12. சந்தா³தே²ரீகா³தா²வண்ணனா

து³க்³க³தாஹம் புரே ஆஸிந்திஆதி³கா சந்தா³ய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினந்தீ அனுக்கமேன ஸம்ப⁴தவிமோக்க²ஸம்பா⁴ரா பரிபக்கஞாணா இமஸ்மிம் பு³த்³து⁴ப்பாதே³ அஞ்ஞதரஸ்மிம் ப்³ராஹ்மணகா³மே அபஞ்ஞாதஸ்ஸ ப்³ராஹ்மணஸ்ஸ கே³ஹே படிஸந்தி⁴ம் க³ண்ஹி. தஸ்ஸா நிப்³ப³த்திதோ பட்டா²யம் தம் குலம் போ⁴கே³ஹி பரிக்க²யம் க³தம். ஸா அனுக்கமேன விஞ்ஞுதம் பத்வா து³க்கே²ன ஜீவதி. அத² தஸ்மிம் கே³ஹே அஹிவாதரோகோ³ உப்பஜ்ஜி. தேனஸ்ஸா ஸப்³பே³பி ஞாதகா மரணப்³யஸனம் பாபுணிம்ஸு. ஸா ஞாதிக்க²யே ஜாதே அஞ்ஞத்த² ஜீவிதும் அஸக்கோந்தீ கபாலஹத்தா² குலே குலே விசரித்வா லத்³த⁴லத்³தே⁴ன பி⁴க்கா²ஹாரேன யாபேந்தீ ஏகதி³வஸம் படாசாராய தே²ரியா ப⁴த்தவிஸ்ஸக்³க³ட்டா²னம் அக³மாஸி. பி⁴க்கு²னியோ தம் து³க்கி²தம் கு²த்³தா³பி⁴பூ⁴தம் தி³ஸ்வான ஸஞ்ஜாதகாருஞ்ஞா பியஸமுதா³சாரேன ஸங்க³ஹேத்வா தத்த² விஜ்ஜமானேன உபசாரமனோஹரேன ஆஹாரேன ஸந்தப்பேஸும். ஸா தாஸம் ஆசாரஸீலே பஸீதி³த்வா தே²ரியா ஸந்திகம் உபஸங்கமித்வா வந்தி³த்வா ஏகமந்தம் நிஸீதி³. தஸ்ஸா தே²ரீ த⁴ம்மம் கதே²ஸி. ஸா தம் த⁴ம்மம் ஸுத்வா ஸாஸனே அபி⁴ப்பஸன்னா ஸம்ஸாரே ச ஸஞ்ஜாதஸம்வேகா³ பப்³ப³ஜி. பப்³ப³ஜித்வா ச தே²ரியா ஓவாதே³ ட²த்வா விபஸ்ஸனம் பட்ட²பேத்வா பா⁴வனம் அனுயுஞ்ஜந்தீ கதாதி⁴காரதாய ஞாணஸ்ஸ ச பரிபாகம் க³தத்தா ந சிரஸ்ஸேவ ஸஹ படிஸம்பி⁴தா³ஹி அரஹத்தம் பத்வா அத்தனோ படிபத்திம் பச்சவேக்கி²த்வா –

122. ‘‘து³க்³க³தாஹம் புரே ஆஸிம், வித⁴வா ச அபுத்திகா;

வினா மித்தேஹி ஞாதீஹி, ப⁴த்தசோளஸ்ஸ நாதி⁴க³ம்.

123. ‘‘பத்தம் த³ண்ட³ஞ்ச க³ண்ஹித்வா, பி⁴க்க²மானா குலா குலம்;

ஸீதுண்ஹேன ச ட³ய்ஹந்தீ, ஸத்த வஸ்ஸானி சாரிஹம்.

124. ‘‘பி⁴க்கு²னிம் புன தி³ஸ்வான, அன்னபானஸ்ஸ லாபி⁴னிம்;

உபஸங்கம்மம் அவோசம், பப்³ப³ஜ்ஜம் அனகா³ரியம்.

125. ‘‘ஸா ச மம் அனுகம்பாய, பப்³பா³ஜேஸி படாசாரா;

ததோ மம் ஓவதி³த்வான, பரமத்தே² நியோஜயி.

126. ‘‘தஸ்ஸாஹம் வசனம் ஸுத்வா, அகாஸிம் அனுஸாஸனிம்;

அமோகோ⁴ அய்யாயோவாதோ³, தேவிஜ்ஜாம்ஹி அனாஸவா’’தி. –

உதா³னவஸேன இமா கா³தா² அபா⁴ஸி.

தத்த² து³க்³க³தாதி த³லித்³தா³. புரேதி பப்³ப³ஜிததோ புப்³பே³. பப்³ப³ஜிதகாலதோ பட்டா²ய ஹி இத⁴ புக்³க³லோ போ⁴கே³ஹி அட்³டோ⁴ வா த³லித்³தோ³ வாதி ந வத்தப்³போ³. கு³ணேஹி பன அயம் தே²ரீ அட்³டா⁴யேவ. தேனாஹ ‘‘து³க்³க³தாஹம் புரே ஆஸி’’ந்தி. வித⁴வாதி த⁴வோ வுச்சதி ஸாமிகோ, தத³பா⁴வா வித⁴வா, மதபதிகாதி அத்தோ². அபுத்திகாதி புத்தரஹிதா. வினா மித்தேஹீதி மித்தேஹி ப³ந்த⁴வேஹி ச பரிஹீனா ரஹிதா. ப⁴த்தசோளஸ்ஸ நாதி⁴க³ந்தி ப⁴த்தஸ்ஸ சோளஸ்ஸ ச பாரிபூரிம் நாதி⁴க³ச்சி²ம், கேவலம் பன பி⁴க்கா²பிண்ட³ஸ்ஸ பிலோதிகாக²ண்ட³ஸ்ஸ ச வஸேன கா⁴ஸச்சா²த³னமத்தமேவ அலத்த²ந்தி அதி⁴ப்பாயோ. தேனாஹ ‘‘பத்தம் த³ண்ட³ஞ்ச க³ண்ஹித்வா’’திஆதி³.

தத்த² பத்தந்தி மத்திகாபா⁴ஜனம். த³ண்ட³ந்தி கோ³ணஸுனகா²தி³பரிஹரணத³ண்ட³கம். குலா குலந்தி குலதோ குலம். ஸீதுண்ஹேன ச ட³ய்ஹந்தீதி வஸனகே³ஹாபா⁴வதோ ஸீதேன ச உண்ஹேன ச பீளியமானா.

பி⁴க்கு²னிந்தி படாசாராதே²ரிம் ஸந்தா⁴ய வத³தி. புனாதி பச்சா², ஸத்தஸம்வச்ச²ரதோ அபரபா⁴கே³.

பரமத்தே²தி பரமே உத்தமே அத்தே², நிப்³பா³னகா³மினியா படிபதா³ய நிப்³பா³னே ச. நியோஜயீதி கம்மட்டா²னம் ஆசிக்க²ந்தீ நியோஜேஸி. ஸேஸம் வுத்தனயமேவ.

சந்தா³தே²ரீகா³தா²வண்ணனா நிட்டி²தா.

பஞ்சகனிபாதவண்ணனா நிட்டி²தா.