11. ந்ஹாதகமுனித்தே²ரகா³தா²வண்ணனா

வாதரோகா³பி⁴னீதோதிஆதி³கா ஆயஸ்மதோ ந்ஹாதகமுனிஸ்ஸ கா³தா². கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே புஞ்ஞானி உபசினித்வா இமஸ்மிம் பு³த்³து⁴ப்பாதே³ ராஜக³ஹே ப்³ராஹ்மணகுலே நிப்³ப³த்தித்வா வயப்பத்தோ விஜ்ஜாட்டா²னாதீ³ஸு நிப்ப²த்திம் க³தோ ந்ஹாதகலக்க²ணயோகே³ன ந்ஹாதகோதி பஞ்ஞாயித்த². ஸோ தாபஸபப்³ப³ஜ்ஜம் பப்³ப³ஜித்வா ராஜக³ஹஸ்ஸ தியோஜனப்பமாணே டா²னே அரஞ்ஞாயதனே நீவாரேஹி யாபேந்தோ அக்³கி³ம் பரிசாரயமானோ வஸதி. தஸ்ஸ ஸத்தா² க⁴டே விய பதீ³பம் ஹத³யப்³ப⁴ந்தரே பஜ்ஜலந்தம் அரஹத்தூபனிஸ்ஸயம் தி³ஸ்வா அஸ்ஸமபத³ம் அக³மாஸி. ஸோ ப⁴க³வந்தம் தி³ஸ்வா ஹட்ட²துட்டோ² அத்தனோ உபகப்பனனியாமேன ஆஹாரம் உபனேஸி. தம் ப⁴க³வா பரிபு⁴ஞ்ஜி. ஏவம் தயோ தி³வஸே த³த்வா சதுத்த²தி³வஸே ‘‘ப⁴க³வா தும்ஹே பரமஸுகு²மாலா, கத²ம் இமினா ஆஹாரேன யாபேதா²’’தி ஆஹ. தஸ்ஸ ஸத்தா² அரியஸந்தோஸகு³ணம் பகாஸேந்தோ த⁴ம்மம் தே³ஸேஸி. தாபஸோ தம் ஸுத்வா ஸோதாபன்னோ ஹுத்வா பப்³ப³ஜித்வா அரஹத்தம் பாபுணி. ப⁴க³வா தம் அரஹத்தே பதிட்ட²பேத்வா க³தோ. ஸோ பன தத்தே²வ விஹரந்தோ அபரபா⁴கே³ வாதாபா³தே⁴ன உபத்³து³தோ அஹோஸி. ஸத்தா² தத்த² க³ந்த்வா படிஸந்தா²ரமுகே²ன தஸ்ஸ விஹாரம் புச்ச²ந்தோ –

435. ‘‘வாதரோகா³பி⁴னீதோ த்வம், விஹரம் கானனே வனே;

பவித்³த⁴கோ³சரே லூகே², கத²ம் பி⁴க்கு² கரிஸ்ஸஸீ’’தி. – கா³த²மாஹ; அத² தே²ரோ –

436. ‘‘பீதிஸுகே²ன விபுலேன, ப²ரித்வான ஸமுஸ்ஸயம்;

லூக²ம்பி அபி⁴ஸம்போ⁴ந்தோ, விஹரிஸ்ஸாமி கானனே.

437. ‘‘பா⁴வேந்தோ ஸத்த போ³ஜ்ஜ²ங்கே³, இந்த்³ரியானி ப³லானி ச;

ஜா²னஸோகு²ம்மஸம்பன்னோ, விஹரிஸ்ஸம் அனாஸவோ.

438. ‘‘விப்பமுத்தம் கிலேஸேஹி, ஸுத்³த⁴சித்தம் அனாவிலம்;

அபி⁴ண்ஹம் பச்சவேக்க²ந்தோ, விஹரிஸ்ஸம் அனாஸவோ.

439. ‘‘அஜ்ஜ²த்தஞ்ச ப³ஹித்³தா⁴ ச, யே மே விஜ்ஜிம்ஸு ஆஸவா;

ஸப்³பே³ அஸேஸா உச்சி²ன்னா, ந ச உப்பஜ்ஜரே புன.

440. ‘‘பஞ்சக்க²ந்தா⁴ பரிஞ்ஞாதா, திட்ட²ந்தி சி²ன்னமூலகா;

து³க்க²க்க²யோ அனுப்பத்தோ, நத்தி² தா³னி புனப்³ப⁴வோ’’தி. –

இமாஹி ஸேஸகா³தா²ஹி அத்தனோ விஹாரம் ஸத்து² பவேதே³ஸி.

தத்த² ஜா²னஸோகு²ம்மஸம்பன்னோதி ஜா²னஸுகு²மபா⁴வேன ஸமன்னாக³தோ. ஜா²னஸுகு²மம் நாம அரூபஜ்ஜா²னம், தஸ்மா அட்ட²ஸமாபத்திலாபி⁴ம்ஹீதி வுத்தம் ஹோதி. தேன அத்தனோ உப⁴தோபா⁴க³விமுத்திதம் த³ஸ்ஸேதி. அபரே பனாஹு – ‘‘ஸோகு²ம்மந்தி அக்³க³மக்³க³ப²லேஸு அதி⁴பஞ்ஞாஸிக்கா² அதி⁴ப்பேதா, ததோ ஜா²னக்³க³ஹணேன அத்தனோ உப⁴தோபா⁴க³விமுத்திதம் விபா⁴வேதீ’’தி. விப்பமுத்தம் கிலேஸேஹீதி படிப்பஸ்ஸத்³தி⁴விமுத்தியா ஸப்³ப³கிலேஸேஹி விமுத்தம், ததோ ஏவ ஸுத்³த⁴சித்தம், அனாவிலஸங்கப்பதாய அனாவிலம், தீஹிபி பதே³ஹி அரஹத்தப²லசித்தமேவ வத³தி. ஸேஸம் ஹேட்டா² வுத்தனயமேவ. இமமேவ ச தே²ரஸ்ஸ அஞ்ஞாப்³யாகரணம் அஹோஸீதி.

ந்ஹாதகமுனித்தே²ரகா³தா²வண்ணனா நிட்டி²தா.