8. தாயனஸுத்தவண்ணனா

89. அட்ட²மே புராணதித்த²கரோதி புப்³பே³ தித்த²கரோ. ஏத்த² ச தித்த²ம் நாம த்³வாஸட்டி² தி³ட்டி²யோ, தித்த²கரோ நாம தாஸம் உப்பாத³கோ ஸத்தா². ஸேய்யதி²த³ம் நந்தோ³, வச்சோ², கிஸோ, ஸம்கிச்சோ. புராணாத³யோ பன தித்தி²யா நாம. அயம் பன தி³ட்டி²ம் உப்பாதே³த்வா கத²ம் ஸக்³கே³ நிப்³ப³த்தோதி? கம்மவாதி³தாய. ஏஸ கிர உபோஸத²ப⁴த்தாதீ³னி அதா³ஸி, அனாதா²னம் வத்தம் பட்ட²பேஸி, பதிஸ்ஸயே அகாஸி, போக்க²ரணியோ க²ணாபேஸி, அஞ்ஞம்பி ப³ஹும் கல்யாணம் அகாஸி. ஸோ தஸ்ஸ நிஸ்ஸந்தே³ன ஸக்³கே³ நிப்³ப³த்தோ, ஸாஸனஸ்ஸ பன நிய்யானிகபா⁴வம் ஜானாதி. ஸோ ததா²க³தஸ்ஸ ஸந்திகம் க³ந்த்வா ஸாஸனானுச்ச²விகா வீரியப்படிஸம்யுத்தா கா³தா² வக்கா²மீதி ஆக³ந்த்வா சி²ந்த³ ஸோதந்திஆதி³மாஹ.

தத்த² சி²ந்தா³தி அனியமிதஆணத்தி. ஸோதந்தி தண்ஹாஸோதம். பரக்கம்மாதி பரக்கமித்வா வீரியம் கத்வா. காமேதி கிலேஸகாமேபி வத்து²காமேபி. பனுதா³தி நீஹர. ஏகத்தந்தி ஜா²னம். இத³ம் வுத்தம் ஹோதி – காமே அஜஹித்வா முனி ஜா²னம் ந உபபஜ்ஜதி, ந படிலப⁴தீதி அத்தோ². கயிரா சே கயிராதே²னந்தி யதி³ வீரியம் கரேய்ய, கரேய்யாத², தம் வீரியம் ந ஓஸக்கேய்ய. த³ள்ஹமேனம் பரக்கமேதி த³ள்ஹம் ஏனம் கரேய்ய. ஸிதி²லோ ஹி பரிப்³பா³ஜோதி ஸிதி²லக³ஹிதா பப்³ப³ஜ்ஜா. பி⁴ய்யோ ஆகிரதே ரஜந்தி அதிரேகம் உபரி கிலேஸரஜம் ஆகிரதி. அகதம் து³க்கடம் ஸேய்யோதி து³க்கடம் அகதமேவ ஸேய்யோ. யம் கிஞ்சீதி ந கேவலம் து³க்கடம் கத்வா கதஸாமஞ்ஞமேவ, அஞ்ஞம்பி யம் கிஞ்சி ஸிதி²லம் கதம் ஏவரூபமேவ ஹோதி. ஸம்கிலிட்ட²ந்தி து³க்கரகாரிகவதம். இமஸ்மிம் ஹி ஸாஸனே பச்சயஹேது ஸமாதி³ன்னது⁴தங்க³வதம் ஸம்கிலிட்ட²மேவ. ஸங்கஸ்ஸரந்தி ஸங்காய ஸரிதம், ‘‘இத³ம்பி இமினா கதம் ப⁴விஸ்ஸதி, இத³ம்பி இமினா’’தி ஏவம் ஆஸங்கிதபரிஸங்கிதம். ஆதி³ப்³ரஹ்மசரியிகாதி மக்³க³ப்³ரஹ்மசரியஸ்ஸ ஆதி³பூ⁴தா புப்³ப³பதா⁴னபூ⁴தா. அட்ட²மம்.