்ச வோ பி⁴க்க²வே, தே³ஸேஸ்ஸாமி படிச்சஸமுப்பன்னே ச த⁴ம்மேதி ஸத்தா² இமஸ்மிம் ஸுத்தே பச்சயே ச பச்சயனிப்³ப³த்தே ச ஸபா⁴வத⁴ம்மே தே³ஸேஸ்ஸாமீதி உப⁴யம் ஆரபி⁴. உப்பாதா³ வா ததா²க³தானந்தி ததா²க³தானம் உப்பாதே³பி, பு³த்³தே⁴ஸு உப்பன்னேஸு அனுப்பன்னேஸுபி ஜாதிபச்சயா ஜராமரணம், ஜாதியேவ ஜராமரணஸ்ஸ பச்சயோ. டி²தாவ ஸா தா⁴தூதி டி²தோவ ஸோ பச்சயஸபா⁴வோ, ந கதா³சி ஜாதி ஜராமரணஸ்ஸ பச்சயோ ந ஹோதி. த⁴ம்மட்டி²ததா த⁴ம்மனியாமதாதி இமேஹிபி த்³வீஹி பச்சயமேவ கதே²தி. பச்சயேன ஹி பச்சயுப்பன்னா த⁴ம்மா திட்ட²ந்தி, தஸ்மா பச்சயோவ ‘‘த⁴ம்மட்டி²ததா’’தி வுச்சதி. பச்சயோ த⁴ம்மே நியமேதி, தஸ்மா ‘‘த⁴ம்மனியாமதா’’தி வுச்சதி. இத³ப்பச்சயதாதி இமேஸம் ஜராமரணாதீ³னம் பச்சயா இத³ப்பச்சயா, இத³ப்பச்சயாவ இத³ப்பச்சயதா. தந்தி தம் பச்சயம். அபி⁴ஸம்பு³ஜ்ஜ²தீதி ஞாணேன அபி⁴ஸம்பு³ஜ்ஜ²தி. அபி⁴ஸமேதீதி ஞாணேன அபி⁴ஸமாக³ச்ச²தி. ஆசிக்க²தீதி கதே²தி. தே³ஸேதீதி த³ஸ்ஸேதி. பஞ்ஞாபேதீதி ஜானாபேதி. பட்ட²பேதீதி ஞாணமுகே² ட²பேதி. விவரதீதி விவரித்வா த³ஸ்ஸேதி. விப⁴ஜதீதி விபா⁴க³தோ த³ஸ்ஸேதி. உத்தானீகரோதீதி பாகடம் கரோதி. பஸ்ஸதா²தி சாஹாதி பஸ்ஸத² இதி ச வத³தி. கிந்தி? ஜாதிபச்சயா, பி⁴க்க²வே, ஜராமரணந்திஆதி³.

இதி கோ², பி⁴க்க²வேதி ஏவம் கோ², பி⁴க்க²வே. யா தத்ராதி யா தேஸு ‘‘ஜாதிபச்சயா ஜராமரண’’ந்திஆதீ³ஸு. தத²தாதிஆதீ³னி பச்சயாகாரஸ்ஸேவ வேவசனானி. ஸோ தேஹி தேஹி பச்சயேஹி அனூனாதி⁴கேஹேவ தஸ்ஸ தஸ்ஸ த⁴ம்மஸ்ஸ ஸம்ப⁴வதோ தத²தாதி, ஸாமக்³கி³ம் உபக³தேஸு பச்சயேஸு முஹுத்தம்பி ததோ நிப்³ப³த்தானம் த⁴ம்மானம் அஸம்ப⁴வாபா⁴வதோ அவிதத²தாதி, அஞ்ஞத⁴ம்மபச்சயேஹி அஞ்ஞத⁴ம்மானுப்பத்திதோ அனஞ்ஞத²தாதி, ஜராமரணாதீ³னம் பச்சயதோ வா பச்சயஸமூஹதோ வா இத³ப்பச்சயதாதி வுத்தோ. தத்ராயம் வசனத்தோ² – இமேஸம் பச்சயா இத³ப்பச்சயா, இத³ப்பச்சயா ஏவ இத³ப்பச்சயதா, இத³ப்பச்சயானம் வா ஸமூஹோ இத³ப்பச்சயதா. லக்க²ணம் பனேத்த² ஸத்³த³ஸத்த²தோ வேதி³தப்³ப³ம்.

அனிச்சந்தி ஹுத்வா அபா⁴வட்டே²ன அனிச்சம். ஏத்த² ச அனிச்சந்தி ந ஜராமரணம் அனிச்சம், அனிச்சஸபா⁴வானம் பன க²ந்தா⁴னம் ஜராமரணத்தா அனிச்சம் நாம ஜாதம். ஸங்க²தாதீ³ஸுபி ஏஸேவ நயோ. ஏத்த² ச ஸங்க²தந்தி பச்சயேஹி ஸமாக³ந்த்வா கதம். படிச்சஸமுப்பன்னந்தி பச்சயே நிஸ்ஸாய உப்பன்னம். க²யத⁴ம்மந்தி க²யஸபா⁴வம். வயத⁴ம்மந்தி விக³ச்ச²னகஸபா⁴வம். விராக³த⁴ம்மந்தி விரஜ்ஜனகஸபா⁴வம். நிரோத⁴த⁴ம்மந்தி நிருஜ்ஜ²னகஸபா⁴வம். ஜாதியாபி வுத்தனயேனேவ அனிச்சதா வேதி³தப்³பா³. ஜனகபச்சயானம் வா கிச்சானுபா⁴வக்க²ணே தி³ட்ட²த்தா ஏகேன பரியாயேனேத்த² அனிச்சாதிஆதீ³னி யுஜ்ஜந்தியேவ. ப⁴வாத³யோ அனிச்சாதி³ஸபா⁴வாயேவ.

ஸம்மப்பஞ்ஞாயாதி ஸவிபஸ்ஸனாய மக்³க³பஞ்ஞாய. புப்³ப³ந்தந்தி புரிமம் அதீதந்தி அத்தோ². அஹோஸிம் நு கோ²திஆதீ³ஸு ‘‘அஹோஸிம் நு கோ² நனு கோ²’’தி ஸஸ்ஸதாகாரஞ்ச அதி⁴ச்சஸமுப்பத்திஆகாரஞ்ச நிஸ்ஸாய அதீதே அத்தனோ விஜ்ஜமானதஞ்ச அவிஜ்ஜமானதஞ்ச கங்க²தி. கிம் காரணந்தி ந வத்தப்³ப³ம், உம்மத்தகோ விய பா³லபுது²ஜ்ஜனோ யதா² வா ததா² வா பவத்ததி. கிம் நு கோ² அஹோஸிந்தி ஜாதிலிங்கு³பபத்தியோ நிஸ்ஸாய ‘‘க²த்தியோ நு கோ² அஹோஸிம், ப்³ராஹ்மணவேஸ்ஸஸுத்³த³க³ஹட்ட²பப்³ப³ஜிததே³வமனுஸ்ஸானம் அஞ்ஞதரோ’’தி கங்க²தி. கத²ம் நு கோ²தி ஸண்டா²னாகாரம் நிஸ்ஸாய ‘‘தீ³கோ⁴ நு கோ² அஹோஸிம் ரஸ்ஸஓதா³தகண்ஹபமாணிகஅப்பமாணிகாதீ³னம் அஞ்ஞதரோ’’தி கங்க²தி. கேசி பன ‘‘இஸ்ஸரனிம்மானாதீ³னி நிஸ்ஸாய ‘கேன நு கோ² காரணேன அஹோஸி’ந்தி ஹேதுதோ கங்க²தீ’’தி வத³ந்தி. கிம் ஹுத்வா கிம் அஹோஸிந்தி ஜாதிஆதீ³னி நிஸ்ஸாய ‘‘க²த்தியோ ஹுத்வா நு கோ² ப்³ராஹ்மணோ அஹோஸிம்…பே… தே³வோ ஹுத்வா மனுஸ்ஸோ’’தி அத்தனோ பரம்பரம் கங்க²தி. ஸப்³ப³த்தே²வ பன அத்³தா⁴னந்தி காலாதி⁴வசனமேதம். அபரந்தந்தி அனாக³தம் அந்தம். ப⁴விஸ்ஸாமி நு கோ² நனு கோ²தி ஸஸ்ஸதாகாரஞ்ச உச்சே²தா³காரஞ்ச நிஸ்ஸாய அனாக³தே அத்தனோ விஜ்ஜமானதஞ்ச அவிஜ்ஜமானதஞ்ச கங்க²தி. ஸேஸமேத்த² வுத்தனயமேவ.

ஏதரஹி வா பச்சுப்பன்னம் அத்³தா⁴னந்தி இதா³னி வா படிஸந்தி⁴மாதி³ம் கத்வா சுதிபரியந்தம் ஸப்³ப³ம்பி வத்தமானகாலம் க³ஹேத்வா. அஜ்ஜ²த்தம் கத²ம்கதீ² ப⁴விஸ்ஸதீதி அத்தனோ க²ந்தே⁴ஸு விசிகிச்சீ² ப⁴விஸ்ஸதி. அஹம் நு கோ²ஸ்மீதி அத்தனோ அத்தி²பா⁴வம் கங்க²தி. யுத்தம் பனேதந்தி? யுத்தம் அயுத்தந்தி கா ஏத்த² சிந்தா. அபிசேத்த² இத³ம் வத்து²ம்பி உதா³ஹரந்தி – சூளமாதாய கிர புத்தோ முண்டோ³, மஹாமாதாய புத்தோ அமுண்டோ³, தம் புத்தம் முண்டே³ஸும், ஸோ உட்டா²ய ‘‘அஹம் நு கோ² சூளமாதாய புத்தோ’’தி சிந்தேஸி. ஏவம் அஹம் நு கோ²ஸ்மீதி கங்கா² ஹோதி. நோ நு கோ²ஸ்மீதி அத்தனோ நத்தி²பா⁴வம் கங்க²தி. தத்ராபி இத³ம் வத்து² – ஏகோ கிர மச்சே² க³ண்ஹந்தோ உத³கே சிரட்டா²னேன ஸீதிபூ⁴தம் அத்தனோ ஊரும் மச்சோ²தி சிந்தேத்வா பஹரி. அபரோ ஸுஸானபஸ்ஸே கே²த்தம் ரக்க²ந்தோ பீ⁴தோ ஸங்குடிதோ ஸயி, ஸோ படிபு³ஜ்ஜி²த்வா அத்தனோ ஜண்ணுகானி த்³வே யக்கா²தி சிந்தேத்வா பஹரி. ஏவம் நோ நு கோ²ஸ்மீதி கங்க²தி.

கிம் நு கோ²ஸ்மீதி க²த்தியோவ ஸமானோ அத்தனோ க²த்தியபா⁴வம் கங்க²தி. ஏஸேவ நயோ ஸேஸேஸுபி. தே³வோ பன ஸமானோ தே³வபா⁴வம் அஜானந்தோ நாம நத்தி², ஸோபி பன ‘‘அஹம் ரூபீ நு கோ² அரூபீ நு கோ²’’திஆதி³னா நயேன கங்க²தி. க²த்தியாத³யோ கஸ்மா ந ஜானந்தீதி சே? அபச்சக்கா² தேஸம் தத்த² தத்த² குலே உப்பத்தி. க³ஹட்டா²பி ச போத்த²லிகாத³யோ பப்³ப³ஜிதஸஞ்ஞினோ, பப்³ப³ஜிதாபி ‘‘குப்பம் நு கோ² மே கம்ம’’ந்திஆதி³னா நயேன க³ஹட்ட²ஸஞ்ஞினோ. மனுஸ்ஸாபி ச ராஜானோ விய அத்தனி தே³வஸஞ்ஞினோ ஹோந்தி. கத²ம் நு கோ²ஸ்மீதி வுத்தனயமேவ. கேவலஞ்ஹேத்த² அப்³ப⁴ந்தரே ஜீவோ நாம அத்தீ²தி க³ஹேத்வா தஸ்ஸ ஸண்டா²னாகாரம் நிஸ்ஸாய ‘‘தீ³கோ⁴ நு கோ²ஸ்மி ரஸ்ஸசதுரஸ்ஸச²ளம்ஸஅட்ட²ம்ஸஸோளஸம்ஸாதீ³னம் அஞ்ஞதரப்பகாரோ’’தி கங்க²ந்தோ கத²ம் நு கோ²ஸ்மீதி? கங்க²தீதி வேதி³தப்³போ³. ஸரீரஸண்டா²னம் பன பச்சுப்பன்னம் அஜானந்தோ நாம நத்தி². குதோ ஆக³தோ ஸோ குஹிம் கா³மீ ப⁴விஸ்ஸதீதி அத்தபா⁴வஸ்ஸ ஆக³திக³திட்டா²னம் கங்க²ந்தோ ஏவம் கங்க²தி. அரியஸாவகஸ்ஸாதி இத⁴ ஸோதாபன்னோ அதி⁴ப்பேதோ, இதரேபி பன தயோ அவாரிதாயேவாதி. த³ஸமம்.

ஆஹாரவக்³கோ³ து³தியோ.