1. ஆஹாரஸுத்தவண்ணனா

11. ஆஹாரவக்³க³ஸ்ஸ பட²மே ஆஹாராதி பச்சயா. பச்சயா ஹி ஆஹரந்தி அத்தனோ ப²லம், தஸ்மா ஆஹாராதி வுச்சந்தி. பூ⁴தானம் வா ஸத்தானந்திஆதீ³ஸு பூ⁴தாதி ஜாதா நிப்³ப³த்தா. ஸம்ப⁴வேஸினோதி யே ஸம்ப⁴வம் ஜாதிம் நிப்³ப³த்திம் ஏஸந்தி க³வேஸந்தி. தத்த² சதூஸு யோனீஸு அண்ட³ஜஜலாபு³ஜா ஸத்தா யாவ அண்ட³கோஸம் வத்தி²கோஸஞ்ச ந பி⁴ந்த³ந்தி, தாவ ஸம்ப⁴வேஸினோ நாம, அண்ட³கோஸம் வத்தி²கோஸஞ்ச பி⁴ந்தி³த்வா ப³ஹி நிக்க²ந்தா பூ⁴தா நாம. ஸம்ஸேத³ஜா ஓபபாதிகா ச பட²மசித்தக்க²ணே ஸம்ப⁴வேஸினோ நாம, து³தியசித்தக்க²ணதோ பபு⁴தி பூ⁴தா நாம. யேன வா இரியாபதே²ன ஜாயந்தி, யாவ ததோ அஞ்ஞம் ந பாபுணந்தி, தாவ ஸம்ப⁴வேஸினோ நாம, ததோ பரம் பூ⁴தா நாம. அத² வா பூ⁴தாதி ஜாதா அபி⁴னிப்³ப³த்தா, யே பூ⁴தா அபி⁴னிப்³ப³த்தாயேவ, ந புன ப⁴விஸ்ஸந்தீதி ஸங்க²ம் க³ச்ச²ந்தி, தேஸம் கீ²ணாஸவானம் ஏதம் அதி⁴வசனம். ஸம்ப⁴வமேஸந்தீதி ஸம்ப⁴வேஸினோ. அப்பஹீனப⁴வஸம்யோஜனத்தா ஆயதிம்பி ஸம்ப⁴வம் ஏஸந்தானம் ஸேக்க²புது²ஜ்ஜனானமேதம் அதி⁴வசனம். ஏவம் ஸப்³ப³தா²பி இமேஹி த்³வீஹி பதே³ஹி ஸப்³ப³ஸத்தே பரியாதி³யதி. வாஸத்³தோ³ சேத்த² ஸம்பிண்ட³னத்தோ², தஸ்மா பூ⁴தானஞ்ச ஸம்ப⁴வேஸீனஞ்சாதி அயமத்தோ² வேதி³தப்³போ³.

டி²தியாதி டி²தத்த²ம். அனுக்³க³ஹாயாதி அனுக்³க³ஹத்த²ம். வசனபே⁴தோ³யேவ சேஸ, அத்தோ² பன த்³வின்னம்பி பதா³னம் ஏகோயேவ. அத² வா டி²தியாதி தஸ்ஸ தஸ்ஸ ஸத்தஸ்ஸ உப்பன்னத⁴ம்மானம் அனுப்பப³ந்த⁴வஸேன அவிச்சே²தா³ய. அனுக்³க³ஹாயாதி அனுப்பன்னானம் உப்பாதா³ய. உபோ⁴பி சேதானி ‘‘பூ⁴தானம் வா டி²தியா சேவ அனுக்³க³ஹாய ச, ஸம்ப⁴வேஸீனம் வா டி²தியா சேவ அனுக்³க³ஹாய சா’’தி ஏவம் உப⁴யத்த² த³ட்ட²ப்³பா³னீதி.

கப³ளீகாரோ ஆஹாரோதி கப³ளம் கத்வா அஜ்ஜோ²ஹரிதப்³ப³கோ ஆஹாரோ, ஓத³னகும்மாஸாதி³வத்து²காய ஓஜாயேதம் அதி⁴வசனம். ஓளாரிகோ வா ஸுகு²மோ வாதி வத்து²ஓளாரிகதாய ஓளாரிகோ, ஸுகு²மதாய ஸுகு²மோ. ஸபா⁴வேன பன ஸுகு²மரூபபரியாபன்னத்தா கப³ளீகாரோ ஆஹாரோ ஸுகு²மோவ ஹோதி. ஸாபி சஸ்ஸ வத்து²தோ ஓளாரிகதா ஸுகு²மதா ச உபாதா³யுபாதா³ய வேதி³தப்³பா³. கும்பீ⁴லானஞ்ஹி ஆஹாரம் உபாதா³ய மோரானம் ஆஹாரோ ஸுகு²மோ. கும்பீ⁴லா கிர பாஸாணே கி³லந்தி, தே ச நேஸம் குச்சி²ப்பத்தா விலீயந்தி. மோரா ஸப்பவிச்சி²காதி³பாணே கா²த³ந்தி. மோரானம் பன ஆஹாரம் உபாதா³ய தரச்சா²னம் ஆஹாரோ ஸுகு²மோ. தே கிர திவஸ்ஸச²ட்³டி³தானி விஸாணானி சேவ அட்டீ²னி ச கா²த³ந்தி, தானி ச நேஸம் கே²ளேன தேமிதமத்தானேவ கந்த³மூலம் விய முது³கானி ஹோந்தி. தரச்சா²னம் ஆஹாரம் உபாதா³ய ஹத்தீ²னம் ஆஹாரோ ஸுகு²மோ. தே ஹி நானாருக்க²ஸாகா²த³யோ கா²த³ந்தி. ஹத்தீ²னம் ஆஹாரதோ க³வயகோ³கண்ணமிகா³தீ³னம் ஆஹாரோ ஸுகு²மோ. தே கிர நிஸ்ஸாரானி நானாருக்க²பண்ணாதீ³னி கா²த³ந்தி. தேஸம்பி ஆஹாரதோ கு³ன்னம் ஆஹாரோ ஸுகு²மோ. தே அல்லஸுக்க²திணானி கா²த³ந்தி. தேஸம் ஆஹாரதோ ஸஸானம் ஆஹாரோ ஸுகு²மோ. ஸஸானம் ஆஹாரதோ ஸகுணானம் ஆஹாரோ ஸுகு²மோ. ஸகுணானம் ஆஹாரதோ பச்சந்தவாஸீனம் ஆஹாரோ ஸுகு²மோ. பச்சந்தவாஸீனம் ஆஹாரதோ கா³மபோ⁴ஜகானம் ஆஹாரோ ஸுகு²மோ. கா³மபோ⁴ஜகானம் ஆஹாரதோ ராஜராஜமஹாமத்தானம் ஆஹாரோ ஸுகு²மோ. தேஸம்பி ஆஹாரதோ சக்கவத்தினோ ஆஹாரோ ஸுகு²மோ. சக்கவத்தினோ ஆஹாரதோ பு⁴ம்மானம் தே³வானம் ஆஹாரோ ஸுகு²மோ. பு⁴ம்மானம் தே³வானம் ஆஹாரதோ சாதுமஹாராஜிகானம். ஏவம் யாவ பரனிம்மிதவஸவத்தீனம் ஆஹாரா வித்தா²ரேதப்³பா³. தேஸம் பனாஹாரோ ஸுகு²மோத்வேவ நிட்ட²ம் பத்தோ.

ஏத்த² ச ஓளாரிகே வத்து²ஸ்மிம் ஓஜா பரித்தா ஹோதி து³ப்³ப³லா, ஸுகு²மே ப³லவதீ. ததா² ஹி ஏகபத்தபூரம்பி யாகு³ம் பீதோ முஹுத்தேனேவ ஜிக⁴ச்சி²தோ ஹோதி யம்கிஞ்சிதே³வ கா²தி³துகாமோ, ஸப்பிம் பன பஸதமத்தம் பிவித்வா தி³வஸம் அபோ⁴த்துகாமோ ஹோதி. தத்த² வத்து² கம்மஜதேஜஸங்கா²தம் பரிஸ்ஸயம் வினோதே³தி, ந பன ஸக்கோதி பாலேதும். ஓஜா பன பாலேதி, ந ஸக்கோதி பரிஸ்ஸயம் வினோதே³தும். த்³வே பன ஏகதோ ஹுத்வா பரிஸ்ஸயஞ்சேவ வினோதே³ந்தி பாலேந்தி சாதி.

ப²ஸ்ஸோ து³தியோதி சக்கு²ஸம்ப²ஸ்ஸாதி³ ச²ப்³பி³தோ⁴பி ப²ஸ்ஸோ ஏதேஸு சதூஸு ஆஹாரேஸு து³தியோ ஆஹாரோதி வேதி³தப்³போ³. தே³ஸனானயோ ஏவ சேஸ, தஸ்மா இமினா நாம காரணேன து³தியோ ததியோ சாதி இத³மேத்த² ந க³வேஸிதப்³ப³ம். மனோஸஞ்சேதனாதி சேதனாவ வுச்சதி. விஞ்ஞாணந்தி சித்தம். இதி ப⁴க³வா இமஸ்மிம் டா²னே உபாதி³ண்ணகஅனுபாதி³ண்ணகவஸேன ஏகராஸிம் கத்வா சத்தாரோ ஆஹாரே த³ஸ்ஸேஸி. கப³ளீகாராஹாரோ ஹி உபாதி³ண்ணகோபி அத்தி² அனுபாதி³ண்ணகோபி, ததா² ப²ஸ்ஸாத³யோ. தத்த² ஸப்பாதீ³ஹி கி³லிதானம் மண்டூ³காதீ³னம் வஸேன உபாதி³ண்ணககப³ளீகாராஹாரோ த³ட்ட²ப்³போ³. மண்டூ³காத³யோ ஹி ஸப்பாதீ³ஹி கி³லிதா அந்தோகுச்சி²க³தாபி கிஞ்சி காலம் ஜீவந்தியேவ. தே யாவ உபாதி³ண்ணகபக்கே² திட்ட²ந்தி, தாவ ஆஹாரத்த²ம் ந ஸாதே⁴ந்தி. பி⁴ஜ்ஜித்வா பன அனுபாதி³ண்ணகபக்கே² டி²தா ஸாதே⁴ந்தி. ததா³பி உபாதி³ண்ணகாஹாரோதி வுச்சந்தீதி. இத³ம் பன ஆசரியானம் ந ருச்சதீதி அட்ட²கதா²யமேவ படிக்கி²பித்வா இத³ம் வுத்தம் – இமேஸம் ஸத்தானம் கா²த³ந்தானம்பி அகா²த³ந்தானம்பி பு⁴ஞ்ஜந்தானம்பி அபு⁴ஞ்ஜந்தானம்பி படிஸந்தி⁴சித்தேனேவ ஸஹஜாதா கம்மஜா ஓஜா நாம அத்தி², ஸா யாவபி ஸத்தமா தி³வஸா பாலேதி, அயமேவ உபாதி³ண்ணககப³ளீகாராஹாரோதி வேதி³தப்³போ³. தேபூ⁴மகவிபாகவஸேன பன உபாதி³ண்ணகப²ஸ்ஸாத³யோ வேதி³தப்³பா³, தேபூ⁴மககுஸலாகுஸலகிரியவஸேன அனுபாதி³ண்ணகா. லோகுத்தரா பன ருள்ஹீவஸேன கதி²தாதி.

ஏத்தா²ஹ – ‘‘யதி³ பச்சயட்டோ² ஆஹாரட்டோ², அத² கஸ்மா அஞ்ஞேஸுபி ஸத்தானம் பச்சயேஸு விஜ்ஜமானேஸு இமேயேவ சத்தாரோ வுத்தா’’தி? வுச்சதே – அஜ்ஜ²த்திகஸந்ததியா விஸேஸபச்சயத்தா. விஸேஸபச்சயோ ஹி கப³ளீகாராஹாரப⁴க்கா²னம் ஸத்தானம் ரூபகாயஸ்ஸ கப³ளீகாரோ ஆஹாரோ, நாமகாயே வேத³னாய ப²ஸ்ஸோ, விஞ்ஞாணஸ்ஸ மனோஸஞ்சேதனா, நாமரூபஸ்ஸ விஞ்ஞாணம். யதா²ஹ – ‘‘ஸேய்யதா²பி, பி⁴க்க²வே, அயம் காயோ ஆஹாரட்டி²திகோ ஆஹாரம் படிச்ச திட்ட²தி, அனாஹாரோ நோ திட்ட²தி (ஸம். நி. 5.183), ததா² ப²ஸ்ஸபச்சயா வேத³னா, ஸங்கா²ரபச்சயா விஞ்ஞாணம், விஞ்ஞாணபச்சயா நாமரூப’’ந்தி (ஸம். நி. 2.1; விப⁴. 225).

கோ பனேத்த² ஆஹாரோ கிம் ஆஹரதீதி? கப³ளீகாராஹாரோ ஓஜட்ட²மகரூபானி ஆஹரதி ப²ஸ்ஸாஹாரோ திஸ்ஸோ வேத³னா, மனோஸஞ்சேதனாஹாரோ தயோ ப⁴வே, விஞ்ஞாணாஹாரோ படிஸந்தி⁴னாமரூபந்தி.

கத²ம்? கப³ளீகாராஹாரோ தாவ முகே² ட²பிதமத்தேயேவ அட்ட² ரூபானி ஸமுட்டா²பேதி, த³ந்தவிசுண்ணிதம் பன அஜ்ஜோ²ஹரியமானம் ஏகேகம் ஸித்த²ம் அட்ட²ட்ட²ரூபானி ஸமுட்டா²பேதியேவ. ஏவம் கப³ளீகாராஹாரோ ஓஜட்ட²மகரூபானி ஆஹரதி. ப²ஸ்ஸாஹாரோ பன ஸுக²வேத³னீயோ ப²ஸ்ஸோ உப்பஜ்ஜமானோயேவ ஸுக²ம் வேத³னம் ஆஹரதி, து³க்க²வேத³னீயோ து³க்க²ம், அது³க்க²மஸுக²வேத³னீயோ அது³க்க²மஸுக²ந்தி ஏவம் ஸப்³ப³தா²பி ப²ஸ்ஸாஹாரோ திஸ்ஸோ வேத³னா ஆஹரதி.

மனோஸஞ்சேதனாஹாரோ காமப⁴வூபக³ம் கம்மம் காமப⁴வம் ஆஹரதி, ரூபாரூபப⁴வூபகா³னி தம் தம் ப⁴வம். ஏவம் ஸப்³ப³தா²பி மனோஸஞ்சேதனாஹாரோ தயோ ப⁴வே ஆஹரதி. விஞ்ஞாணாஹாரோ பன யே ச படிஸந்தி⁴க்க²ணே தம்ஸம்பயுத்தகா தயோ க²ந்தா⁴, யானி ச திஸந்ததிவஸேன திம்ஸ ரூபானி உப்பஜ்ஜந்தி, ஸஹஜாதாதி³பச்சயனயேன தானி ஆஹரதீதி வுச்சதி. ஏவம் விஞ்ஞாணாஹாரோ படிஸந்தி⁴னாமரூபம் ஆஹரதீதி. ஏத்த² ச ‘‘மனோஸஞ்சேதனா தயோ ப⁴வே ஆஹரதீ’’தி ஸாஸவகுஸலாகுஸலசேதனாவ வுத்தா. ‘‘விஞ்ஞாணம் படிஸந்தி⁴னாமரூபம் ஆஹரதீ’’தி படிஸந்தி⁴விஞ்ஞாணமேவ வுத்தம். அவிஸேஸேன பன தம்ஸம்பயுத்ததம்ஸமுட்டா²னத⁴ம்மானம் ஆஹரணதோபேதே ‘‘ஆஹாரா’’தி வேதி³தப்³பா³.

ஏதேஸு சதூஸு ஆஹாரேஸு கப³ளீகாராஹாரோ உபத்த²ம்பே⁴ந்தோ ஆஹாரகிச்சம் ஸாதே⁴தி, ப²ஸ்ஸோ பு²ஸந்தோயேவ மனோஸஞ்சேதனா ஆயூஹமானாவ, விஞ்ஞாணம் விஜானந்தமேவ. கத²ம்? கப³ளீகாராஹாரோ ஹி உபத்த²ம்பே⁴ந்தோயேவ காயட்ட²பனேன ஸத்தானம் டி²தியா ஹோதி. கம்மஜனிதோபி ஹி அயம் காயோ கப³ளீகாராஹாரேன உபத்த²த்³தோ⁴ த³ஸபி வஸ்ஸானி வஸ்ஸஸதம்பி யாவ ஆயுபரிமாணா திட்ட²தி. யதா² கிம்? யதா² மாதுயா ஜனிதோபி தா³ரகோ தா⁴தியா த²ஞ்ஞாதீ³னி பாயேத்வா போஸியமானோ சிரம் திட்ட²தி, யதா² ச உபத்த²ம்பே⁴ன உபத்த²ம்பி⁴தம் கே³ஹம். வுத்தம்பி சேதம் –

‘‘யதா², மஹாராஜ, கே³ஹே பபதந்தே அஞ்ஞேன தா³ருனா உபத்த²ம்பி⁴தம் ஸந்தம் ஏவ தம் கே³ஹம் ந பததி. ஏவமேவ கோ², மஹாராஜ, அயம் காயோ ஆஹாரட்டி²திகோ ஆஹாரம் படிச்ச திட்ட²தீ’’தி.

ஏவம் கப³ளீகாரோ ஆஹாரோ உபத்த²ம்பே⁴ந்தோ ஆஹாரகிச்சம் ஸாதே⁴தி.

ஏவம் ஸாதே⁴ந்தோபி ச கப³ளீகாரோ ஆஹாரோ த்³வின்னம் ரூபஸந்ததீனம் பச்சயோ ஹோதி ஆஹாரஸமுட்டா²னஸ்ஸ ச உபாதி³ண்ணகஸ்ஸ ச. கம்மஜானம் அனுபாலகோ ஹுத்வா பச்சயோ ஹோதி, ஆஹாரஸமுட்டா²னானம் ஜனகோ ஹுத்வாதி. ப²ஸ்ஸோ பன ஸுகா²தி³வத்து²பூ⁴தம் ஆரம்மணம் பு²ஸந்தோயேவ ஸுகா²தி³வேத³னாபவத்தனேன ஸத்தானம் டி²தியா ஹோதி. மனோஸஞ்சேதனா குஸலாகுஸலகம்மவஸேன ஆயூஹமானாயேவ ப⁴வமூலனிப்பா²த³னதோ ஸத்தானம் டி²தியா ஹோதி. விஞ்ஞாணம் விஜானந்தமேவ நாமரூபப்பவத்தனேன ஸத்தானம் டி²தியா ஹோதீதி.

ஏவம் உபத்த²ம்ப⁴னாதி³வஸேன ஆஹாரகிச்சம் ஸாத⁴யமானேஸு பனேதேஸு சத்தாரி ப⁴யானி த³ட்ட²ப்³பா³னி. ஸேய்யதி²த³ம் – கப³ளீகாராஹாரே நிகந்தியேவ ப⁴யம், ப²ஸ்ஸே உபக³மனமேவ, மனோஸஞ்சேதனாய ஆயூஹனமேவ, விஞ்ஞாணே அபி⁴னிபாதோயேவ ப⁴யந்தி. கிம் காரணா? கப³ளீகாராஹாரே ஹி நிகந்திம் கத்வா ஸீதாதீ³னம் புரக்க²தா ஸத்தா ஆஹாரத்தா²ய முத்³தா³க³ணனாதி³கம்மானி கரோந்தா அனப்பகம் து³க்க²ம் நிக³ச்ச²ந்தி. ஏகச்சே ச இமஸ்மிம் ஸாஸனே பப்³ப³ஜித்வாபி வேஜ்ஜகம்மாதி³காய அனேஸனாய ஆஹாரம் பரியேஸந்தா தி³ட்டே²வ த⁴ம்மே கா³ரய்ஹா ஹோந்தி, ஸம்பராயேபி, ‘‘தஸ்ஸ ஸங்கா⁴டிபி ஆதி³த்தா ஸம்பஜ்ஜலிதா’’திஆதி³னா லக்க²ணஸம்யுத்தே (ஸம். நி. 2.218) வுத்தனயேன ஸமணபேதா ஹோந்தி. இமினா தாவ காரணேன கப³ளீகாரே ஆஹாரே நிகந்தி ஏவ ப⁴யந்தி வேதி³தப்³பா³.

ப²ஸ்ஸம் உபக³ச்ச²ந்தாபி ப²ஸ்ஸஸ்ஸாதி³னோ பரேஸம் ரக்கி²தகோ³பிதேஸு தா³ராதீ³ஸு ப⁴ண்டே³ஸு அபரஜ்ஜ²ந்தி, தே ஸஹ ப⁴ண்டே³ன ப⁴ண்ட³ஸாமிகா க³ஹேத்வா க²ண்டா³க²ண்டி³கம் வா சி²ந்தி³த்வா ஸங்காரகூடே ச²ட்³டே³ந்தி, ரஞ்ஞோ வா நிய்யாதே³ந்தி. ததோ தே ராஜா விவிதா⁴ கம்மகாரணா காராபேதி. காயஸ்ஸ ச பே⁴தா³ து³க்³க³தி தேஸம் பாடிகங்கா² ஹோதி. இதி ப²ஸ்ஸஸ்ஸாத³மூலகம் தி³ட்ட²த⁴ம்மிகம்பி ஸம்பராயிகம்பி ப⁴யம் ஸப்³ப³மாக³தமேவ ஹோதி. இமினா காரணேன ப²ஸ்ஸாஹாரே உபக³மனமேவ ப⁴யந்தி வேதி³தப்³ப³ம்.

குஸலாகுஸலகம்மாயூஹனே பன தம்மூலகம் தீஸு ப⁴வேஸு ப⁴யம் ஸப்³ப³ம் ஆக³தமேவ ஹோதி. இமினா காரணேன மனோஸஞ்சேதனாஹாரே ஆயூஹனமேவ ப⁴யந்தி வேதி³தப்³ப³ம்.

படிஸந்தி⁴விஞ்ஞாணஞ்ச யஸ்மிம் யஸ்மிம் டா²னே அபி⁴னிபததி, தஸ்மிம் தஸ்மிம் டா²னே படிஸந்தி⁴னாமரூபம் க³ஹேத்வாவ நிப்³ப³த்ததி. தஸ்மிஞ்ச நிப்³ப³த்தே ஸப்³ப³ப⁴யானி நிப்³ப³த்தானியேவ ஹோந்தி தம்மூலகத்தாதி இமினா காரணேன விஞ்ஞாணாஹாரே அபி⁴னிபாதோயேவ ப⁴யந்தி வேதி³தப்³போ³தி.

கிம்னிதா³னாதிஆதீ³ஸு நிதா³னாதீ³னி ஸப்³பா³னேவ காரணவேவசனானி. காரணஞ்ஹி யஸ்மா ப²லம் நிதே³தி, ‘‘ஹந்த³ நம் க³ண்ஹதா²’’தி அப்பேதி விய, தஸ்மா நிதா³னந்தி வுச்சதி. யஸ்மா தம் ததோ ஸமுதே³தி ஜாயதி பப⁴வதி, தஸ்மா ஸமுத³யோ ஜாதி பப⁴வோதி வுச்சதி. அயம் பனேத்த² பத³த்தோ² – கிம்னிதா³னம் ஏதேஸந்தி கிம்னிதா³னா. கோ ஸமுத³யோ ஏதேஸந்தி கிம்ஸமுத³யா. கா ஜாதி ஏதேஸந்தி கிம்ஜாதிகா. கோ பப⁴வோ ஏதேஸந்தி கிம்பப⁴வா. யஸ்மா பன தேஸம் தண்ஹா யதா²வுத்தேன அத்தே²ன நிதா³னஞ்சேவ ஸமுத³யோ ச ஜாதி ச பப⁴வோ ச, தஸ்மா ‘‘தண்ஹானிதா³னா’’திஆதி³மாஹ. ஏவம் ஸப்³ப³பதே³ஸு அத்தோ² வேதி³தப்³போ³.

ஏத்த² ச இமே சத்தாரோ ஆஹாரா தண்ஹானிதா³னாதி படிஸந்தி⁴ம் ஆதி³ம் கத்வா அத்தபா⁴வஸங்கா²தானம் ஆஹாரானம் புரிமதண்ஹானம் வஸேன நிதா³னம் வேதி³தப்³ப³ம். கத²ம்? படிஸந்தி⁴க்க²ணே தாவ பரிபுண்ணாயதனானம் ஸத்தானம் ஸத்தஸந்ததிவஸேன, ஸேஸானம் ததோ ஊனஊனஸந்ததிவஸேன உப்பன்னரூபப்³ப⁴ந்தரம் ஜாதா ஓஜா அத்தி², அயம் தண்ஹானிதா³னோ உபாதி³ண்ணககப³ளீகாராஹாரோ. படிஸந்தி⁴சித்தஸம்பயுத்தா பன ப²ஸ்ஸசேதனா ஸயஞ்ச சித்தம் விஞ்ஞாணந்தி இமே தண்ஹானிதா³னா உபாதி³ண்ணக-ப²ஸ்ஸமனோஸஞ்சேதனா-விஞ்ஞாணாஹாராதி ஏவம் தாவ புரிமதண்ஹானிதா³னா படிஸந்தி⁴கா ஆஹாரா. யதா² ச படிஸந்தி⁴கா, ஏவம் ததோ பரம் பட²மப⁴வங்க³சித்தக்க²ணாதி³னிப்³ப³த்தாபி வேதி³தப்³பா³.

யஸ்மா பன ப⁴க³வா ந கேவலம் ஆஹாரானமேவ நிதா³னம் ஜானாதி, ஆஹாரனிதா³னபூ⁴தாய தண்ஹாயபி, தண்ஹாய நிதா³னானம் வேத³னாதீ³னம்பி நிதா³னம் ஜானாதியேவ, தஸ்மா தண்ஹா சாயம், பி⁴க்க²வே, கிம்னிதா³னாதிஆதி³னா நயேன வட்டம் த³ஸ்ஸேத்வா விவட்டம் த³ஸ்ஸேஸி. இமஸ்மிஞ்ச பன டா²னே ப⁴க³வா அதீதாபி⁴முக²ம் தே³ஸனம் கத்வா அதீதேன வட்டம் த³ஸ்ஸேதி. கத²ம்? ஆஹாரவஸேன ஹி அயம் அத்தபா⁴வோ க³ஹிதோ.

தண்ஹாதி இமஸ்ஸத்தபா⁴வஸ்ஸ ஜனகம் கம்மம், வேத³னாப²ஸ்ஸஸளாயதனனாமரூபவிஞ்ஞாணானி யஸ்மிம் அத்தபா⁴வே ட²த்வா கம்மம் ஆயூஹிதம், தம் த³ஸ்ஸேதும் வுத்தானி, அவிஜ்ஜாஸங்கா²ரா தஸ்ஸத்தபா⁴வஸ்ஸ ஜனகம் கம்மம். இதி த்³வீஸு டா²னேஸு அத்தபா⁴வோ, த்³வீஸு தஸ்ஸ ஜனகம் கம்மந்தி ஸங்கே²பேன கம்மஞ்சேவ கம்மவிபாகஞ்சாதி, த்³வேபி த⁴ம்மே த³ஸ்ஸேந்தேன அதீதாபி⁴முக²ம் தே³ஸனம் கத்வா அதீதேன வட்டம் த³ஸ்ஸிதம்.

தத்ராயம் தே³ஸனா அனாக³தஸ்ஸ அத³ஸ்ஸிதத்தா அபரிபுண்ணாதி ந த³ட்ட²ப்³பா³. நயதோ பன பரிபுண்ணாத்வேவ த³ட்ட²ப்³பா³. யதா² ஹி சக்கு²மா புரிஸோ உத³கபிட்டே² நிபன்னம் ஸும்ஸுமாரம் தி³ஸ்வா தஸ்ஸ பரபா⁴க³ம் ஓலோகேந்தோ கீ³வம் பஸ்ஸேய்ய, ஓரதோ பிட்டி²ம், பரியோஸானே நங்கு³ட்ட²மூலம், ஹேட்டா² குச்சி²ம் ஓலோகேந்தோ பன உத³கக³தம் அக்³க³னங்கு³ட்ட²ஞ்சேவ சத்தாரோ ச ஹத்த²பாதே³ ந பஸ்ஸேய்ய, ஸோ ந ஏத்தாவதா ‘‘அபரிபுண்ணோ ஸும்ஸுமாரோ’’தி க³ண்ஹாதி, நயதோ பன பரிபுண்ணோத்வேவ க³ண்ஹாதி, ஏவம்ஸம்பத³மித³ம் வேதி³தப்³ப³ம்.

உத³கபிட்டே² நிபன்னஸும்ஸுமாரோ விய ஹி தேபூ⁴மகவட்டம். தீரே டி²தோ சக்கு²மா புரிஸோ விய யோகா³வசரோ. தேன புரிஸேன உத³கபிட்டே² ஸும்ஸுமாரஸ்ஸ தி³ட்ட²காலோ விய யோகி³னா ஆஹாரவஸேன இமஸ்ஸத்தபா⁴வஸ்ஸ தி³ட்ட²காலோ. பரதோ கீ³வாய தி³ட்ட²காலோ விய இமஸ்ஸத்தபா⁴வஸ்ஸ ஜனிகாய தண்ஹாய தி³ட்ட²காலோ. பிட்டி²யா தி³ட்ட²காலோ விய யஸ்மிம் அத்தபா⁴வே தண்ஹாஸங்கா²தம் கம்மம் கதம், வேத³னாதி³வஸேன தஸ்ஸ தி³ட்ட²காலோ. நங்கு³ட்ட²மூலஸ்ஸ தி³ட்ட²காலோ விய தஸ்ஸத்தபா⁴வஸ்ஸ ஜனகானம் அவிஜ்ஜாஸங்கா²ரானம் தி³ட்ட²காலோ. ஹேட்டா² குச்சி²ம் ஓலோகேந்தஸ்ஸ பன அக்³க³னங்கு³ட்ட²ஞ்சேவ சத்தாரோ ச ஹத்த²பாதே³ அதி³ஸ்வாபி ‘‘அபரிபுண்ணோ ஸும்ஸுமாரோ’’தி அக³ஹேத்வா நயதோ பரிபுண்ணோத்வேவ க³ஹணம் விய யத்த² யத்த² பச்சயவட்டம் பாளியம் ந ஆக³தம், தத்த² தத்த² ‘‘தே³ஸனா அபரிபுண்ணா’’தி அக³ஹேத்வா நயதோ பரிபுண்ணாத்வேவ க³ஹணம் வேதி³தப்³ப³ம். தத்த² ச ஆஹாரதண்ஹானம் அந்தரே ஏகோ ஸந்தி⁴, தண்ஹாவேத³னானம் அந்தரே ஏகோ, விஞ்ஞாணஸங்கா²ரானம் அந்தரே ஏகோதி ஏவம் திஸந்தி⁴சதுஸங்கே²பமேவ வட்டம் த³ஸ்ஸிதந்தி. பட²மம்.