2. து³ப்³ப³ண்ணியஸுத்தவண்ணனா

268. து³தியே து³ப்³ப³ண்ணோதி ஜா²மகா²ணுவண்ணோ. ஓகோடிமகோதி லகுண்ட³கோ மஹோத³ரோ. ஆஸனேதி பண்டு³கம்ப³லஸிலாயம். கோத⁴ப⁴க்கோ²தி ஸக்கேன க³ஹிதனாமமேவேதம். ஸோ பன ஏகோ ரூபாவசரப்³ரஹ்மா, ‘‘ஸக்கோ கிர க²ந்திப³லேன ஸமன்னாக³தோ’’தி ஸுத்வா வீமம்ஸனத்த²ம் ஆக³தோ. அவருத்³த⁴கயக்கா² பன ஏவரூபம் ஸம்விஹிதாரக்க²ம் டா²னம் பவிஸிதும் ந ஸக்கோந்தி. உபஸங்கமீதி தே³வானம் ஸுத்வா ‘‘ந ஸக்கா ஏஸ ப²ருஸேன சாலேதும், நீசவுத்தினா பன க²ந்தியம் டி²தேன ஸக்கா பலாபேது’’ந்தி ததா² பலாபேதுகாமோ உபஸங்கமி. அந்தரதா⁴யீதி க²ந்தியம் ட²த்வா ப³லவசித்தீகாரம் பச்சுபட்ட²பேத்வா நீசவுத்தியா த³ஸ்ஸியமானாய ஸக்காஸனே டா²தும் அஸக்கோந்தோ அந்தரதா⁴யி. ந ஸூபஹதசித்தோம்ஹீதி ஏத்த² ஸூதி நிபாதமத்தம், உபஹதசித்தோம்ஹீதி ஆஹ. நாவத்தேன ஸுவானயோதி ந கோதா⁴வத்தேன ஸுஆனயோ, கோத⁴வஸே வத்தேதும் ந ஸுகரோம்ஹீதி வத³தி. ந வோ சிராஹந்தி வோதி நிபாதமத்தம், அஹம் சிரம் ந குஜ்ஜா²மீதி வத³தி. து³தியம்.