3. படிபதா³ஸுத்தவண்ணனா

3. ததியே மிச்சா²படிபத³ந்தி அயம் தாவ அனிய்யானிகபடிபதா³. நனு ச அவிஜ்ஜாபச்சயா புஞ்ஞாபி⁴ஸங்கா²ரோபி அத்தி² ஆனேஞ்ஜாபி⁴ஸங்கா²ரோபி, ஸோ கத²ம் மிச்சா²படிபதா³ ஹோதீதி. வட்டஸீஸத்தா. யஞ்ஹி கிஞ்சி ப⁴வத்தயஸங்கா²தம் வட்டம் பத்தே²த்வா பவத்திதம், அந்தமஸோ பஞ்சாபி⁴ஞ்ஞா அட்ட² வா பன ஸமாபத்தியோ, ஸப்³ப³ம் தம் வட்டபக்கி²யம் வட்டஸீஸந்தி வட்டஸீஸத்தா மிச்சா²படிபதா³வ ஹோதி. யம் பன கிஞ்சி விவட்டம் நிப்³பா³னம் பத்தே²த்வா பவத்திதம், அந்தமஸோ உளுங்கயாகு³மத்ததா³னம்பி பண்ணமுட்டி²தா³னமத்தம்பி, ஸப்³ப³ம் தம் விவட்டபக்கி²யம் விவட்டனிஸ்ஸிதம், விவட்டபக்கி²கத்தா ஸம்மாபடிபதா³வ ஹோதி. அப்பமத்தகம்பி ஹி பண்ணமுட்டி²மத்ததா³னகுஸலம் வா ஹோது மஹந்தம் வேலாமதா³னாதி³குஸலம் வா, ஸசே வட்டஸம்பத்திம் பத்தே²த்வா வட்டனிஸ்ஸிதவஸேன மிச்சா² ட²பிதம் ஹோதி, வட்டமேவ ஆஹரிதும் ஸக்கோதி, நோ விவட்டம். ‘‘இத³ம் மே தா³னம் ஆஸவக்க²யாவஹம் ஹோதூ’’தி ஏவம் பன விவட்டம் பத்தே²ந்தேன விவட்டவஸேன ஸம்மா ட²பிதம் அரஹத்தம்பி பச்சேகபோ³தி⁴ஞாணம்பி ஸப்³ப³ஞ்ஞுதஞ்ஞாணம்பி தா³தும் ஸக்கோதியேவ, ந அரஹத்தம் அப்பத்வா பரியோஸானம் க³ச்ச²தி. இதி அனுலோமவஸேன மிச்சா²படிபதா³, படிலோமவஸேன ஸம்மாபடிபதா³ தே³ஸிதாதி வேதி³தப்³பா³. நனு சேத்த² படிபதா³ புச்சி²தா, நிப்³பா³னம் பா⁴ஜிதம், நிய்யாதனேபி படிபதா³வ நிய்யாதிதா. ந ச நிப்³பா³னஸ்ஸ படிபதா³தி நாமம், ஸவிபஸ்ஸனானம் பன சதுன்னம் மக்³கா³னமேதம் நாமம், தஸ்மா புச்சா²னிய்யாதனேஹி பத³பா⁴ஜனம் ந ஸமேதீதி. நோ ந ஸமேதி, கஸ்மா? ப²லேன படிபதா³ய த³ஸ்ஸிதத்தா. ப²லேன ஹேத்த² படிபதா³ த³ஸ்ஸிதா. ‘‘அவிஜ்ஜாய த்வேவ அஸேஸவிராக³னிரோதா⁴ ஸங்கா²ரனிரோதோ⁴’’தி ஏதம் நிரோத⁴ஸங்கா²தம் நிப்³பா³னம் யஸ்ஸா படிபதா³ய ப²லம், அயம் வுச்சதி, பி⁴க்க²வே, ஸம்மாபடிபதா³தி அயமேத்த² அத்தோ². இமஸ்மிஞ்ச அத்தே² அஸேஸவிராக³னிரோதா⁴தி ஏத்த² விராகோ³ நிரோத⁴ஸ்ஸேவ வேவசனம், அஸேஸவிராகா³ அஸேஸனிரோதா⁴தி அயஞ்ஹேத்த² அதி⁴ப்பாயோ. யேன வா விராக³ஸங்கா²தேன மக்³கே³ன அஸேஸனிரோதோ⁴ ஹோதி, தம் த³ஸ்ஸேதும் ஏதம் பத³பா⁴ஜனம் வுத்தம். ஏவஞ்ஹி ஸதி ஸானுபா⁴வா படிபதா³ விப⁴த்தா ஹோதி. இதி இமஸ்மிம்பி ஸுத்தே வட்டவிவட்டமேவ கதி²தந்தி. ததியம்.