1. ஸுபா⁴ஜீவகம்ப³வனிகாதே²ரீகா³தா²வண்ணனா

திம்ஸனிபாதே ஜீவகம்ப³வனம் ரம்மந்திஆதி³கா ஸுபா⁴ய ஜீவகம்ப³வனிகாய தே²ரியா கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினந்தீ, ஸம்பா⁴விதகுஸலமூலா அனுக்கமேன பரிப்³ரூஹிதவிமோக்க²ஸம்பா⁴ரா பரிபக்கஞாணா ஹுத்வா, இமஸ்மிம் பு³த்³து⁴ப்பாதே³ ராஜக³ஹே ப்³ராஹ்மணமஹாஸாலகுலே நிப்³ப³த்தி, ஸுபா⁴திஸ்ஸா நாமமஹோஸி. தஸ்ஸா கிர ஸரீராவயவா ஸோப⁴னவண்ணயுத்தா அஹேஸும், தஸ்மா ஸுபா⁴தி அன்வத்த²மேவ நாமம் ஜாதம். ஸா ஸத்து² ராஜக³ஹப்பவேஸனே படிலத்³த⁴ஸத்³தா⁴ உபாஸிகா ஹுத்வா அபரபா⁴கே³ ஸம்ஸாரே ஜாதஸம்வேகா³ காமேஸு ஆதீ³னவம் தி³ஸ்வா நேக்க²ம்மஞ்ச கே²மதோ ஸல்லக்க²ந்தீ மஹாபஜாபதியா கோ³தமியா ஸந்திகே பப்³ப³ஜித்வா விபஸ்ஸனாய கம்மம் கரோந்தீ கதிபாஹேனேவ அனாகா³மிப²லே பதிட்டா²ஸி.

அத² நம் ஏகதி³வஸம் அஞ்ஞதரோ ராஜக³ஹவாஸீ து⁴த்தபுரிஸோ தருணோ பட²மயோப்³ப³னே டி²தோ ஜீவகம்ப³வனே தி³வாவிஹாராய க³ச்ச²ந்திம் தி³ஸ்வா படிப³த்³த⁴சித்தோ ஹுத்வா மக்³க³ம் ஓவரந்தோ காமேஹி நிமந்தேஸி. ஸா தஸ்ஸ நானப்பகாரேஹி காமானம் ஆதீ³னவம் அத்தனோ ச நேக்க²ம்மஜ்ஜா²ஸயம் பவேதே³ந்தீ த⁴ம்மம் கதே²ஸி. ஸோ த⁴ம்மகத²ம் ஸுத்வாபி ந படிக்கமதி, நிப³ந்த⁴தியேவ. தே²ரீ நம் அத்தனோ வசனே அதிட்ட²ந்தம் அக்கி²ம்ஹி ச அபி⁴ரத்தம் தி³ஸ்வா, ‘‘ஹந்த³, தயா ஸம்பா⁴விதம் அக்கி²’’ந்தி அத்தனோ ஏகம் அக்கி²ம் உப்பாடேத்வா தஸ்ஸ உபனேஸி. ததோ ஸோ புரிஸோ ஸந்தாஸோ ஸம்வேக³ஜாதோ தத்த² விக³தராகோ³வ ஹுத்வா தே²ரிம் க²மாபேத்வா க³தோ. தே²ரீ ஸத்து² ஸந்திகம் அக³மாஸி. ஸத்து²னோ ஸஹ த³ஸ்ஸனேனேவஸ்ஸா அக்கி² படிபாகதிகம் அஹோஸி. ததோ ஸா பு³த்³த⁴க³தாய பீதியா நிரந்தரம் பு²டா ஹுத்வா அட்டா²ஸி. ஸத்தா² தஸ்ஸா சித்தாசாரம் ஞத்வா த⁴ம்மம் தே³ஸேத்வா அக்³க³மக்³க³த்தா²ய கம்மட்டா²னம் ஆசிக்கி². ஸா பீதிம் விக்க²ம்பே⁴த்வா தாவதே³வ விபஸ்ஸனம் வட்³டே⁴த்வா ஸஹ படிஸம்பி⁴தா³ஹி அரஹத்தம் பாபுணி. அரஹத்தம் பன பத்வா ப²லஸுகே²ன நிப்³பா³னஸுகே²ன விஹரந்தீ அத்தனோ படிபத்திம் பச்சவேக்கி²த்வா அத்தனா தேன ச து⁴த்தபுரிஸேன வுத்தகா³தா² உதா³னவஸேன –

368. ‘‘ஜீவகம்ப³வனம் ரம்மம், க³ச்ச²ந்திம் பி⁴க்கு²னிம் ஸுப⁴ம்;

து⁴த்தகோ ஸன்னிவாரேஸி, தமேனம் அப்³ரவீ ஸுபா⁴.

369. ‘‘கிம் தே அபராதி⁴தம் மயா, யம் மம் ஓவரியான திட்ட²ஸி;

ந ஹி பப்³ப³ஜிதாய ஆவுஸோ, புரிஸோ ஸம்பு²ஸனாய கப்பதி.

370. ‘‘க³ருகே மம ஸத்து²ஸாஸனே, யா ஸிக்கா² ஸுக³தேன தே³ஸிதா;

பரிஸுத்³த⁴பத³ம் அனங்க³ணம், கிம் மம் ஓவரியான திட்ட²ஸி.

371. ‘‘ஆவிலசித்தோ அனாவிலம், ஸரஜோ வீதரஜம் அனங்க³ணம்;

ஸப்³ப³த்த² விமுத்தமானஸம், கிம் மம் ஓவரியான திட்ட²ஸி.

372. ‘‘த³ஹரா ச அபாபிகா சஸி, கிம் தே பப்³ப³ஜ்ஜா கரிஸ்ஸதி;

நிக்கி²ப காஸாயசீவரம், ஏஹி ரமாம ஸுபுப்பி²தே வனே.

373. ‘‘மது⁴ரஞ்ச பவந்தி ஸப்³ப³ஸோ, குஸுமரஜேன ஸமுட்டி²தா து³மா;

பட²மவஸந்தோ ஸுகோ² உது, ஏஹி ரமாம ஸுபுப்பி²தே வனே.

374. ‘‘குஸுமிதஸிக²ரா ச பாத³பா, அபி⁴க³ஜ்ஜந்திவ மாலுதேரிதா;

கா துய்ஹம் ரதி ப⁴விஸ்ஸதி, யதி³ ஏகா வனமோக³ஹிஸ்ஸஸி.

375. ‘‘வாளமிக³ஸங்க⁴ஸேவிதம், குஞ்ஜரமத்தகரேணுலோளிதம்;

அஸஹாயிகா க³ந்துமிச்ச²ஸி, ரஹிதம் பி⁴ம்ஸனகம் மஹாவனம்.

376. ‘‘தபனீயகதாவ தீ⁴திகா, விசரஸி சித்தலதேவ அச்ச²ரா;

காஸிகஸுகு²மேஹி வக்³கு³பி⁴, ஸோப⁴ஸீ ஸுவஸனேஹி நூபமே.

377. ‘‘அஹம் தவ வஸானுகோ³ ஸியம், யதி³ விஹரேமஸே கானனந்தரே;

ந ஹி மத்தி² தயா பியத்தரோ, பாணோ கின்னரிமந்த³லோசனே.

378. ‘‘யதி³ மே வசனம் கரிஸ்ஸஸி, ஸுகி²தா ஏஹி அகா³ரமாவஸ;

பாஸாத³னிவாதவாஸினீ, பரிகம்மம் தே கரோந்து நாரியோ.

379. ‘‘காஸிகஸுகு²மானி தா⁴ரய, அபி⁴ரோபேஹி ச மாலவண்ணகம்;

கஞ்சனமணிமுத்தகம் ப³ஹும், விவித⁴ம் ஆப⁴ரணம் கரோமி தே.

380. ‘‘ஸுதோ⁴தரஜபச்ச²த³ம் ஸுப⁴ம், கோ³னகதூலிகஸந்த²தம் நவம்;

அபி⁴ருஹ ஸயனம் மஹாரஹம், சந்த³னமண்டி³தஸாரக³ந்தி⁴கம்.

381. ‘‘உப்பலம் சுத³கா ஸமுக்³க³தம், யதா² தம் அமனுஸ்ஸஸேவிதம்;

ஏவம் த்வம் ப்³ரஹ்மசாரினீ, ஸகேஸங்கே³ஸு ஜரம் க³மிஸ்ஸஸி.

382. ‘‘கிம் தே இத⁴ ஸாரஸம்மதம், குணபபூரம்ஹி ஸுஸானவட்³ட⁴னே;

பே⁴த³னத⁴ம்மே களேவரே, யம் தி³ஸ்வா விமனோ உதி³க்க²ஸி.

383. ‘‘அக்கீ²னி ச தூரியாரிவ, கின்னரியாரிவ பப்³ப³தந்தரே;

தவ மே நயனானி த³க்கி²ய, பி⁴ய்யோ காமரதீ பவட்³ட⁴தி.

384. ‘‘உப்பலஸிக²ரோபமானி தே, விமலே ஹாடகஸன்னிபே⁴ முகே²;

தவ மே நயனானி த³க்கி²ய, பி⁴ய்யோ காமகு³ணோ பவட்³ட⁴தி.

385. ‘‘அபி தூ³ரக³தா ஸரம்ஹஸே, ஆயதபம்ஹே விஸுத்³த⁴த³ஸ்ஸனே;

ந ஹி மத்தி² தயா பியத்தரோ, நயனா கின்னரிமந்த³லோசனே.

386. ‘‘அபதே²ன பயாதுமிச்ச²ஸி, சந்த³ம் கீளனகம் க³வேஸஸி;

மேரும் லங்கே⁴துமிச்ச²ஸி, யோ த்வம் பு³த்³த⁴ஸுதம் மக்³க³யஸி.

387. ‘‘நத்தி² ஹி லோகே ஸதே³வகே, ராகோ³ யத்த²பி தா³னி மே ஸியா;

நபி நம் ஜானாமி கீரிஸோ, அத² மக்³கே³ன ஹதோ ஸமூலகோ.

388. ‘‘இங்கா³லகுயாவ உஜ்ஜி²தோ, விஸபத்தோரிவ அக்³கி³தோ கதோ;

நபி நம் பஸ்ஸாமி கீரிஸோ, அத² மக்³கே³ன ஹதோ ஸமூலகோ.

389. ‘‘யஸ்ஸா ஸியா அபச்சவேக்கி²தம், ஸத்தா² வா அனுபாஸிதோ ஸியா;

த்வம் தாதி³ஸிகம் பலோப⁴ய, ஜானந்திம் ஸோ இமம் விஹஞ்ஞஸி.

390. ‘‘மய்ஹஞ்ஹி அக்குட்ட²வந்தி³தே, ஸுக²து³க்கே² ச ஸதீ உபட்டி²தா;

ஸங்க²தமஸுப⁴ந்தி ஜானிய, ஸப்³ப³த்தே²வ மனோ ந லிம்பதி.

391. ‘‘ஸாஹம் ஸுக³தஸ்ஸ ஸாவிகா, மக்³க³ட்ட²ங்கி³கயானயாயினீ;

உத்³த⁴டஸல்லா அனாஸவா, ஸுஞ்ஞாகா³ரக³தா ரமாமஹம்.

392. ‘‘தி³ட்டா² ஹி மயா ஸுசித்திதா, ஸோம்பா⁴ தா³ருகபில்லகானி வா;

தந்தீஹி ச கீ²லகேஹி ச, வினிப³த்³தா⁴ விவித⁴ம் பனச்சகா.

393. ‘‘தம்ஹுத்³த⁴டே தந்திகீ²லகே, விஸ்ஸட்டே² விகலே பரிக்ரிதே;

ந விந்தே³ய்ய க²ண்ட³ஸோ கதே, கிம்ஹி தத்த² மனம் நிவேஸயே.

394. ‘‘ததூ²பமா தே³ஹகானி மம், தேஹி த⁴ம்மேஹி வினா ந வத்தந்தி;

த⁴ம்மேஹி வினா ந வத்ததி, கிம்ஹி தத்த² மனம் நிவேஸயே.

395. ‘‘யதா² ஹரிதாலேன மக்கி²தம், அத்³த³ஸ சித்திகம் பி⁴த்தியா கதம்;

தம்ஹி தே விபரீதத³ஸ்ஸனம், ஸஞ்ஞா மானுஸிகா நிரத்தி²கா.

396. ‘‘மாயம் விய அக்³க³தோ கதம், ஸுபினந்தேவ ஸுவண்ணபாத³பம்;

உபக³ச்ச²ஸி அந்த⁴ ரித்தகம், ஜனமஜ்ஜே²ரிவ ருப்பரூபகம்.

397. ‘‘வட்டனிரிவ கோடரோஹிதா, மஜ்ஜே² புப்³பு³ளகா ஸஅஸ்ஸுகா;

பீளகோளிகா சேத்த² ஜாயதி, விவிதா⁴ சக்கு²விதா⁴ ச பிண்டி³தா.

398. ‘‘உப்பாடிய சாருத³ஸ்ஸனா, ந ச பஜ்ஜித்த² அஸங்க³மானஸா;

ஹந்த³ தே சக்கு²ம் ஹரஸ்ஸு தம், தஸ்ஸ நரஸ்ஸ அதா³ஸி தாவதே³.

399. ‘‘தஸ்ஸ ச விரமாஸி தாவதே³, ராகோ³ தத்த² க²மாபயீ ச நம்;

ஸோத்தி² ஸியா ப்³ரஹ்மசாரினீ, ந புனோ ஏதி³ஸகம் ப⁴விஸ்ஸதி.

400. ‘‘ஆஸாதி³ய ஏதி³ஸம் ஜனம், அக்³கி³ம் பஜ்ஜலிதம்வ லிங்கி³ய;

க³ண்ஹிய ஆஸீவிஸம் விய, அபி நு ஸோத்தி² ஸியா க²மேஹி நோ.

401. ‘‘முத்தா ச ததோ ஸா பி⁴க்கு²னீ, அக³மீ பு³த்³த⁴வரஸ்ஸ ஸந்திகம்;

பஸ்ஸிய வரபுஞ்ஞலக்க²ணம், சக்கு² ஆஸி யதா² புராணக’’ந்தி. –

இமா கா³தா² பச்சுதா³ஹாஸி.

தத்த² ஜீவகம்ப³வனந்தி ஜீவகஸ்ஸ கோமாரப⁴ச்சஸ்ஸ அம்ப³வனம். ரம்மந்தி ரமணீயம். தம் கிர பூ⁴மிபா⁴க³ஸம்பத்தியா சா²யூத³கஸம்பத்தியா ச ருக்கா²னம் ரோபிதாகாரேன அதிவிய மனுஞ்ஞம் மனோரமம். க³ச்ச²ந்திந்தி அம்ப³வனம் உத்³தி³ஸ்ஸ க³தம், தி³வாவிஹாராய உபக³ச்ச²ந்திம். ஸுப⁴ந்தி ஏவம்னாமிகம். து⁴த்தகோதி இத்தி²து⁴த்தோ. ராஜக³ஹவாஸீ கிரேகோ மஹாவிப⁴வஸ்ஸ ஸுவண்ணகாரஸ்ஸ புத்தோ யுவா அபி⁴ரூபோ இத்தி²து⁴த்தோ புரிஸோ மத்தோ விசரதி. ஸோ தம் படிபதே² தி³ஸ்வா படிப³த்³த⁴சித்தோ மக்³க³ம் உபருந்தி⁴த்வா அட்டா²ஸி. தேன வுத்தம் – ‘‘து⁴த்தகோ ஸன்னிவாரேஸீ’’தி, மம க³மனம் நிஸேதே⁴ஸீதி அத்தோ². தமேனம் அப்³ரவீ ஸுபா⁴தி தமேனம் நிவாரேத்வா டி²தம் து⁴த்தம் ஸுபா⁴ பி⁴க்கு²னீ கதே²ஸி. ஏத்த² ச ‘‘க³ச்ச²ந்திம் பி⁴க்கு²னிம் ஸுப⁴ம், அப்³ரவி ஸுபா⁴’’தி ச அத்தானமேவ தே²ரீ அஞ்ஞம் விய கத்வா வத³தி. தே²ரியா வுத்தகா³தா²னம் ஸம்ப³ந்த⁴த³ஸ்ஸனவஸேன ஸங்கீ³திகாரேஹி அயம் கா³தா² வுத்தா.

‘‘அப்³ரவீ ஸுபா⁴’’தி வத்வா தஸ்ஸா வுத்தாகாரத³ஸ்ஸனத்த²ம் ஆஹ ‘‘கிம் தே அபராதி⁴த’’ந்திஆதி³. தத்த² கிம் தே அபராதி⁴தம் மயாதி கிம் துய்ஹம், ஆவுஸோ, மயா அபரத்³த⁴ம். யம் மம் ஓவரியான திட்ட²ஸீதி யேன அபராதே⁴ன மம் க³ச்ச²ந்திம் ஓவரித்வா க³மனம் நிஸேதே⁴த்வா திட்ட²ஸி, ஸோ நத்தே²வாதி அதி⁴ப்பாயோ. அத² இத்தீ²திஸஞ்ஞாய ஏவம் படிபஜ்ஜஸி, ஏவம்பி ந யுத்தந்தி த³ஸ்ஸேந்தீ ஆஹ – ‘‘ந ஹி பப்³ப³ஜிதாய, ஆவுஸோ, புரிஸோ ஸம்பு²ஸனாய கப்பதீ’’தி, ஆவுஸோ ஸுவண்ணகாரபுத்த, லோகியசாரித்தேனபி புரிஸஸ்ஸ பப்³ப³ஜிதானம் ஸம்பு²ஸனாய ந கப்பதி, பப்³ப³ஜிதாய பன புரிஸோ திரச்சா²னக³தோபி ஸம்பு²ஸனாய ந கப்பதி, திட்ட²து தாவ புரிஸபு²ஸனா, ராக³வஸேனஸ்ஸா நிஸ்ஸக்³கி³யேன புரிஸஸ்ஸ நிஸ்ஸக்³கி³யஸ்ஸாபி பு²ஸனா ந கப்பதேவ.

தேனாஹ ‘‘க³ருகே மம ஸத்து²ஸாஸனே’’திஆதி³. தஸ்ஸத்தோ² – க³ருகே பாஸாணச்ச²த்தம் விய க³ருகாதப்³பே³ மய்ஹம் ஸத்து² ஸாஸனே யா ஸிக்கா² பி⁴க்கு²னியோ உத்³தி³ஸ்ஸ ஸுக³தேன ஸம்மாஸம்பு³த்³தே⁴ன தே³ஸிதா பஞ்ஞத்தா. தாஹி பரிஸுத்³த⁴பத³ம் பரிஸுத்³த⁴குஸலகோட்டா²ஸம், ராகா³தி³அங்க³ணானம் ஸப்³ப³ஸோ அபா⁴வேன அனங்க³ணம், ஏவம்பூ⁴தம் மம் க³ச்ச²ந்திம் கேன காரணேன ஆவரித்வா திட்ட²ஸீதி.

ஆவிலசித்தோதி சித்தஸ்ஸ ஆவிலபா⁴வகரானம் காமவிதக்காதீ³னம் வஸேன ஆவிலசித்தோ, த்வம் தத³பா⁴வதோ அனாவிலம், ராக³ரஜாதீ³னம் வஸேன ஸரஜோ, ஸாங்க³ணோ தத³பா⁴வதோ வீதரஜம் அனங்க³ணம் ஸப்³ப³த்த² க²ந்த⁴பஞ்சகே ஸமுச்சே²த³விமுத்தியா விமுத்தமானஸம், மம் கஸ்மா ஓவரித்வா திட்ட²ஸீதி?

ஏவம் தே²ரியா வுத்தே து⁴த்தகோ அத்தனோ அதி⁴ப்பாயம் விபா⁴வேந்தோ ‘‘த³ஹரா சா’’திஆதி³னா த³ஸ கா³தா² அபா⁴ஸி. தத்த² த³ஹராதி தருணீ பட²மே யோப்³ப³னே டி²தா. அபாபிகா சஸீதி ரூபேன அலாமிகா ச அஸி, உத்தமரூபத⁴ரா சாஹோஸீதி அதி⁴ப்பாயோ. கிம் தே பப்³ப³ஜ்ஜா கரிஸ்ஸதீதி துய்ஹம் ஏவம் பட²மவயே டி²தாய ரூபஸம்பன்னாய பப்³ப³ஜ்ஜா கிம் கரிஸ்ஸதி, வுட்³டா⁴ய பீ³ப⁴ச்ச²ரூபாய வா பப்³ப³ஜிதப்³ப³ந்தி அதி⁴ப்பாயேன வத³தி. நிக்கி²பாதி ச²ட்³டே³ஹி. ‘‘உக்கி²பா’’தி வா பாடோ², அபனேஹீதி அத்தோ².

மது⁴ரந்தி ஸுப⁴ம், ஸுக³ந்த⁴ந்தி அத்தோ². பவந்தீதி வாயந்தி. ஸப்³ப³ஸோதி ஸமந்ததோ. குஸுமரஜேன ஸமுட்டி²தா து³மாதி இமே ருக்கா² மந்த³வாதேன ஸமுட்ட²ஹமானகுஸுமரேணுஜாதேன அத்தனோ குஸுமரஜேன ஸயம் ஸமுட்டி²தா விய ஹுத்வா ஸமந்ததோ ஸுரபீ⁴ வாயந்தி. பட²மவஸந்தோ ஸுகோ² உதூதி அயம் பட²மோ வஸந்தமாஸோ ஸுக²ஸம்ப²ஸ்ஸோ ச உது வத்ததீதி அத்தோ².

குஸுமிதஸிக²ராதி ஸுபுப்பி²தக்³கா³. அபி⁴க³ஜ்ஜந்திவ மாலுதேரிதாதி வாதேன ஸஞ்சலிதா அபி⁴க³ஜ்ஜந்திவ அபி⁴த்த²னிதா விய திட்ட²ந்தி. யதி³ ஏகா வனமோக³ஹிஸ்ஸஸீதி ஸசே த்வம் ஏகிகா வனமோகா³ஹிஸ்ஸஸி, கா நாம தே தத்த² ரதி ப⁴விஸ்ஸதீதி அத்தனா ப³த்³த⁴ஸுகா²பி⁴ரத்தத்தா ஏவமாஹ.

வாளமிக³ஸங்க⁴ஸேவிதந்தி ஸீஹப்³யக்³கா⁴தி³வாளமிக³ஸமூஹேஹி தத்த² தத்த² உபஸேவிதம். குஞ்ஜரமத்தகரேணுலோளிதந்தி மத்தகுஞ்ஜரேஹி ஹத்தி²னீஹி ச மிகா³னம் சித்ததாபனேன ருக்க²க³ச்சா²தீ³னம் ஸாகா²ப⁴ஞ்ஜனேன ச ஆலோளிதபதே³ஸம். கிஞ்சாபி தஸ்மிம் வனே ஈதி³ஸம் ததா³ நத்தி², வனம் நாம ஏவரூபந்தி தம் பி⁴ம்ஸாபேதுகாமோ ஏவமாஹ. ரஹிதந்தி ஜனரஹிதம் விஜனம். பி⁴ம்ஸனகந்தி ப⁴யஜனகம்.

தபனீயகதாவ தீ⁴திகாதி ரத்தஸுவண்ணேன விசரிதா தீ⁴தலிகா விய ஸுகுஸலேன யந்தாசரியேன யந்தயோக³வஸேன ஸஜ்ஜிதா ஸுவண்ணபடிமா விய விசரஸி, இதா³னேவ இதோ சிதோ ச ஸஞ்சரஸி. சித்தலதேவ அச்ச²ராதி சித்தலதானாமகே உய்யானே தே³வச்ச²ரா விய. காஸிகஸுகு²மேஹீதி காஸிரட்டே² உப்பன்னேஹி அதிவிய ஸுகு²மேஹி. வக்³கு³பீ⁴தி ஸினித்³த⁴மட்டே²ஹி. ஸோப⁴ஸீ ஸுவஸனேஹி நூபமேதி நிவாஸனபாருபனவத்தே²ஹி அனுபமே உபமாரஹிதே த்வம் இதா³னி மே வஸானுகோ³ ஸோப⁴ஸீதி பா⁴வினம் அத்தனோ அதி⁴ப்பாயவஸேன ஏகந்திகம் வத்தமானம் விய கத்வா வத³தி.

அஹம் தவ வஸானுகோ³ ஸியந்தி அஹம்பி துய்ஹம் வஸானுகோ³ கிம்காரபடிஸ்ஸாவீ ப⁴வேய்யம். யதி³ விஹரேமஸே கானனந்தரேதி யதி³ மயம் உபோ⁴பி வனந்தரே ஸஹ வஸாம ரமாம. ந ஹி மத்தி² தயா பியத்தரோதி வஸானுக³பா⁴வஸ்ஸ காரணமாஹ. பாணோதி ஸத்தோ, அஞ்ஞோ கோசிபி ஸத்தோ தயா பியதரோ மய்ஹம் ந ஹி அத்தீ²தி அத்தோ². அத² வா பாணோதி அத்தனோ ஜீவிதம் ஸந்தா⁴ய வத³தி, மய்ஹம் ஜீவிதம் தயா பியதரம் ந ஹி அத்தீ²தி அத்தோ². கின்னரிமந்த³லோசனேதி கின்னரியா விய மந்த³புது²விலோசனே.

யதி³ மே வசனம் கரிஸ்ஸஸி, ஸுகி²தா ஏஹி அகா³ரமாவஸாதி ஸசே த்வம் மம வசனம் கரிஸ்ஸஸி, ஏகாஸனம் ஏகஸேய்யம் ப்³ரஹ்மசரியது³க்க²ம் பஹாய ஏஹி காமபோ⁴கே³ஹி ஸுகி²தா ஹுத்வா அகா³ரம் அஜ்ஜா²வஸ. ‘‘ஸுகி²தா ஹேதி அகா³ரமாவஸந்தீ’’தி கேசி பட²ந்தி, தேஸம் ஸுகி²தா ப⁴விஸ்ஸதி, அகா³ரம் அஜ்ஜா²வஸந்தீதி அத்தோ². பாஸாத³னிவாதவாஸினீதி நிவாதேஸு பாஸாதே³ஸு வாஸினீ. ‘‘பாஸாத³விமானவாஸினீ’’தி ச பாடோ², விமானஸதி³ஸேஸு பாஸாதே³ஸு வாஸினீதி அத்தோ². பரிகம்மந்தி வேய்யாவச்சம்.

தா⁴ரயாதி பரித³ஹ, நிவாஸேஹி சேவ உத்தரியஞ்ச கரோஹி. அபி⁴ரோபேஹீதி மண்ட³னவிபூ⁴ஸனவஸேன வா ஸரீரம் ஆரோபய, அலங்கரோஹீதி அத்தோ². மாலவண்ணகந்தி மாலஞ்சேவ க³ந்த⁴விலேபனஞ்ச. கஞ்சனமணிமுத்தகந்தி கஞ்சனேன மணிமுத்தாஹி ச யுத்தம், ஸுவண்ணமயமணிமுத்தாஹி க²சிதந்தி அத்தோ². ப³ஹுந்தி ஹத்தூ²பகா³தி³பே⁴த³தோ ப³ஹுப்பகாரம். விவித⁴ந்தி கரணவிகதியா நானாவித⁴ம்.

ஸுதோ⁴தரஜபச்ச²த³ந்தி ஸுதோ⁴ததாய பவாஹிதரஜம் உத்தரச்ச²த³ம். ஸுப⁴ந்தி ஸோப⁴னம். கோ³னகதூலிகஸந்த²தந்தி தீ³க⁴லோமகாளகோஜவேன சேவ ஹம்ஸலோமாதி³புண்ணாய தூலிகாய ச ஸந்த²தம். நவந்தி அபி⁴னவம். மஹாரஹந்தி மஹக்³க⁴ம். சந்த³னமண்டி³தஸாரக³ந்தி⁴கந்தி கோ³ஸீஸகாதி³ஸாரசந்த³னேன மண்டி³ததாய ஸுரபி⁴க³ந்தி⁴கம், ஏவரூபம் ஸயனமாருஹ, தம் ஆருஹித்வா யதா²ஸுக²ம் ஸயாஹி சேவ நிஸீத³ சாதி அத்தோ².

உப்பலம் சுத³கா ஸமுக்³க³தந்தி ச-காரோ நிபாதமத்தம், உத³கதோ உக்³க³தம் உட்டி²தம் அச்சுக்³க³ம்ம டி²தம் ஸுபு²ல்லமுப்பலம். யதா² தம் அமனுஸ்ஸஸேவிதந்தி தஞ்ச ரக்க²ஸபரிக்³க³ஹிதாய போக்க²ரணியா ஜாதத்தா நிம்மனுஸ்ஸேஹி ஸேவிதம் கேனசி அபரிபு⁴த்தமேவ ப⁴வேய்ய. ஏவம் த்வம் ப்³ரஹ்மசாரினீதி ஏவமேவ தம் ஸுட்டு² பு²ல்லமுப்பலம் விய துவம் ப்³ரஹ்மசாரினீ. ஸகேஸங்கே³ஸு அத்தனோ ஸரீராவயவேஸு கேனசி அபரிபு⁴த்தேஸுயேவ ஜரம் க³மிஸ்ஸஸி, முதா⁴யேவ ஜராஜிண்ணா ப⁴விஸ்ஸஸி.

ஏவம் து⁴த்தகேன அத்தனோ அதி⁴ப்பாயே பகாஸிதே தே²ரீ ஸரீரஸபா⁴வவிபா⁴வனேன தம் தத்த² விச்சி²ந்தே³ந்தீ ‘‘கிம் தே இதா⁴’’தி கா³த²மாஹ. தஸ்ஸத்தோ² – ஆவுஸோ ஸுவண்ணகாரபுத்த, கேஸாதி³குணபபூரே ஏகந்தேன பே⁴த³னத⁴ம்மே ஸுஸானவட்³ட⁴னே, இத⁴ இமஸ்மிம் காயஸஞ்ஞிதே அஸுசிகளேவரே கிம் நாம தவ ஸாரந்தி ஸம்மதம் ஸம்பா⁴விதம், யம் தி³ஸ்வா விமனோ அஞ்ஞதரஸ்மிம் ஆரம்மணே விக³தமனஸங்கப்போ, ஏத்தே²வ வா அவிமனோ ஸோமனஸ்ஸிகோ ஹுத்வா உதி³க்க²ஸி, தம் மய்ஹம் கதே²ஹீதி.

தம் ஸுத்வா து⁴த்தகோ கிஞ்சாபி தஸ்ஸா ரூபம் சாதுரியஸோபி⁴தம், பட²மத³ஸ்ஸனதோ பன பட்டா²ய யஸ்மிம் தி³ட்டி²பாதே படிப³த்³த⁴சித்தோ, தமேவ அபதி³ஸந்தோ ‘‘அக்கீ²னி ச தூரியாரிவா’’திஆதி³மாஹ. காமஞ்சாயம் தே²ரீ ஸுட்டு² ஸம்யததாய ஸந்திந்த்³ரியா, தாய தி²ரவிப்பஸன்னஸோம்மஸந்தனயனனிபாதேஸு கம்மானுபா⁴வனிப்ப²ன்னேஸு பஸன்னபஞ்சப்பஸாத³படிமண்டி³தேஸு நயனேஸு லப்³ப⁴மானே பபா⁴விஸிட்ட²சாதுரியே தி³ட்டி²பாதே, யஸ்மா ஸயம் சரிதஹாவபா⁴வவிலாஸாதி³பரிகப்பவஞ்சிதோ ஸோ து⁴த்தோ ஜாதோ, தஸ்மாஸ்ஸ தி³ட்டி²ராகோ³ ஸவிஸேஸம் வேபுல்லம் அக³மாஸி. தத்த² அக்கீ²னி ச தூரியாரிவாதி தூரி வுச்சதி மிகீ³, ச-ஸத்³தோ³ நிபாதமத்தம், மிக³ச்சா²பாய விய தே அக்கீ²னீதி அத்தோ². ‘‘கோரியாரிவா’’தி வா பாளி, குஞ்சகாரகுக்குடியாதி வுத்தம் ஹோதி. கின்னரியாரிவ பப்³ப³தந்தரேதி பப்³ப³தகுச்சி²யம் விசரமானாய கின்னரிவனிதாய விய ச தே அக்கீ²னீதி அத்தோ². தவ மே நயனானி த³க்கி²யாதி தவ வுத்தகு³ணவிஸேஸானி நயனானி தி³ஸ்வா, பி⁴ய்யோ உபரூபரி மே காமாபி⁴ரதி பவட்³ட⁴தி.

உப்பலஸிக²ரோபமானி தேதி ரத்துப்பலஅக்³க³ஸதி³ஸானி பம்ஹானி தவ. விமலேதி நிம்மலே. ஹாடகஸன்னிபே⁴தி கஞ்சனரூபகஸ்ஸ முக²ஸதி³ஸே தே முகே², நயனானி த³க்கி²யாதி யோஜனா.

அபி தூ³ரக³தாதி தூ³ரம் டா²னம் க³தாபி. ஸரம்ஹஸேதி அஞ்ஞம் கிஞ்சி அசிந்தேத்வா தவ நயனானி ஏவ அனுஸ்ஸராமி. ஆயதபம்ஹேதி தீ³க⁴பகு²மே. விஸுத்³த⁴த³ஸ்ஸனேதி நிம்மலலோசனே. ந ஹி மத்தி² தயா பியத்தரோ நயனாதி தவ நயனதோ அஞ்ஞோ கோசி மய்ஹம் பியதரோ நத்தி². தயாதி ஹி ஸாமிஅத்தே² ஏவ கரணவசனம்.

ஏவம் சக்கு²ஸம்பத்தியா உம்மாதி³தஸ்ஸ விய தம் தம் விப்பலபதோ தஸ்ஸ புரிஸஸ்ஸ மனோரத²ம் விபரிவத்தேந்தீ தே²ரீ ‘‘அபதே²னா’’திஆதி³னா த்³வாத³ஸ கா³தா² அபா⁴ஸி. தத்த² அபதே²ன பயாதுமிச்ச²ஸீதி, ஆவுஸோ ஸுவண்ணகாரபுத்த, ஸந்தே அஞ்ஞஸ்மிம் இத்தி²ஜனே யோ த்வம் பு³த்³த⁴ஸுதம் பு³த்³த⁴ஸ்ஸ ப⁴க³வதோ ஓரஸதீ⁴தரம் மம் மக்³க³யஸி பத்தே²ஸி, ஸோ த்வம் ஸந்தே கே²மே உஜுமக்³கே³ அபதே²ன கண்டகனிவுதேன ஸப⁴யேன கும்மக்³கே³ன பயாதுமிச்ச²ஸி படிபஜ்ஜிதுகாமோஸி, சந்த³ம் கீளனகம் க³வேஸஸி சந்த³மண்ட³லம் கீளாகோ³ளகம் காதுகாமோஸி, மேரும் லங்கே⁴துமிச்ச²ஸி சதுராஸீதியோஜனஸஹஸ்ஸுப்³பே³த⁴ம் ஸினேருபப்³ப³தராஜம் லங்க⁴யித்வா அபரபா⁴கே³ டா²துகாமோஸி, ஸோ த்வம் மம் பு³த்³த⁴ஸுதம் மக்³க³யஸீதி யோஜனா.

இதா³னி தஸ்ஸ அத்தனோ அவிஸயபா⁴வம் பத்த²னாய ச விகா⁴தாவஹதம் த³ஸ்ஸேதும் ‘‘நத்தீ²’’திஆதி³ வுத்தம். தத்த² ராகோ³ யத்த²பி தா³னி மே ஸியாதி யத்த² இதா³னி மே ராகோ³ ஸியா ப⁴வேய்ய, தம் ஆரம்மணம் ஸதே³வகே லோகே நத்தி² ஏவ. நபி நம் ஜானாமி கீரிஸோதி நம் ராக³ம் கீரிஸோதிபி ந ஜானாமி. அத² மக்³கே³ன ஹதோ ஸமூலகோதி அதா²தி நிபாதமத்தம். அயோனிஸோமனஸிகாரஸங்கா²தேன மூலேன ஸமூலகோ ராகோ³ அரியமக்³கே³ன ஹதோ ஸமுக்³கா⁴திதோ.

இங்கா³லகுயாதி அங்கா³ரகாஸுயா. உஜ்ஜி²தோதி வாதுக்கி²த்தோ விய யோ கோசி, த³ஹனியா இந்த⁴னம் வியாதி அத்தோ². விஸபத்தோரிவாதி விஸக³தபா⁴ஜனம் விய. அக்³கி³தோ கதோதி அக்³கி³தோ அங்கா³ரதோ அபக³தோ கதோ, விஸஸ்ஸ லேஸம்பி அஸேஸேத்வா அபனீதோ வினாஸிதோதி அத்தோ².

யஸ்ஸா ஸியா அபச்சவேக்கி²தந்தி யஸ்ஸா இத்தி²யா இத³ம் க²ந்த⁴பஞ்சகம் ஞாணேன அப்படிவேக்கி²தம் அபரிஞ்ஞாதம் ஸியா. ஸத்தா வா அனுஸாஸிதோ ஸியாதி ஸத்தா வா த⁴ம்மஸரீரஸ்ஸ அத³ஸ்ஸனேன யஸ்ஸா இத்தி²யா அனனுஸாஸிதோ ஸியா. த்வம் தாதி³ஸிகம் பலோப⁴யாதி, ஆவுஸோ, த்வம் ததா²ரூபம் அபரிமத்³தி³தஸங்கா²ரம் அபச்சவேக்கி²தலோகுத்தரத⁴ம்மம் காமேஹி பலோப⁴ய உபக³ச்ச². ஜானந்திம் ஸோ இமம் விஹஞ்ஞஸீதி ஸோ த்வம் பவத்திம் நிவத்திஞ்ச யாதா²வதோ ஜானந்திம் படிவித்³த⁴ஸச்சம் இமம் ஸுப⁴ம் பி⁴க்கு²னிம் ஆக³ம்ம விஹஞ்ஞஸி, ஸம்பதி ஆயதிஞ்ச விகா⁴தம் து³க்க²ம் ஆபஜ்ஜஸி.

இதா³னிஸ்ஸ விகா⁴தாபத்திதம் காரணவிபா⁴வனேன த³ஸ்ஸேந்தீ ‘‘மய்ஹம் ஹீ’’திஆதி³மாஹ. தத்த² ஹீதி ஹேதுஅத்தே² நிபாதோ. அக்குட்ட²வந்தி³தேதி அக்கோஸே வந்த³னாய ச. ஸுக²து³க்கே²தி ஸுகே² ச து³க்கே² ச, இட்டா²னிட்ட²விஸயஸமாயோகே³ வா. ஸதீ உபட்டி²தாதி பச்சவேக்க²ணயுத்தா ஸதி ஸப்³ப³காலம் உபட்டி²தா. ஸங்க²தமஸுப⁴ந்தி ஜானியாதி தேபூ⁴மகம் ஸங்கா²ரக³தம் கிலேஸாஸுசிபக்³க⁴ரணேன அஸுப⁴ந்தி ஞத்வா. ஸப்³ப³த்தே²வாதி ஸப்³ப³ஸ்மிம்யேவ ப⁴வத்தயே மய்ஹம் மனோ தண்ஹாலேபாதி³னா ந உபலிம்பதி.

மக்³க³ட்ட²ங்கி³கயானயாயினீதி அட்ட²ங்கி³கமக்³க³ஸங்கா²தேன அரியயானேன நிப்³பா³னபுரம் யாயினீ உபக³தா. உத்³த⁴டஸல்லாதி அத்தனோ ஸந்தானதோ ஸமுத்³த⁴டராகா³தி³ஸல்லா.

ஸுசித்திதாதி ஹத்த²பாத³முகா²தி³ஆகாரேன ஸுட்டு² சித்திதா விரசிதா. ஸோம்பா⁴தி ஸும்ப⁴கா. தா³ருகபில்லகானி வாதி தா³ருத³ண்டா³தீ³ஹி உபரசிதரூபகானி. தந்தீஹீதி ந்ஹாருஸுத்தகேஹி. கீ²லகேஹீதி ஹத்த²பாத³பிட்டி²கண்ணாதி³அத்தா²ய ட²பிதத³ண்டே³ஹி. வினிப³த்³தா⁴தி விவிதே⁴னாகாரேன ப³த்³தா⁴. விவித⁴ம் பனச்சகாதி யந்தஸுத்தாதீ³னம் அஞ்ச²னவிஸ்ஸஜ்ஜனாதி³னா பட்ட²பிதனச்சகா, பனச்சந்தா விய தி³ட்டா²தி யோஜனா.

தம்ஹுத்³த⁴டே தந்திகீ²லகேதி ஸன்னிவேஸவிஸிட்ட²ரசனாவிஸேஸயுத்தம் உபாதா³ய ரூபகஸமஞ்ஞா தம்ஹி தந்திம்ஹி கீ²லகே ச டா²னதோ உத்³த⁴டே ப³ந்த⁴ந்தோ விஸ்ஸட்டே², விஸும் கரணேன அஞ்ஞமஞ்ஞம் விகலே, தஹிம் தஹிம் கி²பனேன பரிக்ரிதே விகிரிதே. ந விந்தே³ய்ய க²ண்ட³ஸோ கதேதி போத்த²கரூபஸ்ஸ அவயவே க²ண்டா³க²ண்டி³தே கதே போத்த²கரூபம் ந விந்தே³ய்ய, ந உபலபே⁴ய்ய. ஏவம் ஸந்தே கிம்ஹி தத்த² மனம் நிவேஸயே தஸ்மிம் போத்த²கரூபாவயவே கிம்ஹி கிம் கா²ணுகே, உதா³ஹு ரஜ்ஜுகே, மத்திகாபிண்டா³தி³கே வா மனம் மனஸஞ்ஞம் நிவேஸேய்ய, விஸங்கா²ரே அவயவே ஸா ஸஞ்ஞா கதா³சிபி நபதேய்யாதி அத்தோ².

ததூ²பமாதி தம்ஸதி³ஸா தேன போத்த²கரூபேன ஸதி³ஸா. கிந்தி சே ஆஹ ‘‘தே³ஹகானீ’’திஆதி³. தத்த² தே³ஹகானீதி ஹத்த²பாத³முகா²தி³தே³ஹாவயவா. மந்தி மே படிப³த்³தா⁴ உபட்ட²ஹந்தி. தேஹி த⁴ம்மேஹீதி தேஹி பத²விஆதீ³ஹி ச சக்கா²தீ³ஹி ச த⁴ம்மேஹி. வினா ந வத்தந்தீதி ந ஹி ததா² ததா² ஸன்னிவிட்டே² பத²விஆதி³த⁴ம்மே முஞ்சித்வா தே³ஹா நாம ஸந்தி. த⁴ம்மேஹி வினா ந வத்ததீதி தே³ஹோ அவயவேஹி அவயவத⁴ம்மேஹி வினா ந வத்ததி ந உபலப்³ப⁴தி. ஏவம் ஸந்தே கிம்ஹி தத்த² மனம் நிவேஸயேதி கிம்ஹி கிம் பத²வியம், உதா³ஹு ஆபாதி³கே தே³ஹோதி வா ஹத்த²பாதா³தீ³னீதி வா மனம் மனஸஞ்ஞம் நிவேஸேய்ய. யஸ்மா பத²விஆதி³பஸாத³த⁴ம்மமத்தே ஏஸா ஸமஞ்ஞா, யதி³த³ம் தே³ஹோதி வா ஹத்த²பாதா³தீ³னீதி வா ஸத்தோதி வா இத்தீ²தி வா புரிஸோதி வா, தஸ்மா ந ஏத்த² ஜானதோ கோசி அபி⁴னிவேஸோ ஹோதீதி.

யதா² ஹரிதாலேன மக்கி²தம், அத்³த³ஸ சித்திகம் பி⁴த்தியா கதந்தி யதா² குஸலேன சித்தகாரேன பி⁴த்தியம் ஹரிதாலேன மக்கி²தம் லித்தம் தேன லேபம் த³த்வா கதம் ஆலிகி²தம் சித்திகம் இத்தி²ரூபம் அத்³த³ஸ பஸ்ஸேய்ய. தத்த² யா உபத²ம்ப⁴னகே²பனாதி³கிரியாஸம்பத்தியா மானுஸிகா நு கோ² அயம் பி⁴த்தி அபஸ்ஸாய டி²தாதி ஸஞ்ஞா, ஸா நிரத்த²கா மனுஸ்ஸபா⁴வஸங்கா²தஸ்ஸ அத்த²ஸ்ஸ தத்த² அபா⁴வதோ, மானுஸீதி பன கேவலம் தஹிம் தஸ்ஸ ச விபரீதத³ஸ்ஸனம், யாதா²வதோ க³ஹணம் ந ஹோதி, த⁴ம்மபுஞ்ஜமத்தே இத்தி²புரிஸாதி³க³ஹணம்பி ஏவம் ஸம்பத³மித³ம் த³ட்ட²ப்³ப³ந்தி அதி⁴ப்பாயோ.

மாயம் விய அக்³க³தோ கதந்தி மாயாகாரேன புரதோ உபட்டா²பிதம் மாயாஸதி³ஸம். ஸுபினந்தேவ ஸுவண்ணபாத³பந்தி ஸுபினமேவ ஸுபினந்தம், தத்த² உபட்டி²தஸுவண்ணமயருக்க²ம் விய. உபக³ச்ச²ஸி அந்த⁴ ரித்தகந்தி அந்த⁴பா³ல ரித்தகம் துச்ச²கம் அந்தோஸாரரஹிதம் இமம் அத்தபா⁴வம் ‘‘ஏதம் மமா’’தி ஸாரவந்தம் விய உபக³ச்ச²ஸி அபி⁴னிவிஸஸி. ஜனமஜ்ஜே²ரிவ ருப்பரூபகந்தி மாயாகாரேன மஹாஜனமஜ்ஜே² த³ஸ்ஸிதம் ரூபியரூபஸதி³ஸம் ஸாரம் விய உபட்ட²ஹந்தம், அஸாரந்தி அத்தோ².

வட்டனிரிவாதி லாகா²ய கு³ளிகா விய. கோடரோஹிதாதி கோடரே ருக்க²ஸுஸிரே ட²பிதா. மஜ்ஜே² புப்³பு³ளகாதி அக்கி²த³லமஜ்ஜே² டி²தஜலபுப்³பு³ளஸதி³ஸா. ஸஅஸ்ஸுகாதி அஸ்ஸுஜலஸஹிதா. பீளகோளிகாதி அக்கி²கூ³த²கோ. ஏத்த² ஜாயதீதி ஏதஸ்மிம் அக்கி²மண்ட³லே உபோ⁴ஸு கோடீஸு விஸக³ந்த⁴ம் வாயந்தோ நிப்³ப³த்ததி. பீளகோளிகாதி வா அக்கி²த³லேஸு நிப்³ப³த்தனகா பீளகா வுச்சதி. விவிதா⁴தி ஸேதனீலமண்ட³லானஞ்சேவ ரத்தபீதாதீ³னம் ஸத்தன்னம் படலானஞ்ச வஸேன அனேகவிதா⁴. சக்கு²விதா⁴தி சக்கு²பா⁴கா³ சக்கு²ப்பகாரா வா தஸ்ஸ அனேககலாபக³தபா⁴வதோ. பிண்டி³தாதி ஸமுதி³தா.

ஏவம் சக்கு²ஸ்மிம் ஸாரஜ்ஜந்தஸ்ஸ சக்கு²னோ அஸுப⁴தம் அனவட்டி²ததாய அனிச்சதஞ்ச விபா⁴வேஸி. விபா⁴வேத்வா ச யதா² நாம கோசி லோப⁴னீயம் ப⁴ண்ட³ம் க³ஹேத்வா சோரகந்தாரம் படிபஜ்ஜந்தோ சோரேஹி பலிபு³த்³தோ⁴ தம் லோப⁴னீயப⁴ண்ட³ம் த³த்வா க³ச்ச²தி, ஏவமேவ சக்கு²ம்ஹி ஸாரத்தேன தேன புரிஸேன பலிபு³த்³தா⁴ தே²ரீ அத்தனோ சக்கு²ம் உப்பாடேத்வா தஸ்ஸ அதா³ஸி. தேன வுத்தம் ‘‘உப்பாடிய சாருத³ஸ்ஸனா’’திஆதி³. தத்த² உப்பாடியாதி உப்பாடேத்வா சக்கு²கூபதோ நீஹரித்வா. சாருத³ஸ்ஸனாதி பியத³ஸ்ஸனா மனோஹரத³ஸ்ஸனா. ந ச பஜ்ஜித்தா²தி தஸ்மிம் சக்கு²ஸ்மிம் ஸங்க³ம் நாபஜ்ஜி. அஸங்க³மானஸாதி கத்த²சிபி ஆரம்மணே அனாஸத்தசித்தா. ஹந்த³ தே சக்கு²ந்தி தயா காமிதம் ததோ ஏவ மயா தி³ன்னத்தா தே சக்கு²ஸஞ்ஞிதம் அஸுசிபிண்ட³ம் க³ண்ஹ, க³ஹேத்வா ஹரஸ்ஸு பஸாத³யுத்தம் இச்சி²தம் டா²னம் நேஹி.

தஸ்ஸ ச விரமாஸி தாவதே³தி தஸ்ஸ து⁴த்தபுரிஸஸ்ஸ தாவதே³வ அக்கி²ம்ஹி உப்பாடிதக்க²ணே ஏவ ராகோ³ விக³ச்சி². தத்தா²தி அக்கி²ம்ஹி, தஸ்ஸம் வா தே²ரியம். அத² வா தத்தா²தி தஸ்மிம்யேவ டா²னே. க²மாபயீதி க²மாபேஸி. ஸோத்தி² ஸியா ப்³ரஹ்மசாரினீதி ஸேட்ட²சாரினி மஹேஸிகே துய்ஹம் ஆரோக்³யமேவ ப⁴வேய்ய. ந புனோ ஏதி³ஸகம் ப⁴விஸ்ஸதீதி இதோ பரம் ஏவரூபம் அனாசாரசரணம் ந ப⁴விஸ்ஸதி, ந கரிஸ்ஸாமீதி அத்தோ².

ஆஸாதி³யாதி க⁴ட்டேத்வா. ஏதி³ஸந்தி ஏவரூபம் ஸப்³ப³த்த² வீதராக³ம். அக்³கி³ம் பஜ்ஜலிதம்வ லிங்கி³யாதி பஜ்ஜலிதம் அக்³கி³ம் ஆலிங்கே³த்வா விய.

ததோதி தஸ்மா து⁴த்தபுரிஸா. ஸா பி⁴க்கு²னீதி ஸா ஸுபா⁴ பி⁴க்கு²னீ. அக³மீ பு³த்³த⁴வரஸ்ஸ ஸந்திகந்தி ஸம்மாஸம்பு³த்³த⁴ஸ்ஸ ஸந்திகம் உபக³ச்சி² உபஸங்கமி. பஸ்ஸிய வரபுஞ்ஞலக்க²ணந்தி உத்தமேஹி புஞ்ஞஸம்பா⁴ரேஹி நிப்³ப³த்தமஹாபுரிஸலக்க²ணம் தி³ஸ்வா. யதா² புராணகந்தி போராணம் விய உப்பாடனதோ புப்³பே³ விய சக்கு² படிபாகதிகம் அஹோஸி. யமேத்த² அந்தரந்தரா ந வுத்தம், தம் வுத்தனயத்தா ஸுவிஞ்ஞேய்யமேவ.

ஸுபா⁴ஜீவகம்ப³வனிகாதே²ரீகா³தா²வண்ணனா நிட்டி²தா.

திம்ஸனிபாதவண்ணனா நிட்டி²தா.