10. ஸூரியஸுத்தவண்ணனா

91. த³ஸமே ஸூரியோதி ஸூரியவிமானவாஸீ தே³வபுத்தோ. அந்த⁴காரேதி சக்கு²விஞ்ஞாணுப்பத்தினிவாரணேன அந்த⁴பா⁴வகரணே. விரோசதீதி வேரோசனோ. மண்ட³லீதி மண்ட³லஸண்டா²னோ. மா, ராஹு, கி³லீ சரமந்தலிக்கே²தி அந்தலிக்கே² சரம் ஸூரியம், ராஹு, மா கி³லீதி வத³தி. கிம் பனேஸ தம் கி³லதீதி? ஆம, கி³லதி. ராஹுஸ்ஸ ஹி அத்தபா⁴வோ மஹா, உச்சத்தனேன அட்ட²யோஜனஸதாதி⁴கானி சத்தாரி யோஜனஸஹஸ்ஸானி, பா³ஹந்தரமஸ்ஸ த்³வாத³ஸயோஜனஸதானி, ப³ஹலத்தேன ச² யோஜனஸதானி, ஸீஸம் நவ யோஜனஸதம், நலாடம் தியோஜனஸதம், ப⁴முகந்தரம் பண்ணாஸயோஜனம், முக²ம் த்³வியோஜனஸதம், கா⁴னம் தியோஜனஸதம், முகா²தா⁴னம் தியோஜனஸதக³ம்பீ⁴ரம் ஹத்த²தலபாத³தலானி புது²லதோ த்³வியோஜனஸதானி. அங்கு³லிபப்³பா³னி பண்ணாஸ யோஜனானி. ஸோ சந்தி³மஸூரியே விரோசமானே தி³ஸ்வா இஸ்ஸாபகதோ தேஸம் க³மனவீதி²ம் ஓதரித்வா முக²ம் விவரித்வா திட்ட²தி. சந்த³விமானம் ஸூரியவிமானம் வா தியோஜனஸதிகே மஹானரகே பக்கி²த்தம் விய ஹோதி. விமானே அதி⁴வத்தா² தே³வதா மரணப⁴யதஜ்ஜிதா ஏகப்பஹாரேனேவ விரவந்தி. ஸோ பன விமானம் கதா³சி ஹத்தே²ன சா²தே³தி, கதா³சி ஹனுகஸ்ஸ ஹேட்டா² பக்கி²பதி, கதா³சி ஜிவ்ஹாய பரிமஜ்ஜதி, கதா³சி அவக³ண்ட³காரகம் பு⁴ஞ்ஜந்தோ விய கபோலந்தரே ட²பேதி. வேக³ம் பன வாரேதும் ந ஸக்கோதி. ஸசே வாரேஸ்ஸாமீதி க³ண்ட³கம் கத்வா திட்டே²ய்ய, மத்த²கம் தஸ்ஸ பி⁴ந்தி³த்வா நிக்க²மேய்ய, ஆகட்³டி⁴த்வா வா நம் ஓனமேய்ய. தஸ்மா விமானேன ஸஹேவ க³ச்ச²தி. பஜம் மமந்தி சந்தி³மஸூரியா கிர த்³வேபி தே³வபுத்தா மஹாஸமயஸுத்தகத²னதி³வஸே ஸோதாபத்திப²லம் பத்தா. தேன ப⁴க³வா ‘‘பஜம் மம’’ந்தி ஆஹ, புத்தோ மம ஏஸோதி அத்தோ². த³ஸமம்.

பட²மோ வக்³கோ³.