5. ஜந்துஸுத்தவண்ணனா

106. பஞ்சமே கோஸலேஸு விஹரந்தீதி ப⁴க³வதோ ஸந்திகே கம்மட்டா²னம் க³ஹேத்வா தத்த² க³ந்த்வா விஹரந்தி. உத்³த⁴தாதி அகப்பியே கப்பியஸஞ்ஞிதாய ச கப்பியே அகப்பியஸஞ்ஞிதாய ச அனவஜ்ஜே ஸாவஜ்ஜஸஞ்ஞிதாய ச ஸாவஜ்ஜே அனவஜ்ஜஸஞ்ஞிதாய ச உத்³த⁴ச்சபகதிகா ஹுத்வா. உன்னளாதி உக்³க³தனளா, உட்டி²ததுச்ச²மானாதி வுத்தம் ஹோதி. சபலாதி பத்தசீவரமண்ட³னாதி³னா சாபல்லேன யுத்தா. முக²ராதி முக²க²ரா, க²ரவசனாதி வுத்தம் ஹோதி. விகிண்ணவாசாதி அஸம்யதவசனா, தி³வஸம்பி நிரத்த²கவசனபலாபினோ. முட்ட²ஸ்ஸதினோதி நட்ட²ஸ்ஸதினோ ஸதிவிரஹிதா, இத⁴ கதம் ஏத்த² பமுஸ்ஸந்தி. அஸம்பஜானாதி நிப்பஞ்ஞா. அஸமாஹிதாதி அப்பனாஉபசாரஸமாதி⁴ரஹிதா, சண்ட³ஸோதே ப³த்³த⁴னாவாஸதி³ஸா. விப்³ப⁴ந்தசித்தாதி அனவட்டி²தசித்தா, பந்தா²ருள்ஹபா³லமிக³ஸதி³ஸா. பாகதிந்த்³ரியாதி ஸம்வராபா⁴வேன கி³ஹிகாலே விய விவடஇந்த்³ரியா.

ஜந்தூதி ஏவம்னாமகோ தே³வபுத்தோ. தத³ஹுபோஸதே²தி தஸ்மிம் அஹு உபோஸதே², உபோஸத²தி³வஸேதி அத்தோ². பன்னரஸேதி சாதுத்³த³ஸிகாதி³படிக்கே²போ. உபஸங்கமீதி சோத³னத்தா²ய உபக³தோ. ஸோ கிர சிந்தேஸி – ‘‘இமே பி⁴க்கூ² ஸத்து² ஸந்திகே கம்மட்டா²னம் க³ஹேத்வா நிக்க²ந்தா, இதா³னி பமத்தா விஹரந்தி, ந கோ² பனேதே பாடியேக்கம் நிஸின்னட்டா²னே சோதி³யமானா கத²ம் க³ண்ஹிஸ்ஸந்தி, ஸமாக³மனகாலே சோதி³ஸ்ஸாமீ’’தி உபோஸத²தி³வஸே தேஸம் ஸன்னிபதிதபா⁴வம் ஞத்வா உபஸங்கமி. கா³தா²ஹி அஜ்ஜ²பா⁴ஸீதி ஸப்³பே³ஸம் மஜ்ஜே² ட²த்வா கா³தா² அபா⁴ஸி.

தத்த² யஸ்மா கு³ணகதா²ய ஸத்³தி⁴ம் நிக்³கு³ணஸ்ஸ அகு³ணோ பாகடோ ஹோதி, தஸ்மா கு³ணம் தாவ கதே²ந்தோ ஸுக²ஜீவினோ புரே ஆஸுந்திஆதி³மாஹ. தத்த² ஸுக²ஜீவினோ புரே ஆஸுந்தி புப்³பே³ பி⁴க்கூ² ஸுப்போஸா ஸுப⁴ரா அஹேஸும், உச்சனீசகுலேஸு ஸபதா³னம் சரித்வா லத்³தே⁴ன மிஸ்ஸகபிண்டே³ன யாபேஸுந்தி அதி⁴ப்பாயேன ஏவமாஹ. அனிச்சா²தி நித்தண்ஹா ஹுத்வா.

ஏவம் போராணகபி⁴க்கூ²னம் வண்ணம் கதே²த்வா இதா³னி தேஸம் அவண்ணம் கதே²ந்தோ து³ப்போஸந்திஆதி³மாஹ. தத்த² கா³மே கா³மணிகா வியாதி யதா² கா³மே கா³மகுடா நானப்பகாரேன ஜனம் பீளேத்வா கீ²ரத³தி⁴தண்டு³லாதீ³னி ஆஹராபேத்வா பு⁴ஞ்ஜந்தி, ஏவம் தும்ஹேபி அனேஸனாய டி²தா தும்ஹாகம் ஜீவிகம் கப்பேதா²தி அதி⁴ப்பாயேன வத³தி. நிபஜ்ஜந்தீதி உத்³தே³ஸபரிபுச்சா²மனஸிகாரேஹி அனத்தி²கா ஹுத்வா ஸயனம்ஹி ஹத்த²பாதே³ விஸ்ஸஜ்ஜேத்வா நிபஜ்ஜந்தி. பராகா³ரேஸூதி பரகே³ஹேஸு, குலஸுண்ஹாதீ³ஸூதி அத்தோ². முச்சி²தாதி கிலேஸமுச்சா²ய முச்சி²தா.

ஏகச்சேதி வத்தப்³ப³யுத்தகேயேவ. அபவித்³தா⁴தி ச²ட்³டி³தகா. அனாதா²தி அபதிட்டா². பேதாதி ஸுஸானே ச²ட்³டி³தா காலங்கதமனுஸ்ஸா. யதா² ஹி ஸுஸானே ச²ட்³டி³தா நானாஸகுணாதீ³ஹி க²ஜ்ஜந்தி, ஞாதகாபி நேஸம் நாத²கிச்சம் ந கரோந்தி, ந ரக்க²ந்தி, ந கோ³பயந்தி, ஏவமேவம் ஏவரூபாபி ஆசரியுபஜ்ஜா²யாதீ³னம் ஸந்திகா ஓவாதா³னுஸாஸனிம் ந லப⁴ந்தீதி அபவித்³தா⁴ அனாதா², யதா² பேதா, ததே²வ ஹோந்தி. பஞ்சமம்.