5. ப⁴த்³தி³த்தி²விமானவண்ணனா

நீலா பீதா ச காளா சாதி ப⁴த்³தி³த்தி²விமானம். தஸ்ஸ கா உப்பத்தி? ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன ச ஸமயேன கிமிலனக³ரே ரோஹகோ நாம க³ஹபதிபுத்தோ அஹோஸி ஸத்³தோ⁴ பஸன்னோ ஸீலாசாரஸம்பன்னோ. தஸ்மிம்யேவ ச நக³ரே தேன ஸமானமஹாபோ⁴கே³ குலே ஏகா தா³ரிகா அஹோஸி ஸத்³தா⁴ பஸன்னா பகதியாபி ப⁴த்³த³தாய ப⁴த்³தா³தி நாமேன. அத² ரோஹகஸ்ஸ மாதாபிதரோ தம் குமாரிம் வாரேத்வா தாதி³ஸே காலே தம் ஆனேத்வா ஆவாஹவிவாஹம் அகம்ஸு. தே உபோ⁴பி ஸமக்³க³வாஸம் வஸந்தி. ஸா அத்தனோ ஆசாரஸம்பத்தியா ‘‘ப⁴த்³தி³த்தீ²’’தி தஸ்மிம் நக³ரே பாகடா பஞ்ஞாதா அஹோஸி.

தேன ச ஸமயேன த்³வே அக்³க³ஸாவகா பஞ்சஸதபஞ்சஸதபி⁴க்கு²பரிவாரா ஜனபத³சாரிகம் சரந்தா கிமிலனக³ரம் பாபுணிம்ஸு. ரோஹகோ தேஸம் தத்த² க³தபா⁴வம் ஞத்வா ஸோமனஸ்ஸஜாதோ தே²ரே உபஸங்கமித்வா வந்தி³த்வா ஸ்வாதனாய நிமந்தேத்வா து³தியதி³வஸே பணீதேன கா²த³னீயேன போ⁴ஜனீயேன ஸபரிவாரே தே ஸந்தப்பேத்வா ஸபுத்ததா³ரோ தேஹி தே³ஸிதம் த⁴ம்மதே³ஸனம் ஸுத்வா தேஸம் ஓவாதே³ பதிட்ட²ஹந்தோ ஸரணானி க³ண்ஹி, பஞ்ச ஸீலானி ஸமாதி³யி. ப⁴ரியா பனஸ்ஸ அட்ட²மீசாதுத்³த³ஸீபன்னரஸீபாடிஹாரியபக்கே²ஸு உபோஸத²ம் உபவஸி, விஸேஸதோ ஸீலாசாரஸம்பன்னா அஹோஸி தே³வதாஹி ச அனுகம்பிதா. தாய ஏவ ச தே³வதானுகம்பாய அத்தனோ உபரி பதிதம் மிச்சா²பவாத³ம் நிரம்கத்வா ஸுவிஸுத்³த⁴ஸீலாசாரதாய அதிவிய லோகே பத்த²டயஸா அஹோஸி.

ஸா ஹி ஸயம் கிமிலனக³ரே டி²தா அத்தனோ ஸாமிகஸ்ஸ வணிஜ்ஜாவஸேன தக்கஸிலாயம் வஸந்தஸ்ஸ, உஸ்ஸவதி³வஸே ஸஹாயேஹி உஸ்ஸாஹிதஸ்ஸ நக்க²த்தகீளாசித்தே உப்பன்னே க⁴ரதே³வதாய அத்தனோ தி³ப்³பா³னுபா⁴வேன தம் தத்த² நேத்வா ஸாமிகேன ஸஹ யோஜிதா தேனேவ ஸமாக³மேன பதிட்டி²தக³ப்³பா⁴ ஹுத்வா தே³வதாய கிமிலனக³ரம் படினீதா, அனுக்கமேன க³ப்³பி⁴னிபா⁴வே பாகடே ஜாதே ஸஸ்ஸுஆதீ³ஹி ‘‘அதிசாரினீ’’தி ஆஸங்கிதா, தாய ஏவ தே³வதாய அத்தனோ ஆனுபா⁴வேன க³ங்கா³மஹோகே⁴ கிமிலனக³ரம் ஓத்த²ரந்தே விய உபட்டா²பிதே அத்தனோ பதிப்³ப³தாபா⁴வஸம்ஸூசகேன ஸச்சாதி⁴ட்டா²னபுப்³ப³கேன ஸபதே²ன வாதவேக³ஸமுட்டி²தவீசிஜாலம் க³ங்கா³மஹோக⁴ம் அத்தனோ உபரி ஆபதிதம் ஆயஸ்ஸஞ்ச நிவத்தேத்வா, ஸாமிகேன ஸமாக³தாபி தேன புப்³பே³ ஸஸ்ஸுஆதீ³ஹி விய ஆஸங்கிதா தக்கஸிலாயம் தேன தி³ன்னம் நாமமுத்³தி³தம் ஸஞ்ஞாணஞ்ச அப்பேந்தீ, தம் ஆஸங்கம் நிரம்கத்வா ப⁴த்துனோ ஞாதிஜனஸ்ஸ ச மஹாஜனஸ்ஸ ச ஸம்பா⁴வனீயா ஜாதா. தேன வுத்தம் ‘‘ஸுவிஸுத்³த⁴ஸீலாசாரதாய அதிவிய லோகே பத்த²டயஸா அஹோஸீ’’தி.

ஸா அபரேன ஸமயேன காலம் கத்வா தாவதிம்ஸப⁴வனே உப்பன்னா. அத² ப⁴க³வதி ஸாவத்தி²தோ தாவதிம்ஸப⁴வனம் க³ந்த்வா பாரிச்ச²த்தகமூலே பண்டு³கம்ப³லஸிலாயம் நிஸின்னே, தே³வபரிஸாய ச ப⁴க³வந்தம் உபஸங்கமித்வா வந்தி³த்வா ஏகமந்தம் நிஸின்னாய ப⁴த்³தி³த்தீ²பி உபஸங்கமித்வா வந்தி³த்வா ஏகமந்தம் அட்டா²ஸி. அத² ப⁴க³வா த³ஸஸஹஸ்ஸிலோகதா⁴தூஸு ஸன்னிபதிதாய தே³வப்³ரஹ்மபரிஸாய மஜ்ஜே² தாய தே³வதாய கதபுஞ்ஞகம்மம் புச்ச²ந்தோ –

206. ‘‘நீலா பீதா ச காளா ச, மஞ்ஜிட்டா² அத² லோஹிதா;

உச்சாவசானம் வண்ணானம், கிஞ்ஜக்க²பரிவாரிதா.

207. ‘‘மந்தா³ரவானம் புப்பா²னம், மாலம் தா⁴ரேஸி முத்³த⁴னி;

நயிமே அஞ்ஞேஸு காயேஸ, ருக்கா² ஸந்தி ஸுமேத⁴ஸே.

208. ‘‘கேன காயம் உபபன்னா, தாவதிம்ஸம் யஸஸ்ஸினீ;

தே³வதே புச்சி²தாசிக்க², கிஸ்ஸ கம்மஸ்ஸித³ம் ப²ல’’ந்தி. – ஆஹ;

206-7. தத்த² நீலா பீதா ச காளா ச, மஞ்ஜிட்டா² அத² லோஹிதாதி ஏத்த² ச-ஸத்³தோ³ வுத்தத்த²ஸமுச்சயோ, ஸோ நீலா ச பீதா சாதிஆதி³னா பச்சேகம் யோஜேதப்³போ³. அதா²தி அஞ்ஞத்தே² நிபாதோ. தேன ஓதா³தாதி³கே அவுத்தவண்ணே ஸங்க³ண்ஹாதி. இதி-ஸத்³தோ³ லுத்தனித்³தி³ட்டோ² வேதி³தப்³போ³. ச-ஸத்³தோ³ வா அவுத்தத்த²ஸமுச்சயோ. அதா²தி இதி-ஸத்³த³த்தே² நிபாதோ. உச்சாவசானம் வண்ணானந்தி ஏத்த² உச்சாவசானந்தி விப⁴த்தியா அலோபோ த³ட்ட²ப்³போ³, உச்சாவசவண்ணானம் நானாவித⁴வண்ணானந்தி அத்தோ². வண்ணானந்தி வா வண்ணவந்தானம். கிஞ்ஜக்க²பரிவாரிதாதி கிஞ்ஜக்கே²ஹி பரிவாரிதானம். ஸாமிஅத்தே² ஹி ஏதம் பச்சத்தவசனம். இத³ம் வுத்தம் ஹோதி – நீலா ச பீதா ச காளா ச மஞ்ஜிட்டா² ச லோஹிதா ச அத² அஞ்ஞே ஓதா³தாத³யோ சாதி இமேஸம் வஸேன உச்சாவசவண்ணானம் ததா²பூ⁴தேஹியேவ கிஞ்ஜக்கே²ஹி கேஸரேஹி பரிவாரிதானம் விசித்தஸண்டா²னாதி³தாய வா உச்சாவசானம் யதா²வுத்தவண்ணவந்தானம் மந்தா³ரவருக்க²ஸம்பூ⁴ததாய மந்தா³ரவானம் புப்பா²னம் மாலம் தேஹி கதம் மாலாகு³ணம் த்வம் தே³வதே அத்தனோ ஸீஸே தா⁴ரேஸி பிளந்த⁴ஸீதி.

யதோ ருக்க²தோ தானி புப்பா²னி, தேஸம் விஸேஸவண்ணதாய அனஞ்ஞஸாதா⁴ரணதம் த³ஸ்ஸேதும் ‘‘நயிமே அஞ்ஞேஸு காயேஸு, ருக்கா² ஸந்தி ஸுமேத⁴ஸே’’தி வுத்தம். தத்த² இமேதி யதா²வுத்தவண்ணஸண்டா²னாதி³யுத்தா புப்ப²வந்தோ ருக்கா² ந ஸந்தீதி யோஜனா. காயேஸூதி தே³வனிகாயேஸு. ஸுமேத⁴ஸேதி ஸுந்த³ரபஞ்ஞே.

தத்த² நீலாதி இந்த³னீலமஹானீலாதி³மணிரதனானம் வஸேன நீலோபா⁴ஸா. பீதாதி புப்ப²ராக³கக்கேதனபுலகாதி³மணிரதனானஞ்சேவ ஸிங்கீ³ஸுவண்ணஸ்ஸ ச வஸேன பீதோபா⁴ஸா. காளாதி அஸ்மகஉபலகாதி³மணிரதனானம் வஸேன கண்ஹோபா⁴ஸா. மஞ்ஜிட்டா²தி ஜோதிரஸகோ³முத்தககோ³மேத³காதி³மணிரதனானம் வஸேன மஞ்ஜிட்டோ²பா⁴ஸா. லோஹிதாதி பது³மராக³லோஹிதங்கபவாளரதனாதீ³னம் வஸேன லோஹிதோபா⁴ஸா. கேசி பன நீலாதி³பதா³னி ‘‘ருக்கா²’’தி இமினா ‘‘நீலா ருக்கா²’’திஆதி³னா யோஜேத்வா வத³ந்தி. ருக்கா²பி ஹி நீலாதி³வண்ணேஹி புப்பே²ஹி ஸஞ்ச²ன்னத்தா நீலாதி³யோக³தோ நீலாதி³வோஹாரம் லப⁴ந்தீதி தேஹி ‘‘நீலா…பே… லோஹிதா…பே… நயிமே அஞ்ஞேஸு காயேஸு ருக்கா² ஸந்தி ஸுமேத⁴ஸேதி, யதோ த்வம் உச்சாவசானம் வண்ணானம் கிஞ்ஜக்க²பரிவாரிதானம் மந்தா³ரவானம் புப்பா²னம் மாலம் தா⁴ரேஸீ’’தி யோஜனா காதப்³பா³. தத்த² யதா²தி³ட்டே² வண்ணவிஸேஸயுத்தே புப்பே² கித்தேத்வா தேஸம் அஸாதா⁴ரணபா⁴வத³ஸ்ஸனேன ருக்கா²னம் ஆவேனிகபா⁴வத³ஸ்ஸனம் பட²மனயோ, ருக்கா²னம் அஸாதா⁴ரணபா⁴வத³ஸ்ஸனேன புப்பா²னம் ஆவேனிகபா⁴வத³ஸ்ஸனம் து³தியனயோ. பட²மனயே வண்ணாத³யோ ஸரூபேன க³ஹிதா, து³தியனயே நிஸ்ஸயமுகே²னாதி அயமேதேஸம் விஸேஸோ.

208. கேனாதி கேன புஞ்ஞகம்மேன, காயம் தாவதிம்ஸந்தி யோஜனா. புச்சி²தாசிக்கா²தி புச்சி²தா த்வம் ஆசிக்க² கதே²ஹி.

ஏவம் ப⁴க³வதா புச்சி²தா ஸா தே³வதா இமாஹி கா³தா²ஹி ப்³யாகாஸி –

209. ‘‘ப⁴த்³தி³த்தி²காதி மம் அஞ்ஞம்ஸு, கிமிலாயம் உபாஸிகா;

ஸத்³தா⁴ ஸீலேன ஸம்பன்னா, ஸம்விபா⁴க³ரதா ஸதா³.

210. ‘‘அச்சா²த³னஞ்ச ப⁴த்தஞ்ச, ஸேனாஸனம் பதீ³பியம்;

அதா³ஸிம் உஜுபூ⁴தேஸு, விப்பஸன்னேன சேதஸா.

211. ‘‘சாதுத்³த³ஸிம் பஞ்சத³ஸிம், யா ச பக்க²ஸ்ஸ அட்ட²மீ;

பாடிஹாரியபக்க²ஞ்ச, அட்ட²ங்க³ஸுஸமாக³தம்.

212. ‘‘உபோஸத²ம் உபவஸிஸ்ஸம், ஸதா³ ஸீலேஸு ஸம்வுதா;

ஸஞ்ஞமா ஸம்விபா⁴கா³ ச, விமானம் ஆவஸாமஹம்.

213. ‘‘பாணாதிபாதா விரதா, முஸாவாதா³ ச ஸஞ்ஞதா;

தே²ய்யா ச அதிசாரா ச, மஜ்ஜபானா ச ஆரகா.

214. ‘‘பஞ்சஸிக்கா²பதே³ ரதா, அரியஸச்சான கோவிதா³;

உபாஸிகா சக்கு²மதோ, அப்பமாத³விஹாரினீ;

கதாவாஸா கதகுஸலா ததோ சுதா, ஸயம்பபா⁴ அனுவிசராமி நந்த³னம்.

215. ‘‘பி⁴க்கூ² சாஹம் பரமஹிதானுகம்பகே, அபோ⁴ஜயிம் தபஸ்ஸியுக³ம் மஹாமுனிம்;

கதாவாஸா கதகுஸலா ததோ சுதா, ஸயம்பபா⁴ அனுவிசராமி நந்த³னம்.

216. ‘‘அட்ட²ங்கி³கம் அபரிமிதம் ஸுகா²வஹம், உபோஸத²ம் ஸததமுபாவஸிம் அஹம்;

கதாவாஸா கதகுஸலா ததோ சுதா, ஸயம்பபா⁴ அனுவிசராமி நந்த³ன’’ந்தி.

209-214. தத்த² ப⁴த்³தி³த்தி²காதி மம் அஞ்ஞம்ஸு, கிமிலாயம் உபாஸிகாதி ஆசாரஸம்பத்தியா ஸச்சகிரியாய உப்³ப³த்தமானமஹோக⁴னிவத்தனேன அக²ண்ட³ஸீலாதி ஸஞ்ஜாதனிச்ச²யா ப⁴த்³தா³ ஸுந்த³ரா அயம் இத்தீ², தஸ்மா ‘‘ப⁴த்³தி³த்தி²கா உபாஸிகா’’தி ச மம் கிமிலனக³ரவாஸினோ ஜானிம்ஸு. ஸத்³தா⁴ ஸீலேன ஸம்பன்னாதிஆதி³ ஹேட்டா² வுத்தனயத்தா உத்தானத்த²மேவ.

அபிச ‘‘ஸத்³தா⁴’’தி இமினா ஸத்³தா⁴த⁴னம், ‘‘ஸம்விபா⁴க³ரதா, அச்சா²த³னஞ்ச ப⁴த்தஞ்ச, ஸேனாஸனம் பதீ³பியம். அதா³ஸிம் உஜுபூ⁴தேஸு, விப்பஸன்னேன சேதஸா’’தி இமினா சாக³த⁴னம், ‘‘ஸீலேன ஸம்பன்னா, சதுத்³த³ஸிம் பஞ்சத³ஸிம்…பே… பஞ்சஸிக்கா²பதே³ ரதா’’தி இமினா ஸீலத⁴னம் ஹிரித⁴னம் ஓத்தப்பத⁴னஞ்ச, ‘‘அரியஸச்சான கோவிதா³’’தி இமினா ஸுதத⁴னம் பஞ்ஞாத⁴னஞ்ச த³ஸ்ஸிதந்தி ஸா அத்தனோ ஸத்தவித⁴அரியத⁴னபடிலாப⁴ம். ‘‘உபாஸிகா சக்கு²மதோ…பே… அனுவிசராமி நந்த³ன’’ந்தி இமினா தஸ்ஸ தி³ட்ட²த⁴ம்மிகம் ஸம்பராயிகஞ்ச ஆனிஸம்ஸம் விபா⁴வேதி. தத்த² கதாவாஸாதி நிப்பா²தி³தஸுசரிதாவாஸா. ஸுசரிதகம்மஞ்ஹி தத³த்தே ஆயதிஞ்ச ஸுகா²வாஸஹேதுதாய ‘‘ஸுக²விஹாரஸ்ஸ ஆவாஸோ’’தி வுச்சதி. தேனாஹ ‘‘கதகுஸலா’’தி.

215. புப்³பே³ அனாமஸிதகே²த்தவிஸேஸம் அத்தனோ தா³னமயம் புஞ்ஞம் வத்வா இதா³னி தஸ்ஸ ஆயதனக³ததம் த³ஸ்ஸேதும் ‘‘பி⁴க்கூ² சா’’திஆதி³ வுத்தம். தத்த² பி⁴க்கூ²தி அனவஸேஸபி⁴ன்னகிலேஸதாய பி⁴க்கூ². பரமஹிதானுகம்பகேதி பரமம் அதிவிய தி³ட்ட²த⁴ம்மிகாதி³னா ஹிதேன அனுக்³கா³ஹகே. அபோ⁴ஜயிந்தி பணீதேன போ⁴ஜனேன போ⁴ஜேஸிம். தபஸ்ஸியுக³ந்தி உத்தமேன தபஸா ஸப்³ப³கிலேஸமலம் தாபேத்வா ஸமுச்சி²ந்தி³த்வா டி²தத்தா தபஸ்ஸிபூ⁴தம் யுக³ம். மஹாமுனிந்தி ததோ ஏவ மஹாஇஸிபூ⁴தம், மஹதோ வா அத்தனோ விஸயஸ்ஸ மஹந்தேனேவ ஞாணேன முனனதோ பரிச்சி²ந்த³னதோ மஹாமுனிம். ஸப்³ப³மேதம் த்³வே அக்³க³ஸாவகே ஸந்தா⁴ய வத³தி.

216. அபரிமிதம் ஸுகா²வஹந்தி அனுனாஸிகலோபம் அகத்வா வுத்தம். ‘‘யாவஞ்சித³ம், பி⁴க்க²வே, ந ஸுகரம் அக்கா²னேன பாபுணிதும் யாவ ஸுகா² ஸக்³கா³’’தி (ம. நி. 3.255) வசனதோ ப⁴க³வதோபி வசனபதா²தீதபரிமாணரஹிதஸுக²னிப்³ப³த்தகம் அத்தனோ வா ஆனுபா⁴வேன அபரிமிதஸுகா²வஹம் ஸுக²ஸ்ஸ ஆவஹனகம். ஸததந்தி ஸப்³ப³காலம். தம் தம் உபோஸத²ரக்க²ணதி³வஸம் அஹாபேத்வா, தம் தம் வா உபோஸத²ரக்க²ணதி³வஸம் அக²ண்ட³ம் கத்வா பரிபுண்ணம் கத்வா ஸததம் வா ஸப்³ப³காலம் ஸுகா²வஹந்தி யோஜனா. ஸேஸம் ஹேட்டா² வுத்தனயமேவ.

அத² ப⁴க³வா மாதுதே³வபுத்தப்பமுகா²னம் த³ஸஸஹஸ்ஸிலோகதா⁴துவாஸீனம் தே³வப்³ரஹ்மஸங்கா⁴னம் தயோ மாஸே அபி⁴த⁴ம்மபிடகம் தே³ஸேத்வா மனுஸ்ஸலோகம் ஆக³ந்த்வா ப⁴த்³தி³த்தி²விமானம் பி⁴க்கூ²னம் தே³ஸேஸி. ஸா தே³ஸனா ஸம்பத்தபரிஸாய ஸாத்தி²கா அஹோஸீதி.

ப⁴த்³தி³த்தி²விமானவண்ணனா நிட்டி²தா.