3. த⁴ஜக்³க³ஸுத்தவண்ணனா

249. ததியே ஸமுபப்³யூள்ஹோதி ஸம்பிண்டி³தோ ராஸிபூ⁴தோ. த⁴ஜக்³க³ம்உல்லோகேய்யதா²தி ஸக்கஸ்ஸ கிர தி³யட்³ட⁴யோஜனஸதாயாமோ ரதோ². தஸ்ஸ ஹி பச்சி²மந்தோ பண்ணாஸயோஜனோ, மஜ்ஜே² ரத²பஞ்ஜரோ பண்ணாஸயோஜனோ, ரத²ஸந்தி⁴தோ யாவ ரத²ஸீஸா பண்ணாஸயோஜனானி. ததே³வ பமாணம் தி³கு³ணம் கத்வா தியோஜனஸதாயாமோதிபி வத³ந்தியேவ. தஸ்மிம் யோஜனிகபல்லங்கோ அத்த²தோ, தியோஜனிகம் ஸேதச்ச²த்தம் மத்த²கே ட²பிதம், ஏகஸ்மிம்யேவ யுகே³ ஸஹஸ்ஸஆஜஞ்ஞா யுத்தா, ஸேஸாலங்காரஸ்ஸ பமாணம் நத்தி². த⁴ஜோ பனஸ்ஸ அட்³ட⁴தியானி யோஜனஸதானி உக்³க³தோ, யஸ்ஸ வாதாஹதஸ்ஸ பஞ்சங்கி³கதூரியஸ்ஸேவ ஸத்³தோ³ நிச்ச²ரதி, தம் உல்லோகேய்யாதா²தி வத³தி. கஸ்மா? தம் பஸ்ஸந்தானஞ்ஹி ராஜா நோ ஆக³ந்த்வா பரிஸபரியந்தே நிகா²தத²ம்போ⁴ விய டி²தோ, கஸ்ஸ மயம் பா⁴யாமாதி ப⁴யம் ந ஹோதி. பஜாபதிஸ்ஸாதி ஸோ கிர ஸக்கேன ஸமானவண்ணோ ஸமானாயுகோ து³தியம் ஆஸனம் லப⁴தி. ததா² வருணோ ஈஸானோ ச. வருணோ பன ததியம் ஆஸனம் லப⁴தி, ஈஸானோ சதுத்த²ம். பலாயீதி அஸுரேஹி பராஜிதோ தஸ்மிம் ரதே² டி²தோ அப்பமத்தகம்பி ரஜத⁴ஜம் தி³ஸ்வா பலாயனத⁴ம்மோ.

இதிபி ஸோ ப⁴க³வாதிஆதீ³னி விஸுத்³தி⁴மக்³கே³ வித்தா²ரிதானேவ. இத³மவோசாதி இத³ம் த⁴ஜக்³க³பரித்தம் நாம ப⁴க³வா அவோச, யஸ்ஸ ஆணாகே²த்தே கோடிஸதஸஹஸ்ஸசக்கவாளே ஆனுபா⁴வோ வத்ததி. இத³ம் ஆவஜ்ஜேத்வா ஹி யக்க²ப⁴யசோரப⁴யாதீ³ஹி து³க்கே²ஹி முத்தானம் அந்தோ நத்தி². திட்ட²து அஞ்ஞது³க்க²வூபஸமோ, இத³ம் ஆவஜ்ஜமானோ ஹி பஸன்னசித்தோ ஆகாஸேபி பதிட்ட²ம் லப⁴தி.

தத்ரித³ம் வத்து² – தீ³க⁴வாபிசேதியம்ஹி கிர ஸுதா⁴கம்மே கயிரமானே ஏகோ த³ஹரோ முத்³த⁴வேதி³காபாத³தோ பதித்வா சேதியகுச்சி²யா ப⁴ஸ்ஸதி. ஹேட்டா² டி²தோ பி⁴க்கு²ஸங்கோ⁴ ‘‘த⁴ஜக்³க³பரித்தம், ஆவுஸோ, ஆவஜ்ஜாஹீ’’தி ஆஹ. ஸோ மரணப⁴யேன தஜ்ஜிதோ ‘‘த⁴ஜக்³க³பரித்தம் மம் ரக்க²தூ’’தி ஆஹ. தாவதே³வஸ்ஸ சேதியகுச்சி²தோ த்³வே இட்ட²கா நிக்க²மித்வா ஸோபானம் ஹுத்வா அட்ட²ம்ஸு, உபரிட்டி²தோ வல்லினிஸ்ஸேணிம் ஓதாரேஸும். தஸ்மிம் நிஸ்ஸேணியம் டி²தே இட்ட²கா யதா²ட்டா²னேயேவ அட்ட²ம்ஸு. ததியம்.