11. பட²மபதிப்³ப³தாவிமானவண்ணனா

கோஞ்சா மயூரா தி³வியா ச ஹம்ஸாதி பதிப்³ப³தாவிமானம். தஸ்ஸ கா உப்பத்தி? ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தத்த² அஞ்ஞதரா இத்தீ² பதிப்³ப³தா அஹோஸி ப⁴த்து அனுகூலவத்தினீ க²மா பத³க்கி²ணக்³கா³ஹினீ, ந குத்³தா⁴பி படிப்ப²ரதி, அப²ருஸவாசா ஸச்சவாதி³னீ ஸத்³தா⁴ பஸன்னா யதா²விப⁴வம் தா³னானி ச அதா³ஸி. ஸா கேனசிதே³வ ரோகே³ன பு²ட்டா² காலம் கத்வா தாவதிம்ஸப⁴வனே நிப்³ப³த்தி. அதா²யஸ்மா மஹாமோக்³க³ல்லானோ புரிமனயேனேவ தே³வசாரிகம் சரந்தோ தம் தே³வதீ⁴தரம் மஹதிம் ஸம்பத்திம் அனுப⁴வந்திம் தி³ஸ்வா தஸ்ஸா ஸமீபமுபக³தோ. ஸா அச்ச²ராஸஹஸ்ஸபரிவுதா ஸட்டி²ஸகடபா⁴ராலங்காரபடிமண்டி³தத்தபா⁴வா தே²ரஸ்ஸ பாதே³ஸு ஸிரஸா வந்தி³த்வா ஏகமந்தம் அட்டா²ஸி. தே²ரோபி தாய கதபுஞ்ஞகம்மம் புச்ச²ந்தோ –

93. ‘‘கோஞ்சா மயூரா தி³வியா ச ஹம்ஸா, வக்³கு³ஸ்ஸரா கோகிலா ஸம்பதந்தி;

புப்பா²பி⁴கிண்ணம் ரம்மமித³ம் விமானம், அனேகசித்தம் நரனாரிஸேவிதம்.

94. ‘‘தத்த²ச்ச²ஸி தே³வி மஹானுபா⁴வே, இத்³தீ⁴ விகுப்³ப³ந்தி அனேகரூபா;

இமா ச தே அச்ச²ராயோ ஸமந்ததோ, நச்சந்தி கா³யந்தி பமோத³யந்தி ச.

95. ‘‘தே³வித்³தி⁴பத்தாஸி மஹானுபா⁴வே,

மனுஸ்ஸபூ⁴தா கிமகாஸி புஞ்ஞம்;

கேனாஸி ஏவம் ஜலிதானுபா⁴வா,

வண்ணோ ச தே ஸப்³ப³தி³ஸா பபா⁴ஸதீ’’தி. – ஆஹ;

96. ‘‘ஸா தே³வதா அத்தமனா, மோக்³க³ல்லானேன புச்சி²தா;

பஞ்ஹம் புட்டா² வியாகாஸி, யஸ்ஸ கம்மஸ்ஸித³ம் ப²லம்’’.

97. ‘‘அஹம் மனுஸ்ஸேஸு மனுஸ்ஸபூ⁴தா, பதிப்³ப³தானஞ்ஞமனா அஹோஸிம்;

மாதாவ புத்தம் அனுரக்க²மானா, குத்³தா⁴பிஹம் நப்ப²ருஸம் அவோசம்.

98. ‘‘ஸச்சே டி²தா மோஸவஜ்ஜம் பஹாய, தா³னே ரதா ஸங்க³ஹிதத்தபா⁴வா;

அன்னஞ்ச பானஞ்ச பஸன்னசித்தா, ஸக்கச்ச தா³னம் விபுலம் அதா³ஸிம்.

99. ‘‘தேன மேதாதி³ஸோ வண்ணோ, தேன மே இத⁴ மிஜ்ஜ²தி;

உப்பஜ்ஜந்தி ச மே போ⁴கா³, யே கேசி மனஸோ பியா.

100. ‘‘அக்கா²மி தே பி⁴க்கு² மஹானுபா⁴வ, மனுஸ்ஸபூ⁴தா யமகாஸி புஞ்ஞம்;

தேனம்ஹி ஏவம் ஜலிதானுபா⁴வா, வண்ணோ ச மே ஸப்³ப³தி³ஸா பபா⁴ஸதீ’’தி. –

ஸா தே³வதா விஸ்ஸஜ்ஜேஸி.

93. தத்த² கோஞ்சாதி கோஞ்சஸகுணா, யே ‘‘ஸாரஸா’’திபி வுச்சந்தி. மயூராதி மோரா. தி³வியாதி தி³ப்³பா³னுபா⁴வா. இத³ஞ்ஹி பத³ம் ‘‘தி³வியா கோஞ்சா, தி³வியா மயூரா’’திஆதி³னா சதூஹிபி பதே³ஹி யோஜேதப்³ப³ம். ஹம்ஸாதி ஸுவண்ணஹம்ஸாதி³ஹம்ஸா. வக்³கு³ஸ்ஸராதி மது⁴ரஸ்ஸரா. கோகிலாதி காளகோகிலா சேவ ஸுக்ககோகிலா ச. ஸம்பதந்தீதி தே³வதாய அபி⁴ரமணத்த²ம் கீளந்தா லளந்தா ஸமந்ததோ பதந்தி விசரந்தி. கோஞ்சாதி³ரூபேன ஹி தே³வதாய ரதிஜனனத்த²ம் பரிவாரபூ⁴தா தே³வதா கீளந்தா லளந்தா ‘‘கோஞ்சா’’திஆதி³னா வுத்தா. புப்பா²பி⁴கிண்ணந்தி க³ந்தி²தாக³ந்தி²தேஹி நானாவித⁴ரதனகுஸுமேஹி ஓகிண்ணம். ரம்மந்தி ரமணீயம், மனோரமந்தி அத்தோ². அனேகசித்தந்தி அனேகேஹி உய்யானகப்பருக்க²போக்க²ரணிஆதீ³ஹி விமானேஸு ச அனேகேஹி பி⁴த்திவிஸேஸாதீ³ஹி சித்தம். நரனாரிஸேவிதந்தி பரிவாரபூ⁴தேஹி தே³வபுத்தேஹி தே³வதீ⁴தாஹி ச உபஸேவிதம்.

94. இத்³தீ⁴ விகுப்³ப³ந்தி அனேகரூபாதி நானாரூபானம் வித³ம்ஸனேன அனேகரூபா கம்மானுபா⁴வஸித்³தா⁴ இத்³தீ⁴ விகுப்³ப³ந்தீ விகுப்³ப³னித்³தி⁴யோ வலஞ்ஜேந்தீ அச்ச²ஸீதி யோஜனா.

97. அனஞ்ஞமனாதி பதிப்³ப³தா, பதிதோ அஞ்ஞஸ்மிம் மனோ ஏதிஸ்ஸாதி அஞ்ஞமனா, ந அஞ்ஞமனாதி அனஞ்ஞமனா, மய்ஹம் ஸாமிகதோ அஞ்ஞஸ்மிம் புரிஸே பாபகம் சித்தம் ந உப்பாதே³ஸிந்தி அத்தோ². மாதாவ புத்தம் அனுரக்க²மானாதி யதா² மாதா புத்தம், ஏவம் மய்ஹம் ஸாமிகம், ஸப்³பே³பி வா ஸத்தே ஹிதேஸிதாய அஹிதாபனயனகாமதாய ச அனுத்³த³யமானா. குத்³தா⁴பிஹம் நப்ப²ருஸம் அவோசந்தி பரேன கதம் அபா²ஸுகம் படிச்ச குத்³தா⁴பி ஸமானா அஹம் ப²ருஸவசனம் ந கதே²ஸிம், அஞ்ஞத³த்து² பியவசனமேவ அபா⁴ஸிந்தி அதி⁴ப்பாயோ.

98. ஸச்சே டி²தாதி ஸச்சே பதிட்டி²தா. யஸ்மா முஸாவாதா³ வேரமணியா ஸச்சே பதிட்டி²தா நாம ஹோதி, ந கதா³சி ஸச்சவசனமத்தேனாதி ஆஹ – மோஸவஜ்ஜம் பஹாயாதி முஸாவாத³ம் பஹாய. தா³னே ரதாதி தா³னே அபி⁴ரதா, யுத்தப்பயுத்தாதி அத்தோ². ஸங்க³ஹிதத்தபா⁴வாதி ஸங்க³ஹவத்தூ²ஹி அத்தானம் விய ஸபா⁴வேனேவ பரேஸம் ஸங்க³ண்ஹனஸீலா அன்னஞ்ச பானஞ்ச கம்மப²லஸத்³தா⁴ய பஸன்னசித்தா ஸக்கச்சம் சித்தீகாரேன அதா³ஸிம், அஞ்ஞஞ்ச வத்தா²தி³தா³னம் விபுலம் உளாரம் அதா³ஸிந்தி யோஜனா. ஸேஸம் வுத்தனயமேவ.

பதிப்³ப³தாவிமானவண்ணனா நிட்டி²தா.