3. நாக³விமானவண்ணனா

அலங்கதா மணிகஞ்சனாசிதந்தி நாக³விமானம். தஸ்ஸ கா உப்பத்தி? ப⁴க³வா பா³ராணஸியம் விஹரதி இஸிபதனே மிக³தா³யே. தேன ஸமயேன பா³ராணஸிவாஸினீ ஏகா உபாஸிகா ஸத்³தா⁴ பஸன்னா ஸீலாசாரஸம்பன்னா ப⁴க³வந்தம் உத்³தி³ஸ்ஸ வத்த²யுக³ம் வாயாபேத்வா ஸுபரிதோ⁴தம் காராபேத்வா உபஸங்கமித்வா ப⁴க³வதோ பாத³மூலே ட²பேத்வா ஏவமாஹ ‘‘படிக்³க³ண்ஹாது, ப⁴ந்தே ப⁴க³வா, இமம் வத்த²யுக³ம் அனுகம்பம் உபாதா³ய யம் மம அஸ்ஸ தீ³க⁴ரத்தம் ஹிதாய ஸுகா²யா’’தி. ப⁴க³வா தம் படிக்³க³ஹேத்வா தஸ்ஸா உபனிஸ்ஸயஸம்பத்திம் தி³ஸ்வா த⁴ம்மம் தே³ஸேஸி, ஸா தே³ஸனாவஸானே ஸோதாபத்திப²லே பதிட்ட²ஹித்வா ப⁴க³வந்தம் வந்தி³த்வா பத³க்கி²ணம் கத்வா கே³ஹம் அக³மாஸி. ஸா ந சிரஸ்ஸேவ காலம் கத்வா தாவதிம்ஸேஸு உப்பன்னா ஸக்கஸ்ஸ தே³வராஜஸ்ஸ பியா அஹோஸி வல்லபா⁴ யஸுத்தரா நாம நாமேன. தஸ்ஸா புஞ்ஞானுபா⁴வேன ஹேமஜாலஸஞ்ச²ன்னோ குஞ்ஜரவரோ நிப்³ப³த்தி, தஸ்ஸ ச க²ந்தே⁴ மணிமயோ மண்ட³போ, மஜ்ஜே² ஸுபஞ்ஞத்தரதனபல்லங்கோ நிப்³ப³த்தி, த்³வீஸு த³ந்தேஸு சஸ்ஸ கமலகுவலயுஜ்ஜலா ரமணீயா த்³வே போக்க²ரணியோ பாதுரஹேஸும். தத்த² பது³மகண்ணிகாஸு டி²தா தே³வதீ⁴தா பக்³க³ஹிதபஞ்சங்கி³கதூரியா நச்சந்தி சேவ கா³யந்தி ச.

ஸத்தா² பா³ராணஸியம் யதா²பி⁴ரந்தம் விஹரித்வா யேன ஸாவத்தி² தேன சாரிகம் பக்காமி. அனுபுப்³பே³ன ஸாவத்தி²ம் பத்வா தத்ர ஸுத³ம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² ஸா தே³வதா அத்தனா அனுபு⁴ய்யமானம் தி³ப்³ப³ஸம்பத்திம் ஓலோகேத்வா தஸ்ஸா காரணம் உபதா⁴ரேந்தீ ‘‘ஸத்து² வத்த²யுக³தா³னகாரண’’ந்தி ஞத்வா ஸஞ்ஜாதஸோமனஸ்ஸா ப⁴க³வதி பஸாத³ப³ஹுமானா வந்தி³துகாமா அபி⁴க்கந்தாய ரத்தியா ஹத்தி²க்க²ந்த⁴வரக³தா ஆகாஸேன ஆக³ந்த்வா ததோ ஓதரித்வா ப⁴க³வந்தம் வந்தி³த்வா அஞ்ஜலிம் பக்³க³ய்ஹ ஏகமந்தம் அட்டா²ஸி. தம் ஆயஸ்மா வங்கீ³ஸோ ப⁴க³வதோ அனுஞ்ஞாய இமாஹி கா³தா²ஹி புச்சி² –

705. ‘‘அலங்கதா மணிகஞ்சனாசிதம், ஸோவண்ணஜாலசிதம் மஹந்தம்;

அபி⁴ருய்ஹ க³ஜவரம் ஸுகப்பிதம், இதா⁴க³மா வேஹாயஸம் அந்தலிக்கே².

706. ‘‘நாக³ஸ்ஸ த³ந்தேஸு து³வேஸு நிம்மிதா, அச்சோ²த³கா பது³மினியோ ஸுபு²ல்லா;

பது³மேஸு ச தூரியக³ணா பபி⁴ஜ்ஜரே, இமா ச நச்சந்தி மனோஹராயோ.

707. ‘‘தே³வித்³தி⁴பத்தாஸி மஹானுபா⁴வே, மனுஸ்ஸபூ⁴தா கிமகாஸி புஞ்ஞம்;

கேனாஸி ஏவம் ஜலிதானுபா⁴வா, வண்ணோ ச தே ஸப்³ப³தி³ஸா பபா⁴ஸதீ’’தி.

705. தத்த² அலங்கதாதி ஸப்³பா³ப⁴ரணவிபூ⁴ஸிதா. மணிகஞ்சனாசிதந்தி தேஹி தி³ப்³ப³மானேஹி மணிஸுவண்ணேஹி ஆசிதம். ஸோவண்ணஜாலசிதந்தி ஹேமஜாலஸஞ்ச²ன்னம். மஹந்தந்தி விபுலம். ஸுகப்பிதந்தி க³மனஸன்னாஹவஸேன ஸுட்டு² ஸன்னத்³த⁴ம். வேஹாயஸந்தி வேஹாயஸபூ⁴தே ஹத்தி²பிட்டே². அந்தலிக்கே²தி ஆகாஸே, ‘‘அலங்கதமணிகஞ்சனாசித’’ந்திபி பாடோ². அயஞ்ஹேத்த² ஸங்கே²பத்தோ² – தே³வதே, த்வம் ஸப்³பா³லங்காரேஹி அலங்கதா அலங்கதமணிகஞ்சனாசிதம், அதிவிய தி³ப்³ப³மானேஹி மணீஹி கஞ்சனேஹி ச அலங்கரணவஸேன க²சிதம், ஹேமஜாலேஹி கும்பா⁴லங்காராதி³பே⁴தே³ஹி ஹத்தா²லங்காரேஹி சிதம் ஆமுத்தம் மஹந்தம் அதிவிய ப்³ரஹந்தம் உத்தமம் க³ஜம் ஆருய்ஹ ஹத்தி²பிட்டி²யா நிஸின்னா ஆகாஸேனேவ இத⁴ அம்ஹாகம் ஸந்திகம் ஆக³தாதி.

706. நாக³ஸ்ஸ த³ந்தேஸு து³வேஸு நிம்மிதாதி ஏராவணஸ்ஸ விய நாக³ராஜஸ்ஸ இமஸ்ஸ த்³வீஸு த³ந்தேஸு த்³வே போக்க²ரணியோ ஸுசரிதஸிப்பினா ஸுட்டு² விரசிதா. தூரியக³ணாதி பஞ்சங்கி³கதூரியஸமூஹா. பபி⁴ஜ்ஜரேதி த்³வாத³ஸன்னம் லயபே⁴தா³னம் வஸேன பபே⁴த³ம் க³ச்ச²ந்தி. ‘‘பவஜ்ஜரே’’தி ச பட²ந்தி, பகாரேஹி வாதீ³யந்தீதி அத்தோ².

ஏவம் தே²ரேன புட்டா² தே³வதா இமாஹி கா³தா²ஹி விஸ்ஸஜ்ஜேஸி –

708. ‘‘பா³ராணஸியம் உபஸங்கமித்வா, பு³த்³த⁴ஸ்ஸஹம் வத்த²யுக³ம் அதா³ஸிம்;

பாதா³னி வந்தி³த்வா ச²மா நிஸீதி³ம், வித்தா சஹம் அஞ்ஜலிகம் அகாஸிம்.

709. ‘‘பு³த்³தோ⁴ ச மே கஞ்சனஸன்னிப⁴த்தசோ, அதே³ஸயி ஸமுத³யது³க்க²னிச்சதம்;

அஸங்க²தம் து³க்க²னிரோத⁴ஸஸ்ஸதம், மக்³க³ம் அதே³ஸயி யதோ விஜானிஸம்.

710. ‘‘அப்பாயுகீ காலகதா ததோ சுதா, உபபன்னா தித³ஸக³ணம் யஸஸ்ஸினீ;

ஸக்கஸ்ஸஹம் அஞ்ஞதரா பஜாபதி, யஸுத்தரா நாம தி³ஸாஸு விஸ்ஸுதா’’தி.

708-9. தத்த² ச²மாதி பூ⁴மியம். பு⁴ம்மத்தே² ஹி இத³ம் பச்சத்தவசனம். வித்தாதி துட்டா². யதோதி யதோ ஸத்து² ஸாமுக்கம்ஸிகத⁴ம்மதே³ஸனதோ. விஜானிஸந்தி சத்தாரி அரியஸச்சானி படிவிஜ்ஜி²ம்.

710. அப்பாயுகீதி ‘‘ஈதி³ஸம் நாம உளாரம் புஞ்ஞம் கத்வா ந தயா ஏதஸ்மிம் து³க்க²ப³ஹுலே மனுஸ்ஸத்தபா⁴வே ஏவம் டா²தப்³ப³’’ந்தி ஸஞ்ஜாதாபி⁴ஸந்தி⁴னா விய பரிக்க²யம் க³தேன கம்முனா அப்பாயுகா ஸமானா. அஞ்ஞதரா பஜாபதீதி ஸோளஸஸஹஸ்ஸானம் மஹேஸீனம் அஞ்ஞதரா. தி³ஸாஸு விஸ்ஸுதாதி த்³வீஸு தே³வலோகேஸு ஸப்³ப³தி³ஸாஸு பாகடா பஞ்ஞாதா. ஸேஸம் வுத்தனயமேவ.

நாக³விமானவண்ணனா நிட்டி²தா.