1. ஸுமேதா⁴தே²ரீகா³தா²வண்ணனா

மஹானிபாதே மந்தாவதியா நக³ரேதிஆதி³கா ஸுமேதா⁴ய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினந்தீ, ஸக்கச்சம் விமோக்க²ஸம்பா⁴ரே ஸம்பா⁴ரேந்தீ கோணாக³மனஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்வா, அத்தனோ ஸகீ²ஹி குலதீ⁴தாஹி ஸத்³தி⁴ம் ஏகஜ்ஜா²ஸயா ஹுத்வா மஹந்தம் ஆராமம் காரேத்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ நிய்யாதே³ஸி. ஸா தேன புஞ்ஞகம்மேன காயஸ்ஸ பே⁴தா³ தாவதிம்ஸம் உபக³ச்சி². தத்த² யாவதாயுகம் தி³ப்³ப³ஸம்பத்திம் அனுப⁴வித்வா ததோ சுதா யாமேஸு உபபஜ்ஜி. ததோ சுதா துஸிதேஸு, ததோ சுதா நிம்மானரதீஸு, ததோ சுதா பரனிம்மிதவஸவத்தீஸூதி அனுக்கமேன பஞ்சஸு காமஸக்³கே³ஸு உப்பஜ்ஜித்வா தத்த² தத்த² தே³வராஜூனம் மஹேஸீ ஹுத்வா ததோ சுதா கஸ்ஸபஸ்ஸ ப⁴க³வதோ காலே மஹாவிப⁴வஸ்ஸ ஸேட்டி²னோ தீ⁴தா ஹுத்வா அனுக்கமேன விஞ்ஞுதம் பத்வா ஸாஸனே அபி⁴ப்பஸன்னா ஹுத்வா ரதனத்தயம் உத்³தி³ஸ்ஸ உளாரபுஞ்ஞகம்மம் அகாஸி.

தத்த² யாவஜீவம் த⁴ம்மூபஜீவினீ குஸலத⁴ம்மனிரதா ஹுத்வா ததோ சுதா தாவதிம்ஸேஸு நிப்³ப³த்தித்வா அபராபரம் ஸுக³தீஸுயேவ ஸம்ஸரந்தீ, இமஸ்மிம் பு³த்³து⁴ப்பாதே³ மந்தாவதீனக³ரே கோஞ்சஸ்ஸ நாம ரஞ்ஞோ தீ⁴தா ஹுத்வா நிப்³ப³த்தி. தஸ்ஸா மாதாபிதரோ ஸுமேதா⁴தி நாமம் அகம்ஸு. தம் அனுக்கமேன வுத்³தி⁴ப்பத்தவயப்பத்தகாலே மாதாபிதரோ ‘‘வாரணவதீனக³ரே அனிகரத்தஸ்ஸ நாம ரஞ்ஞோ த³ஸ்ஸாமா’’தி ஸம்மந்தேஸும். ஸா பன த³ஹரகாலதோ பட்டா²ய அத்தனோ ஸமானவயாஹி ராஜகஞ்ஞாஹி தா³ஸிஜனேஹி ச ஸத்³தி⁴ம் பி⁴க்கு²னுபஸ்ஸயம் க³ந்த்வா பி⁴க்கு²னீனம் ஸந்திகே த⁴ம்மம் ஸுத்வா சிரகாலதோ பட்டா²ய கதாதி⁴காரதாய ஸம்ஸாரே ஜாதஸம்வேகா³ ஸாஸனே அபி⁴ப்பஸன்னா ஹுத்வா வயப்பத்தகாலே காமேஹி வினிவத்திதமானஸா அஹோஸி. தேன ஸா மாதாபிதூனம் ஞாதீனம் ஸம்மந்தனம் ஸுத்வா ‘‘ந மய்ஹம் க⁴ராவாஸேன கிச்சம், பப்³ப³ஜிஸ்ஸாமஹ’’ந்தி ஆஹ. தம் மாதாபிதரோ க⁴ராவாஸே நியோஜேந்தா நானப்பகாரேன யாசந்தாபி ஸஞ்ஞாபேதும் நாஸக்கி²ம்ஸு. ஸா ‘‘ஏவம் மே பப்³ப³ஜிதும் லப்³ப⁴தீ’’தி க²க்³க³ம் க³ஹேத்வா ஸயமேவ அத்தனோ கேஸே சி²ந்தி³த்வா தே ஏவ கேஸே ஆரப்³ப⁴ படிக்கூலமனஸிகாரம் பவத்தேந்தீ தத்த² கதாதி⁴காரதாய பி⁴க்கு²னீனம் ஸந்திகே மனஸிகாரவிதா⁴னஸ்ஸ ஸுதபுப்³ப³த்தா ச அஸுப⁴னிமித்தம் உப்பாதே³த்வா தத்த² பட²மஜ்ஜா²னம் அதி⁴க³ச்சி². அதி⁴க³தபட²மஜ்ஜா²னா ச அத்தனா க⁴ராவாஸே உய்யோஜேதும் உபக³தே மாதாபிதரோ ஆதி³ம் கத்வா அந்தோஜனபரிஜனம் ஸப்³ப³ம் ராஜகுலம் ஸாஸனே அபி⁴ப்பஸன்னம் காரேத்வா க⁴ரதோ நிக்க²மித்வா பி⁴க்கு²னுபஸ்ஸயம் க³ந்த்வா பப்³ப³ஜி. பப்³ப³ஜித்வா ச விபஸ்ஸனம் பட்ட²பேத்வா ஸம்மதே³வ பரிபக்கஞாணா விமுத்திபரிபாசனீயானம் த⁴ம்மானம் விஸேஸிதாய ந சிரஸ்ஸேவ ஸஹ படிஸம்பி⁴தா³ஹி அரஹத்தம் பாபுணி. தேன வுத்தம் அபதா³னே (அப. தே²ரீ 2.1.1-19) –

‘‘ப⁴க³வதி கோணாக³மனே, ஸங்கா⁴ராமம்ஹி நவனிவேஸம்ஹி;

ஸகி²யோ திஸ்ஸோ ஜனியோ, விஹாரதா³னம் அதா³ஸிம்ஹ.

‘‘த³ஸக்க²த்தும் ஸதக்க²த்தும், த³ஸஸதக்க²த்தும் ஸதானி ச ஸதக்க²த்தும்;

தே³வேஸு உபபஜ்ஜிம்ஹ, கோ பன வாதோ³ மனுஸ்ஸேஸு.

‘‘தே³வேஸு மஹித்³தி⁴கா அஹும்ஹ, மானுஸகம்ஹி கோ பன வாதோ³;

ஸத்தரதனஸ்ஸ மஹேஸீ, இத்தி²ரதனம் அஹம் ஆஸிம்.

‘‘இத⁴ ஸஞ்சிதகுஸலா, ஸுஸமித்³த⁴குலப்பஜா;

த⁴னஞ்ஜானீ ச கே²மா ச, அஹம்பி ச தயோ ஜனா.

‘‘ஆராமம் ஸுகதம் கத்வா, ஸப்³பா³வயவமண்டி³தம்;

பு³த்³த⁴ப்பமுக²ஸங்க⁴ஸ்ஸ, நிய்யாதே³த்வா பமோதி³தா.

‘‘யத்த² யத்தூ²பபஜ்ஜாமி, தஸ்ஸ கம்மஸ்ஸ வாஹஸா;

தே³வேஸு அக்³க³தம் பத்தா, மனுஸ்ஸேஸு ததே²வ ச.

‘‘இமஸ்மிம்யேவ கப்பம்ஹி, ப்³ரஹ்மப³ந்து⁴ மஹாயஸோ;

கஸ்ஸபோ நாம கோ³த்தேன, உப்பஜ்ஜி வத³தம் வரோ.

‘‘உபட்டா²கோ மஹேஸிஸ்ஸ, ததா³ ஆஸி நரிஸ்ஸரோ;

காஸிராஜா கிகீ நாம, பா³ராணஸிபுருத்தமே.

‘‘தஸ்ஸாஸும் ஸத்த தீ⁴தரோ, ராஜகஞ்ஞா ஸுகே²தி⁴தா;

பு³த்³தோ⁴பட்டா²னனிரதா, ப்³ரஹ்மசரியம் சரிம்ஸு தா.

‘‘தாஸம் ஸஹாயிகா ஹுத்வா, ஸீலேஸு ஸுஸமாஹிதா;

த³த்வா தா³னானி ஸக்கச்சம், அகா³ரேவ வதம் சரிம்.

‘‘தேன கம்மேன ஸுகதேன, சேதனாபணிதீ⁴ஹி ச;

ஜஹித்வா மானுஸம் தே³ஹம், தாவதிம்ஸூபகா³ அஹம்.

‘‘ததோ சுதா யாமமக³ம், ததோஹம் துஸிதம் க³தா;

ததோ ச நிம்மானரதிம், வஸவத்திபுரம் க³தா.

‘‘யத்த² யத்தூ²பபஜ்ஜாமி, புஞ்ஞகம்மஸமோஹிதா;

தத்த² தத்தே²வ ராஜூனம், மஹேஸித்தமஹாரயிம்.

‘‘ததோ சுதா மனுஸ்ஸத்தே, ராஜூனம் சக்கவத்தினம்;

மண்ட³லீனஞ்ச ராஜூனம், மஹேஸித்தமகாரயிம்.

‘‘ஸம்பத்திமனுபோ⁴த்வான, தே³வேஸு மானுஸேஸு ச;

ஸப்³ப³த்த² ஸுகி²தா ஹுத்வா, நேகஜாதீஸு ஸம்ஸரிம்.

‘‘ஸோ ஹேது ஸோ பப⁴வோ, தம்மூலம் ஸாவ ஸாஸனே க²ந்தீ;

தம் பட²மஸமோதா⁴னம், தம் த⁴ம்மரதாய நிப்³பா³னம்.

‘‘கிலேஸா ஜா²பிதா மய்ஹம், ப⁴வா ஸப்³பே³ ஸமூஹதா;

நாகீ³வ ப³ந்த⁴னம் சே²த்வா, விஹராமி அனாஸவா.

‘‘ஸ்வாக³தம் வத மே ஆஸி, பு³த்³த⁴ஸேட்ட²ஸ்ஸ ஸந்திகே;

திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸனம்.

‘‘படிஸம்பி⁴தா³ சதஸ்ஸோ, விமோக்கா²பி ச அட்டி²மே;

ச²ளபி⁴ஞ்ஞா ஸச்சி²கதா, கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா அத்தனோ படிபத்திம் பச்சவேக்கி²த்வா உதா³னவஸேன –

450. ‘‘மந்தாவதியா நக³ரே, ரஞ்ஞோ கோஞ்சஸ்ஸ அக்³க³மஹேஸியா;

தீ⁴தா ஆஸிம் ஸுமேதா⁴, பஸாதி³தா ஸாஸனகரேஹி.

451. ‘‘ஸீலவதீ சித்தகதா², ப³ஹுஸ்ஸுதா பு³த்³த⁴ஸாஸனே வினிதா;

மாதாபிதரோ உபக³ம்ம, ப⁴ணதி உப⁴யோ நிஸாமேத².

452. ‘‘நிப்³பா³னாபி⁴ரதாஹம், அஸஸ்ஸதம் ப⁴வக³தம் யதி³பி தி³ப்³ப³ம்;

கிமங்க³ம் பன துச்சா² காமா, அப்பஸ்ஸாதா³ ப³ஹுவிகா⁴தா.

453. ‘‘காமா கடுகா ஆஸீ, விஸூபமா யேஸு முச்சி²தா பா³லா;

தே தீ³க⁴ரத்தம் நிரயே, ஸமப்பிதா ஹஞ்ஞந்தே து³க்கி²தா.

454. ‘‘ஸோசந்தி பாபகம்மா, வினிபாதே பாபவத்³தி⁴னோ ஸதா³;

காயேன ச வாசாய ச, மனஸா ச அஸம்வுதா பா³லா.

455. ‘‘பா³லா தே து³ப்பஞ்ஞா, அசேதனா து³க்க²ஸமுத³யோருத்³தா⁴;

தே³ஸேந்தே அஜானந்தா, ந பு³ஜ்ஜ²ரே அரியஸச்சானி.

456. ‘‘ஸச்சானி ‘அம்ம’பு³த்³த⁴வரதே³ஸி, தானி தே ப³ஹுதரா அஜானந்தா யே;

அபி⁴னந்த³ந்தி ப⁴வக³தம், பிஹேந்தி தே³வேஸு உபபத்திம்.

457. ‘‘தே³வேஸுபி உபபத்தி, அஸஸ்ஸதா ப⁴வக³தே அனிச்சம்ஹி;

ந ச ஸந்தஸந்தி பா³லா, புனப்புனம் ஜாயிதப்³ப³ஸ்ஸ.

458. ‘‘சத்தாரோ வினிபாதா, து³வே ச க³தியோ கத²ஞ்சி லப்³ப⁴ந்தி;

ந ச வினிபாதக³தானம், பப்³ப³ஜ்ஜா அத்தி² நிரயேஸு.

459. ‘‘அனுஜானாத² மம் உப⁴யோ, பப்³ப³ஜிதும் த³ஸப³லஸ்ஸ பாவசனே;

அப்போஸ்ஸுக்கா க⁴டிஸ்ஸம், ஜாதிமரணப்பஹானாய.

460. ‘‘கிம் ப⁴வக³தே அபி⁴னந்தி³, தேன காயகலினா அஸாரேன;

ப⁴வதண்ஹாய நிரோதா⁴, அனுஜானாத² பப்³ப³ஜிஸ்ஸாமி.

461. ‘‘பு³த்³தா⁴னம் உப்பாதோ³, விவஜ்ஜிதோ அக்க²ணோ க²ணோ லத்³தோ⁴;

ஸீலானி ப்³ரஹ்மசரியம், யாவஜீவம் ந தூ³ஸேய்யம்.

462. ‘‘ஏவம் ப⁴ணதி ஸுமேதா⁴, மாதாபிதரோ ‘ந தாவ ஆஹாரம்;

ஆஹரிஸ்ஸம் க³ஹட்டா², மரணவஸம் க³தாவ ஹேஸ்ஸாமி’.

463. ‘‘மாதா து³க்கி²தா ரோத³தி பிதா ச;

அஸ்ஸா ஸப்³ப³ஸோ ஸமபி⁴ஹதோ;

க⁴டேந்தி ஸஞ்ஞாபேதும், பாஸாத³தலே ச²மாபதிதம்.

464. ‘‘உட்டே²ஹி புத்தக கிம் ஸோசி, தேன தி³ன்னாஸி வாரணவதிம்ஹி;

ராஜா அனீகரத்தோ, அபி⁴ரூபோ தஸ்ஸ த்வம் தி³ன்னா.

465. ‘‘அக்³க³மஹேஸீ ப⁴விஸ்ஸஸி, அனிகரத்தஸ்ஸ ராஜினோ ப⁴ரியா;

ஸீலானி ப்³ரஹ்மசரியம், பப்³ப³ஜ்ஜா து³க்கரா புத்தக.

466. ‘‘ரஜ்ஜே ஆணா த⁴னமிஸ்ஸரியம், போ⁴கா³ ஸுகா² த³ஹரிகாஸி;

பு⁴ஞ்ஜாஹி காமபோ⁴கே³, வாரேய்யம் ஹோது தே புத்த.

467. ‘‘அத² நே ப⁴ணதி ஸுமேதா⁴, மா ஏதி³ஸிகானி ப⁴வக³தமஸாரம்;

பப்³ப³ஜ்ஜா வா ஹோஹிதி, மரணம் வா மே ந சேவ வாரேய்யம்.

468. ‘‘கிமிவ பூதிகாயமஸுசிம், ஸவனக³ந்த⁴ம் ப⁴யானகம் குணபம்;

அபி⁴ஸம்விஸேய்யம் ப⁴ஸ்தம், அஸகிம் பக்³க⁴ரிதம் அஸுசிபுண்ணம்.

469. ‘‘கிமிவ தஹம் ஜானந்தீ, விகூலகம் மம்ஸஸோணிதுபலித்தம்;

கிமிகுலலயம் ஸகுணப⁴த்தம், களேவரம் கிஸ்ஸ தி³யதீதி.

470. ‘‘நிப்³பு³ய்ஹதி ஸுஸானம், அசிரம் காயோ அபேதவிஞ்ஞாணோ;

சு²த்³தோ⁴ களிங்க³ரம் விய, ஜிகு³ச்ச²மானேஹி ஞாதீஹி.

471. ‘‘சு²த்³தூ⁴ன நம் ஸுஸானே, பரப⁴த்தம் ந்ஹாயந்தி ஜிகு³ச்ச²ந்தா;

நியகா மாதாபிதரோ, கிம் பன ஸாதா⁴ரணா ஜனதா.

472. ‘‘அஜ்ஜோ²ஸிதா அஸாரே, களேவரே அட்டி²ன்ஹாருஸங்கா⁴தே;

கே²ளஸ்ஸுச்சாரஸ்ஸவபரிபுண்ணே பூதிகாயம்ஹி.

473. ‘‘யோ நம் வினிப்³பு⁴ஜித்வா, அப்³ப⁴ந்தரமஸ்ஸ பா³ஹிரம் கயிரா;

க³ந்த⁴ஸ்ஸ அஸஹமானா, ஸகாபி மாதா ஜிகு³ச்சே²ய்ய.

474. ‘‘க²ந்த⁴தா⁴துஆயதனம், ஸங்க²தம் ஜாதிமூலகம் து³க்க²ம்;

யோனிஸோ அனுவிசினந்தீ, வாரேய்யம் கிஸ்ஸ இச்சே²ய்யம்.

475. ‘‘தி³வஸே தி³வஸே திஸத்தி, ஸதானி நவனவா பதேய்யும் காயம்ஹி;

வஸ்ஸஸதம்பி ச கா⁴தோ, ஸேய்யோ து³க்க²ஸ்ஸ சேவம் க²யோ.

476. ‘‘அஜ்ஜு²பக³ச்சே² கா⁴தம், யோ விஞ்ஞாயேவம் ஸத்து²னோ வசனம்;

தீ³கோ⁴ தேஸம் ஸம்ஸாரோ, புனப்புனம் ஹஞ்ஞமானானம்.

477. ‘‘தே³வேஸு மனுஸ்ஸேஸு ச, திரச்சா²னயோனியா அஸுரகாயே;

பேதேஸு ச நிரயேஸு ச, அபரிமிதா தி³ஸ்ஸந்தே கா⁴தா.

478. ‘‘கா⁴தா நிரயேஸு ப³ஹூ, வினிபாதக³தஸ்ஸ பீளியமானஸ்ஸ;

தே³வேஸுபி அத்தாணம், நிப்³பா³னஸுகா² பரம் நத்தி².

479. ‘‘பத்தா தே நிப்³பா³னம், யே யுத்தா த³ஸப³லஸ்ஸ பாவசனே;

அப்போஸ்ஸுக்கா க⁴டேந்தி, ஜாதிமரணப்பஹானாய.

480. ‘‘அஜ்ஜேவ தாதபி⁴னிக்க²மிஸ்ஸம், போ⁴கே³ஹி கிம் அஸாரேஹி;

நிப்³பி³ன்னா மே காமா, வந்தஸமா தாலவத்து²கதா.

481. ‘‘ஸா சேவம் ப⁴ணதி பிதரமனீகரத்தோ, ச யஸ்ஸ ஸா தி³ன்னா;

உபயாஸி வாரணவதே, வாரேய்யமுபட்டி²தே காலே.

482. ‘‘அத² அஸிதனிசிதமுது³கே, கேஸே க²க்³கே³ன சி²ந்தி³ய ஸுமேதா⁴;

பாஸாத³ம் பித³ஹித்வா, பட²மஜ்ஜா²னம் ஸமாபஜ்ஜி.

483. ‘‘ஸா ச தஹிம் ஸமாபன்னா, அனீகரத்தோ ச ஆக³தோ நக³ரம்;

பாஸாதே³ ச ஸுமேதா⁴, அனிச்சஸஞ்ஞம் ஸுபா⁴வேதி.

484. ‘‘ஸா ச மனஸி கரோதி, அனீகரத்தோ ச ஆருஹீ துரிதம்;

மணிகனகபூ⁴ஸிதங்கோ³, கதஞ்ஜலீ யாசதி ஸுமேத⁴ம்.

485. ‘‘ரஜ்ஜே ஆணா த⁴னமிஸ்ஸரியம், போ⁴கா³ ஸுகா² த³ஹரிகாஸி;

பு⁴ஞ்ஜாஹி காமபோ⁴கே³, காமஸுகா² து³ல்லபா⁴ லோகே.

486. ‘‘நிஸ்ஸட்ட²ம் தே ரஜ்ஜம், போ⁴கே³ பு⁴ஞ்ஜஸ்ஸு தே³ஹி தா³னானி;

மா து³ம்மனா அஹோஸி, மாதாபிதரோ தே து³க்கி²தா.

487. ‘‘தம் தம் ப⁴ணதி ஸுமேதா⁴, காமேஹி அனத்தி²கா விக³தமோஹா;

மா காமே அபி⁴னந்தி³, காமேஸ்வாதீ³னவம் பஸ்ஸ.

488. ‘‘சாதுத்³தீ³போ ராஜா, மந்தா⁴தா ஆஸி காமபோ⁴கி³னமக்³கோ³;

அதித்தோ காலங்கதோ, ந சஸ்ஸ பரிபூரிதா இச்சா².

489. ‘‘ஸத்த ரதனானி வஸ்ஸேய்ய, வுட்டி²மா த³ஸதி³ஸா ஸமந்தேன;

ந சத்தி² தித்தி காமானம், அதித்தாவ மரந்தி நரா.

490. ‘‘அஸிஸூனூபமா காமா, காமா ஸப்பஸிரோபமா;

உக்கோபமா அனுத³ஹந்தி, அட்டி²கங்கலஸன்னிபா⁴.

491. ‘‘அனிச்சா அது⁴வா காமா, ப³ஹுது³க்கா² மஹாவிஸா;

அயோகு³ளோவ ஸந்தத்தோ, அக⁴மூலா து³க²ப்ப²லா.

492. ‘‘ருக்க²ப²லூபமா காமா, மம்ஸபேஸூபமா து³கா²;

ஸுபினோபமா வஞ்சனியா, காமா யாசிதகூபமா.

493. ‘‘ஸத்திஸூலூபமா காமா, ரோகோ³ க³ண்டோ³ அக⁴ம் நிக⁴ம்;

அங்கா³ரகாஸுஸதி³ஸா, அக⁴மூலம் ப⁴யம் வதோ⁴.

494. ‘‘ஏவம் ப³ஹுது³க்கா² காமா, அக்கா²தா அந்தராயிகா;

க³ச்ச²த² ந மே ப⁴வக³தே, விஸ்ஸாஸோ அத்தி² அத்தனோ.

495. ‘‘கிம் மம பரோ கரிஸ்ஸதி, அத்தனோ ஸீஸம்ஹி ட³ய்ஹமானம்ஹி;

அனுப³ந்தே⁴ ஜராமரணே, தஸ்ஸ கா⁴தாய க⁴டிதப்³ப³ம்.

496. ‘‘த்³வாரம் அபாபுரித்வானஹம், மாதாபிதரோ அனீகரத்தஞ்ச;

தி³ஸ்வான ச²மம் நிஸின்னே, ரோத³ந்தே இத³மவோசம்.

497. ‘‘தீ³கோ⁴ பா³லானம் ஸம்ஸாரோ, புனப்புனஞ்ச ரோத³தம்;

அனமதக்³கே³ பிது மரணே, பா⁴து வதே⁴ அத்தனோ ச வதே⁴.

498. ‘‘அஸ்ஸு த²ஞ்ஞம் ருதி⁴ரம், ஸம்ஸாரம் அனமதக்³க³தோ ஸரத²;

ஸத்தானம் ஸம்ஸரதம், ஸராஹி அட்டீ²னஞ்ச ஸன்னிசயம்.

499. ‘‘ஸர சதுரோத³தீ⁴, உபனீதே அஸ்ஸுத²ஞ்ஞருதி⁴ரம்ஹி;

ஸர ஏககப்பமட்டீ²னம், ஸஞ்சயம் விபுலேன ஸமம்.

500. ‘‘அனமதக்³கே³ ஸம்ஸரதோ, மஹிம் ஜம்பு³தீ³பமுபனீதம்;

கோலட்டி²மத்தகு³ளிகா, மாதா மாதுஸ்வேவ நப்பஹோந்தி.

501. ‘‘திணகட்ட²ஸாகா²பலாஸம், உபனீதம் அனமதக்³க³தோ ஸர;

சதுரங்கு³லிகா க⁴டிகா, பிதுபிதுஸ்வேவ நப்பஹோந்தி.

502. ‘‘ஸர காணகச்ச²பம் புப்³ப³ஸமுத்³தே³, அபரதோ ச யுக³சி²த்³த³ம்;

ஸிரம் தஸ்ஸ ச படிமுக்கம், மனுஸ்ஸலாப⁴ம்ஹி ஓபம்மம்.

503. ‘‘ஸர ரூபம் பே²ணபிண்டோ³பமஸ்ஸ, காயகலினோ அஸாரஸ்ஸ;