2. முத்தாதே²ரீகா³தா²வண்ணனா

2. ‘‘முத்தே முச்சஸ்ஸு யோகே³ஹி, சந்தோ³ ராஹுக்³க³ஹா இவ;

விப்பமுத்தேன சித்தேன, அனணா பு⁴ஞ்ஜ பிண்ட³க’’ந்தி. –

அயம் முத்தாய நாம ஸிக்க²மானாய கா³தா². அயம்பி புரிமபு³த்³தே⁴ஸு கதாதி⁴காரா தத்த² தத்த² ப⁴வே விவட்டூபனிஸ்ஸயம் குஸலம் உபசினந்தீ விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதம் பத்வா ஏகதி³வஸம் ஸத்தா²ரம் ரதி²யம் க³ச்ச²ந்தம் தி³ஸ்வா பஸன்னமானஸா பஞ்சபதிட்டி²தேன வந்தி³த்வா பீதிவேகே³ன ஸத்து² பாத³மூலே அவகுஜ்ஜா நிபஜ்ஜி. ஸா தேன புஞ்ஞகம்மேன தே³வலோகே நிப்³ப³த்தித்வா அபராபரம் ஸுக³தீஸுயேவ ஸம்ஸரந்தீ இமஸ்மிம் பு³த்³து⁴ப்பாதே³ ஸாவத்தி²யம் ப்³ராஹ்மணமஹாஸாலகுலே நிப்³ப³த்தி, முத்தாதிஸ்ஸா நாமம் அஹோஸி. ஸா உபனிஸ்ஸயஸம்பன்னதாய வீஸதிவஸ்ஸகாலே மஹாபஜாபதிகோ³தமியா ஸந்திகே பப்³ப³ஜித்வா ஸிக்க²மானாவ ஹுத்வா கம்மட்டா²னம் கதா²பேத்வா விபஸ்ஸனாய கம்மம் கரோதி. ஸா ஏகதி³வஸம் ப⁴த்தகிச்சம் கத்வா பிண்ட³பாதபடிக்கந்தா தே²ரீனம் பி⁴க்கு²னீனம் வத்தம் த³ஸ்ஸேத்வா தி³வாட்டா²னம் க³ந்த்வா ரஹோ நிஸின்னா விபஸ்ஸனாய மனஸிகாரம் ஆரபி⁴. ஸத்தா² ஸுரபி⁴க³ந்த⁴குடியா நிஸின்னோவ ஓபா⁴ஸம் விஸ்ஸஜ்ஜேத்வா தஸ்ஸா புரதோ நிஸின்னோ விய அத்தானம் த³ஸ்ஸேத்வா ‘‘முத்தே முச்சஸ்ஸு யோகே³ஹீ’’தி இமம் கா³த²மாஹ.

தத்த² முத்தேதி தஸ்ஸா ஆலபனம். முச்சஸ்ஸு யோகே³ஹீதி மக்³க³படிபாடியா காமயோகா³தீ³ஹி சதூஹி யோகே³ஹி முச்ச, தேஹி விமுத்தசித்தா ஹோஹி. யதா² கிம்? சந்தோ³ ராஹுக்³க³ஹா இவாதி ராஹுஸங்கா²தோ க³ஹதோ சந்தோ³ விய உபக்கிலேஸதோ முச்சஸ்ஸு. விப்பமுத்தேன சித்தேனாதி அரியமக்³கே³ன ஸமுச்சே²த³விமுத்தியா ஸுட்டு² விமுத்தேன சித்தேன, இத்த²ம் பூ⁴தலக்க²ணே சேதம் கரணவசனம். அனணா பு⁴ஞ்ஜ பிண்ட³கந்தி கிலேஸஇணம் பஹாய அனணா ஹுத்வா ரட்ட²பிண்ட³ம் பு⁴ஞ்ஜேய்யாஸி. யோ ஹி கிலேஸே அப்பஹாய ஸத்தா²ரா அனுஞ்ஞாதபச்சயே பரிபு⁴ஞ்ஜதி, ஸோ ஸாணோ பரிபு⁴ஞ்ஜதி நாம. யதா²ஹ ஆயஸ்மா பா³குலோ – ‘‘ஸத்தாஹமேவ கோ² அஹம், ஆவுஸோ, ஸாணோ ரட்ட²பிண்ட³ம் பு⁴ஞ்ஜி’’ந்தி (ம. நி. 3.211). தஸ்மா ஸாஸனே பப்³ப³ஜிதேன காமச்ச²ந்தா³தி³இணம் பஹானாய அனணேன ஹுத்வா ஸத்³தா⁴தே³ய்யம் பரிபு⁴ஞ்ஜிதப்³ப³ம். பிண்ட³கந்தி தே³ஸனாஸீஸமேவ, சத்தாரோபி பச்சயேதி அத்தோ². அபி⁴ண்ஹம் ஓவத³தீதி அரியமக்³க³ப்பத்தியா உபக்கிலேஸே விஸோதே⁴ந்தோ ப³ஹுஸோ ஓவாத³ம் தே³தி.

ஸா தஸ்மிம் ஓவாதே³ ட²த்வா நசிரஸ்ஸேவ அரஹத்தம் பாபுணி. தேன வுத்தம் அபதா³னே (அப. தே²ரீ 2.1.31-36) –

‘‘விபஸ்ஸிஸ்ஸ ப⁴க³வதோ, லோகஜேட்ட²ஸ்ஸ தாதி³னோ;

ரதி²யம் படிபன்னஸ்ஸ, தாரயந்தஸ்ஸ பாணினோ.

‘‘க⁴ரதோ நிக்க²மித்வான, அவகுஜ்ஜா நிபஜ்ஜஹம்;

அனுகம்பகோ லோகனாதோ², ஸிரஸி அக்கமீ மம.

‘‘அக்கமித்வான ஸிரஸி, அக³மா லோகனாயகோ;

தேன சித்தப்பஸாதே³ன, துஸிதம் அக³மாஸஹம்.

‘‘கிலேஸா ஜா²பிதா மய்ஹம்…பே… கதம் பு³த்³த⁴ஸ்ஸ ஸாஸன’’ந்தி.

அரஹத்தம் பன பத்வா ஸா தமேவ கா³த²ம் உதா³னேஸி. பரிபுண்ணஸிக்கா² உபஸம்பஜ்ஜித்வா அபரபா⁴கே³ பரினிப்³பா³னகாலேபி தமேவ கா³த²ம் பச்சபா⁴ஸீதி.

முத்தாதே²ரீகா³தா²வண்ணனா நிட்டி²தா.