6. யஜமானஸுத்தவண்ணனா

262. ச²ட்டே² யஜமானானந்தி யஜந்தானம். ததா³ கிர அங்க³மக³த⁴வாஸிகா மனுஸ்ஸா அனுஸம்வச்ச²ரம் ஸப்பிமது⁴பா²ணிதாதீ³ஸு அக்³க³ம் க³ஹேத்வா ஏகஸ்மிம் டா²னே தா³ரூனம் ஸட்டி²மத்தே ஸகடபா⁴ரே ராஸிம் கத்வா அக்³கி³ம் த³த்வா பஜ்ஜலிதகாலே ‘‘மஹாப்³ரஹ்முனோ யஜாமா’’தி தம் ஸப்³ப³ம் பக்கி²பந்தி. ‘‘ஏகவாரம் பக்கி²த்தம் ஸஹஸ்ஸகு³ணப²லம் தே³தீ’’தி நேஸம் லத்³தி⁴. ஸக்கோ தே³வராஜா ‘‘ஸப்³பே³பிமே ஸப்³ப³அக்³கா³னி க³ஹேத்வா ‘மஹாப்³ரஹ்முனோ யஜாமா’தி அக்³கி³ம்ஹி ஜா²பேந்தி. அப²லம் கரோந்தி, மயி பஸ்ஸந்தே மா நஸ்ஸந்து, யதா² பு³த்³த⁴ஸ்ஸ சேவ ஸங்க⁴ஸ்ஸ ச த³த்வா ப³ஹும் புஞ்ஞம் பஸவந்தி, ஏவம் கரிஸ்ஸாமீ’’தி தா³ருராஸிம் ஜலாபேத்வா ஓலோகேந்தேஸு மனுஸ்ஸேஸு புண்ணமதி³வஸே ப்³ரஹ்மத்தபா⁴வம் மாபேத்வா மஹாஜனஸ்ஸ பஸ்ஸந்தஸ்ஸேவ சந்த³மண்ட³லம் பி⁴ந்தி³த்வா நிக்க²ந்தோ விய அஹோஸி. மஹாஜனோ தி³ஸ்வா ‘‘இமம் யஞ்ஞம் படிக்³க³ஹேதும் மஹாப்³ரஹ்மா ஆக³ச்ச²தீ’’தி ஜண்ணுகேஹி பூ⁴மியம் பதிட்டா²ய, அஞ்ஜலிம் பக்³க³ய்ஹ நமஸ்ஸமானோ அட்டா²ஸி. ப்³ராஹ்மணா ஆஹம்ஸு ‘‘தும்ஹே ‘மயம் தக்கேன கதே²மா’தி மஞ்ஞத², இதா³னி பஸ்ஸத², அயம் வோ ப்³ரஹ்மா ஸஹத்தா² யஞ்ஞம் படிக்³க³ஹேதும் ஆக³ச்ச²தீ’’தி. ஸக்கோ ஆக³ந்த்வா தா³ருசிதகமத்த²கே ஆகாஸே ட²த்வா ‘‘கஸ்ஸாயம் ஸக்காரோ’’தி புச்சி²? தும்ஹாகம், ப⁴ந்தே, படிக்³க³ண்ஹத² நோ யஞ்ஞந்தி. தேன ஹி ஆக³ச்ச²த², மா துலம் ச²ட்³டே³த்வா ஹத்தே²ன துலயித்த², அயம் ஸத்தா² து⁴ரவிஹாரே வஸதி, தம் புச்சி²ஸ்ஸாம ‘‘கஸ்ஸ தி³ன்னம் மஹப்ப²லம் ஹோதீ’’தி? உப⁴யரட்ட²வாஸினோ க³ஹேத்வா ஸத்து² ஸந்திகம் க³ந்த்வா புச்ச²ந்தோ ஏவமாஹ.

தத்த² புஞ்ஞபேக்கா²னந்தி புஞ்ஞம் இச்ச²ந்தானம் புஞ்ஞத்தி²கானம். ஓபதி⁴கம் புஞ்ஞந்தி உபதி⁴விபாகம் புஞ்ஞம். ஸங்கே⁴ தி³ன்னம் மஹப்ப²லந்தி அரியஸங்கே⁴ தி³ன்னம் விப்பா²ரவந்தம் ஹோதி. தே³ஸனாவஸானே சதுராஸீதிபாணஸஹஸ்ஸானி அமதபானம் பிவிம்ஸு. ததோ பட்டா²ய மனுஸ்ஸா ஸப்³பா³னி அக்³க³தா³னானி பி⁴க்கு²ஸங்க⁴ஸ்ஸ அத³ம்ஸு. ச²ட்ட²ம்.