7. நது³ப்³பி⁴யஸுத்தவண்ணனா

253. ஸத்தமே உபஸங்கமீதி ‘‘அயம் ஸக்கோ ‘யோபி மே அஸ்ஸ ஸுபச்சத்தி²கோ, தஸ்ஸ பாஹம் ந து³ப்³பே⁴ய்ய’ந்தி சிந்தேதி, மயா தஸ்ஸ பச்சத்தி²கதரோ நாம நத்தி², வீமம்ஸிஸ்ஸாமி தாவ நம், கிம் நு கோ² மம் பஸ்ஸித்வா து³ப்³ப⁴தி, ந து³ப்³ப⁴தீ’’தி சிந்தேத்வா உபஸங்கமி. திட்ட² வேபசித்தி க³ஹிதோஸீதி வேபசித்தி, ஏத்தே²வ திட்ட², க³ஹிதோ த்வம் மயாதி வத³தி. ஸஹ வசனேனேவஸ்ஸ ஸோ கண்ட²பஞ்சமேஹி ப³ந்த⁴னேஹி ப³த்³தோ⁴வ அஹோஸி. ஸபஸ்ஸு ச மேதி மயி அது³ப்³ப⁴த்தா²ய ஸபத²ம் கரோஹீதி வத³தி. யம் முஸாப⁴ணதோ பாபந்தி இமஸ்மிம் கப்பே பட²மகப்பிகேஸு சேதியரஞ்ஞோ பாபம் ஸந்தா⁴யாஹ. அரியூபவாதி³னோதி கோகலிகஸ்ஸ விய பாபம். மித்தத்³து³னோ ச யம் பாபந்தி மஹாகபிஜாதகே மஹாஸத்தே து³ட்ட²சித்தஸ்ஸ பாபம். அகதஞ்ஞுனோதி தே³வத³த்தஸதி³ஸஸ்ஸ அகதஞ்ஞுனோ பாபம். இமானி கிர இமஸ்மிம் கப்பே சத்தாரி மஹாபாபானி. ஸத்தமம்.