1. மஞ்ஜிட்ட²கவிமானவண்ணனா

மஞ்ஜிட்ட²கவக்³கே³ மஞ்ஜிட்ட²கே விமானஸ்மிந்தி மஞ்ஜிட்ட²கவிமானம். தஸ்ஸ கா உப்பத்தி? ப⁴க³வா ஸாவத்தி²யம் விஹரதி ஜேதவனே. தத்த² அஞ்ஞதரோ உபாஸகோ ப⁴க³வந்தம் நிமந்தேத்வா அனந்தரவிமானே வுத்தனயேனேவ மண்ட³பம் ஸஜ்ஜேத்வா தத்த² நிஸின்னம் ஸத்தா²ரம் பூஜேத்வா தா³னம் தே³தி. தேன ச ஸமயேன அஞ்ஞதரா குலதா³ஸீ அந்த⁴வனே ஸுபுப்பி²தம் ஸாலருக்க²ம் தி³ஸ்வா தத்த² புப்பா²னி க³ஹேத்வா ஹீரேஹி ஆவுணித்வா வடம்ஸகே கத்வா புன ப³ஹூனி முத்தபுப்பா²னி அக்³க³புப்பா²னி ச க³ஹேத்வா நக³ரம் பவிட்டா². தஸ்மிம் மண்ட³பே யுக³ந்த⁴ரபப்³ப³தகுச்சி²ம் ஓபா⁴ஸயமானம் பா³லஸூரியம் விய ச²ப்³ப³ண்ணபு³த்³த⁴ரம்ஸியோ விஸ்ஸஜ்ஜேத்வா நிஸின்னம், ப⁴க³வந்தம் தி³ஸ்வா பஸன்னசித்தா தேஹி புப்பே²ஹி பூஜேந்தீ வடம்ஸகானி ஆஸனஸ்ஸ ஸமந்ததோ ட²பேத்வா இதரானி ச புப்பா²னி ஓகிரித்வா ஸக்கச்சம் வந்தி³த்வா திக்க²த்தும் பத³க்கி²ணம் கத்வா அக³மாஸி. ஸா அபரபா⁴கே³ காலம் கத்வா தாவதிம்ஸப⁴வனே நிப்³ப³த்தி, தத்த² தஸ்ஸா ரத்தப²லிகமயம் விமானம், தஸ்ஸ ச புரதோ ஸுவண்ணவாலுகாஸந்த²தபூ⁴மிபா⁴க³ம் மஹந்தம் ஸாலவனம் பாதுரஹோஸி. ஸா யதா³ விமானதோ நிக்க²மித்வா ஸாலவனம் பவிஸதி, ததா³ ஸாலஸாகா² ஓனமித்வா தஸ்ஸா உபரி குஸுமானி ஓகிரந்தி. தம் ஆயஸ்மா மஹாமோக்³க³ல்லானோ ஹேட்டா² வுத்தனயேன உபக³ந்த்வா இமாஹி கா³தா²ஹி கதகம்மம் புச்சி² –

689. ‘‘மஞ்ஜிட்ட²கே விமானஸ்மிம், ஸோண்ணவாலுகஸந்த²தே;

பஞ்சங்கி³கேன தூரியேன, ரமஸி ஸுப்பவாதி³தே.

690. ‘‘தம்ஹா விமானா ஓருய்ஹ, நிம்மிதா ரதனாமயா;

ஓகா³ஹஸி ஸாலவனம், புப்பி²தம் ஸப்³ப³காலிகம்.

691. ‘‘யஸ்ஸ யஸ்ஸேவ ஸாலஸ்ஸ, மூலே திட்ட²ஸி தே³வதே;

ஸோ ஸோ முஞ்சதி புப்பா²னி, ஓனமித்வா து³முத்தமோ.

692. ‘‘வாதேரிதம் ஸாலவனம், ஆது⁴தம் தி³ஜஸேவிதம்;

வாதி க³ந்தோ⁴ தி³ஸா ஸப்³பா³, ருக்கோ² மஞ்ஜூஸகோ யதா².

693. ‘‘கா⁴யஸே தம் ஸுசிக³ந்த⁴ம், ரூபம் பஸ்ஸஸி அமானுஸம்;

தே³வதே புச்சி²தாசிக்க², கிஸ்ஸ கம்மஸ்ஸித³ம் ப²ல’’ந்தி.

689. தத்த² மஞ்ஜிட்ட²கே விமானஸ்மிந்தி ரத்தப²லிகமயே விமானே. ஸிந்து³வாரகணவீரமகுலஸதி³ஸவண்ணஞ்ஹி ‘‘மஞ்ஜிட்ட²க’’ந்தி வுச்சதி. ஸோண்ணவாலுகஸந்த²தேதி ஸமந்ததோ விப்பகிண்ணாஹி ஸுவண்ணவாலுகாஹி ஸந்த²தபூ⁴மிபா⁴கே³. ரமஸி ஸுப்பவாதி³தேதி ஸுட்டு² பவாதி³தேன பஞ்சங்கி³கேன தூரியேன அபி⁴ரமஸி.

690. நிமித்தா ரதனாமயாதி தவ ஸுசரிதஸிப்பினா அபி⁴னிம்மிதா ரதனமயா விமானா. ஓகா³ஹஸீதி பவிஸஸி. ஸப்³ப³காலிகந்தி ஸப்³ப³காலே ஸுக²ம் ஸப்³ப³உதுஸப்பாயம், ஸப்³ப³காலே புப்ப²னகம் வா.

692. வாதேரிதந்தி யதா² புப்பா²னி ஓகிரந்தி, ஏவம் வாதேன ஈரிதம் சலிதம். ஆது⁴தந்தி மந்தே³ன மாலுதேன ஸணிகஸணிகம் விதூ⁴பயமானம். தி³ஜஸேவிதந்தி மயூரகோகிலாதி³ஸகுணஸங்கே⁴ஹி உபஸேவிதம்.

ஏவம் தே²ரேன புட்டா² ஸா தே³வதா இமாஹி கா³தா²ஹி ப்³யாகாஸி –

694. ‘‘அஹம் மனுஸ்ஸேஸு மனுஸ்ஸபூ⁴தா, தா³ஸீ அயிரகுலே அஹும்;

பு³த்³த⁴ம் நிஸின்னம் தி³ஸ்வான, ஸாலபுப்பே²ஹி ஓகிரிம்.

695. ‘‘வடம்ஸகஞ்ச ஸுகதம், ஸாலபுப்ப²மயம் அஹம்;

பு³த்³த⁴ஸ்ஸ உபனாமேஸிம், பஸன்னா ஸேஹி பாணிபி⁴.

696. ‘‘தாஹம் கம்மம் கரித்வான, குஸலம் பு³த்³த⁴வண்ணிதம்;

அபேதஸோகா ஸுகி²தா, ஸம்பமோதா³மனாமயா’’தி.

694-5. தத்த² அயிரகுலேதி அய்யகுலே, ஸாமிககே³ஹேதி அத்தோ². அஹுந்தி அஹோஸிம். ஓகிரிந்தி புப்பே²ஹி விப்பகிரிம். உபனாமேஸிந்தி பூஜாவஸேன உபனாமேஸிம். ஸேஸம் வுத்தனயமேவ.

அதா²யஸ்மா மஹாமோக்³க³ல்லானோ ஸபரிவாராய தஸ்ஸா தே³வதாய த⁴ம்மம் தே³ஸேத்வா மனுஸ்ஸலோகம் ஆக³ந்த்வா ப⁴க³வதோ தமத்த²ம் நிவேதே³ஸி. ப⁴க³வா தம் அட்டு²ப்பத்திம் கத்வா ஸம்பத்தமஹாஜனஸ்ஸ த⁴ம்மம் தே³ஸேஸி. தே³ஸனா ஸதே³வகஸ்ஸ லோகஸ்ஸ ஸாத்தி²கா அஹோஸீதி.

மஞ்ஜிட்ட²கவிமானவண்ணனா நிட்டி²தா.